Luke 12
12
1မေနယ့်လော့် ရာခန့်ဟဉ်း(မ်)စောင့်ယေရှု ကွန်းဟိန်ပိုင်းပွန့်နမ်ညော့ ကော်နိမ်တောင်းကော်နိမ်န နောင်သရေစပ်ဟင်းကော် ထီန်ဟင်းမားဝိုက်။ မွန်းစောင့်ကော့် အောင်းတပဲ့မွန်းလေ "ဖာရိရှဲလေန နောင်တဆေးညော့ အောင်းယောင်ဆောင်ကွန်းနီးလေ ဟေအလေးဆီ ဆန့်ကျင်ဟင်း။ 2ကွန်းမောင်းဖောင်လ အောင်းမနော်ဟေအောင်းမနီးလေ စန်လောက်ဆဉ်ဟင်း။ တော်နယ်ကော့် အောင်းအနယ့်လေ ကွန်းတန်းတီလေန ချန်းချန်းလန်းလန်း အောင်းတနယ့်ခေါက်(ပ်) အချီန်တထီန်မား။ ကွန်းတောင်းလုန်န လျှို့ဝှက်ချက်လေကော့် တနယ့်ဟုမားဝိုက်။ 3အောင်းတန့်ခနောဝ်အရိပ်နမ်းလေကော့် နောင်တန့် ရာခနောဝ်အောင်းလိမ်းညော့ တနယ့်ဟဉ်း။ နာ့ဆတ်(ပ်)တူးဟုန်းအပ်ဆီ ရိန်းစမ့်စမ့် ဟောင်ပေါတမ့်ကော့် ခွန့်ခနေခေါင်ဆီနောင်စေကျဉ်းနော့်တပေး"ဆီ ဝါကော်ဝိုက်။ 4"အိုက်ကော့်၊ ဟေအလေးဆီ ထောင်(မ်)ဟင်း။ အောင်းကွန်းတအောင်း(ဝ်)သိုင်းအောင်းမဆူကော့် ပီကိုးဟင်း။ မနော်လ အောင်းတိုးမဆူနဲဟော် အောင်း(ဝ်)သိုင်းပဲ့မေကော့် အောင်းကျန်အောင်းထောကော့် မနော်မအောင်း(ဝ်)သိုင်းပဲ့။ အောင်းထိုင့်လ အောင်းမနော်ဟေပဲ့ တောင်းလုန်ကော့်။ 5စောင့်ဖလားပါးနိမ်နဲဟော် အောင်းမဆူတနယ့်ကိုးလ။ စောင့်ဖလားလ အောင်းအဆတ်မဆူ အောင်း(ဝ်)သိုင်းပဲ့ဆီမကား တော်ပေါထီန်ငလိုင်းကော့် အာဏာအောင်းဆုန်ပဲ့လေရောင်း။ အောင်းစောင့်ဖလားနဲဟော် မဆူတနဲ့ကိုး အောင်းတဲ့တဲ့လ။ 6အောင်းနုတ်ပလီဟာ့တူးလ တောင်းငွန်းဆောင်(န်)ဖတ်တောင်းခိုင်ဟင်း။ တော်နယ်ကော့် စောင့်ဖလားလ အောင်းနုတ်ပလီတူးနိမ်အင်ကိုးမလိဉ်း(မ်)။ 7ခေါင်ဟိုအောင်းခနေဟိုမဆူလေကော့် အမ်ပဲ့။ ကောပ့်နယ့်ညော့ မဆူပီကိုး မဆူလေန နောင်နုတ်ပလီလေမကား ခေါန်ရောင်း"ဆီ ဝါကော်ဝိုက်။ 8"အောင်းမဆူကောခဝါလ၊ ရာခနာ့ကွန်းလက်ခံအောင်းကော ကွန်းဝန်ခံန ဖောကော့်ခရောင်(ဝ့်) လူ့သားတော်န ကွန်းဟောန့်န အကြောင်းပေးကွန်းစောင်း(မ်)ခလောင်ကောလေဝါလ ခနာ့ဖီလေ တဝန်ခံဝိုက်။ 9တော်နယ်ကော့် အောင်းကော ခနာ့ကွန်းလေ ဟောင်ပေါငြင်း ခနာ့ဖီလေကော့် မောန အောင်းငြင်းတနယ့်ခမ်ဝိုက်။ 10မဆူလေန အောင်းလူ့သားတော် ဟောင်ပေါဆန့်ကျင်လော့် မွန်းခွင့်လွှတ်ပဲ့မေကော့် ဟောင်ပေါဆန့်ကျင်အောင်း ဉာဏ်အလင်းတော်စောင့်ဖလားလော့် မွန်းစောင့် အောင်းတခွင့်လွှတ်မစော်။ 11အောင်းမော ခနောဝ်စလပ် ကွန်းအုပ်ချုပ်လေ နယ့်ပေါမစော် ခနာ့ကွန်းအရာရှိလေကော့်ခရောင့်(ဝ်) ဟောင်ပါတဆွဲတလားပေါဝါလော့် အောင်းမောတောင်းမော နောင်နူးတနယ့်ကာကွယ်ဆီ တနယ့်ဝါနောင်နူးဝါလ ပီကိုး။ 12မေအချီန်ဟောန့်နာ့ ခေါင်စောင့်ဖလားလ အောင်းမဆူ တနယ့်ဝါနောင်နူးဝါလ တဆောန်ဟောင့်(ဝ်)ကျဉ်းဆီ "ဝါကော်ဝိုက်။ 13နော်လောင်နော့် ဆီမေခနောဝ်ကွန်းဖွန် ကွန်းကော်နိမ်လ "စောင့်၊ အောင်းကောတနွိုက် ပစ္စည်းပေါ်ဟောလေ ဟပေါခွဲဟောင့်(ဝ်) အောင်းစပီစိုင်းကော ကွာဝါဟောင့်(ဝ်)အီ့"ဆီ အောင်းမွန်းစောင့် ဝါကော်ဝိုက်။ ပေါ်ဟောဟောင်ပေါသိုင်းကော် အမွေဟခွဲအီ့ဆီ အောင်းပီစိုင်းဟော လောင်(ဝ်)ပြားကော်အီ့"ဆီ ဝါကော်ဝိုက်။ 14မေနယ့်လော့် မွန်းစောင့်န "အိုက်ကော့်၊ ခနောဝ်ကြားမဆူဆောင်(န်)ကော့်န ပစ္စည်းဟပေါနယ့်မိုင်ဟောင့်(ဝ်) အောင်းကော အမိန့်အာဏာလေ ဖောဟောင့်(ဝ်)ဝိုက်"ဆီ ဝါပေါက်ကော်ဝိုက်။ 15မေနယ်လော့် မွန်းစောင့်ယေရှုလ ဆက်ဆီ အောင်းကွန်းဖွန်လေ "ပီလောဖားဟင်း၊ အောင်းမဆူပိုင်ပစ္စည်းလေတောင်းလုန်န အောင်းအဆတ်မဆူ မကယ်ပဲ့"ဆီ လောင်(ဝ်)ပြားကော်ဝိုက်။ 16နောက်လောင်နော့် မွန်းစောင့်လ အောင်းကွန်းဖွန်လေ အကြောင်းပွန်ပုဒ်နိမ် လောင်(ဝ်)ပြားကော်ဝိုက်။ အကြောင်းပုံဟောန့်န "မေတန်ဟာ ဆဌေးကော်နိမ်လ ရာတုန်နားမွန်း မတ်မိုက်၊ မတ်တောက်လေ အိုက်အောက်ဝိုက်။ 17မွန်းလ ကောတနယ့်ဟေနောင်နူး အောင်းမတ်ဟိုက်လေ စနီးဝိုက်နေရာကော့်မရောင်း"ဆီ မွန်းစဉ်းစားကော်ဝိုက်။ 18နယ့်ရောင့်(ဝ်) မွန်းလ "ကောတနယ့်ဟေနောင်နူးဝါလ ကောဟုကော် ရေးခေါင့်(ဝ်)လေဖျတ်ဆီ ပစ္စည်းအောင်းနီးလေတောင်းအောင်းအောက်ရာနားကော ဆောင်(ဝ်)တော်ပေါနွိုက် ရေးခေါင့်(ဝ်)အောင်းရောင်(ဝ်)တောင့်ဆီ ကာအောင်းအောက် ရာနားကောလေတောင်းလုန် ဆောင်(ဝ်)ဆီတဆိဉ်းဝိုက်ကော်။ 19နယ့်ရောင့်(ဝ်) အောင်းမွန်းတောင်းမွန်းတန့်ကော်လ "ရာကော အတွုက်ပီးနော်ကော့်ခရောင့်(ဝ်) ပစ္စည်းအောင်းနီးလေ ခနောဝ်ရေးခေါင့်(ဝ်) ကောဆောင်(ဝ်)ရောင့်(ဝ်)ကော်ညော့၊ ဆီမေအစောင်စဆီ ကော ဆောင်း(ဝ်)ဆီ၊ ကျဉ်းဆီ၊ စွုမ်းဆီတအူကော့်"ဆီ ဝါကော်ဝိုက်။ 20တော်နယ်ကော့် စောင့်ဖလားလ အောင်းကွန်းဟိုက် "မောလ ကွန်းဆောပ်ကျဉ်းနော့်။ ကမ်းခမ်စောင် မောသသိုင်းကော့်၊ ကောပ့်နယ့်ညော့ အောင်းမောစူးဝိုက်လေ တထီန်ခနောဝ်မေးပွန်ကော့်ဝိုက်"ဆီ လောင်(ဝ်)ပြားကော်ဝိုက်။ 21သဘောဟိုက်လ တ"အောင်းစောင့်ကောင်(ဝ်)တောင်းကောင်(ဝ်) ကွန်းစူးလေန အောင်းစဘဝအစောင်နဲဟော်။ တော်နယ် အောင်းထိုင့်လေန ဟောင်ပေါထီန်ခနာ့စောင့်ဖလား အောင်းစမ်းစောင်း(ဝ်)လေ"ဆီ လောင်(ဝ်)ပြားကော်ဝိုက်။ 22နောက်လောင်နော့် စောင့်ယေရှုလ အောင်းတပဲ့မွန်းလေ "အောင်းမဆူ ကောခဝါလ အောင်းဘဝမဆူလေကော့် ပီကြာပါဟင်း၊ အောင်းမဆူ စကျဉ်း၊ စနွမ်း၊ စနွန်၊ စမိုင်းလေကော့် ပီကြာပါဟင်း။ 23အဆတ်မဆူလ နောင်အောင်းကျဉ်းမကားအရေးရောင်(ဝ်)။ တိုးကွန်းန နောင်ဆေ့ဖလေမကား အရေးရောင်(ဝ်)ဝိုက်။ 24အောင်းလကားလေ တွဲကော်နူ။ မနော်လေ မနယ့်ပွတ်၊ မနယ့်ပတ်၊ အောင်းစဆောင်(ဝ်)ပေါင်ခေါင့်(ဝ်)ကော့်မရောင်း။ တော်နယ် စောင့်ဖလားလ အောင်းစမနော် လိမ့်ဟောင့်(ဝ်)ဝိုက်။ မဆူလေန ဆာဆီ နုတ်လေမကား ခေါန်ရောင်းမစော်လေး။ 25ကောပ့်မဆူကြာပါဆီ အဆတ်မဆူမောင်းနိမ်ဆာဆီနယ့်အူဟူလေး။ 26မဆူလေန လောင်အောင်းဆေးအင်ကော့် ပေါမဟေပဲ့လ၊ စလောင် အောင်းတန်းတီလေ ဟေဟောင်းကွာပူပန်နာ့။ 27အောင်းမောက်ရာ့ထိန်လေ တွဲကော်နူ။ မနော်လေန လောင်ကော့် မဟေဟင်း။ အောင်းစမနော် ဆေလေကော့်မဟေဟင်း။ တော်နယ် အောင်းမဆူကောခဝါလ မေတန်ဟာ အောင်းစောင့်ခွန်ဟော်ခမ်းရှောလမုန် ယဉ်းဖမ်ကော်နူ။ အောင်းမွန်းနွန်ဝိုက်လေန နောင်မောက်ရထိန်လေကိုးမဆန်း။ 28စောင့်ဖလားန အချီန်အောင်းအိအိအင်ဟော်တနယ့်အူဟော ဝမ်းနယ့်အဆတ်ရောင်းဆီ ဝမ်းမဖု ခနောဝ်ဖိုင်း အောင်းဆောင်(ဝ်)ခေါင့်(ဝ်) အောင်းတနယ့်ခမ် အောင်းစမောက်ရထိန်လေကိုးသကော့် ဟပေါဆန်း ဖန်စန်းမားအွန်န အောင်းမဆူပေါဝါလော့် နောင်နယ့်မကား ဆာဆီတဖန်စန်းဟောင့်(ဝ်)မစော်လေး။ အောင်းမဆူယွန်(မ်)လေန အိုက်ဆေး။ 29မဆူလေ အောင်းစကျဉ်းအင်တောင်း ပီပူဟင်း။ 30ကွန်းမယွန်(မ်) အောင်းစောင့်ဖလားလေနဲဟော် အောင်းအတွိုက်ထော့န် နယ့်ပူဟင်းန။ တော်နယ့် စောင့်ဖလားမဆူလ အောင်းမဆူလိုလေ ဟု။ 31အောင်းအစားဟောန့် ရာအတွိုက်တာဘဝမောန အောင်းချဉ်းအရေးရောင်(ဝ်)န အောင်းစောင့်ဖလားအုပ်စိုးခနေမောန ဟောင်ပေါဟေစောင်း(မ်)လော့် မွန်းန အောင်းဟောလိုလေတောင်းလုန် တဟေဟောင့်(ဝ်)ဝိုက်။" 32မွန်းစောင့်လ "တပဲ့လေ မဆူပီကိုးဟင်း၊ စောင့်ဖလားမဆူလ အောင်းစမဆူ အောင်းနယ့်ဟောင့်(ဝ်)သာသနာစောင့်ဖလားလ မွန်းစောင့် ကြိုက်ဝိုက်။ 33ပစ္စည်းမဆူ ကာအောင်းရောင်းလေခိုင်ဆီ အောင်းကွန်းဖန်လေ မိုင်ဟောင့်(ဝ်)ကော်။ အောင်းမဆူတောင်းမဆူ မေနော်ကော့် အောင်းမမိုပဲ့ အိတ်ငွန်းလေဟေဆီ ရာဖလောက်လေမထီန်၊ မိုလေမိုင်းလေ အောင်းမဖျတ်ပဲ့ ရာနိဗ္ဗာန်ဟောန့် အောင်းပစ္စည်းဟောန့် ဆိဉ်းဝိုက်ဟင်း။ 34စောဝ်မဆူလေကော့် ရာပစ္စည်းမဆူလေရောင်းနဲဟော် တရောင်းဟင်းဝိုက်။" 35နောက်လောင်နော့် စောင့်ယေရှုန "ဖနွန်အောင်းနွန်ဝိုက် ကွဉ်း(မ်)ကွဉ်း(မ်)တောင်း အောင်းလောင်စောင့်ဖလားလေ ဟပေါနယ့်ဟေ ကမ်းခမ်နောင်စပ်ဆီမီးညော့ မေနော်ကော့်တူတူအဆင်သင့် တပေးဝိုက်။ 36ဆီမေမင်္ဂလာ အောင်းစောင့်မနော်တပေါက်မား နောင်ခလေထညော့ အောင်းကောတပေါက်မား အဆင့်သင့်ထဟင်း။ စောင့်ပေါက်မားဆီ မားခေါက်နာ့ဆတ်တူးကော်နွေ့ဆတ် အောင်းနာ့ဆတ်တူး ဟပေါနယ့်ပွတ် ထဟင်း။ 37မေမွန်းပေါက်မား အောင်းစခအောင်းအူနိုးနိုးကြားကြား စောင့်မွန်းန ဆုလေတဟောင့်(ဝ်)ဝိုက်။ အောင်းစမဆူ ကောခဝါလ၊ စောင့်မွန်းန အောင်းခမွန်းလေ ဟနှောင်ဆီ ခေါင်ကျဉ်းလေ တလိမ့်ဟောင့်(ဝ်)ဝိုက်။ 38စောင့်မဆူလ အချီန်ကမ်းခမ်ကော့်ခရောင့်(ဝ်)၊ ကမ်းနော်ကော့်ခရောင့်(ဝ်) ဟောင်ပေါပေါက်မားလော့် ခဟောန့်န ဟောင်ပေါပေးထအဆင်သင့်လော့် မွန်းန အိုက်တနယ့်စွုမ်းဝိုက်။ 39တော်နယ်ကော့် အောင်းမဆူတနယ့်ဟေအလေးန၊ ဖလောက်န မေနောတမားဝါလ ဟောင်ပေါဟုထ မွန်းန နိုးနိုးကြားကြားတအူညော့ ဖလောက်န ခနောဝ်ဟုန်းမွန်း အောင်းတခေါင့်(ဝ်)ပဲ့ကော့်မစော်။ 40ကောပ့်နယ့်ညော့ အဆင်သင့်မဲထဟင်း။ ဟေဟောင်းပေါဝါလော့် "ကော၊ လူ့သားတော်န အချီန်မဆူမထန် တကြွပေါက်မားညော့"ဆီ ဝါကော်ဝိုက်။ 41နောက်လောင်နော့် ပေတရုလ အောင်းစောင့်ယေရှု "စောင့်၊ ပွန်အောင်းထိုင့်လ ဝါအောင်းစဟောလေး၊ နဲ့မစော် ဝါအောင်းပေလေး"ဆီ ထန်(မ်)ကော်ဝိုက်။ 42မေနယ့်လော့် စောင့်ယေရှုလ "ကောလ ပညာရောင်းဆီ ရာဟုန်းစောင့်မွန်း အောင်းသစ္စာရောင်း နောင်ကွန်းနယ့်စီမံလောင်လေညော့ အောင်းကွန်းတောင်းလုန် ကောဝါ။ စောင့်မွန်းန အောင်းမွန်း အောင်းခတန်းတီလေပါ အချီန်ဟောင်ပေါထီန်မား ခေါင်ကျဉ်းလေ ဟပေါနယ့်စီစဉ် အပ်ဝိုက်ကော်ဝိုက်။ 43စောင့်မွန်းပေါက်မားလ ဟောင်ပေါခေါက် အောင်းခဟေလောင်ကော်လော့် ခဟိုက်လ အောင်းနီးအောင်းငမ်းတနယ့်ခံစား။ 44အောင်းမဆူ ကောဟောင်နယ့်ဝါအောင်းစော်ပေါလော့် စောင့်မွန်းလ အောင်းကွန်းဟောန့် ကာအောင်းပေးပစ္စည်းမွန်းလေတောင်းလုန် သဟတွဲနွေ့ဝိုက်။ 45တော်နယ်ကော့် ခဟောန့်လ ခနောဝ်စောဝ်မွန်း စောင့်မနော်တပေါက်မားလ တနောက်ကျဆီ ထန်ဆီ အောင်းကျန်အောင်းခကော့်ယဉ်းလေတောင်း အောင်းခကော့်စိုင်းလေ ဖိုက်ဟဲ တင်ဟဲ၊ ကျဉ်းကော် ဆွတ်ကော်ဆီ တကြားမွန်းမူးညော့ 46စောင့်ဟောန့်န ဝမ်းအောင်းမွန်းမမျှော်၊ အချီန်အောင်းမွန်းမဟု ထီန်မားဆီ အောင်းစမွန်း ဟောင့်(ဝ်)အပြစ်ဆီ တောင်းကွန်းသစ္စာမရောင်းလေတောင်း တဟအူနွေ့ဟင်းဝိုက်။ 47အောင်းစောင့်မွန်းလိုလေ ဟုဆီ အောင်းမဲဝိုက် ဟောင်ပေါမရောင်း။ နောင်နယ့်ပေါမစော် နောင်အလိုမွန်းညော့ ခအောင်းမဟေစောင်း(မ်)လေန တနယ့်ခမ်အောင်းတင်တောင်းခေါင့်ဝိုင်တောင်းဝိုက်။ 48တော်နယ်ကော့် ခလေန စောင့်မနော် ခဟဟေနောင်နူးဝါလမဟုဆီ အောင်းဖစ် တောင်းခေါင့်ဝိုင်တောင်းတနယ့်တင်လ အောင်းစမွန်း တောင်းခေါင့်ဝိုင်ဟိုက်တောင်း စောင်နိန်အင်ဟော် အောင်းတင်တနယ့်ခမ်ဟော။ တော်နယ် ဆီမေကွန်းအောင်းနွိုက်နမ်နမ်လ အောင်းပေရောန်းနမ်နမ် တနယ့်ခမ်။ ဆီမေကွန်းအောင်းနမ်နမ်အပ်ဝိုက်လ နမ်နမ်တရောန်းဟင်းဝိုက်။ 49နောက်လောင်နော့် ကောလ အောင်းကမ္ဘာဟိုက် တောင်းဖိုင်းတောင်း ဟပေါနယ့်သန့်စင်ဆီ ကောထီန်မား။ တောင်းဖိုင်းတောင်းအောင်းဆော် ကောအလိုရောင်း။ 50မဟူကော့် ကောစောင့်ကော့် အောင်းကောတနယ့်ခမ် အောင်းဒုက္ခဆင်းရဲတူးနိမ်ရောင်းအွန်။ အောင်းဟိုက်လေ ကာမရောင့်(ဝ်)အွန်လ အောင်းဒုက္ခဆင်းရဲဟိုက်လေ ကောတနယ့်ခမ်အွန်။ 51ကောလ ခနေကမ္ဘာဟိုက် အောင်းငြိမ်းချမ်းရေးလေ ကောအောင်း(ဝ်)မားဆီ မဆူထန်ဟင်းလေး။ နောင်နယ့်မစော် ကောမားလ အောင်းကွန်းလေ ဟပေါနယ့်ခွဲခြားဆီ ကောမား။ 52ဆီမေအစောင်စဆီ စောင့်ဟုန်းဟာ့ကော့ပေါရောင်း အောင်းကောကွန်းမယွန်(မ်)ဆောင်(န်)ကော့်န တောင်းကွန်းယွန်(မ်)ဆမ်ကော့်တောင်း နောင်ဆန့်ကျင်ညော့ ကွန်းယွန်(မ်)အောင်းကောဆမ်ကော့်ကော့် အောင်းစကွန်းမယွန်(မ်)ဆောင်(န်)ကော့် ဆန့်ကျင်ဆီ တကွဲပြားကော်ဝိုက်။ 53ပေါ်တောင်းလုစိုင်း၊ မယ်တောင်းလုဆောင်(ဝ်)၊ မယ်စောင့်တောင်းလုပေါင့်(ဝ်)ကော့် ကော်နိမ်တောင်း ကော်နိမ် အောင်းတတဲဟင်းပဲ့မစော်။ 54နယ့်ရောင့်(ဝ်) မွန်းစောင့်ယရှုလ အောင်းကွန်းဖွန်လေ "မဆူလေန စားဆီဝမ်းတို အောင်းချီဖလေခွန့်မား ဟောင်ပေါနယ့်ဟောန် ဖွန်သတိုဝါလ မဆူဟုဟင်း။ နောင်နယ့်ကျဉ်းနော့်စမ်ပေး။ 55တောင်းပါ့နာ့စမ်း ဖပေါလုန်းမား "တထီန်အချီန်နွေကော့်"ဆီ ဝါဆီ နောင်ဝါညော့ ပေးမား။ 56ကွန်းယောင်ဆောင်ကွန်းနီးလေ၊ မဆူလ အောင်းချီဖတောင်း အောင်းလုမ်းတွဲဆီ ဖုန်တတိုဖတနက် မဆူဝါပဲ့၊ တော်နယ့် အောင်းအစောင်ပေးလ နောင်နူးဝါလ ဟေဟောင်းဆီ မဆူမဟုဟင်းန။ 57လောင်အောင်းနီးလေ ဟပေါနယ့်ဟေ အောင်းစောင့်ကော်(ဝ်)တောင်းကော်(ဝ်) ဟေဟောင်းဆီ မဆုံးဖြတ်ပဲ့ဟင်းနာ့။ 58ကွန်းကော်နိမ်မစော်ကော်နိမ် ဟောင်ပေါဆွဲတလားအောင်းစမော ရာတလားရုံးမထီန်ခွေတ် အောင်းမဆူတောင်းမဆူ ဟပေါကျေအေး တနယ့်ညှိဟင်း။ နောင်နယ့်ပေါမဟေ တလားသူကြီးလ အောင်းစမော အပြစ်ရောင်းဆီ သတ်မှတ်ရောင့်(ဝ်) တအပ်ရာကွန်း ဟေလောင်ရုံးဝိုက်။ နောက်လောင်နော့် ကွန်းဟေလောင်ရုံးဟောန့်န အောင်းစမော တချားထောင်ဝိုက်။ 59အောင်းကောခဝါလ၊ မောန ရာမောကာအောင်းရောင်း အကြွေးလေတော်ပေါမို့ပွန့် ကာမဆိုင့် ဆီမေနေရာဟောန့် မောန အောင်းတနယ့်အောက်မစော်"ဆီ ဝါကော်ဝိုက်။
Iliyochaguliwa sasa
Luke 12: ttpv-rv
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.