متى 5

1ولما شاف يسوع الجماهيـر طلع قعد عالجبل ولحقوه تلاميذو. 2وصار الـمعلم يشرح ويقول: 3نيالهن الـمحتاجيـن في الروح لأنو نصيبهن مملكة السما. 4نيالهن الحزنانيـن لأنهن راح يتشجعو. 5نيالهن الـمسالـميـن لأنهن راح يورثو الأرض. 6نيالهن الـجوعانيـن والعطشانيـن للعدل لأنهن راح يشبعو. 7نيالهن اللي بيرحمو غيرهن لأنو ربنا راح يرحمهن. 8نيالهن إللّي قلوبهن نظيفه لأنهن راح يشوفو الله. 9نيالهن إللّي بيعملو السلام لأنهن راح يسموهن أولاد الله. 10نيالهن الـمطرودين عشان العدل لأنو نصيبـهن مملكة السما. 11نيالكو إذا هانوكو ولاحقوكو وحكو عليكو بالشر عشاني. 12انبسطو وكيفو لانو جائزتكو كبيـره في السما. هيك عذبو الأنبيا اللي كانو قبلكو.

13إنتو ملـح الأرض، بس إذا الـملـح فقد طعمو بإيش الواحد بدّو يملـّح؟ بنفعش هذا الملح لإشي عشان هيك راح نـزتُّو بره وراح يدعسو عليه الناس. 14إنتو نور العالم. منقدرش نخبي مدينة مبنية عجبل. 15ولا منضوي النور ومنخبيه لازم يكون عالي عشان ينوّر لكل الناس اللي في البيت. 16فخلي نوركو يشع قدام الناس عشان يشوفوا أعمالكو الـمنيحة ويعظمو أبوكو اللي في السما.

17تفكروش إنو إجيت أتخلص من وصايا الله اللي اعطاها لـموسـى أو من اللي قالوه الأنبيا. ما إجيتش أتخلص منها بالعكس إجيت أكملها. 18عنجد بقولكو لحد ما تختفي السما والأرض مش راح يختفي ولا حرف ولا نقطة وحده من كلمة الله. كل إشي راح يتحقق. 19عشان هيك إذا في واحد بطعش الله في واحدة من الوصايا الزغيـرة وهيك بعلم الناس راح تكون جائزتو صغيـره في مملكة السما. بس اللي بطيع الوصايا وبعلمها راح تكون جائزتو كبيره في مملكة السما. 20وبأقولكو إذا ما كانتش علاقتكو مع الله والناس أحسن بكثيـر من الكتبة والفريسيين مستحيل تفوتو عمملكة السما.

21سمعتو إنو زمان قالو للناس: تقتلش، واللي بقتل بتحاكم. 22بس أنا بقولكو اللي بكون غضبان عأخوه بحاكمو القاضي. وإذا واحد بقول لأخوه: ما أبيخك بحاكمو أعلى مجلس يهودي. وإذا بقولو: أهبل بستحق قصاص جهنم. 23وإذا كنت رايح عمذبح الهيكل تقدم هديه لألله وهناك تذكرت إنو في مشكله مع أخوك. 24اترك هديتك محلها وروح بالأول تصالح مع أخوك وبعدين إرجع قدمها. 25صالح اللي بدُّو يرفع عليك قضية عالسريع — وإنت بعدك معو في الطريق قبل ما يحكم القاضـي عليك وبعدين يحطك البوليس في السجن. 26عنجد بقلك مش راح تطلع من هناك إلا بعد ما تدفع كل اللي عليك.

27سمعتو إنو قالو: تزنيش. 28بس أنا بقولكو إنو كل واحد بتطّلع عوحده عشان يشتهيها بكون زنى بعقله. 29عشان هيك إقلع عينك اليميـن إذا بتخليك تخطي وإرميها بعيد لأنو أحسنلك تخسر عينك من إنو تخسر كل جسمك في جهنم. 30وإقطع إيدك اليمين إذا بتخليك تخطي وإرميها بعيد لأنو أحسنلك تخسر إيدك من إنو تخسر كل جسمك في جهنم.

31وقالو إللي بطلق مرتو خليه يعطيها ورقة طلاق. 32بس أنا بقولكو اللي بطلق مرتو بخليها تزني، وهذا منطبقش إذا كانت مش أمينه لجوزها، واللي بتجوز مطلقه بزني.

33كمان سمعتو أنو الناس قالو زمان إذا حلفت اوفي بوعدك، وأوفي اللي وعدتو لربك. 34بس أنا بقولكو تحلفوش بالـمره. لا بالسما لأنها عرش الله. 35ولا بالأرض لأنها الـمحل اللي بحُط فيه إجريه ولا بأورشليم عشان هي مدينة الملك العظيم. 36وتحلفش براسك لأنك بتقدرش تغيـر لون شعرة وحده من شعر راسك. 37احكي بدون ما تحلف، وخلي كلامك يا آه يا لأ. وكل إشي زيادة هو شر من الشيطان.

38سمعتو إنو قالو: عين بعين وسن بسن. 39بس أنا بقولكو تُكونوش عنيفين مع الأشرار، بالعكس إللي بضربك عخدك اليمين درلو الخد التاني. 40واللي بدو يحاكمك ويوخذ قميصك إتركلو كل أواعيك. 41واللي بجبـرك تخدمو مسافة كيلو ونص، إخدمو ضعف الـمسافة. 42وأعطي للّي بطلب منك وتقلش لأ للي بدو يتدين منك.

43سمعتو إنو قالو حب صاحبك واكره عدوك. 44بس أنا بقولكو حبو أعداءكو وصلوا عشان إللي بدايقوكو. 45وبهاي الطريقة بتصيـرو مثل أبوكو السماوي إللي بخلي شمسو تطلع عالـمناح وعالعاطلين وبخلي الدنيا تشتي عالظالـمين وعالعادليـن. 46بتفكروا إنو إلكو مكافأة اذا حبيتو إللي بيحبوكو؟ طيب مش هيك بعملو إللي بيجمعو ضرايب روما؟ 47وإذا رحبتو بس بجماعتكو فكيف إنتو أحسن من غيـركو؟ طيب مش هيك الناس إللي بتعرفش الله بتعمل؟ 48عشان هيك كونو كاملين مثل ما أبوكو السماوي كامل.

Iliyochaguliwa sasa

متى 5: CGB

Kuonyesha

Shirikisha

Nakili

Je, ungependa vivutio vyako vihifadhiwe kwenye vifaa vyako vyote? Jisajili au ingia

Jifunze Mengi Kuhusu ترجمة الكتاب المقدس باللهجة العامية الجليلية