Mateo 9
9
Jesús ntodanꞌ thi xaꞌ bde
(Mr. 2:1-12; Lc. 5:17-26)
1Zyasa, Jesús ngwap lo bark nde mbere Xaꞌ tedib lad ro nittoꞌ tenꞌ nzo Xaꞌ. 2Tya ngwano men thi xaꞌ nguj tible xa' lo Jesús nzo'b xaꞌ thi lo lonꞌ. Lo senꞌ mne Jesús plopa ndli lazoꞌ re xaꞌ ya Dios, Jesús nchab lo xaꞌ bde ya:
—Blo ne lazoꞌa, xinꞌ na, leꞌ re xken la mdyonꞌla. 3Zyasa pla maestr nchak ley mbli xaꞌ xgab: “Nixin mbiꞌ reꞌ xis Dios”. 4Leꞌ Jesús mnela cho xgab mbli re maestr ya, nde nchab Jesús: ¿Kwan liy ndli goꞌ xgab narax lenꞌ lazoꞌ goꞌ? 5Btej goꞌ lon: ¿kwanꞌ mas nambi gab na lo xaꞌ? ¿Leꞌ re xken la mdyonꞌ la o mas nambi gab men mdyanꞌ la lu? 6Naya, loꞌn lo goꞌ, leꞌ Xinꞌ Mbiꞌ nkeno yalnyebeꞌ sa tonꞌ Xaꞌ re xken men lo izyo reꞌ, bwiꞌ goꞌ nea.
Zyasa nchab Jesús lo xaꞌ bde ya:
—Goche, bxen lonꞌ la, nde bya liz la. 7Zyasa xaꞌ bde ya mdoli xaꞌ nde ndya xaꞌ liz xaꞌ. 8Lo mbwiꞌ re men jwanꞌ na, jwanꞌ toz nzoyen xaꞌ, nde mni xaꞌ diꞌs wen lo Dios, tak mdaꞌ Dios yalne ro lo ti mbiꞌ.
Jesús mbrez Mateo
(Mr. 2:13-17; Lc. 5:27-32)
9Tya mbroꞌ Jesús, nde senꞌ ndo Xaꞌ ned, mbwiꞌ Xaꞌ ndob thi mbiꞌ ndole Mateo tenꞌ nthop xaꞌ tmi low. Mbiꞌ ya nthop tmi low nchax lo Rom nde nchab Xaꞌ lo mbiꞌ:
—Ptonke xis na.
Zyasa Mateo mdoli nde mdonke xaꞌ xis Jesús. 10Nde senꞌ ndobya Jesús kon re xin'te'd Xaꞌ liz Mateo, tya mzin nar xaꞌ nthop tmi low nchax lo Rom nde nar xaꞌ nzo'b xken naꞌ, mdob ro mes kon Jesus. 11Nde lo mbwiꞌ re xaꞌ fariseo jwanꞌ na, mnabdiꞌs xaꞌ lo re xin'te'd Jesús:
—¿Cho kwan liy nchano maestr goꞌ re xaꞌ nthop tmi nde re xaꞌ nzo'b xken naꞌ?
12Lo mbin Jesús jwanꞌ na, nchab Jesús lo re xaꞌ ya:
— Re xaꞌ nadanꞌ nanakinꞌta xaꞌ doktor, benꞌta re xaꞌ nayiz nakinꞌ doktor. 13Bya goꞌ nde byen goꞌ cho kwan nak diꞌs reꞌ: “Yalndlat lazoꞌ ncholas na, nancholasta na kuj goꞌ maꞌ taꞌ go' lon” Tak nandalta na sa bez na re xaꞌ galꞌ ndo, leꞌn ndal sa bez na re xaꞌ nzoꞌb xken naꞌ, sa laꞌ xaꞌ re jwanꞌ narax.
Nyabdiꞌs xaꞌ lo Jesús xomod nak yalse
(Mr. 2:18-22; Lc. 5:33-39)
14Zyasa re xin'te'd Juan mbike lo Jesús, nde mnabdiꞌs xaꞌ:
—¿Cho kwan liy sa re xin'te'd la nandlid xaꞌ yalse? nde re náꞌ nde re xaꞌ fariseo jwanꞌ toz ndli náꞌy,
15Jesús mkab lo xaꞌ:
—¿Cho toyal yo nabil lazoꞌ re men jwanꞌ nzi lo yalselyaꞌ, laja mbyo ndoselyaꞌ ndo xij xaꞌ? Per sin thi wiz we xaꞌ mbyo ta mselyaꞌ ya, zyasa li re xaꞌ yalse.
16Ngen cho nkebde thi ble lar kub, lad thi lar gox, tak leꞌ lar kub ndyopa nde ncheda lar gox, zyasa cheꞌ masra nched tenꞌ mkebde lar kuba. 17Neka ngo men bin kub lenꞌ yid gox, tak tez ko mena lenꞌ yid gox, ncheda yid nde nxyo bin kub, nde leꞌ yid ndyroꞌtal. Jwanꞌ nasa ndablo ko men bin kub lenꞌ yid kub tamod sa ropa bro xeka.
Xinꞌ got Jairo kon ngol mbwal ro xab Jesús
(Mr. 5:21-43; Lc. 8:40-56)
18Laja Jesús ndotej jwanꞌ na lo re men, thi xaꞌ nyebeꞌ lenꞌ yo tenꞌ ndyop men Judío, mzin xaꞌ nde mdoxub xaꞌ axta mdinꞌ lo xaꞌ izyo lo Jesús, nde nchab xaꞌ:
— Xinꞌ got na ngolo nguj, per tez lu yeꞌd la nde xob la yaꞌa xis or, troꞌxban or.
19Leꞌ Jesús mdoli nde ngwanke Jesús xis mbiꞌ ya kon re xin'te'd Jesús. 20Zyasa thi ngol ndyak yis ndlyaj ren, ndatea tib sen linꞌ naꞌyatabta yis ren lo xaꞌ, mbike gax xaꞌ xis Jesús nde mbwal xaꞌ ro xab Jesús, 21tak mbli ngol xgab: “Benꞌta gal na ro xab Xaꞌ, leꞌ na dyanꞌ.” 22Nde Jesús mbyek, mbwiꞌ Xaꞌ lo ngol, nde nchab Xaꞌ:
—Blo ne lazoꞌa, xinꞌ got na, kwent ndli lazoꞌa, jwanꞌ na mdyanꞌ la. Nde zyaga mdyanꞌ ngol.
23Senꞌ mzin Jesús liz mbiꞌ ya, nde mbwiꞌ Jesús nzi re xaꞌ nkeꞌ di yek men nguj#9:23 xaꞌ nkeꞌ di yek re xaꞌ nguj Xaꞌ nkeꞌ flaut yek re men nguj., nde re xaꞌ jwanꞌ nzi yonꞌ yek or nguja, 24zyasa nchab Jesús lo re xaꞌ ya:
—Broꞌte go, tak nangujta mzaꞌ, leꞌ mzaꞌ naxyat.
Zyasa mxino re men Jesús. 25Per senꞌ ngolo mbroꞌte re men ya, Jesús ngote lenꞌ yo, nde mxen Jesús yaꞌ mzaꞌ, nde ngoche mzaꞌ. 26Nde jwanꞌ na mxyobdiꞌs dib izyo ya.
Jesús ntodanꞌ chop xaꞌ nkow lonꞌ
27Senꞌ lo mbroꞌte Jesús tya, chop xaꞌ syeg mdonke xis Jesús, nde mbrez yaj xaꞌ nchab xaꞌ:
—¡Blat lazoꞌa náꞌ, Xaꞌ nde lo bin David! 28Senꞌ ngote Jesús lenꞌ yo, rop xaꞌ nkow lonꞌ ya mbike gax lo Jesús, nde mnabdiꞌs Jesús lo xaꞌ:
—¿Cho tlin gan lin jwanꞌ reꞌ ndyak goꞌ?
Leꞌ rop xaꞌ ya mkab:
—Tlia gan Señor.
29Zyasa Jesús mbwal ngudlo rop xaꞌ nde nchab Jesús:
— Xa ndli lazoꞌ goꞌ ta ak jwanꞌ mnab goꞌ.
30Nde mxyalꞌ ngudlo rop xaꞌ ya. Zyasa Jesús mnaꞌb toz lo rop xaꞌ ya nchab Jesús:
—Nda wiꞌ toz goꞌ sa ngen cho nye jwanꞌ reꞌ.
31Per benꞌta ngolo mbroꞌ rop xaꞌ tya, tolo mdej xaꞌy lo re men nzo dib izyo ya jwanꞌ mbli Jesús.
Jesús ntodanꞌ thi xaꞌ ngup
32Laja ndoyo rop xaꞌ ta mxyalꞌ lonꞌ ya ned, mzin tib pla men ndeno thi xaꞌ ngup nzo mbi narax lo Jesús. 33Nde senꞌ mbloꞌte Jesús mbi narax leꞌn lazoꞌ xaꞌ ngupa, leꞌ xaꞌ mdobte mdodiꞌs. Nde re men nzoyen xaꞌ nde nchab xaꞌ:
—Tera wiꞌ tir men thi jwanꞌ taba dib Israel.
34Mbay re xaꞌ fariseo nchab:
—Mbiꞌ reꞌ ngote re mbi narax, tak xaꞌ jwanꞌ nyebeꞌ lo re mbi narax, ndaꞌ yalne lo xaꞌ.
Jesús ndlat lazonꞌ re men
35Jesús mkete re yez ro nde re ranch. Mketeloꞌ Xaꞌ xkiꞌs Dios lenꞌ re yo tenꞌ ndyop xaꞌ Israel nde mdaꞌ Xaꞌ diꞌs wen chanꞌ yalnyebeꞌ chanꞌ Dios lo re men. Nde mtodanꞌ Xaꞌ men lo re nak yis nde re nak yis nchow jwanꞌ ndyak men. 36Lo senꞌ mbwiꞌ Jesús men toz tira, mblat lazoꞌ Jesús xaꞌ tak nzi xaꞌ xaja nzi mbakxilꞌ ptyab nde nalat ndyak naꞌngen cho ngenap. 37Zyasa nchab Jesús lo re xin'te'd Jesús:
—Galꞌ diꞌs, bro toz kosech, per lud xaꞌ jwanꞌ nge sinꞌ lo neꞌy. 38Jwanꞌ nasa mna'b goꞌ lo Xaꞌ nak xwanꞌ kosech sa telꞌ Xaꞌ men ke sinꞌ lo kosech Xaꞌ.
Iliyochaguliwa sasa
Mateo 9: zpt
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Active: ©Wycliffe Bible Translators, Inc. All rights reserved.