Utumbulilu 1
1
Kubhombakeka kwa ndema
1Pakutumbula hapa Chapanga akabhombiki mbengu na ndema. 2Ndema ukabhi panga liumbo na utopu. Lubhendu lukabhi luyekiki panani ja machi, na Roho waka Chapanga akabhi atumbile panani ja machi. 3Bhela, Chapanga akapwaghike, “Kubya na unang'anu.” Na unang'anu ukabhile. 4Chapanga akaweni kubha unang'anu ghola nde unyahi. Bhela Chapanga akaulekanishi unang'anu na lubhendu. 5Chapanga akaulohiki unang'anu “Muhe” na lubhendu akalulohiki “Ikilu.” Kukabhi pakamihi, kukabhi lukela, lichobha la kutumbula.
6Bhela, Chapanga akapwaghike, “Kubya na mbekenyu pachilanda ja machi, jighabhanisha machi na machi.” 7Chapanga akajitendiki mbekenyu, na kughalekanisha machi ghaghabhi panani ja mbekenyu heji na machi ghala ghaghabhi pahi. Na kukabhi bhenibhela. 8Chapanga akajilohiki mbekenyu heji “Lianga.” Kukabhi pakamihi, kukabhi lukela, lichobha la kabhele.
9Chapanga akapwaghike, “Machi ghaghabhi pahi ja lianga ghalibhonganaje pandu pamu, nahuli pabya na pandu pajomu.” Na kukabhi bhenibhela. 10Chapanga akapalohiki pandu pajomu “Inchi” na lipogha la machi akalilohiki “Bahali.” Chapanga akaweni kubha nde inyahi. 11Bhela, Chapanga akapwaghike, “Inchi na jipihaje mimea. Mimea jejipiha imbeju, mikongu jejipiha mapambiku ghaghabhi na imbeki mkati jaki, na kila nkongu kulengana na ntundu waki patali patali.” Na kukabhi bhenibhela. 12Inchi jakamelihi mimea, mimea jejipiha imbeju kulengana na ntundu waki na mikongu jejipiha mapambiku kulengana na ntundu waki. Chapanga akaweni kubha nde inyahi. 13Kukabhi pakamihi, kukabhi lukela, lichobha la katatu.
14Chapanga akapwaghike, “Kubya na minang'anu mu lianga la kunani nahuli kughabhanisha ikilu na muhi, nayombi ibya nde nginyulila ya kulangiha ikahi patali patali, machobha na hyaka, 15jinang'anaje kunani na kuumulakila ndema.” Na kukabhi bhenibhela. 16Chapanga akatendiki minang'anu jibheli mikolongwa, unang'anu ukolongwa utawala muhi, na unang'anu uchoku utawala ikilu. Bhelabhela akatendiki ndondwa. 17Chapanga akajibhekiki minang'anu jeniheji ku lianga jimulakya ndema, 18jipata kunang'ana ikilu na muhi, na kulekanesha unang'anu na lubhendu. Chapanga akaweni kubha nde inyahi. 19Kukabhi pakamihi, kukabhi lukela, lichobha la kacheche.
20Chapanga akapwaghike, “Kubyaje na mapogha gha ihumbi yomi yamaheli mu machi, na hijuni igholukaje pachilanda ja lianga la kunani.” 21Bhela, Chapanga akaibhombiki ihumbi ikolongwa namaa ya mubahali, na kila ntundu wa ihumbi yomi yeijenda mkati ja machi. Na akabhombiki kila ntundu wa hijuni. Chapanga akaweni kubha nde inyahi. 22Chapanga akaipengalili ihumbi heyi yokapi, na kupwagha, “Mbelakanaje, mkajonjukikaje, mkaghatwelakya machi gha bahali, na hijuni ijonjukikaje pundema.” 23Kukabhi pakamihi, kukabhi lukela, lichobha la kahanu.
24Chapanga akapwaghike, “Inchi na jipihaje kila ntundu wa ihumbi yomi: Hinyama ya kudimakika, ihumbi yeikwabha, na hinyama ya muchitengu kwa ntundu waki.” Na kukabhi bhenibhela. 25Chapanga akaibhombiki hinyama ya muchitengu kwa ntundu waki, hinyama ya kudimakika kwa ntundu waki, na ihumbi yokapi yeikwabha kwa ntundu waki. Chapanga akaweni kubha nde inyahi.
26Bhela Chapanga akapwaghike, “Tumbombaje mundu kwa ulenganesu witu, na kwa sula jitu, bhakatawala homba ya mubahali, na hijuni ya kunani, na hinyama ya kudimakika na hinyama ya muchitengu, na ndema wokapi, na kila chiumbi chechikwabha panani ja ndema.” 27Chapanga akumbombiki mundu kwa ulenganesu waki, ena, kwa ulenganesu waka Chapanga akumbombiki. Akabhabhombiki mwanalomi na mbomba. 28Chapanga akabhapengalili na kubhapwaghila, “Mbelakanaje, mkajonjukikaje, mkautwelakya ndema na kuutawala. Mkatawala homba ya mubahali, na hijuni ya kunani, na kila chiumbi chomi chechijenda panani ja ndema.” 29Bhela Chapanga akapwaghike, “Lingalya, numpeki kila mmea ghoupiha imbeju panani ja ndema wokapi na kila nkongu ghoubhi na mapambiku ghaghabhi na imbeki mkati jaki. Yeniheyi anaibya chilebhi chinu, 30na chilebhi cha hinyama yokapi ya pundema, na chilebhi cha kila chijuni cha kunani, na chilebhi cha kila chiumbi chechikwabha panani ja ndema chechibhi na womi, numpekeha kila nkongu wa mahamba kubha chilebhi chinu.” Na kukabhi bhenibhela. 31Chapanga akaweni kubha kila chindu cheachibhombiki kubha nde chinyahi namaa. Kukabhi pakamihi, kukabhi lukela, lichobha la sita.
Iliyochaguliwa sasa
Utumbulilu 1: MpBV
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The New Testament in Mpoto Language ©The Word for the World International and Mpoto Language Translation, 2020 All rights reserved.