أعمال الرُسُل 14
14
في إِقُونِيَة
1وَ نَفْس الشَّيّءْ بِقِي فِي إِقُونِيَةْ. بُولُسْ وَ بَرْنَابَا دَخَلَوْا فِي بَيْت الصَّلَاةْ هَنَا الْيَهُودْ وَ قَمَّوْا يِحَجُّوا بِقُدْرَةْ لَحَدِّي نَاسْ كَتِيرِينْ آمَنَوْا بِعِيسَى مِنْ الْيَهُودْ وَ مِنْ الْيُونَانِيِّينْ. 2وَ لَاكِنْ الْيَهُودْ الْأَبَوْا مَا يِآمُنُوا حَرَّشَوْا النَّاسْ الْمَا يَهُودْ وَ غَيَّرَوْا فِكِرْهُمْ أَشَانْ يَزْعَلَوْا مِنْ الْمُؤمِنِينْ. 3وَ بُولُسْ وَ بَرْنَابَا مَا خَافَوْا مِنْهُمْ وَ طَوَّلَوْا هِنَاكْ وَ كَلَّمَوْا بِالرَّبّ عِيسَى لِنَاسْ الْحِلَّةْ بِكَلَامْ وَاضِحْ. وَ الرَّبّ أَنْطَاهُمْ عَلَامَاتْ وَ عَجَايِبْ أَشَانْ يِثَبِّتْ بِشَارَةْ رَحْمَتَهْ قِدَّامْ النَّاسْ. 4وَ نَاسْ الْحِلَّةْ أَلْفَارَقَوْا، الْوَاحِدِينْ لَمَّوْا مَعَ الْيَهُودْ وَ الْوَاحِدِينْ مَعَ الرُّسُلْ.
5وَ الْيَهُودْ أَسْتَفَقَوْا مَعَ النَّاسْ الْمَا يَهُودْ وَ كُبَارَاتْهُمْ، وَ كُلُّهُمْ شَالَوْا نِيَّةْ أَشَانْ يِعَذُّبُوا الرُّسُلْ وَ يَرْجُمُوهُمْ. 6وَ وَكِتْ بُولُسْ وَ بَرْنَابَا سِمْعَوْا الْخَبَرْ دَا، جَرَوْا فِي بَلَدْ لِكَوْنِيَا فِي حِلَّالْ لِسْتَرَةْ وَ دَرْبَةْ وَ حَوَالَيْهُمْ. 7وَ هِنَاكْ كُلَ، قَمَّوْا بَلَّغَوْا لِلنَّاسْ بِالْبِشَارَةْ.
في لِسْتَرَة و دَرْبَة
8وَ فِي حِلَّةْ لِسْتَرَةْ فِي نَادُمْ مَعْضُورْ. هُو مُكَرْسَحْ مِنْ وِلْدَوْه وَ يَوْم وَاحِدْ كُلَ، مَا رَاغْ. 9وَ هُو قَاعِدْ يَسْمَعْ كَلَامْ بُولُسْ عَدِيلْ وَ بُولُسْ شَافَهْ وَ عِرِفْ الْمَعْضُورْ عِنْدَهْ إِيمَانْ أَشَانْ يَلْقَى الْعَافَيْ. 10وَ بُولُسْ نَادَاهْ بِحِسّ شَدِيدْ وَ قَالْ: «قُمّ فَوْق بِرِجِلَيْنَكْ.» وَ الرَّاجِلْ نَطَّ فَوْق وَ قَمَّ يُرُوغْ.
11وَ النَّاسْ اللَّامِّينْ شَافَوْا الشَّيّءْ الْبُولُسْ سَوَّاهْ وَ عَاطَوْا بِلُغِّتْهُمْ اللِّكَوْنِيَّةْ وَ قَالَوْا: «الْإِلٰـهَاتْ شَالَوْا صُورَةْ النَّاسْ وَ نَزَلَوْا فِي أُسُطْنَا!» 12وَ قَالَوْا بَرْنَابَا هُو زِيُوسْ مَلِكْ الْإِلٰـهَاتْ وَ بُولُسْ هُو هَرْمِيسْ خَشُمْ الْكَلَامْ هَنَا الْإِلٰـهَاتْ أَشَانْ هُو بَسْ الْقَاعِدْ يِكَلِّمْ. 13وَ رَاجِلْ الدِّينْ هَنَا الصَّنَمْ زِيُوسْ جَابْ تِيرَانْ وَ نُوَّارْ مُلَدَّمِينْ فِي خَشُمْ بَابْ بَيْت الصَّنَمْ هَنَا زِيُوسْ. وَ بَيْت الصَّنَمْ دَا قَاعِدْ فِي دَخُولْ الْحِلَّةْ. هُو وَ كُلَّ النَّاسْ دَوَّرَوْا يِقَدُّمُوا ضَحِيَّةْ لِلرُّسُلْ.
14وَ وَكِتْ الرُّسُلْ بَرْنَابَا وَ بُولُسْ سِمْعَوْا بِالْكَلَامْ دَا، هُمَّنْ زِعِلَوْا زَعَلْ شَدِيدْ وَ شَرَّطَوْا خُلْقَانْهُمْ وَ جَرَوْا فِي أُسْط النَّاسْ. 15وَ قَالَوْا: «يَا النَّاسْ، مَالْكُو تِسَوُّوا شَيّءْ مِثِلْ دَا؟ أَنِحْنَ نَاسْ مِثِلْكُو بَسْ! وَ جِينَا نِبَلُّغُوا لَيْكُو الْبِشَارَةْ أَشَانْ تِخَلُّوا الْكَلَامْ الْبَاطِلْ دَا وَ تِتَابُعُوا كَلَامْ اللّٰهْ الْحَيّ. هُو بَسْ خَلَقْ السَّمَاوَاتْ وَ الْأَرْض وَ الْبُحُورْ وَ كُلَّ شَيّءْ الْفِيهُمْ. 16فِي الزَّمَنْ الْفَاتْ، اللّٰهْ خَلَّى كُلَّ الْقَبَايِلْ يِعِيشُوا مِثِلْ هُمَّنْ يِدَوْرُوا. 17وَ لَاكِنْ فِي الْوَكِتْ دَا كُلَ، اللّٰهْ أَنْطَى شَهَادَةْ أَشَانْ يَعَرْفُوهْ هُو مَوْجُودْ. هُو سَوَّى لَيْكُو الْخَيْر وَ رَزَقَاكُو بِأَلْمِي مِنْ السَّمَاءْ وَ غَلَّةْ فِي الْخَرِيفْ وَ شَبَّعَاكُو بِأَكِلْ وَ أَنْطَاكُو فَرَحْ فِي قُلُوبْكُو.» 18وَ بِكَلَامْهُمْ دَا كُلَ، مَا قِدْرَوْا يَدْحَرَوْا النَّاسْ يِسَوُّوا لَيْهُمْ ضَحِيَّةْ.
19وَ بَعَدْ دَا، يَهُودْ وَاحِدِينْ جَوْا مِنْ أَنْطَاكِيَةْ وَ إِقُونِيَةْ وَ حَرَّشَوْا النَّاسْ. وَ رَجَمَوْا بُولُسْ أَشَانْ يَكْتُلُوهْ. وَ خَلَاصْ، كَرَّوْه وَ زَقَلَوْه بَرَّا مِنْ الْحِلَّةْ. وَ فِي فِكِرْهُمْ، هُو مَاتْ خَلَاصْ. 20وَ لَاكِنْ وَكِتْ التَّلَامِيذ جَوْا وَ حَوَّقَوْه، هُو قَمَّ وَ قَبَّلْ مَعَاهُمْ فِي الْحِلَّةْ. وَ أَمْبَاكِرْ، بُولُسْ مَشَى مَعَ بَرْنَابَا لِحِلَّةْ دَرْبَةْ.
الرُسُل قبّلوا في درِبهم
21وَ بَلَّغَوْا الْبِشَارَةْ لِنَاسْ الْحِلَّةْ وَ كَتِيرِينْ مِنْهُمْ بِقَوْا تَلَامِيذْهُمْ. وَ بَعَدْ دَا، قَبَّلَوْا فِي لِسْتَرَةْ وَ مِنْ لِسْتَرَةْ مَشَوْا فِي إِقُونِيَةْ وَ قَبَّلَوْا بَتَّانْ فِي أَنْطَاكِيَةْ بِسِيدِيَةْ. 22وَ فِي كُلَّ الْحِلَّالْ دَوْل، شَجَّعَوْا التَّلَامِيذ وَ وَصَّوْهُمْ أَشَانْ يَقْعُدُوا ثَابْتِينْ فِي الْإِيمَانْ. وَ قَالَوْا لَيْهُمْ: «أَكِيدْ، تَعَبْ كَتِيرْ يَجِي فَوْقنَا كُلِّنَا فِي الدَّرِبْ الْيِوَدِّينَا فِي مَمْلَكَةْ اللّٰهْ.» 23وَ فِي أَيِّ بَكَانْ، عَزَلَوْا نَاسْ مِنْ جَمَاعَةْ الْمُؤمِنِينْ أَشَانْ يَبْقَوْا لَيْهُمْ كُبَارَاتْ. وَ صَامَوْا وَ سَأَلَوْا اللّٰهْ لَيْهُمْ وَ أَمَّنَوْهُمْ لِلرَّبّ عِيسَى الْهُمَّنْ كُلُّهُمْ آمَنَوْا بَيَّهْ. وَ خَلَاصْ مَشَوْا.
24وَ بَعَدْ شَقَّوْا بَلَدْ بِسِيدِيَةْ، جَوْا فِي بَلَدْ بَمْفِيلِيَةْ. 25وَ بَلَّغَوْا الْبِشَارَةْ لِنَاسْ حِلَّةْ بَرْقَةْ وَ مَشَوْا قِدَّامْ لِحِلَّةْ أَتَّالِيَّةْ. 26وَ هِنَاكْ رِكْبَوْا فِي سَفِينَةْ وَ شَقَّوْا الْبَحَرْ أَشَانْ يِقَبُّلُوا فِي حِلَّةْ أَنْطَاكِيَةْ فِي سُورِيَا. وَ فِي الْحِلَّةْ دِي، أَوَّلْ سَأَلَوْا لَيْهُمْ اللّٰهْ أَشَانْ يَحْفَضْهُمْ بِرَحْمَتَهْ وَكِتْ هُمَّنْ مَاشِينْ يِسَوُّوا الْخِدْمَةْ الْهَسَّعْ كَمَّلَوْهَا. 27وَ وَكِتْ وِصْلَوْا خَلَاصْ، نَادَوْا كُلَّ جَمَاعَةْ الْمُؤمِنِينْ يِلِمُّوا. وَ أَوْرَوْهُمْ بِكُلَّ شَيّءْ الْاللّٰهْ سَوَّاهْ بَيْهُمْ وَ كِكَّيْف اللّٰهْ فَتَحْ دَرِبْ الْإِيمَانْ لِلنَّاسْ الْمَا يَهُودْ. 28وَ قَعَدَوْا وَكِتْ طَوِيلْ مَعَ التَّلَامِيذ.
Iliyochaguliwa sasa
أعمال الرُسُل 14: ع.د.ت19
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
La Bible en arabe tchadien © Alliance biblique du Tchad, 2019