San Mateo 7
7
Se̱ guun niha̱ꞌ rá níꞌ cuta̱ꞌ níꞌ cacunꞌ xráá tinúú níꞌ maꞌ
1’Se̱ guun niha̱ꞌ rá soj cuta̱ꞌ soj cacunꞌ xráá tinúú soj, ga̱a ne̱ taj cacunꞌ cuta̱ꞌ Yaꞌanj xráá maꞌa̱n soj maan ado̱nj. 2Dan me se sese gu̱un niha̱ꞌ rá soj cuta̱ꞌ soj cacunꞌ xráá tinúú soj, ne̱ veé da̱nj cuta̱ꞌ Yaꞌanj cacunꞌ xráá maꞌa̱n soj uún ado̱nj. Ne̱ sese se̱ cutaꞌ soj cacunꞌ xráá tinúú soj, ne̱ cunu̱u ꞌe̱e̱ rá Yaꞌanj man maꞌa̱n soj uún na̱nj ado̱nj. 3Me cheꞌé niꞌya̱j so̱ꞌ niꞌya nu̱u̱ rihaan tinúú so̱ꞌ, ne̱ ne niꞌya̱j so̱ꞌ chruun ma̱nj nu̱u̱ rihaan ma̱ꞌán so̱ꞌ ga̱. 4Asa̱ꞌ caꞌve̱e cata̱j so̱ꞌ rihaan tinúú so̱ꞌ: “Rque̱ so̱ꞌ rihaan so̱ꞌ quiri̱i̱ ꞌu̱nj niꞌya á.” Se̱ guun a̱ doj cata̱j so̱ꞌ da̱nj ti̱háꞌ so̱ꞌ man tinúú so̱ꞌ maꞌ. ꞌO̱ se ni̱ꞌyaj so̱ꞌ, ne̱ chruun ma̱nj vaa gue̱e̱ nuû rihaan so̱ꞌ na̱nj ado̱nj. 5Síí nucuiꞌ rá mé so̱ꞌ ado̱nj. Asino quiri̱i̱ so̱ꞌ chruun ma̱nj nu̱u̱ rihaan ma̱ꞌán so̱ꞌ, ga̱a ne̱ caꞌve̱e quiri̱i̱ so̱ꞌ niꞌya nu̱u̱ rihaan tinúú so̱ꞌ ado̱nj.
6’Se̱ goꞌ soj rasu̱u̱n gue̱e̱ man chuvee, ne̱ se̱ caraa soj chruj perlá tuꞌve̱e̱ ndoꞌo rihaan xcáá a̱ maꞌ. ꞌO̱ se chuvee yoꞌ roꞌ, ca̱nica̱j ne̱ cha̱ man soj, ne̱ xcáá yoꞌ roꞌ, tu̱guáj cheꞌé xcáá man se sa̱ꞌ yoꞌ, ne̱ navi̱j nu̱ꞌ yoꞌ xtu̱nꞌ, quiꞌya̱j xcáá na̱nj ado̱nj.
No̱ xcúún níꞌ cachi̱nj niꞌya̱j níꞌ rihaan Yaꞌanj cheꞌé rasu̱u̱n achiin man níꞌ a
7’Cachi̱nj soj se vaa achiin man soj rihaan Yaꞌanj, ne̱ soꞌ me síí rque̱ man soj, ne̱ nano̱ꞌ soj rasu̱u̱n achiin man soj, ne̱ nari̱ꞌ soj rasu̱u̱n yoꞌ, ne̱ ase vaa ꞌyaj síí ticaꞌmii taꞌyaa tucuá tuviꞌ roꞌ, da̱nj quiꞌya̱j soj ga̱ Yaꞌanj, ne̱ caꞌnu̱u̱ Yaꞌanj taꞌyaa yoꞌ, ne̱ rque̱ Yaꞌanj rasu̱u̱n achiin man soj ado̱nj. 8ꞌO̱ se cunuda̱nj síí achíín rasu̱u̱n rihaan Yaꞌanj roꞌ, quiri̱ꞌ soꞌ rasu̱u̱n achiin man soꞌ, ne̱ síí nanoꞌ rasu̱u̱n achiin man roꞌ, quiri̱ꞌ soꞌ rasu̱u̱n yoꞌ, ne̱ síí ticaꞌmii taꞌyaa rej ya̱nj Yaꞌanj roꞌ, caꞌnu̱u̱ Yaꞌanj taꞌyaa, ne̱ quiri̱ꞌ síí ticaꞌmii taꞌyaa rasu̱u̱n achiin man soꞌ ado̱nj.
9’Xca̱j soj cuentá da̱j ꞌyaj maꞌa̱n soj, nda̱ꞌ se yuvii̱ me soj, tza̱j ne̱ sese achíín taꞌníí ꞌo̱ soj rachrúún cha̱ yoꞌ man soj, ne̱ se̱ nanoꞌ soj yahij ne̱ caxri̱i̱ soj ston soꞌ maꞌ. 10Ne̱ sese achíín taꞌníí soj nee̱ xcuaj cha̱ yoꞌ man soj, ne̱ se̱ nanoꞌ soj xcuáá ne̱ caxri̱i̱ soj ston soꞌ maꞌ. 11Dan me se nda̱ꞌ se síí chiꞌi̱i̱ nimán me soj, tza̱j ne̱ neꞌen soj rque̱ soj se sa̱ꞌ cha̱ taꞌníí soj ado̱nj. Cheꞌé dan táá a̱ Rej soj síí nicu̱nꞌ xta̱ꞌ, ne̱ si̱j sa̱ꞌ ina̱nj me soꞌ, ne̱ rque̱ ya̱ soꞌ rasu̱u̱n sa̱ꞌ man nij síí achíín rasu̱u̱n man soꞌ na̱nj ado̱nj.
Cataj Jesús se vaa quiꞌya̱j sa̱ꞌ níꞌ rihaan tuviꞌ níꞌ a
12’Dan me se da̱j se uun rá soj quiꞌya̱j sa̱ꞌ yuvii̱ rihaan soj roꞌ, taꞌngaꞌ da̱nj quiꞌya̱j sa̱ꞌ soj rihaan tuviꞌ soj á. Sese da̱nj quiꞌya̱j soj rihaan tuviꞌ soj, ne̱ síí uno nu̱ꞌ stucua̱nj Moisés do̱ꞌ, nu̱ꞌ snana̱ nij síí nataꞌ snana̱ Yaꞌanj ga̱a naá do̱ꞌ, me soj ado̱nj.
Caꞌmii Jesús cheꞌé chrej caxra̱ꞌ ga̱ chrej catu̱u̱n a
13’Catu̱u̱ soj taꞌyaa chru̱j á. ꞌO̱ se caxra̱ꞌ vaa taꞌyaa do̱ꞌ, chrej do̱ꞌ, ꞌanj rej caꞌa̱nj niꞌya̱ yuvii̱, ne̱ ri̱i̱ yuvii̱ atúj taꞌyaa yoꞌ a. 14Tana̱nj chru̱j vaa taꞌyaa ne̱ catu̱u̱n vaa chrej ꞌanj rej ga̱a̱ iꞌna̱ꞌ yuvii̱ rihaan Yaꞌanj, ne̱ na̱nj do̱j yuvii̱ nariꞌ chrej sa̱ꞌ yoꞌ ado̱nj.
Xca̱j níꞌ cuentá da̱j ꞌyaj yuvii̱, ne̱ queneꞌe̱n níꞌ da̱j vaa nimán yuvii̱ a
15’Vaa yuvii̱ taj se vaa me nij soꞌ síí nataꞌ snana̱ Yaꞌanj, tza̱j ne̱ ne ya̱ aꞌmii nij soꞌ maꞌ. Tu̱mé soj man soj, se̱ gaa na̱nj quiꞌya̱j nij soꞌ sayuun man soj á. Dan me se vaa güii cuchi̱ꞌ nij soꞌ rihaan soj, ne̱ ase vaa matzinj roꞌ, da̱nj ga̱a̱ nij soꞌ cuchi̱ꞌ nij soꞌ rihaan soj, ne̱ niꞌya̱nj ndoꞌo caꞌmi̱i̱ nij soꞌ rihaan soj, tza̱j ne̱ nimán nij soꞌ roꞌ, ase vaa nimán xcaꞌyanj caꞌnu̱ꞌ roꞌ, ga̱a̱ nimán nij soꞌ, gu̱un rá nij soꞌ quiꞌya̱j nij soꞌ sayuun man soj na̱nj ado̱nj. 16Cheꞌé dan xca̱j soj cuentá ni̱ꞌyaj soj man nij soꞌ da̱j quiꞌya̱j nij soꞌ, ga̱a ne̱ queneꞌe̱n nij soj da̱j vaa nimán nij soꞌ a. Uta nii chruj uvá raa̱ chruun tanj, rá soj naꞌ. Taj maꞌ. Ne̱ uta nii chruj higó raa̱ coj yâj yaꞌa̱a, rá soj naꞌ. Taj maꞌ. 17Dan me se chruun sa̱ꞌ roꞌ, ma̱n chruj chá raa̱ a. Ne̱ chruun nij roꞌ, ma̱n chruj nij raa̱ uún a. 18Chruun sa̱ꞌ roꞌ, se̱ guun cuma̱n chruj nij raa̱ maꞌ. Ne̱ chruun nij roꞌ, se̱ guun cuma̱n chruj sa̱ꞌ raa̱ maꞌ. 19Ne̱ sese nuviꞌ chruj sa̱ꞌ raa̱ ꞌo̱ chruun, ne̱ aꞌneꞌ nii man chruun yoꞌ, ne̱ axríj yaꞌan nii man chruun yoꞌ na̱nj ado̱nj. 20Dan me se sese niꞌya̱j soj man yuvii̱ ne̱ queneꞌe̱n soj da̱j vaa ꞌyaj yuvii̱, ne̱ xca̱j soj cuentá da̱j vaa nimán yuvii̱ ado̱nj.
Cataj Jesús me síí ca̱yáán ga̱ Yaꞌanj asa̱ꞌ guun chij Yaꞌanj a
21’Neꞌen soj se vaa ma̱n ndoꞌo yuvii̱ taj rihanj se vaa ꞌu̱nj me Síí ꞌNi̱j Raꞌa man nij soꞌ, tza̱j ne̱ tuꞌva rmaꞌa̱n taꞌa̱j nij soꞌ na̱nj ado̱nj. Né cunuda̱nj nij síí taj neꞌen manj caꞌa̱nj ca̱yáán ga̱ Yaꞌanj asa̱ꞌ guun chij Yaꞌanj maꞌ. Tana̱nj ina̱nj nij síí uno rihaan Réé ꞌu̱nj síí nicu̱nꞌ xta̱ꞌ me síí ca̱yáán ga̱ soꞌ na̱nj ado̱nj. 22Ne̱ güii caꞌne̱ꞌ ꞌu̱nj cacunꞌ cheꞌé yuvii̱ me se cuma̱n ndoꞌo yuvii̱ cata̱j rihaan ꞌu̱nj a: “So̱ꞌ roꞌ, me Síí ꞌNi̱j Raꞌa man núj ado̱nj. ꞌO̱ se cataꞌ tuꞌva núj se‑chu̱vií so̱ꞌ ga̱a nataꞌ núj nana̱ rqué so̱ꞌ man núj rihaan yuvii̱ do̱ꞌ, ga̱a quirii núj nana̱ chre̱e nimán yuvii̱ do̱ꞌ, ga̱a quiꞌyaj ndoꞌo núj suun sa̱ꞌ noco̱o do̱ꞌ ado̱nj.” Da̱nj cata̱j nij yuvii̱ yoꞌ rihaan ꞌu̱nj vaa güii na̱nj ado̱nj. 23Ga̱a ne̱ cata̱j yá ꞌu̱nj rihaan nij yuvii̱ a: “A̱ doj ne que̱neꞌén ꞌu̱nj man soj maꞌ. Ma̱an síí ꞌyaj ina̱nj cacunꞌ me soj na̱nj ado̱nj. Naxu̱u̱n soj man soj rihanj á.” Da̱nj cata̱j ꞌu̱nj rihaan nij síí ꞌyaj cacunꞌ vaa güii na̱nj ado̱nj.
Ase vaa síí uneꞌ xraan veꞌ vaa síí uno sa̱ꞌ rihaan Jesús a
24’Dan me se a̱ me maꞌa̱n síí uno sa̱ꞌ nana̱ nihánj nana̱ cataj xnaꞌanj ꞌu̱nj rihaan soj ne̱ ꞌyaj soꞌ nda̱a vaa taj ꞌu̱nj, ne̱ ase vaa ꞌo̱ síí cuneꞌ veꞌ tucuá rihaan yuvej vaa soꞌ ado̱nj. Síí cuneꞌ veꞌ yoꞌ me se síí acaj ndoꞌo cuentá me soꞌ ado̱nj. 25Ga̱a ne̱ caꞌnaꞌ maa̱n, ne̱ goꞌ ndoꞌo maa̱n raa̱ veꞌ, ne̱ cavii niꞌyo̱j chráá, ne̱ caꞌnaꞌ goꞌ tacóó veꞌ, ne̱ caꞌnaꞌ uxrá nana̱ yuva̱a̱, ne̱ goꞌ rihaan veꞌ yoꞌ a. Tza̱j ne̱ ne cane̱e̱ veꞌ yoꞌ a̱ maꞌ. ꞌO̱ se xraan ina̱nj ne veꞌ yoꞌ rihaan yuvej na̱nj ado̱nj. 26Tza̱j ne̱ síí naꞌvej rá cuno̱ nana̱ nihánj nana̱ cataj xnaꞌanj ꞌu̱nj rihaan soj me se ase vaa síí cuneꞌ veꞌ rihaan yoꞌóó chru̱u̱ vaa soꞌ ado̱nj. Ne̱ síí niꞌyo̱n rmi̱i̱ me soꞌ chugua̱nj. 27Ga̱a ne̱ caꞌnaꞌ uxrá maa̱n yuva̱a̱ goꞌ yoꞌ xráá veꞌ, ne̱ cavii niꞌyo̱j chráá, ne̱ caꞌnaꞌ na xe̱e̱ goꞌ na xe̱e̱ tacóó veꞌ, ne̱ caꞌnaꞌ uxrá nana̱ yuva̱a̱ ne̱ goꞌ xráá veꞌ yoꞌ a. Veé dan, ne̱ canee nu̱ꞌ veꞌ tucuá síí niꞌyo̱n yoꞌ na̱nj ado̱nj.
28Veé dan, ne̱ quisíj tucuꞌyón Jesús nu̱ꞌ nana̱ nihánj rihaan nij yuvii̱, ga̱a ne̱ caráyaꞌa̱nj ndoꞌo nij yuvii̱ noco̱ꞌ man soꞌ cheꞌé stucua̱nj soꞌ a. 29ꞌO̱ se xcaj nij yuvii̱ cuentá se vaa ase vaa tucuꞌyón ꞌo̱ síí uun chij ndoꞌo roꞌ, da̱nj tucuꞌyón Jesús, rá nij soꞌ a. Ne̱ cu̱u doj tucuꞌyón soꞌ rihaan nij síí naquiꞌyaj cu̱u stucua̱nj Moisés, rá nij soꞌ a.
Iliyochaguliwa sasa
San Mateo 7: trc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© Wycliffe Bible Translators, Inc. 2024 segunda versión electrónica