Matta 4
4
Fakware a swe Yesu
(Mar 1:12-13; Luk 4:1-13)
1Fi̱ki̱m Kwamamu a yikani ki̱ni Yesu a di̱si̱lachangi̱n ko ke n Setan a swe ki̱n. 2A kuteng ki̱ku a da̱u dimwen diti wan taana, kum n ti kukongu, chun a bu ki̱n. 3Fakware, naba swa̱ka̱ke, a be we di̱ki̱ne ko, “Ka mun nang Bwe Kwama, yi kali yiyu mwi a kau ki̱danne.”
4N Yesu a ke ko, “A mwal ko,
‘Chi ki̱nii ti̱kuriye n ke kana chabtu.
Aya ka nang di̱di̱le di̱kwa̱l
di̱du ki̱chiredu a di̱Kwamane.’ ”
5Yinu n Setan a ki̱la yal Yesu, a yika Wurchalima, a fi a suu a la chi we Kan Kwama di̱duna Wurchalimanu. 6A yi ki̱n ko, “Ka mun nang Bwe Kwama, rii sutubu we ti̱mu, di̱ne a mwal ko,
‘N Ki̱n ka yi ni̱bu ti̱tumbi̱ri ki̱mu ya̱m.
Ka konu ki̱ni fa̱li chi
Ko ke ngaudu bewure.’ ”
7Yinu n Yesu a yiti̱ ki̱n ko, “A mwalmwale, a ne mwang swe Tewuduwe Kwama mo!”
8N Setan a ki̱la yal ki̱n a di̱kun di̱swa̱mi̱n, fi a ya yungi̱n ki̱n yaati ti̱ti̱niyu n ti dwiyen chi̱tu kwang. 9Yinu a yi ki̱n ko, “Ka n sung, n siiye, mang ni̱nu ki̱ni kwang.”
10N Yesu a yi ki̱n ko, “Setan, yika mi̱n a fi! A mwal ko, ‘Dela Tewuduwe Kwama, sii ki̱n ki̱kun!’ ”
11Yinu n Setan a du ki̱n. Ni̱bu ti̱tumbi̱ri Kwamamu a be, a dela ki̱n.
Yesu a mwe nangang kangu a Ka̱lili
(Mar 1:14-15; Luk 4:14-15)
12Yo n Yesu a nwe ko n Yowana a le di̱bi̱nti̱le, a kun a yika Ka̱lili. 13N ki̱n a du Nasa̱ret a ki̱la Kafanawu wu a ki̱ti̱ku La wurdune, wu a ki̱dire ti̱m Chabulum n ti Nafi̱taliye. 14Ke a ri chi fa̱ku Yichaya a fwaatu ko,
15“Ti̱nwei, ni̱bu Chabulum n ti ni̱bu Nafi̱talimu,
n ti̱n bi̱bu ta da a wa̱re
la wurduni̱mu n ti kangu
ba̱la̱ng we ki̱ti̱ku Wurduni̱mu,
n ti kuu Ka̱lili bi̱bu ni̱bu
n ke ni̱bu Yafudam a dawemu.
16Ni̱bu bi̱bu a no swe
a da ki̱liyemu, a ku yiiki̱ku,
Bi̱bu a no swe a ki̱liye ki̱letiyemu,
a ya yiiki̱ku.”
17A mwetuwe ki̱dang kangu, n Yesu ki̱ma di̱mwaru ko, “Ti̱wo ki̱ti̱mu, di̱ne Yaa Kwama a mwatawe.”
Miyari̱mu n Yesu a mwe a yali̱mu
(Mar 1:16-20; Luk 5:1-11)
18Aya n Yesu ki̱yadu a ki̱ti̱ku la Ka̱liliyang, a ku kebu chi burau ki̱ tau chi̱ngi, n Simun wu ki̱yalu ko m Biti̱r n ti keko n Andi̱riya. N chi ki̱mau dwa̱kai chiyu a far di̱dun di̱ne n chi ki̱tabachi̱ngiye. 19N Yesu a yal chi ko, “Ti̱bumite, mang miya chimi̱nu tani̱n yale ni̱bu ka bumiti̱ni̱m.”
20Bi̱nabi̱na bi̱ki̱mu a kaibu ki̱swi a du kuli̱n chi̱nu, a bunti̱ Yesu.
21Ki̱du fikoye, a ku bi̱kam kebu chi burau, n Yakubu bwe Sa̱badi n ti keko n Yowana. N chi a fi̱l kwa̱mbi̱re mwe ki̱do dwa̱kai chiyu n ti te chi n Sa̱badi, n Yesu a yalti̱ chi we fiko. 22Bi̱nabi̱na n chi a du te chi we kwa̱mbi̱re mwe a bunti̱ Yesu.
N Yesu a ma mayaku a beti̱n buri̱ntu
(Luk 6:17-19)
23N Yesu ki̱bwa̱lu we Ka̱lili ki̱miyadu we kambi muraku ni̱bu Yafudamitu, ki̱mwa ya̱m bi̱li̱m bi̱bu a Yaa Kwamamu, ki̱bera buri̱n ti kwang n ti bi̱bu bwiyu a li̱mbi̱mu.
24Ya̱m Yesumu a ti̱ran we ti̱m Suriyami kwang. Ni̱bu a le ki̱be ki̱mi̱nedu ki̱ni ni̱bu buri̱ni̱mu nabwen n ti bi̱bu bwiyu a li̱mbi̱mu n ti ni̱bu ki̱nwe riyemu n ti ni̱bu ki̱fi̱bti n ti bi̱bu ki̱kuli ki̱madi̱mu n ti bi̱ngi̱rmani̱mi kwang, a ya beku. 25Ki̱tuu ni̱be nabwen a bunti̱ ki̱n we Ka̱lili n ti Dikafoli, n ti Wurchalima n ti Yafudiya n ti ti̱mu a wuka ki̱swi la Wurdune.
தற்சமயம் தேர்ந்தெடுக்கப்பட்டது:
Matta 4: Tula
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2015, The Nigeria Bible Translation Trust and Wycliffe Bible Translators, Inc. All rights reserved.