Génesis 11
11
Aju ja ma'xix twa'l tuj Babel
1Tuj tq'ijlalil ojtxi junx yol b'a'n kyu'n kykyaqil xjal twitz tx'otx'. 2Tej kyetz xjal tuj tjawitz q'ij o knet jun chq'ajlaj kyu'n tuj tx'otx' Sinar, ex axtzun e najan. 3E oktzun ten yolil kyxolx ex kyma kyja': Qo', qb'inchan kub' lagriy, ex qq'o'nkx tuj q'aq' tu'n ttzq'ajset, che chi. Ajb'entzun lagriy te t-xel ab'j, atzun asfalt ajb'en kyu'n te t-xel mescla. 4Kymatltzun kyja': Qb'inchan jaw jun tnam ex jun ja ma'xix twa'l ex japun pon twa'l max twitz kya'j, tu'n tkyaj jun nab'l qe, ex tu'n mi'n qel sputj twitz tx'otx', che chi.
5Ku'tztzun Qman ke'yilte aju tnam ex aju ja ma'xix twa'l in b'anttoq kyu'n qe xjal. 6Tmatzun kyja': Lu qe xjal lu junx kytanmi, ax ikx junx yol b'a'n kyu'n; ma tzyet aq'untl lu kyu'n ex mlay che mayet ti'j ju in kub' kyximan tu'n kyb'inchante. 7Ja'lotzun qo', qo ku'x tzpet-salte kyyol tu'ntzun mi'n tel tnik' jun ti'j tyol juntl, chi Qman.
8Iktzun tten e el t-sputun Qman qe xjal tuj tkyaqil twitz tx'otx', ex kyaj kykolin aq'untl ti'j tnam. 9Tu'ntzun jlu, Babel tb'i tnam ok, tu'nju atzun kub' ttzpet-sa'n Qman kyyol kykyaqil xjal. Tujtzun tnam lu e je'l t-sputun tuj tkyaqil twitz tx'otx'.
Qe tiyjil Sem
1 Crónicas 1.24-27
10Atzun tx'olb'ab'l jlu kyi'j tiyjil Sem.
Otoq japun Sem twi' jun syent ab'q'i tej tul itz'j Arfaxad aju tky'ajal, kab'e ab'q'i tik'len q'eqab'. 11Titz'jlenxi Arfaxad, anq'intl Sem jwe' syenttl ab'q'i, ex tzajtzun txqantl tky'ajal ex tme'jel.
12Otoq japun Arfaxad twi' 35 ab'q'i tej tul itz'j Sala aju tky'ajal. 13Titz'jlenxi Sala, anq'intl Arfaxad 403 ab'q'i, ex tzajtzun txqantl tky'ajal ex tme'jel.
14Otoq japun Sala twi' 30 ab'q'i tej tul itz'j Heber aju tky'ajal. 15Titz'jlenxi Heber, anq'intl Sala 403 ab'q'i, ex tzajtzun txqantl tky'ajal ex tme'jel.
16Otoq japun Heber twi' 34 ab'q'i tej tul itz'j Peleg aju tky'ajal. 17Titz'jlenxi Peleg, anq'intl Heber 430 ab'q'i, ex tzajtzun txqantl tky'ajal ex tme'jel. 18Otoq japun Peleg twi' 30 ab'q'i tej tul itz'j Reu aju tky'ajal. 19Titz'jlenxi Reu, anq'intl Peleg 209 ab'q'i, ex tzajtzun txqantl tky'ajal ex tme'jel.
20Otoq japun Reu twi' 32 ab'q'i tej tul itz'j Serug aju tky'ajal. 21Titz'jlenxi Serug, anq'intl Reu 207 ab'q'i, ex tzajtzun txqantl tky'ajal ex tme'jel.
22Otoq japun Serug twi' 30 ab'q'i tej tul itz'j Nacor aju tky'ajal. 23Titz'jlenxi Nacor, anq'intl Serug kab' syenttl ab'q'i, ex tzajtzun txqantl tky'ajal ex tme'jel.
24Otoq japun Nacor twi' 29 ab'q'i tej tul itz'j Taré aju tky'ajal. 25Titz'jlenxi Taré, anq'intl Nacor 119 ab'q'i, ex tzajtzun txqantl tky'ajal ex tme'jel. 26Otoq japun Taré twi' 70 ab'q'i tej tul itz'j Abram, Nacor ex Harán, aqeju tky'ajal.
Qe tiyjil Taré
27Atzun tx'olb'ab'l jlu kyi'j qe tiyjil Taré.
Ate Taré tman Abram, Nacor ex Harán, ex ate Harán tman Lot. 28Nej kyim Harán twitz tman tujx tx'otx' jatum ul itz'j, tuj tnam Ur kyxol qe aj Caldeo.
29Moje'tzun Abram tuk'il Sarai, atzunte Nacor moje' tuk'il Milca aju tme'jel Harán ex tanb' Isca. 30Minti'toq tal Sarai tu'nju mib'antoq alin.
31Etztzun Taré tuj tnam Ur kyxol qe aj Caldeo tu'n tul tuj tx'otx' Canaán, ex tzaj tuk'in Abram aju tky'ajal, tuk'ix Lot aju tal tchman ex tky'ajal Harán, ex tuk'ix Sarai aju tlib'. Tejtzun kyul tuj tnam Harán, axtzun e kyaj ten najal. 32Japun Taré twi' 205 ab'q'i, ex kyim ax tuj tnam Harán.
ప్రస్తుతం ఎంపిక చేయబడింది:
Génesis 11: MAMNO
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Mam de Huehuetenango (ortografía reformada): CHIK'B'AB'L TI'J TU'JIL TYOL DIOS TUJ QYOL © Sociedad Bíblica de Guatemala 2011.