Jɛnɛsis 13
13
Abram kɛ Lot gbala mli
1Abram kɛ eŋa kɛ nɔ fɛɛ nɔ ni eyɔɔ lɛ je Ijipt, ni Lot fata ehe; amɛtee wuoyigbɛ. 2#Abɛi 10.22 No mli lɛ Abram ena nii babaoo: shĩaŋ kooloi kɛ jwiɛtɛi kɛ shika tsuru. 3Etsa egbɛfãa lɛ nɔ fiofio kɛjɛ wuoyigbɛ aahu kɛtee Betel. Eyashɛ he ko yɛ Betel kɛ Ai teŋ, he ni eshi ebuu lɛ yɛ ni ema afɔleshãa latɛ yɛ tsutsu ko lɛ. 4#Jɛn 12.8 Biɛ Abram ja Yehowa yɛ.
5Lot ni kɛ Abram nyiɛ lɛ hu yɛ toi kɛ tsinai kɛ bui, 6ni no hewɔ lɛ, shikpɔŋ lɛ faaa hãaa amɛ bɔ ni amɛyi enyɔ lɛ fɛɛ amɛaahi he kome, ejaakɛ amɛnibii fa. 7Kɛkɛ ni bei ba Abram koolookwɛlɔi lɛ kɛ Lot koolookwɛlɔi lɛ ateŋ. Nɛkɛ be nɛɛ mli lɛ Kanaanbii lɛ kɛ Perizbii lɛ yɛ shikpɔŋ lɛ nɔ.
8 #
Lal 133.1
Kɛkɛ ni Abram kɛɛ Lot akɛ, “Kaahã bei miiba mi kɛ bo teŋ kɛ mikoolookwɛlɔi lɛ kɛ okoolookwɛlɔi lɛ ateŋ, ejaakɛ nyɛmimɛi ji wɔ. 9Shikpɔŋ muu lɛ fɛɛ kã ohiɛ nɛɛ. Tse ohe yɛ mihe. Kɛji okɔ abɛkugbɛ lɛ, no lɛ makɔ ninejurɔgbɛ; ni kɛji okɔ ninejurɔgbɛ lɛ, no lɛ makɔ abɛkugbɛ.”
10Kɛkɛ ni Lot wo ehiɛ nɔ ni ekwɛ shikpɔŋ lɛ kɛkpe, ni ena akɛ Yordan jɔɔ lɛ fɛɛ yɛ frɔ̃frɔ̃ aahu kɛtee Zoar tɔ̃ɔ. Etamɔ Yehowa trom lɛ aloo Ijipt shikpɔŋ lɛ. Nɛkɛ be mli lɛ, Yehowa kpãtãko Sodom kɛ Gomora hiɛ. 11Kɛkɛ ni Lot kɔ Yordan jɔɔ lɛ fɛɛ, ni efã kɛtee bokãgbɛ. Bɔ ni fee ni amɛyi enyɔ lɛ amɛgbala mli nɛ. 12Abram hi Kanaan shikpɔŋ lɛ nɔ, ni Lot hi maji ni yɔɔ Yordan jɔɔ lɛ mli lɛ amli. Lot shi ebuu lɛ shii abɔ kɛyashi be ni eyashɛ Sodom. 13#Jɛn 18.20; 19.4-9 Shi Sodombii lɛ yiwalɔi ji amɛ, ni amɛfeɔ esha amɛshiɔ Yehowa.
Abram fã kɛtee Hebron
14Be ni Lot kɛ Abram egbala mli sɛɛ lɛ, Yehowa kɛɛ Abram akɛ, “Wo ohiɛ nɔ, ni ojɛ he ni oyɔɔ lɛ okwɛ kooyigbɛ kɛ wuoyigbɛ kɛ bokãgbɛ kɛ anaigbɛ shikpɔŋ ni onaa nɛɛ, 15#Bɔf 7.5; Jɛn 12.7 bo kɛ oshwiei mikɛbaahã kɛaatee naanɔ. 16#Jɛn 28.14; Num 23.10 Mahã oshwiei afa tamɔ shikpɔŋ mlu, ni kɛji mɔ ko aaanyɛ shikpɔŋ mlu akane lɛ, belɛ aaanyɛ oshwiei lɛ hu akane. 17Tee shi, nyiɛmɔ shikpɔŋ lɛ nɔ kɛtsɔ̃ ekɛlɛ kɛ elɛɛmɔ nɔ, shi bo mikɛbaahã”. 18#Jɛn 14.13, 24 Kɛkɛ ni Abram fã ebuu lɛ, ni eba ebahi Mamre tsei krɔŋkrɔŋi lɛ ni yɔɔ Hebron lɛ amasɛi, ni ema afɔleshãa latɛ yɛ jɛi ehã Yehowa.
ప్రస్తుతం ఎంపిక చేయబడింది:
Jɛnɛsis 13: NEGAB
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Bible in Ga Language © Bible Society of Ghana, 2020.