Matyê 20
20
Saghʼ-ləghaa lə̂ pəghaŋə-faʼ pi pə́ fúŋ gháp lə̂ faʼ pə̂ məku-mə́ku
1Yěso nkə̂ ncí ndâʼ ngô: «Ə no Ləfou Sê* pə́ pə́ ghíʼ no cǒ ŋuu yi a lə mə̂ʉ mbaʼa-mbaʼ, ńgwó ndǒu pəghaŋə-faʼ pi a wo cóghʼ nkâʼ zʉ́. 2Gháp pə pəghaŋə-faʼ tsuŋtə ghíʼ a wo ŋə́ tâʼ paghʼə nkâp lə́ tâʼ ŋuu lə̂ leʼé lâʼ. A cʉ̂ʼ ntə́u gháp nkâʼ zʉ́#20.2 Paghʼə nkâp laghʼ mbə̂ nkâp yi pə́ laghʼ mbêi tâʼ ngaŋə-faʼ lə̂ leʼé-mbî.. 3Pəmə́nəu ləpfuʼú pou nkûʼ, a kə̂ ncí nkwár nzeʼ zʉ́, ńjwó pəcó pəghaŋə-faʼ kə̂ ncí ntə́ʉ məfaghʼə́ ndə̂u, káa pə́ ghʉ gháp có zə̂u. 4A lâʼ lə́ páp ngô: “Pei wô zéi nkâʼ məŋ fâʼ. Məŋ ngwo ghʉ̌ láptə́ tsóʼ faʼ zéi.” 5Pêi pye lər lə̂ nkâʼ. Ngaŋə nkâʼ ghʉ̂ ḿbə́ ntə̌ʉ-nəu, ə́ nkə́ ncí nkwár nzeʼ zʉ́, ə́ mbou mbə́ mpfu mbwǒr-nəu lə́ pəmə́nəu pə́tárə́, ə́ nkə́ ncí nkwár, ə́ njwó pəghaŋə-faʼ, ə́ nkə́ ngʉ́ pə́ yə́rə́. 6Ə́ ntáa ḿbə́ mpfu-ngwʉ̂ lə́ pəmə́nəu pə́taa, a kwâr, ə́ njwó pəcó pəghaŋə-faʼ tə̂ʉtə, a túŋu gháp ngô: “Ńté hó pei tə̂ʉtə yʉʼ wə̂ tə fú mbaʼa-mbaʼ tə́ pə́ ngʉ̂ có zə̂u?” 7Gháp pwor ngô: “Ə́ pə́ pə́ ńgó cǒ ŋuu kə́ fûŋ yé wághʼ lə̂ faʼ.” A lâʼ lə́ páp ngô: “Pei tu, ə́ ngwô zéi nkâʼ məŋ fâʼ.”»
8Ə mpfu yi pə́ tsôʼ faʼ pôu nkûʼ, ngaŋə nkâʼ tsə̂tə lə́ ŋuu yi a nâŋtə məzə̂u mé ngô: «Fúŋ pəghaŋə-faʼ, ə́ ŋə́ nkâp zap, ə́ njǐ lə́ pye pi məŋ fǔŋ gháp lə̂ faʼ pə́ nzəm lə̂, ə́ ngwó nkə́u lə́ pye pi məŋ yǎa ə́ njǐ lə́ páp mbaʼa-mbaʼ. 9Pye pi gháp jǐ záp faʼ lə́ pəmə́nəu pə́taa mpfu-ngwʉ̂ tô, pə́ ŋə̂ tâʼ paghʼə nkâp lə́ maa wǒwó lə́ páp. 10Pye pi gháp yǎa nji faʼ mbaʼa-mbaʼ kə̂ ntô záp, ə́ mə́ nkwâŋ záp pə́ ńgó zap nkâp wo nyéʼ záa, lə́ pə́ pou ŋə́ pə́ tâʼ paghʼə nkâp lə́ maa wǒwó lə́ páp. 11Gháp ghi pfú zap nkâp, ə́ mə́ ntsâtə tə́poŋ ńté ngaŋə nkâʼ. 12Gháp pə̂ ndâʼ ngô: “Pye pwo tó pə́ nzəm, gháp faʼ pə́ ndaʼ tâʼ mə́nəu, o kə̌ mbǒu mbéi gháp pə́ ghíʼ paghʼ, lə́ mə́i paghʼ yǎa njǐ faʼ pə̂ məmbaʼa-mbaʼ, paghʼ kə̌ fǎʼ pə́ tə zə̂tə, mə́nəu pə̂ ntôu wághʼ.” 13Ngaŋə nkâʼ pwôr lə́ cǒ tâʼ ŋuu lə́ páp ngô: “Ə sə̌u ghâa, məŋ nkə́ fâa ghâa có no mbó gho. Poghʼo yǎa ntsuŋtə́ tə ḿbə́ tâʼ ŋuu, ghíʼ o wo pfú tâʼ paghʼə nkâp lə̂ leʼé lâʼ. 14Ko nkâp zô, ə́ fú mbəʉ məŋ ə́ ncʉ́ŋtə́. Ə́ wó lə́ ŋuu yi a tǒ pə́ nzəm, mə́i məŋ njwǒ ńgó n ngwo ŋə́ ndʉŋ-ndʉŋ zə̂u yi n ŋə̌ lə́ gho lə́ zʉ́. 15Məŋ ngwo lə̂ ndághʼ nkâp zâa ńgʉ́ zə̂u yi məŋ nkǒŋ, kâa pə́ yə́rə́ mo? Kəʉ o záŋə lóŋ ńté pə́ no yi o jwǒ n mbə̂ ngaŋə poŋə́ ntə̂ʉ?” 16Ə́ pə̂ yə́rə́, Yěso kə̂ ncʉ́ʼ ndâʼ ngô: Pəlyəghʼ-nzəm táa cʉ́ʼ pəluŋ-mbi, pəluŋ-mbi cʉ́ʼ pəlyəghʼ-nzəm.»
Yěso kə̂ ncí mə́ mbwʉ̂ ghíʼ a wo kwʉ́ pǒu zʉ́ʉ lə́ ləwʉ̂
(Mks 10.32-34; Lks 18.31-34)
17Yěso pə̂ nkôʼ lə́ Yelúsalêm, ə́ fúŋ ngaŋə-jyêʼ-no* yé ntsap pwô lə̂ ləghə̂m, lə̂ záp pə pǎp yʉʼ, gháp pǎp pə̂ ndə̂r, a lâʼ lə́ páp ngô: 18«Pei tsúŋú nzúʼ shʉʼʉ, paghʼə pə́ laŋə́ mə́ nkôʼ lə́ Yelúsalêm gháʼa, ə́ kə́u wó, pə́ féi Môu Ŋuu* ńŋə́ lə́ pətə́-ndə̂ pənuŋú-poʼ Sê* gháp pə pəkeʼtə́-lə́pə́ʉ Mə̌usə̂i*. Gháp fêʼ yé, ə́ ntághʼ ńgó a wo kwʉ́, 19ə́ féi yé ńŋə́ mbó pətəpə̌i no Sê, gháp zôutə́ yé, ə́ ndǎghʼ ngwaa ńsə́u yé, ə́ nkʉ̌ʉ yé lə̂ tʉ̌-mbʉ̂ŋtə. Â póu nzʉ́ʉ lə̂ ləwʉ̂ lə̂ mbâatə leʼé tárə́.»
Mə́ pə Jâghʼ gháp Jâŋ pə̌ ndou yʉʼ jwǐ ńté gháp
(Mks 10.35-45; Lks 22.25-27)
20Mə́ pə Jâghʼ gháp Jâŋ, ghəpə́ Zebede, lâghʼ gháp ńtó mbi Yěso, ə́ nkʉʼtə́ sê lə̂ ndôu có zə̂u mbó zʉ́. 21Yěso túŋu yé ngô: «O tsâa ńgó n ngʉ́ gháʼá?» A pwôr ngô: «Məŋ mə̌ ntsâa ńgó o pə́i mbó məŋ ńgó, o táa pə́ fou, ghəpə́ zâa yo pwô nyáŋə́ mbəʉ gho, tâʼ pə́ lə̂ ndyəghʼə́ pô gho yi təʉ, cǒ pə́ lə̂ ndyəghʼə́ pô gho yi kwap.» 22Yěso pwôr ngô: «Káa pei jí wéi zə̂u yi pei gháʼa ndôu zěi. Pei kuʼ lə̂ nó ntə̂uʼ ngwôʼ yi n ndər lə̂ nǒ wó?» Gháp pwor ngô: «paghʼ kuʼ lə̂ nó.» 23Yěso lâʼ lə́ páp ngô: «Pei táa nó ntə̂uʼ zâa. Lə́, ə́ ngwǒ lə̂ nyáŋə́ ŋuu lə̂ ndyəghʼə́ pô ghâa yi təʉ kəʉ pə́ yi kwap mə́i káa məŋ lə̂ ngwô ghâa lə̂ ŋə́ lə́ ŋuu. Tə́ ghâa lə̂ pə̌ njî pye pi a lə tsuŋu mêi məyʉʼ, ə́ ndághʼ ḿbâp gháp.»
24Pəcó ngaŋə-jyêʼ-no* Yěso ləghə̂m lei tə nzúʼ no yi gháp laʼá, ə́ nzáŋə́ lóŋ ńté pəfə̌r pêi pə́pwô. 25Yěso fûŋ gháp pə́tsəm, ə́ ndǎʼ lə́ páp ngô: «Pei pə̌ njî ńgó pəfou pətəpə̌i no Sê pə́ sâʼ lâʼ gháʼá, ə́ nôʼtə pye lâʼ páp, pye njwǐ pou mə́ ŋə̂i páp ŋə̌i. 26Lə́ kâa kə́ mbôŋ yé ńgó ə́ pə̂ təcər pei, ə́ mbə́ yə́rə́. Ŋuu lə̌i mə́ nkôŋ lə̂ ḿbə́ ŋuu njwǐ təcər pei, mə́i ə́ pôŋ ńgó a cʉ́ʼ môu-faʼ wei. 27Ŋuu lə́ pei lə̌i mə́ nkôŋ lə̂ ḿbə́ nduŋ-mbi təcər pei, mə́i ə́ poŋ ńgó a pə́i lə̂ ḿbə́ puʼ zéi. 28Ə́ kə́ mbə́ ndʉŋ-ndʉŋ ghíʼ káa Môu Ŋuu* lə tó yé ndəu ndesé, lə́ pə́ yi pye-mə́soŋ wo fǎʼ mbó zʉ́, a lə tô pə́ lə̂ fáʼ mbó pye-mə́soŋ, ə́ fǎʼ tə ŋə́ tû yé lə̂ ndághʼ ńzə́u tû pye-mə́soŋ.»
Yěso ghʉ pəfwoghʼ-mə́nyôghʼ pə́pwô jwô yʉʼ
(Mks 10.46-52; Lks 18.35-43)
29Yěso gháp pə ngaŋə-jyêʼ-no* yé ghʉ mə́ fû cər túsoŋ Yeríko nkwár, ə nou lâʼ tsə̂ʉ nzəm zʉ́. 30Pəcó pəfwoghʼ-mə́nyôghʼ pə́pwô pi gháp nyáŋ nkaŋ laŋə́-ndə̂u, zûʼ ńgó Yěso pə̌ nděi yʉʼ wó, ə́ njǐ lə̂ ngêʼtə́, ndâʼ ngô: «Ə́ Nde, ŋuu lə̂ ngər-ndə̂ fou Ndavîd tsáa mə́jʉ̂ŋ mághʼ.» 31Ə pye tə nzáa sâʼ gháp ńgó gháp nâʼ, lə́ gháp fû myaghʼə́ ngáʼ lə̂ ngêʼtə́ ə́ ndǎʼ ngô: «Ə́ Nde, ŋuu lə̂ ngər-ndə̂ fou Ndavîd tsáa məjʉ̂ŋ mághʼ.» 32Yěso tə̂ʉ, ə́ fúŋ gháp, ə́ ntúŋú gháp ngô: «Pei tsâa ńgó n ngʉ̂ gháʼá lə́ pei?» 33Gháp pwor ngô: «Nde, ghʉ̌ ńgó mənyôghʼ mághʼ jwó yʉʼ.» 34Yěso tsâa-mə́jʉ̂ŋ máp, ə́ nzápə́ mbô mé lə̂ nyôghʼ máp, ə́ kə̂ ntóghʼ njí lə̂ njwó yʉʼ, gháp tsə̂ʉ nzəm zʉ́.
ప్రస్తుతం ఎంపిక చేయబడింది:
Matyê 20: NLA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి