Jã Sɛbɛ 1
1
A ƳƐRƖ̃ ƲLƆ NA Ɩ A CÃA NƖ A BAAFƲ
1A lɛ a tẽw na ma dãa be be sɛr wa, ɩ̃ a ʋlɔ na ɩ a Ƴɛrɩ̃ de na nĩe be be. A ʋna Ƴɛrɩ̃ be nɩ na a Naaŋmɩn, ɩ̃ a Ƴɛrɩ̃ ʋlɔ ɩ na a Naaŋmɩn. 2Ʋ be nɩ na a Naaŋmɩn a korĩ-cɛ jaa. 3Ʋlɔ ɩ̃ maal a yele a jaa. Bom ma be be ʋ na ma maal wa. 4A baafʋ be na a ʋ jie ɩ̃ a baafʋ ʋlɔ ɩ na cãa a nɩbɛ jie. 5A cãa caara na a libe pʋɔ ɩ̃ a libe ma tʋɔ ʋ wa.
6Daba kãw dãa na be be a Naaŋmɩn na tʋ̃, a ʋ yuor dɩ a Jã. 7Ʋ wa na na ɩ a yel-mɩ̃ɛ ƴɛr-mana, na ʋ mana a cãa ƴɛrɩ̃, a mɩnɛ a nɩbɛ ba jaa na tʋɔ tɛrɛ a ƴɔ̃w-nyãa. 8A ʋlɔ mɩ̃ɛ ma ɩ a cãa wa, ɩ̃ ʋ ɛ̃ɛ na wa na mana a cãa ƴɛrɩ̃. 9A cãa ʋlɔ ɩ na a yel-mɩ̃ɛ cãa na waara a tẽw pʋɔ caara a nɩbɛ ba jaa.
10Ʋ dãa na be a tẽw pʋɔ, ɩ̃ a ʋlɔ ɩ̃ maal a tẽw, ɩ̃-cɛ a tẽw nɩbɛ ma dãa bɔ̃w ʋ wa. 11Ʋ wa na a ʋ mɩ̃ɛ tẽw, ɩ̃ a ʋ mɩ̃ɛ nɩbɛ ma sɔw de ʋ wa. 12Ɩ̃-cɛ a bala na sɔw de ʋ tɛrɛ nɩ ʋ a ƴɔ̃w-nyãa, ʋ kʋ ba na sɔr a ba lɩɛb ɩ a Naaŋmɩn bibiir. 13A dɔwfʋ ʋlɔ ma ɩ a tẽw na dɔwfʋ wa; aa mɩ yi nɩrɛ pʋ-tɩɛrʋ̃ pʋɔ, mɩɩ daba tɩɛrʋ̃ pʋɔ wa, ɩ̃-cɛ a Naaŋmɩn ɩ̃ ɩ a ba Sãa.
14A Ƴɛrɩ̃ ʋlɔ lɩɛbʼã ɩ nɩrɛ, ɩ̃ jɛ a sɩ sɔ̃w. Sɩ nyɛ na a ʋ yo-yifʋ na ɩ a yo-yifʋ ʋlɔ a Bi-dab-daadaa na pɔw a ʋ Sãa jie. A ʋ maalfʋ nyɩrɩ̃ na vɩɛlɛ, ɩ̃ ʋ mɩ ɩ na yel-mɩ̃ɛ sʋbɔ. 15A Jã ƴɛrɛ na a ʋ ƴɛrɩ̃ nɩ kpɛ̃w yele:
“A naa ɩnɛ ɩ̃ dãa yele nyɩ áa ʋlɔ na be a ɩ̃ puorɩ̃ waara ɩ na kpɛ̃ɛ a ɩ̃ ɩnɛ, a-na-ɩ ʋ dãa na de nĩe be be ɩ̃ a ba wa bɩɛr dɔw ma.”
16A maal-vɩlaa a jaa yi na a ʋ jie ma ƴala waara a sɩ jie dɔɔlɔ taa. 17A-na-ɩ a Mowisi a Naaŋmɩn kʋ a ƴɛr-kpɛn ʋ tɩɩr, ɩ̃-cɛ a maal-vɩlaa nɩ a yel-mɩ̃ɛ yi na a *Jeeju-Kirisi jie. 18Nɩ-bõ-ƴen ma dãa nyɛ a Naaŋmɩn wa, ɩ̃-cɛ a Bi-dab-daadaa na ɩ a Naaŋmɩn, na be a Sãa lõboorɩ̃, ʋlɔ ɩ̃ miil a nɩbɛ a ba bɔ̃w ʋ.
A JÃ-BATII YEL-MƖ̃Ɛ ƳƐRƖ̃
(Mat 3.1-12, Mar 1.1-8, Lu 3.1-18)
19A daar ʋlɔ a Jufisɩ bala na be a Jerujalɛm na dãa tʋ̃ a Naaŋmɩn baar-lorbo nɩ a Naaŋmɩn yir tʋ̃tʋnbɔ a ba soor a Jã-Batii á ala ʋ ɩ, nyɩ́ nyɛ a ala ʋ na dãa man ba. 20ꞌWaa sɔɔlɩ̃ ba wa, ɩ̃ ʋ yel ba na cãa pʋɔ:
“Aa ɩ maa ɩ̃ ɩ a *Kirisi wa.” 21Ba lɛ soor ʋ na:
“Ɩ̃ ala fʋ ɩ? A Eli fʋ ɩ mɩɩ?”
A Jã yel:
“Maa ɩ a ʋlɔ wa.”
A ba lɛ soor ʋ:
“Fʋ̃ʋ ɩ a Naaŋmɩn ƴɛr-hiere ʋlɔ mɩɩ?”
Ʋ yel:
“Kpee!” 22Ala-ɩ̃-sɔ ba soor ʋ na:
“Ɩ̃ ala tɔr fʋ ɩ? A sɛw na a fʋ na yel sɩ a sʋbɔ ʋlɔ fʋ na ɩ, a sɩ yel kʋ a bala na tʋ̃ sɩ.” 23A Jã yel ba:
“Ɩ̃ ɩ na
a nɩrɛ ʋlɔ kɔkɩr na yire a wɛkar pʋɔ yele:
Nyɩ́ cɔɔrɩ̃ a Nɩ-kpɛ̃ɛ sɔr bar ʋ tor,”
a mɩnɛ a Naaŋmɩn ƴɛr-hiere Ejayi na dãa yel.
24A bala ba na tʋ̃ a Jã jie, *Farɩsɩ nɩbɛ be na tɔ 25ɩ̃ soor ʋ:
“A fʋ na ma ɩ a Kirisi wa, ma mɩ ɩ a Eli wa, ma ɩ a ʋna Naaŋmɩn ƴɛr-hiere wa, bõ ɩ̃ ɩ a fʋ mʋrɔ a nɩbɛ a kʋ̃ɔ?” 26A Jã yel ba:
“A maa, kʋ̃ɔ pʋɔ ɩ̃ mʋrɔ nyɩ, ɩ̃-cɛ nɩrɛ be na a nyɩ sɔ̃w nyɩ na ma bɔ̃w wa. 27Ʋ be na a ɩ̃ puor waara ɩ̃ maa ɩ bom na tʋɔ gũu sɩɩr a ʋ nafaba wa.”
28A ala a jaa maalʼã a Betani na be a Jʋrdɛ̃ man gaan, a jie ʋlɔ a Jã na dãa mʋrɔ a nɩbɛ a kʋ̃ɔ.
A JEEJU NA Ɩ A NAAŊMƖN PÉLE
29A dɩvɩɛ bio, a Jã nyɛ na a *Jeeju ʋ wɩɛrɛ a ʋ sɛ̃, ʋ yel:
“Nyɩ́ nyɛ a Naaŋmɩn Péle na ire a tẽw nɩbɛ maal-fãa bara. 30A ʋ ƴɛrɩ̃ ɩ̃ dãa ƴɛr a mɩnɛ ɩ̃ na yel á daba be na a ɩ̃ puorɩ̃ waara na ɩ kpɛ̃ɛ a ɩ̃ ɩnɛ, a-na-ɩ ʋ dãa na de nĩe be be ɩ̃ a ba wa bɩɛr dɔw ma. 31Ɩ̃ a maa, maa dãa bɔ̃w a nɩ-buor ʋ na ɩ wa, ɩ̃-cɛ ɩ̃ wa na na mʋrɔ a nɩbɛ a kʋ̃ɔ a mɩnɛ a na tʋɔ maal a *Ɩsɩrayɛl nɩbɛ a ba bɔ̃w ʋ.”
32A Jã lɛ yelʼã:
“Ɩ̃ nyɛ na a Naaŋmɩn Sɩɛ ʋ yi a saꞌlon wɔ̃ taa nɩ a ŋmam ɩ̃ suure waara na lo a ʋ juu. 33Maa dãa bɔ̃w a sʋbɔ ʋlɔ ʋ na ɩ wa, ɩ̃-cɛ a Naaŋmɩn ʋlɔ na tʋ ma ɩ̃ mʋrɔ a nɩbɛ a kʋ̃ɔmɩ, ʋ dãa na yel ma á ɩ̃ nɔɔ nyɛ na a Naaŋmɩn Sɩɛ ʋ suure na lo a daba juu, áa daba ʋlɔ ɩ̃ nɔɔ mʋrɔ a nɩbɛ a Naaŋmɩn Sɩɛ pʋɔ. 34Ɩ̃ a maa, ɩ̃ nyɛ na a ala ɩ̃ mana kʋrɔ nyɩ a ʋlɔ ɩ̃ ɩ a Naaŋmɩn Bie.”
A JEEJU DÃDÃW PAR-TUURBE
35A dɩvɩɛ bio, a Jã lɛ be na be nɩ a ʋ *par-tuurbe ayi 36ɩ̃ nyɛ a *Jeeju ʋ tɔlɔ, ʋ yel:
“Nyɩ́ nyɛ a Naaŋmɩn Péle!” 37A mɩnɛ a par-tuurbe ayi bala na wõ a ala ʋ na ƴɛr, ba tuure na a Jeeju. 38A Jeeju lɩɛbʼã nyɛ a ba tuure ʋ, ʋ soor ba:
“Bõ nyɩ bʋɔrɔ?”
A ba yel ʋ:
“Arabɩ! (A lɛ yelʼã, Jãjaana) Nyɩnɛ fʋ kpɛɛrɛ?” 39A Jeeju yel ba:
“Nyɩ́ wa bɔ̃w a jie.”
A lɛ, ba cenʼã na nyɛ a jie, ɩ̃ jɛ nɩ ʋ a be a bibir ʋlɔ. A mɔtɔ̃w gɔrfʋ daar ba cen a be.
40A bana nɩbɛ ayi ƴen sʋbɔ na dãa wõ a Jã ƴɛrɩ̃ ɩ̃ tuure a Jeeju ɩ na a Ãdire na ɩ a Sɩmɔ̃ Pɩɛr yɛbɛ. 41A Ãdire de na nĩe bɔ a ʋ yɛbɛ Sɩmɔ̃ ɩ̃ yel ʋ:
“Sɩ nyɛ na a Mɛsɩ.” (A lɛ yelʼã, a ʋlɔ a Naaŋmɩn na tʋ̃.) 42Ɩ v taw na a Sɩmɔ̃ cenʼɩ̃ a Jeeju sɛ̃, a Jeeju ꞌwuor ʋ ɩ̃ yel:
“Fʋ ɩ na a Jã bie, Sɩmɔ̃, ɩ̃ ba nɔɔ bʋɔlɔ fʋ na Sefasɩ.” (A lɛ yelʼã, a Pɩɛr.)
A FƖLƖPƖ NƖ A NATANƖƐL A JEEJU NA BƲƆL
43A dɩvɩɛ bio, a *Jeeju bʋɔrɔ na ʋ cen a Galile wɩɛr, ɩ̃ a be ʋ nyɛ na a Fɩlɩpɩ ɩ̃ yel ʋ:
“Tuure ma!” 44A Fɩlɩpɩ ɩ na a Bɛsada-tẽw nɩrɛ a Ãdire nɩ a Pɩɛr kaarɩ̃. 45A Fɩlɩpɩ bɔ na a Natanɩɛl nyɛ ɩ̃ yel ʋ:
“Sɩ nyɛ na a ʋlɔ a Mowisi na dãa ƴɛr a ʋ ƴɛrɩ̃ a ƴɛr-kpɛn sɛbɛ pʋɔ, na ɩ a ʋlɔ a Naaŋmɩn ƴɛr-hierbe na mɩ dãa ƴɛr a ʋ ƴɛrɩ̃. A Jeeju ʋ, na ɩ a Najarɛtɩ Jojɛfʋ bi-daba.” 46a Natanɩɛl yel ʋ:
“Bõ-vɩlaa na tʋɔ na yi a Najarɛtɩ-tẽw pʋɔ mɩɩ?”
A Fɩlɩpɩ yel ʋ:
“Wa su nɩ ʋ a fʋ mimir.” 47Ɩ̃ a mɩnɛ a Jeeju na nyɛ a Natanɩɛl ʋ waara a ʋ sɛ̃, ʋ yelʼã a ʋ ɩnɛ:
“Nyɩ́ nyɛ a *Ɩsɩrayɛl nɩrɛ sɩrɛ jaa. Bɛlɩ̃fʋ ma be a ʋ jie fɩ̃ɩ wa.” 48A Natanɩɛl soor ʋ:
“Mɩnɛ fʋ ɩ ɩ̃ bɔ̃w ma?”
A Jeeju yel ʋ:
“A lɛ a Fɩlɩpɩ na ma dãa bʋɔl fʋ sɛr wa, ɩ̃ dãa na de nĩe nyɛ fʋ a lɛ fʋ na be a fɩgɩ tɩɛ pulẽe.” 49A Natanɩɛl yel ʋ:
“Jãjaana, fʋ̃ʋ ɩ a Naaŋmɩn Bie! Fʋ̃ʋ ɩ a Ɩsɩrayɛl nɩbɛ jamana!” 50A Jeeju yel ʋ:
“Fʋ sɔw ma na a-na-ɩ ɩ̃ yel fʋ na a ɩ̃ dãa na nyɛ fʋ a be a fɩgɩ tɩɛ pulẽe. Fʋ nɔɔ nyɛ na yele a bɛrmɛ gãw a asɩmɛ.” 51Ɩ̃ ʋ lɛ yelʼã go:
“Yel-mɩ̃ɛ ɩ̃ yele nyɩ, nyɩ nɔɔ nyɛ na a saꞌlon ʋ yuo ɩ̃ a Naaŋmɩn sɩ-tʋnɩsɩ duoro ɩ̃ suure a *Nɩbɛ Bie jie.”
ప్రస్తుతం ఎంపిక చేయబడింది:
Jã Sɛbɛ 1: BNT93
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Le Nouveau Testament en langue birifor © Alliance Biblique au Burkina Faso, 1993.