కీర్తనల గ్రంథము 68

సంగీత నాయకునికి: దావీదు స్తుతి కీర్తన.

1దేవా, లేచి నీ శత్రువులను చెదరగొట్టుము.

ఆయన శత్రువులు అందరూ ఆయన దగ్గర్నుండి పారిపోయెదరుగాక!

2గాలికి ఎగిరిపోయే పొగలా

నీ శత్రువులు చెదరిపోవుదురుగాక.

అగ్నిలో మైనం కరిగిపోయేలా

నీ శత్రువులు నాశనం చేయబడుదురుగాక.

3కాని మంచి మనుష్యులు సంతోషంగా ఉన్నారు.

మంచి మనుష్యులు దేవునితో కలసి సంతోషంగా గడుపుతున్నారు. మంచి మనుష్యులు ఆనందం అనుభవిస్తూ సంతోషంగా ఉన్నారు.

4దేవుని స్తుతించండి. ఆయన నామమునకు స్తుతులు పాడండి.

ఆయనకు మార్గం సిద్ధపరచండి. ఆరణ్యంలో ఆయన తన రథం మీద వెళ్తాడు.

ఆయన పేరు యాహ్.#68:4 యాహ్ ఇది హీబ్రూ భాషలో దేవునికున్న పేర్లలో ఒకటి.

ఆయన నామాన్ని స్తుతించండి.

5ఆయన పవిత్ర ఆలయంలో దేవుడు అనాధలకు తండ్రిలా ఉన్నాడు.

దేవుడు విధవరాండ్రను గూర్చి జాగ్రత్త పుచ్చుకొంటాడు.

6ఒంటరిగా ఉన్న మనుష్యులకు దేవుడు ఒక ఇంటిని ఇస్తాడు.

దేవుడు తన ప్రజలను కారాగారం నుండి విడిపిస్తాడు. వారు చాలా సంతోషంగా ఉన్నారు.

కాని దేవునికి విరోధంగా తిరిగే మనుష్యులు దహించు సూర్య వేడిమిగల దేశంలో నివసిస్తారు.

7దేవా, నీ ప్రజలను నీవు ఈజిప్టు నుండి బయటకు రప్పించావు.

ఎడారిగుండా నీవు నడిచావు.

8భూమి కంపించింది.

దేవుడు, ఇశ్రాయేలీయుల దేవుడు, సీనాయి కొండ మీదికి వచ్చాడు. మరియు ఆకాశం కరిగిపోయింది.

9దేవా, నీవు వర్షం కురిపించావు

మరియు నిస్సారమైన పాత భూమిని నీవు మరల బలపరిచావు.

10నీ పశువులు ఆ దేశానికి తిరిగి వచ్చాయి.

దేవా, అక్కడ పేద ప్రజలకు నీవు ఎన్నో మంచివాటిని యిచ్చావు.

11దేవుడు ఆజ్ఞ ఇచ్చాడు.

నా శుభవార్త చెప్పడానికి అనేక మంది ప్రజలు వెళ్లారు.

12“శక్తిగల రాజుల సైన్యాలు పారిపోతున్నాయి.

యుద్ధం నుండి సైనికులు తెచ్చే వస్తువులు ఇంటి వద్ద స్త్రీలు పంచుకొంటారు.

13ఇంటి దగ్గర ఉండిపోయిన మనుష్యులు ఆ ఐశ్వర్యాలను పంచుకొంటారు.

వారు పావురపు రెక్కలకు వెండిపూత పూస్తారు. ఆ రెక్కలను వారు బంగారు పూతతో తళ తళ మెరిపిస్తారు.”

14సల్మోను కొండ మీద శత్రురాజులను దేవుడు చెదరగొట్టాడు.

వారు పడిపోతున్న మంచులా ఉన్నారు.

15బాషాను పర్వతం చాలా గొప్ప పర్వతం, బాషాను పర్వతానికి ఎన్నో శిఖరాలు ఉన్నాయి.

16బాషాను పర్వతమా, నీవేల సీయోను కొండను చిన్న చూపు చూస్తున్నావు?

దేవుడు ఆ కొండను ప్రేమిస్తున్నాడు.

యెహోవా తాను శాశ్వతంగా అక్కడ నివసించాలని నిర్ణయించుకొన్నాడు.

17యెహోవా పరిశుద్ధమైన సీయోను కొండకు వస్తున్నాడు.

ఆయన వెనుక ఆయన రథాలు లక్షలాదిగా ఉన్నాయి.

18ఆయన ఎత్తయిన చోట్లకు వెళ్లాడు.

ఆయన తన బంధీల బృందాలను నడిపించాడు.

ఆయన మనుష్యులనుండి అనగా ఆయనను

వ్యతిరేకించిన ప్రజలనుండి కూడ కానుకలు తీసుకొన్నాడు#68:18 కానుకలు తీసుకొన్నాడు “ఆయన మనుష్యులను కానుకగా స్వీకరించాడు” లేదా “ఆయన మనుష్యులకు కానుకలనిచ్చాడు.” ఇది ప్రాచీన సిరియాక్ మరియు అరమేయిక్ తర్జుమాల ప్రకారం. ఎఫెసీ. 4:8 చూడండి.

19యెహోవాను స్తుతించండి.

మనం మోయాల్సిన బరువులు మోయటంలో ప్రతిరోజూ ఆయన మనకు సహాయం చేస్తాడు.

దేవుడు మనల్ని రక్షిస్తాడు.

20ఆయనే మన దేవుడు. ఆయనే మనలను రక్షించే దేవుడు.

మన యెహోవా దేవుడు మనల్ని మరణంనుండి రక్షిస్తాడు.

21దేవుడు తన శత్రువులను ఓడించినట్టు చూపిస్తాడు.#68:21 దేవుడు … చూపిస్తాడు అక్షరార్థముగా దేవుడు తన శత్రువుల తలలను చితుకగొడతాడు.

దేవుడు తనకు విరోధంగా పోరాడినవారిని శిక్షిస్తాడు.

22నా ప్రభువు ఇలా చెప్పాడు: “శత్రువును తిరిగి బాషాను నుండి నేను రప్పిస్తాను.

సముద్రపు లోతుల నుండి శత్రువును నేను రప్పిస్తాను.

23కనుక నీవు వారి రక్తంలో నడువవచ్చు

కనుక మీ కుక్కలు వారి రక్తం నాకవచ్చు.”

24విజయ ఊరేగింపును దేవుడు నడిపించటం ప్రజలు చూస్తారు.

నా పరిశుద్ధ దేవుడు, నా రాజు విజయంతో ఊరేగింపు నడిపించటం ప్రజలు చూస్తారు.

25గాయకులు ముందు నడుస్తారు. వారి వెనుక వాయిద్య బృందం నడుస్తారు.

మధ్యలో ఆడపడుచులు తంబురలు వాయిస్తారు.

26మహా సమాజంలో దేవుని స్తుతించండి.

ఇశ్రాయేలు ప్రజలారా, యెహోవాను స్తుతించండి.

27చిన్న బెన్యామీను వారిని నడిపిస్తున్నాడు.

యూదా మహా వంశం అక్కడ ఉంది.

జెబూలూను, నఫ్తాలి నాయకులు అక్కడ ఉన్నారు.

28దేవా, నీ శక్తి మాకు చూపించుము,

దేవా, గత కాలంలో మాకోసం నీవు ఉపయోగించిన నీ శక్తి మాకు చూపించుము.

29రాజులు వారి ఐశ్వర్యాలను నీ వద్దకు,

యెరూషలేములోని మందిరానికి తీసుకొని వస్తారు.

30ఆ “జంతువులు” నీవు చెప్పినట్లు చేసేలా నీ దండాన్ని ఉపయోగించుము.

ఆ దేశాలలోని “ఎద్దులు, ఆవులు” నీకు లోబడేలా చేయుము

ఆ రాజ్యాలను యుద్ధంలో

నీవు ఓడించావు.

ఇప్పుడు వారు నీ వద్దకు వెండి

తీసుకొని వచ్చునట్లు చేయుము.

31వారు ఈజిప్టు నుండి ఐశ్వర్యం తీసుకొని వచ్చేలా చేయుము.

దేవా, ఇథియోపియా (కూషు) వారు వారి ఐశ్వర్యాన్ని నీ వద్దకు తెచ్చేలా చేయుము.

32భూరాజులారా, దేవునికి పాడండి.

మన యెహోవాకు స్తుతి కీర్తనలు పాడండి.

33దేవునికి పాడండి. ప్రాచీన ఆకాశాలలో ఆయన తన రథాల మీద పయనిస్తున్నాడు.

ఆయన శక్తిగల స్వరాన్ని ఆలకించండి.

34మీ దేవుళ్లందరి కంటె యెహోవా ఎక్కువ శక్తిగలవాడు.

ఇశ్రాయేలీయుల దేవుడు తన ప్రజలను బలపరుస్తాడు.

35దేవుడు తన ఆలయంలో ఆశ్చర్యకరుడు.

ఇశ్రాయేలీయుల దేవుడు తన ప్రజలకు శక్తిని, బలాన్ని ఇస్తాడు.

దేవుని స్తుతించండి.

ప్రస్తుతం ఎంపిక చేయబడింది:

కీర్తనల గ్రంథము 68: TERV

హైలైట్

షేర్ చేయి

కాపీ

మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి

Telugu Holy Bible: Easy-to-Read Version

పవిత్ర బైబిల్ గురించి మరింత తెలుసుకోండి