Matiu 3
3
Tioni itema so ilixo so kelele mulanu vaikala
1Xe no voxo anene la Tioni itema so ilixo so kelele muxali mo muxoxolu muvotone'i tamitema no xale lia esi'esi ne Iutea. 2La anu muvivikala lexe, “Ngaxiunu opongengi so susu noxinge mo nga'isalilinoxu no anu Mosinge oponu. Xo voxo so Mosinge molu u'uli laxune'i tamitemaou no tualasou a alaimanasi.” 3Tioni ne anu itema e Mosinge mupala'anixu no anu vaikalaou polopeti Aisaia aloxo 'o, “Ili'i la tamitema ilomusou itema vile u'ava'ava no xale lia esiesi lexe, 'Ngalalaxinu vote'isou Tatananenge, mo nga'isalilinoxu vote'isou.'” 4Tioni ne anu mulavusou usakinu lavalava e mi'itaxu no anu kameli laxusou, ka usinixu no anu laleti. Mo anu ani'anixu ane musia'e xe unuxu.
5Tioni muxolu no xale lia esiesi ne la tamitema Taielusalemo xe tamitema so xale lia ne Iutea xe tatemanu tuala no pa'umolu lexa Tiotani ne mine'ene'e noxou. 6Mine'ene'e noxou xe ane'i ta'ei milamana no anu susu noxi'a la milemolu. Laso Tioni mu'oxo ilixo anene so mukelenixa'a no lexa Tiotani ne.
7Ia anu mumaisi'a tavu'alo noxi'a Tapalisi xe Tasatusi ine'ene'e no apu ne so u'oxonu iloxo so kelele noxi'a la muvikala tatila noxi'a aloxo 'o, “Ngingi ne, ngingi ngaxilisi mo nga'oxo loloxa'a tamitema, ia anu loxo lamalasini masua uxolu no anangene a loxo tasineke tamasua to. Ena'ei muvikalangengi so nga'umesou voxo so la'ia e unene'e 'o? 8Loxo ngexiunu opongengi mo nge'islalinoxou maninasou la nexi masi tamaisou nene'axu uxali no anu xoluxolu noxinge ane. 9Mamu so nga'itingengi xo ngingi Apala'amu ta'ilusunu. Anene mi vitanisi ane. Eni avikala lexe Mosinge umomomo so uxiunu lavolavo'o uta'olu 'o so ixali ta'ilusunu Apala'amu. 10Laixe so ngingi ngamama'u, xo Tatananenge anu loxo itema a utatavulenu lapemu. Anu a mulalaxi so uxetasou ovuovu aneva ulavusou uxalixu temanu laixe uasi. Uxetasou ukalu laso upeinu no navu.
11Eni alavusou a'oxonu ilixo so akelenixa'a tamitema no anu lexa so sosovo lexe ilamana no anu susu noxi'a. Ia itema ane une'e ili'i noxilo ne anu xavinu mutiatila noxilo. Anu itema mutiatila ia eni amitema vitanisi mo alaixe so atavulenu lasuou uasi. Anu itema xavinu mutiatila noxilo mo loxo u'oxonu ilixo so ukelenixa'a tamitema la anu u'oxonu no anu Ulenu Laixe xe navu.
12Anu Tatananenge mulalaxi so utongone'i tamitema mo ukalipalane'i. Ukalipalane'i tamitemaou noxi'a ane'i ane tamitema so susu. Xo anu loxo itema e utetelisou lasovolu so ususunu no anu uiti ka uleanu ulai teitexi. Uleanu ulai teitexi xe sivo uilisou la utavulenu sosou uxexe io ngiaxusi ulapau uai no lia. Mukalu la anu utaxusou uiti ngiaxu mo uta'olunu no tasou u'isalili. Ia sosou ne, anu usi'alonu so u'elaxu no navu ane u'ani'ani mo kaluxu uasi.”
Tioni mu'oxonu ilixo so kelele noxou Iesua
13Ioxe, no voxo anene la Iesua mulutu ne Xalili mo mulai no lexa Tiotani la muxali noxou Tioni. Xo anu mumasaxau so Tioni u'oxonu iloxo so ukelenixu no lexa. 14Ia Tioni mutovonu so lexe u'apixu mo muvikala lexe, “Loxova so nene'e noxilo? Laixe loxo nini mene na'oxo ilixo so nakelenixilo ane.” 15Ia Iesua mukolinu lexe, “Uasi, ta'oxonu loxo elemolu. Ta'oxonu axone so tamulinu mimi mukalusi no anu masaxa noxou Mosinge.” Laso Tioni mumulinu vaikalaou.
16Ioxe, mukelenixu mukalu xe Iesua mulivu muxali no lexa pa'umolu sila loxotolo mua'a la mumaisou Ulenu Laixe noxou Mosinge mulu'e. Anu mulu'e la loxo ngiala e utu la muai noxou. 17Sila xoli vile molu no loxotolo mulu'e lexe, “Ano'o eni alixeli asexelaxu ane. Eni a'osasou misevile.”
ప్రస్తుతం ఎంపిక చేయబడింది:
Matiu 3: ATA
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
Copyright 1999 New Tribes Mission, Sanford, FL 32771-1487