Mateo 12
12
Bënni useed kie' Jesús talje deu dza tu'ueak'laadxi'ke bënni Judea
(Mr 2:23-28; Lc 6:1-5)
1Tu dza, dza tu'ueak'laadxi'ke bënni Judea, Jesús rde' ladj layeel. Na' bënni useed kie' guladuune len gulazulau'e talje deu ki xhua'xhtiil len ta'we xhsei. 2Bënni fariseo gulale'i'de leke ati gle'ke Jesús:
—Byu'tzka, bënni useed kiu' tuune le ti de lsenz gun'ru dza'a ru'ueak'laadxi'ru.
3Ati Le' bubi'e diidza:
—¿Naru ti rul'i'li le beene tu lyas David len bënni lze'e kati guladuune? 4Gyaazie liidxe Dios len bënni lze'e ati gla'we yët'xhtiil le chi nak La'ay lau'e Dios, nak'te pxuuz'z de lsenz la'we yët'xhtiil'a. 5¿U ti rul'i'li lu xhba kie' Moisés ga rna ki pxuuz ki gdou' ti tuune dula zala ti tu'ueak'laadxi'ke dza tu'ueak'laadxi'ke bënni Judea? 6Lena'a rea' lbi'ili ki nu zua' ni nak'r xhën ka gdou'. 7Lbi'ili ti rajni'i'li bixh re'e'ni gna' diidza ni: “Ti re'en'da nu bua' gdëëdi'li'ba lau'a, le re'en'da nak wechilaadxi'i lza'a'li.” Naru la chi gyajni'i'li diidza ni, ti guspaaga'li'ne xhgia' bënni'a tibi dula nun'ke. 8Koma Le' Xi'ine Bënni nape yëla rnabe' ki dza tu'ueak'laadxi'ke bënni Judea.
Jesús ru'uune tue' bënni re'i'de dza tu'ueak'laadxi'ke bënni Judea
(Mr 3:1-6; Lc 6:6-11)
9Buze'e na' Jesús len gyaazie lu yu'u useed ki yëdz'a. 10Ze' na' tue' bënni nat'zi ne'e; ati bunach tugiilje nakxh luune ludxie' xhgia' Jesús, lena'a gulunaab'de Le':
—¿Ba de lsenz un'ru'ne bënni re'i'de dza tu'ueak'laadxi'ke bënni Judea?
11Jesús bubi'e diidza:
—¿Nuul'li xhki zuaaba kieeli tuuba bëku'xhiila ati rbixh'ba lu yeru nis dza ru'ueak'laadxi'li, ti riaj'li len rubiaj'li'ba? 12¡La zakir'de tue' bënni ka tuuba bëku'xhiila! Lena'a, de lsenz gun'ru le nak dxia'a dza tu'ueak'laadxi'ke bënni Judea.
13Na' gudxe bënni'a nat'zi ne'e:
—Bli no'u.
Bënni'a blie' ne'e len bueak'te dxia'a ka nak le ye tzala'a ne'a. 14San kati bënni fariseo gularooje na', gulazulau'e tuune diidza nakxh luune ludëëd'de Jesús.
Jesús bënni'a nusë'le'e Dios
15Kati Jesús gnëëz'de le ni, zuwëëje ati zian'k bunach zjak'leene le'. Ru'uune yugute'ke bënni te'i'de, 16len rnabe'i'de bunach ki ti lui'ke diidza kie' lau'i lau ka. 17Le ni guk naar yajtzaag diidza le gne' Isaías bënni be diidza ulaaz kie' Dios kati gne':
18«Ni zue' bënni wendxin kia', bënni'a chi grëa'ne,
nadxi'i'tzki'da'ne, len ruzakalaadxa'a len Le'.
Bë' La'ay kia' sua len Le',
len utzajtixhjë'e gdu yëdz'lyu yëla rbë'xhbei dxia'a.
19Ti se' ruzbë' len ti gusku'e;
nutunu gyëëni chi'e la nëëz.
20Ti ksiuudxe kitzje' yëtj'a chi nazú bë
len ti ksuule rabau'a lea chi zuakz ru'ul,
nakati gun're ga gnabe' yëla rbë'xhbei dxia'a.
21Len yugute' yëdz uluune Le' lëëz.»
Tuspaage'e xhgia' Jesús
(Mr 3:20-30; Lc 11:14-23; 12:10)
22Guluche'ke lau'e Jesús tue' bënni yu'u le' bë' xëwi, na'chul lau'e len ti rak gui'e diidza, ati Jesús beene ga bule'i'de ati bui'e diidza. 23Yugute'ke tubaan'de tunaabi lza'a'ke: «¿Naru bënni Xi'ine David bënni ni'?»
24Kati bënni fariseo gulayëën'de le ni, gulanake: «Beelzebú, xan'ke bë' xëwi nak nu rnëëdzj kie' bënni ni yëla wak naar ubiije bë' xëwi'a.»
25Ati Jesús nëëz'de le rza' ikj'laadxi'dau'ke, lena'a gudxe leke: «Bi'ti'teez yëdz xhën le naroj chop'l len tadil, unit'lau, len nu'ti'teez bënni dzë'ë'ke tuuz yu'u len tadil'e ulanit'lau'e. 26Lekz'ka' xhki bënni xëwi ubiije bënni xëwi, len larakz leeze til'e; ¿Nakxh guune gun'chi'e yëla rnabe' kie'? 27Lbi'ili rnaali ki rubiija bë' xëwi len yëla rnabe' kie' Beelzebú; ati xhki ka nak, ¿nuxh rnëëdzj yëla rnabe' kieke bënni'a da'ke lbi'ili ki lubiije bë' xëwi? Lena'a, kuin'gakze tuune ga runn'be' ki lbi'ili nak'chixi'li. 28Koma xhki neda rubiija bë' xëwi len yëla rnabe' kie' Dios, le ni re'e'ni gna ki yëla rnabe' ki yewayuba chi bdxin ga zuaali.
29»¿Nakxh'kz guune tue' bënni tzaazie liidxe tue' bënni naal len kuaane le de kie', xhki ti guuge'e le' zia'a? Ka'az gunn kuaane le de kie'.
30»Bënni ti za'leene neda, neda rudabaage'e, len bënni ti rutuub'leene neda, rus'lasie.
31»Lena'a rea' lbi'ili ki Dios uzi'xhëëne xhtu'la'ke bunach len yugute' diidza le ku nak le lanáke, san ti si'xhëëne xhki lanáke diidza le ku nak kie' Bë' La'ay kie' Dios. 32Le' uzi'xhëëne zala bënni gui'e diidza le ku nak kie' le' Xi'ine Bënni; san bënni bi gne' kie' Bë' La'ay kie' Dios ti si'xhën'kze le' dza zuaaru na'a u dza zia'a za'.
Len xhlu'li'i le rbia rak'be'i'ru bixh yaag'a
(Lc 6:43-45)
33»Xhki yaag nak dxia'a, ubia xhlu'li'i dxia'a; xhki yaag ti nak dxia'a ubia xhlu'li'i ku nak; koma len xhlu'li'i le rbia tu tu yaag rak'be'i'ru bixh yaag'a. 34¡Xi'in bel'! ¿Nakxh'kz gunn gui'li diidza dxia'a, xhki nak'li bënni xhe'e? Le rza'z ikj'laadxi'dau'e bënni rui'e diidza. 35Bënni dxia'a rue'e diidza dxia'a koma le dxia'a zua len le', len bënni xhe'e rue'e diidza le ku nak koma yëla xhe'e zua len le'. 36Ati neda rea' lbi'ili ki dza kati kchuug'be'e Dios, yugute'li useedx'la'an'li bi'ti'teez diidza le ku nak le be'li. 37Koma larakz diidza le be'li kchuug'be' kieeli, ati ley gun ga si'li yëla ruslá u gbaaga'li xhgia'.»
La'ke tunaabe le gunn'be' yëla wak
(Mr 8:12; Lc 11:29-32)
38Na' lake bënni fariseo len bënni useed xhba kie' Dios gle'ke Jesús:
—Bënni useed, re'eni'tu gle'i'tu li' guunu le gunn'be' yëla wak.
39Ati Jesús bubi'e diidza:
—Bunach ti tabëëze dxia'a len nak'ke chop'laadxi tunaabe le gunn'be' yëla wak, san kaaz guk kie' Jonás gak le gunn'be' kieke. 40Ka Jonás gyu'e le'e'ba bël xhën tson dza len tson yeel, lekz'ka' le' Xi'ine Bënni tzu'e xhan yu tson dza len tson yeel. 41Kati gdxin dza kchuug'be'e Dios kieke bënni nakua'ke dza zuaaru na'a, bënni Nínive ulayas'ke len luspaage'e leke xhgia'; koma bënni Nínive gulubi'i'laadxi'ke len Dios kati gulayëën'de diidza be'e Jonás, len nu zua' ni nak'r xhën ka Jonás. 42Lekz'ka' kati gdxin dza kchuug'be'e Dios kieke bënni nakua'ke dza zuaaru na'a, nguul gnabe'nu yëdz Saba dza kati gzue' Salomón uyas'nu len guspaaga'nu leke xhgia', koma gaagi zitu yëdz'lyu biid'nu duzenaag'nu yëla nayajni'i kie' Salomón, len nu zua ni nak'r xhën ka Salomón.
Bë' xëwi le rudxin
(Lc 11:24-26)
43»Kati tu bë' xëwi ruroj le' tue' bënni, rda latj yu biidx rgiilj ga uzi'laadxi'i, len xhki ti rdzëël, rna: 44“Wëëja liidxa ga brooja.” Kati rudxin, rudzëëli le' bënni ni ka tu yu'u ga nutunu zua', le na'lua len naba'a. 45Na' riaj len rajxi' ye gaadx bë' xëwi nayali'i'rk ka ley len zura tayaaz le' bënni ni, ati ryali'ir le rak kie' ka kati'a gyu'u le' tuuz bë' xëwi. Ki gak lekz'ka' kieke bunach ti tabëëze dxia'a.
Xhne'e len bënni bë'che'e Jesús
(Mr 3:31-35; Lc 8:19-21)
46Tzal Jesús ni rue'e diidza len bunach, xhne'e len bënni bë'che'e guladxiine na' len tabëëze le' rayu'ul, koma te'en'de lui'leene Le' diidza, 47tue' bënni gdixhji'de Jesús:
—Xhno'u len bënni bë'chu'u nakua'ke rayu'u len te'en'de lui'leene Li' diidza.
48Ati Le' bubi'e diidza kie' bënni'a gdixhji'de Le':
—¿Nuxh rak xhna'a len bënni bë'cha'a?
49Na' blui'e zga ga nakua'ke bënni useed kie' ati gne':
—Bënni ni nak'ke xhna'a len bënni bë'cha'a. 50Koma nu'ti'teez nu run le ryaazlaadxe'e Xuuza zue' yewayuba, nake bënni bë'cha'a, nguul zaana len xhna'a.
ప్రస్తుతం ఎంపిక చేయబడింది:
Mateo 12: PZD
హైలైట్
షేర్ చేయి
కాపీ
మీ పరికరాలన్నింటి వ్యాప్తంగా మీ హైలైట్స్ సేవ్ చేయబడాలనుకుంటున్నారా? సైన్ అప్ చేయండి లేదా సైన్ ఇన్ చేయండి
© Sociedad Biblica de México AC