Traducción Bíblica: Mixe de Quetzaltepec, 2013© Sociedad Bíblica de México, A.C., 2013www.sbm.org.mx ℗ 2017 Hosanna

Mixe Quetzaltepec - 2013 SBM (NT) Drama

Biblia en Mixe de Quetzaltepec, Oaxaca, México © Sociedad Bíblica de México, A.C., 2013. Active Translation in Process

Ënät ja Pilato ojts ja Jesús tyajwopyë. Ets ja tsiptuunpë taktë tu'uk ja äpny kujup ets ja Jesús tukujääntë ets ja tsapts ukywyit tukxojxtë. Tääts tmëwinkoontë ets t'ënëmaaytyë:
Juuky'ajtp ja jutiis ja'ay ja yajkutujkpë.
Ets twinkojx tjëjpkojxtë.
Tääts ja Pilato jatëkok pyëtsiimy ets y'ënëmaayëtë:
Ixtë, tëëjës nyajpëtsëmy ets xynyijawëtëty ko ka'apës tii pyoky npatë.
Tääts ja Jesús pyëtsiimy äpny kujup mëët, xoxy mëët ja tsapts ukywyit ets ja Pilato y'ënäny:
Tyaa ntukwinkuwowëtë ya'atë ye'etyëjk.
Ko t'ijxtë ja teety wintsëntëjk ets ja mëjtsajptëjk këwent'ajtpë ets yaxpë jojkpë tyëjkëtyë:
Yajkruutspät. Yajkruutspät.
Ets ja Pilato y'ënëmaayëtë:
Mënëjkxtë ets miits xyajkruutspätëty, ëjts ka'apës tii pyoky të npatë.
Ets ja jutiis ja'ayëty y'ëtsoowtë:
Tap ëëts tu'uk ja n'ënä'ämën nmëët'atë mëti'ipë ënaanpën ko y'ookëty ja ja'ay mëti'ipë nätyijëpën Tios U'unk.
Ko jëtu'un ja Pilato tmëtooy, ojts mëk tsyë'ëkë. Ets tyëjkëkyojnëpë këmoontëkoty ets tyajtëëy ja Jesús:
¿Maa mkukajpnëty?
Niwi'ix ja Jesús kya'ëtsooy.
Ënät ja Pilato y'ënëmaayë:
¿Këtii m'ëtsoyë? ¿këtii xynyijawë ko nmëët'ajtypës ja kutujkën ets nyajkruuspätëty ëkë npëjkta'akëty ëwaatsëtumë?
Ënät ja Jesús y'ëtsooy:
Mijts nitii kutujkën xykyamëët'aty ma ëjtsën ko jeexyë ja Tios ka'ap të mo'oyë ja kutujkën; paaty ja mëti'ipës të xykyë'ëyäkyën ma mijtsën, ni'ik ja pyokymyëëtëty këtiinëm mijts.
Ja Pilato kanaakjëjp ja winma'any tja'ixtaay ets tja'ëxmatsany ja Jesús ëwaatsëtuuy; je'eyëp ko ja jutiis ja'ayëty ni'ikyë ojts tyëkëtë yaxpë jokpë:
Ko xy'ëxmatsëty ëwaatsëtum, ka'ap ënäty mijts xymyëku'ukjawë ja yajkutujkpë kopk. Oypyënëty pën nätyijëp yajkutujkpë, nämyëtsip'ajtëp mëët ja yajkutujkpë kopk.
Ko ja Pilato jëtu'un tmëtooy ënät ojts tni'ënä'ämë ets ja Jesús tyajpëtsëmtëty ets nyaaxwe'tsy ënyääypyäjnkëjxy ma pyaye'eyën, ma txëëwatyën hebreo ayuk Gabatá, jä'ä nyiwijy Tsaa Winwääpy. Jä'ä xëëw ma ënäty ja ëmaayxyëëw yajnipëjktaakën ets ja Pilato t'ënëmaay ja jutiis ja'ayëty:
Tyaa ënät ja myajkutujkpëty.
Ets mëk yujk'ënantë:
Wä'än t'ooky. Wä'än t'ooky. Yajkruutspät.
Ets ja Pilato yajtëëwëtë:
¿Mtsojktëp ets nyajkruuspätëtyës mëti'ipë mkutujkpë'ajtëpënë?
Ets ja teety wintsëntëjk y'ëtsoowëtë:
Ka'apës pën wiinkpë yajkutujkpë nmëët'atë, yi'iyë tu'uk ja yajkutujkpë kopk mëti'ipë Roma tso'onpën.
Ënät ja Pilato tkë'ëyäjky ja Jesús ets tmënëjkxtëty wä'än tyajkruutspätë.


Tääts ja Jesús tsyo'ony, tam ja kruuts tpakäpy, ets nyijkx ma txëëwatyën O'kpë Këpajk mëti'ipë hebreo ayuk yajtijpën Gólgota. Jam ojts tyajkruutspätë ets ëpëky nimäjtsk wiinkpë ja ja'ayëty mëët kyëruutspejty pa'apa'a. Ets ja Pilato tni'ënä'ämëy ets ja ayuk jam yajkëxja'ajëty kruuts këpäjky mëti'ipë ënaanp: Jesús Nazaretëtë ja'ay, jutiis ja'ay yajkutujkpë. May ja jutiis ja'ay ja letrë ojts tkajpxtë, jä'ä ko kajpn mëwinkon ja it wyi'im ma ja Jesús ojts tyajkruutspätën ets ja letrë, hebreo, latín ets griego ayuk jyä'äyëty. Paaty ja jutiis ja'ayëty, mëti'ipë teety wintsën ijtëpën t'ënëmaaytyë ja Pilato:
Këtii jëtu'un xyjya'ajëty: Jutiis yajkutujkpë. Jëtu'un xyjya'ajëty ko jä'ä nyätyijyë kë'ëm jutiis yajkutujkpë.
Ënät ja Pilato y'ëtsoowëtë:
Mëti'ipës të nkëxja'ayën, jëtu'un wyë'ëmëty këxja'ay.
Tëë ënäty ja tsiptuunpë tyajkruutspätë ja Jesús ets ja wyit ojts twijtsë'këtë ets ojts tyajwa'kxtë taxkpëky, këëktu'këëtsy tjä'ä'ajtë. Ojts näjyëtu'un twijtsë'ëktë ja nyipit, jä'ä ka'ap xyuyëty, itkujky je'eyë y'axuuytyukyëty. Ënät ja tsiptuunpë nyäy'ënanëtë:
Ka'ap ntukë'tsëmëty, je'eyë nni'ëyë'kmëty ets n'ijxmëty pën tuka'ajëp.
Jëtu'un tyuunë jyajtë ets y'atëëy ja Tios ja y'aaw y'ayuk mëti'ipë këxja'ay miinpën: Ojts tpëjkwa'kxtë aak yë'ëjëty ja nwitës ets tëë tni'ëyë'ëktë ja nipitës. Jëtu'un ojts ja tsiptuunpë winë tuntë.
Jam winkon ma ja Jesús jam kruutskëjxm yajpaatyën, tam ënäty tyänëtë ja tyaak, ja myëkä'äx; ja Maria, mëti'ipë Cleofas tyo'oxytyëjk'ajtypyën ets ja Maria Magdalena. Ko ja Jesús t'ijxy ja tyaak ets ko tam winkon tyänë ja y'ijxpëjkpë mëti'ipë ni'ik tsyojkpyën ënät t'ënëmaay ja tyaak:
Nanë, tam mpa'atënëty ja m'u'unk.
Ets ja y'ijxpëjkpë t'ënëmaay:
Tam mpa'atänëty ja mtaak.
Tääts ja ijxpëjkpë twooy ja Jesús ja tyaak ma tyëjkën.

Ko jëtu'un jyäjty kyëpejty, ets ko nän nyija'ap ënäty ja Jesús ko tëë tyuunta'ay jyajta'ayë winë ets tam mëti'ipë jaaktëkoy'ajtpën paaty y'ënäny:
Tëtsëpës.
Tam ënäty tu'ktu'ts ja tsatsym nyëë xun. Ënät ojts tukpatijë'ëktë ja wit, je'eyë tkëxtsuumtë ma tu'uk kepyën ets ojts tuk'atijë'ëktë. Ko ja Jesús tkupëjky ja tsatsym nyëë xun ënät y'ënäny:
Tyam tëë ënät tyuunta'ay jyajta'ayë tu'kë'ëyë winë.
Ets ojts kyutëëynyäxy ja kyëpajk ets ja jya'awën tyukpëtsëëmë.

Tu'kxëëwnëm ënäty tkapaaty ja ëmaayxyëëw ets ja jutiis ja'ayëty ka'ap ënäty tsoktë ets ja o'kpë jam wyë'ëmëty kruutskëjxm po'kxënxëëwëtë; ma tääpë ja po'kxënxëëw ënäty tpaatyën mëj xëëw ënäty jää tunanëp. Paaty ja Pilato t'ënëmaaytyë ets yajtekytyëjtëty ja mëti'ipë jam kruutskëjxmëtyën ets tyajjënaktëty ja o'kpë jam kruutskëjxm. Ënät ja tsiptuunpëtëjkëty ojts nyëjkxtë ets ja mëjëwyiimpë ojts tekytyëjtë ets näjyëtu'un ja mëmäjtskpë mëti'ipë jamëtyën ma ja Jesús ja pya'ajën. Ko ja Jesús tmëwinkoontë ets t'ijxtë ko ënäty të y'o'knë. Paaty ojts ka'ap ja tyeky tëjëtë.
Ënät tu'uk ja tsiptuunpë tkatsymyëku'umëy ja Jesús ets ja kyäty y'ëwatsy ets pyëtsiimy ja ne'pyny ets ja nëë. Mëti'ipë ya'atë jyääpyën, yë'ë mëti'ipë kë'ëm tyim'ijxën ko jëtu'un jyäjty kyëpejty, nyija'awëp ko tyiyëty jyääntyëty mëti'ipë jyääpyën ets miits xymyëpëktëty. Paaty ya'atë jëtu'un tyuunë jyajtë ets y'atëwëty ijxtëm myinyën këxja'ay: Nitu'uk tkatëjëtëty ja pyajk. Ets wiinktsow näjyëtu'un këxja'ay myiny: Y'ixtëp ko ënäty yajmoxmëkumë.


Ko jëtu'un jyäjty kyëpejty, ja José mëti'ipë kukajpn'ajtpën jam Arimatea, ojts t'amëtoy ja Pilato ets myo'ojëtëty ja Jesús ja nyi'kx kyopk. Yë José yë'ë ijty yë Jesús ijxpëjkpë'ajtëp, je'eyëp ko ayu'utsy jä'ä ko yë'ë tsyë'këp ja kutuunktëjk, jutiis ja'ayëty. Ojts ja Pilato myo'oyë ja kutujkën ets tyajënakëty ja Jesús ja nyi'kx kyopk jam kruutskëjxm. Näyjyëtu'un ja Nicodemo, mëti'ipë ojts ja Jesús tëkok mëët myëtyä'äkyën koots; yë'ë ojts tmëja'ty tëkëëk tu'ts ja pa'akxu'kpë nëë xëpiny mëët ja mirra ets áloe. Ënät ja José ets ja Nicodemo ojts tyajpëtë'ëktë ja Jesús ja nyi'kx kyopk ets tukwinpijtë ja linë wit mëët ja pa'akxu'kpë nëë, jëtu'un ijxtëm ja jutiis ja'ayëty ënäty tuunk'atën ko ja o'kpë tyajnaaxtëkëja'antë. Ma ënäty ja Jesús të kyëruutspetyën, tam ijty tu'uk yë pëjykyam yajpaaty jam winkon; ets jam pëjykyamjotm, tam ijty tu'uk ja jemypyë o'kpë jut ma ka'ap pën nyaaxtëkënëm. Jam ojts ja Jesús ja nyini'kx tyajnaaxtëjkëyëtë, yë'ë ënäty jam winkon yajpatp ets nän yë'ë ënäty pyätyp ja po'kxënxëëw mëti'ipë ja jutiis ja'ay myëjja'awëtëpën.

ฟัง Juan 19