Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᔩᓱᓯ ᑕᑯᓴᕋᒥ ᐊᔪᕐᓴᖏᑦᑐᓂᒃ ᑕᑯᕗᖅ ᑐᓂᕐᕈᑎᒥᖕᓂᒃ ᐴᕐᓯᖃᑦᑕᕐᑐᓂᒃ ᑐᒃᓯᐊᕐᕕᒡᔪᐊᑉ ᑐᓂᕐᕈᓯᕐᕕᖓᓄᑦ; ᐊᒻᒪ ᑕᑯᒋᕗᖅ ᐅᐃᒡᒐᕐᓂᕐᒥᒃ ᐊᔪᕐᓴᕐᑐᒥᒃ ᑐᓂᓯᔪᒥᒃ ᑮᓇᐅᔮᑯᓘᖕᓂᒃ ᑲᓐᓄᔮᖕᓂᒃ ᒪᕐᕉᖕᓂᒃ. ᔩᓱᓯ ᐅᖃᕐᐳᖅ, “ᓱᓕᔪᒥᒃ ᐅᖃᐅᑎᕙᑦᓯ, ᐅᓇ ᐅᐃᒡᒐᕐᓂᖅ ᐊᔪᕐᓴᕐᑐᖅ ᑐᓂᓯᓂᕐᓴᐅᕗᖅ ᐊᓯᓕᒫᒥᓂᑦ; ᐊᓯᖏᑦ ᑐᓂᓯᖕᒪᑕ ᐊᑐᕐᓂᐊᖏᑕᒥᖕᓂᒃ; ᐅᓇᓕ ᐊᕐᓇᖅ ᐊᔪᕐᓴᕐᑑᒐᓗᐊᕐᓗᓂ ᐱᑦᔪᑎᒃᓴᑐᐊᒥᓂᒃ ᑕᒤᓐᓂᒃ ᑐᓂᓯᕗᖅ.”


ᐃᓕᓐᓂᐊᕐᑎᖏᑕ ᐃᓚᖏᑦ ᐅᖃᖃᑎᒌᒍᑎᖃᓚᐅᕐᐳᑦ ᑐᒃᓯᐊᕐᕕᒡᔪᐊᕐᒥᒃ, ᑕᑯᒥᓇᕐᓂᖓ ᐅᖃᐅᓯᕆᓪᓗᒍ, ᐅᔭᕅᓪᓗ ᓴᓇᓯᒪᑦᓯᐊᕐᓂᖏᓐᓂᒃ, ᒎᑎᒧᑦ ᑐᓂᕐᕈᑎᒋᔭᐅᕙᒃᑐᑦ ᐱᓪᓗᒋᑦ, ᔩᓱᓯᓕ ᐅᖃᕐᐳᖅ, “ᑕᑯᔭᓯ ᑕᒪᒃᑯᐊ, ᐅᓪᓗᓂ ᓇᓪᓕᐅᑎᔪᒫᕐᑐᓂ ᐅᔭᕋᓕᒫᑦᓯᐊᑦ ᐊᑕᐅᓯᕐᒥᒡᓘᓐᓃᑦ ᐃᓂᒋᔭᒥᓂ ᐃᓕᓯᒪᔪᖃᕈᓐᓃᕈᒫᕐᐳᑦ ᐅᕐᕉᑎᑕᐅᔪᒫᕐᒪᑕ.”


ᐃᓕᓐᓂᐊᕐᑎᖏᑕ ᐊᐱᕆᕚᑦ, “ᐊᔪᕆᕐᑐᐃᔩ, ᖃᖓ ᑕᒪᒃᑯᐊ ᑍᒤᑦᓱᒫᕐᐸᑦ? ᖃᓄᖅ ᓇᓗᓁᒃᑯᑕᖃᕈᒫᕐᐸᑦ ᐱᒋᐊᓕᕈᑎᒃ?”
ᔩᓱᓯ ᐅᖃᕐᐳᖅ, “ᖃᐅᔨᓴᕆᑦᓯ ᓯᓔᕐᕆᔭᐅᖁᓇᓯ; ᐊᒥᓱᑦ ᑎᑭᑦᓱᒫᕐᒪᑕ ᐅᕙᓐᓄᑦ ᐱᔨᐅᓂᕋᕐᑐᑦ, ᐅᖃᕐᓗᑎᒃ, ‘ᑖᓐᓇᐅᕗᖓ ᙭ᔅᑑᓯ!’ ᐊᒻᒪᓗ, ‘ᒫᓐᓇ ᐱᕕᒃᓴᖓ ᓇᓪᓕᐅᑎᕗᖅ!’ ᑖᒃᑯᐊ ᒪᓕᖕᓂᐊᕋᓯᐅᒃ. ᐅᓇᑕᕐᑐᓂᒃ ᑐᓴᕈᑦᓯ ᓵᓚᒋᖃᑦᑕᐅᑎᓇᓱᒃᑐᓂᒃ, ᓯᕘᕋᓂᐊᕋᓯ; ᑕᒪᒃᑯᐊ ᓯᕗᓪᓕᐅᔭᕆᐊᖃᕐᒪᑕ, ᓯᓚᕐᔫᓪᓕ ᐃᓱᐊ ᓱᓕ ᓇᓪᓕᐅᑎᓐᖏᓚᖅ.”
ᔩᓱᓯ ᑕᕝᕙ ᐅᖃᓕᕐᐳᖅ, “ᐃᓅᖃᑎᒌᒡᔪᐊᑦ ᐃᓅᖃᑎᒌᒡᔪᐊᓄᑦ ᐊᓯᒥᖕᓄᑦ ᐅᓇᑕᕈᒫᕐᐳᑦ, ᐊᖓᔪᖅᑳᕐᔪᐊᖃᕐᕖᑦ ᐊᓯᒥᖕᓄᑦ ᐊᖓᔪᖅᑳᕐᔪᐊᖃᕐᕕᖕᓄᑦ ᐅᓇᑕᕈᒫᕐᐳᑦ; ᓄᓇ ᐊᖏᔪᒥᒃ ᓴᔪᒃᐱᓗᖃᑦᑕᕈᒫᕐᐳᖅ ᓇᐅᒃᑯᑐᐃᓐᓇᖅ, ᑳᖕᓇᕐᑐᐊᓘᖃᑦᑕᕐᓗᓂ ᓇᓂᑐᐃᓐᓇᖅ ᐋᓐᓂᐊᓇᕐᑐᖃᕐᐸᒡᓗᓂᓗ; ᑲᑉᐱᐊᓇᕐᑐᓂᒃ ᖃᐅᔨᔭᕆᐅᕐᓇᕐᑐᓂᒃ ᓴᖅᑭᑦᑐᖃᕈᒫᕐᐳᖅ ᕿᓚᖕᒥᑦ. ᑕᒪᒃᑯᐊ ᐱᓚᐅᖅᑳᕐᑎᓐᓇᒋᑦ ᑎᒍᔭᐅᔪᒫᕐᐳᓯ, ᐊᑭᕋᕐᑐᕐᑕᐅᓗᓯ, ᐋᑕᐅᔪᒫᕐᐳᓯ ᔫᑎᑦ ᐅᒃᐱᕐᓂᕐᒧᑦ ᑲᑎᒪᕕᖏᓐᓄᑦ ᑎᒍᔭᐅᓯᒪᕕᖕᒧᐊᕐᑕᐅᔪᒫᕐᐳᓯᓗ, ᐊᖓᔪᖅᑳᕐᔪᐊᓄᑦ ᐊᐅᓚᑦᓯᔨᓄᓪᓗ ᐱᑎᑕᐅᔪᒫᕐᐳᓯ ᐅᕙᖓ ᐱᑦᔪᑎᒋᓗᖓ. ᑍᒤᑕᐅᓕᕐᑎᓪᓗᓯ ᐱᕕᒃᓴᖃᕈᒫᕐᐳᓯ ᐅᖃᐅᓯᕐᓂᒃ ᑐᓴᕈᒥᓇᕐᑐᓂᒃ ᐅᖃᐅᓯᖃᕈᓐᓇᕐᓗᓯ. ᐃᓱᒪᔮᕐᓂᐊᕋᓯ, ᖃᓄᖅ ᐅᖃᐅᓯᒃᓴᖃᕐᓂᐊᕐᒪᖔᑦᓯ; ᐅᕙᖓ ᐅᖃᐅᓯᒃᓴᖃᕐᑎᑦᓱᒫᕐᐸᑦᓯ ᓯᓚᑐᓂᖃᕐᑎᓪᓗᓯᓗ, ᐊᑭᕋᕐᑐᕐᑎᑦᓯᓐᓂᓪᓘᓐᓃᑦ ᐊᑭᕋᕐᑐᕐᑕᐅᔪᓐᓇᕈᒫᓐᖏᓚᓯ ᑭᒡᒍᓯᒃᓮᕈᑦᔨᔪᒫᕐᐳᓯᓕ ᑖᒃᑯᓂᖓ. ᑎᒍᔭᐅᑎᑕᐅᔪᒫᕐᐳᓯ ᐊᖓᔪᖅᑳᑦᓯᓐᓂᑦ, ᖃᑕᓐᖑᑎᑦᓯᓐᓂᓪᓗ, ᐃᓚᑦᓯᓐᓂᓪᓗ ᓇᖕᒥᓂᑦᓯᓐᓂᑦ, ᐃᓚᓐᓈᕆᔭᑦᓯᓐᓂᓪᓗ, ᐃᓚᖏᑦ ᐃᓚᓯ ᑐᖁᑕᐅᔪᒫᕐᐳᑦ. ᑕᒤᓐᓄᑦ ᐆᒥᒋᔭᐅᔪᒫᕐᐳᓯ ᐅᕙᖓ ᐱᑦᔪᑎᒋᓗᖓ, ᓂᐊᖁᑦᓯᓐᓂ ᐊᑕᐅᓯᕐᒥᒃᓘᓃᑦ ᓄᔭᒥᒃ ᐊᓯᐅᔪᖃᕐᓂᐊᓐᖏᓚᖅ. ᕿᓄᐃᓵᕐᓂᑦᓯᓐᓄᑦ ᑭᓯᐊᓂ ᐃᓕᑦᓯᓐᓂᒃ ᐱᐅᓕᔪᒫᕐᐳᓯ.”


“ᔨᕉᓴᓕᒻ ᑕᑯᒍᑦᓯᐅᒃ ᐅᓇᑕᕐᑐᒃᓴᓄᑦ ᐃᓗᒪᔭᐅᔪᖅ, ᖃᐅᔨᔪᒫᕐᐳᓯ ᑕᕝᕙ ᓯᖁᑦᑎᕐᑕᐅᕕᒃᓴᖓ ᖃᒡᓕᖕᒪᑦ. ᑕᕝᕙ ᑍᒤᓕᕐᐸᑦ ᔫᑎᐊᒥ ᓄᓇᖃᕐᑐᑦ ᖃᖅᑲᓄᑦ ᕿᒫᔭᕆᐊᖃᓕᕈᒫᕐᐳᑦ, ᐃᒡᓗᒐᓴᒡᔪᐊᓂᓗ ᓄᓇᖃᕐᑐᑦ ᐊᐅᓪᓚᕆᐊᖃᓕᕐᓗᑎᒃ, ᐃᒡᓗᒐᓴᒡᔪᐊᑦ ᐊᓯᐊᓂ ᓄᓇᖃᕐᑐᑦ ᐃᒡᓗᒐᓴᒡᔪᐊᓄᑦ ᐃᑎᕋᓱᐊᕐᑐᒃᓴᐅᓐᖏᓚᑦ. ᑖᒃᑯᐊ ᐅᓪᓗᐃᑦ ᓱᒋᐊᕐᑕᐅᕕᐅᖕᒪᑕ, ᐊᒡᓚᖕᓂ ᐅᖃᐅᓯᐅᓯᒪᔪᓕᒫᑦ ᓇᓚᐅᓯᖁᓪᓗᒋᑦ. ᐊᖏᔪᒥᒃ ᑲᑉᐱᐊᓇᕈᒫᕐᐳᖅ ᑖᒃᑯᓇᓂ ᐅᓪᓗᓂ ᐊᕐᓇᓄᑦ ᓄᑕᕋᒃᓴᖃᕐᑐᓄᑦ, ᓄᑕᕋᓛᖃᕐᑐᓄᓪᓗ! ᓄᓇᕐᔪᐊᕐᒥ ᑲᑉᐱᐊᓇᕐᑐᖃᕈᒫᕐᒪᑦ ᐊᖏᔪᒥᒃ ᒎᑎᐅᓪᓗ ᓂᓐᖓᐅᓯᖓ ᑎᑭᐅᑎᔪᒫᕐᒪᑦ ᐃᓄᖕᓄᑦ ᑖᒃᑯᓄᖓ. ᐃᓚᖏᑦ ᓴᕕᒡᔪᐊᒧᑦ ᑐᖁᑕᐅᔪᒫᕐᐳᑦ, ᐃᓚᖏᓪᓗ ᑎᒍᔭᐅᓗᑎᒃ ᐊᐅᓪᓚᕈᑦᔭᐅᔪᒫᕐᐳᑦ ᔫᑎᐅᓐᖏᑦᑐᓄᑦ; ᔨᕉᓴᓕᒻᓗ ᑐᓪᓕᕋᕐᓴᐅᔪᒫᕐᐳᖅ ᔫᑎᐅᓐᖏᑦᑐᓄᑦ, ᐱᕕᒃᓴᖓᑦ ᐃᓱᓕᓚᐅᖏᓐᓂᖓᓂ.”


“ᑲᒪᓇᕐᑐᖃᕈᒫᕐᐳᖅ ᓯᕿᓂᕐᒥ ᑕᖅᑭᕐᒥᓗ ᐅᓪᓗᕆᐊᓂᓗ, ᓄᓇᕐᔪᐊᕐᒥᓗ ᐃᓅᖃᑎᒌᒡᔪᐊᓕᒫᑦ ᓇᓗᓕᕐᓇᕐᑐᒦᑦᓱᒫᕐᐳᑦ ᑲᑉᐱᐊᓱᒻᒪᕆᒡᓗᑎᒡᓗ ᐃᒪᕐᔪᐊᑉ ᐃᒃᑑᓕᔮᕐᓂᖓᓄᑦ ᐃᖏᐅᓕᐊᓗᖕᓄᓪᓗ. ᐃᓄᐃᑦ ᓄᑭᖃᕈᓐᓃᕈᒫᕐᐳᑦ ᑲᑉᐱᐊᓱᖕᓂᕐᒧᑦ ᐅᑕᖅᑭᓂᕐᒧᓪᓗ ᓄᓇᕐᔪᐊᕐᒧᑦ ᑎᑭᑉᐸᓪᓕᐊᔪᑦ ᐱᓪᓗᒋᑦ; ᕿᓚᐅᑉ ᐱᔪᓐᓇᕐᓂᖏᑦ ᐊᐅᓚᑕᐅᔪᒫᕐᒪᑕ. ᑕᕝᕙ ᐃᓅᑉ ᐃᕐᓂᖓ ᑕᑯᔪᒫᕐᐹᑦ ᓄᕗᔭᑎᒍᑦ ᕾᔪᖅ ᐱᔪᓐᓇᕐᓂᕐᔪᐊᖃᕐᑐᖅ ᓂᕐᑐᕐᓇᕐᓂᕐᔪᐊᖃᕐᓗᓂᓗ. ᑕᒪᒃᑯᐊ ᐱᕙᓪᓕᐊᓕᕐᐸᑕ, ᖁᒻᒧᑦ ᑕᑯᓴᓕᕆᑦᓯ, ᐱᐅᓕᔭᐅᕕᒃᓴᓯ ᖃᒡᓕᖕᒪᑦ.”


ᔩᓱᓯᐅᑉ ᐊᑦᔨᐅᔪᒥᒃ ᐅᖃᐅᑎᕔᑦ, “ᓇᐹᕐᑐᖅ ᐸᐅᕐᖓᓕᒃ ᐃᓱᒪᒋᓕᕐᓯᐅᒃ, ᓇᐹᕐᑐᓕᒫᓪᓗ ᐊᓯᖏᑦ. ᐅᖃᐅᔭᖏᑦ ᐱᕈᓕᕐᐸᑕ, ᖃᐅᔨᒪᕙᒃᐳᓯ ᐊᐅᔭᓪᓚᕆᓐᖑᕐᓂᐊᕐᑐᖅ ᖃᓂᑦᑑᓕᕐᒪᑦ. ᑍᒫᒃᑕᐅᖅ, ᑕᒪᒃᑯᐊ ᐱᕙᓪᓕᐊᔪᑦ ᑕᑯᓕᕈᑦᓯᐅᒃ, ᖃᐅᔨᒪᑦᔪᑎᒋᓂᐊᕐᐸᓯ ᒎᑎᐅᑉ ᐊᑕᓂᐅᕕᖓᑕ ᖃᓂᑦᑑᓕᕐᓂᖓᓂᒃ.
“ᓱᓕᔪᒥᒃ ᐅᖃᐅᑎᕙᑦᓯ, ᑕᒪᒃᑯᐊᓕᒫᑦ ᓇᓪᓕᐅᑎᔪᒫᕐᐳᑦ ᐃᓄᐃᑦ ᒫᓐᓇ ᐃᓅᔪᑦ ᑐᖁᔪᐃᓐᓇᐅᓚᐅᖅᑳᕐᑎᓐᓇᒋᑦ. ᕿᓚᒡᓗ ᓄᓇᓗ ᓄᖑᔪᒫᕐᐴᒃ, ᐅᖃᐅᓯᒃᑲᓕ ᓄᖑᔪᒫᓐᖏᓚᑦ.”

“ᖃᐅᔨᓴᑦᓯᐊᕆᑦᓯ ᐃᓕᑦᓯᓐᓂᒃ ᐆᒻᒪᑎᑦᓯᒍᑦ ᐅᖁᒤᓕᑎᑕᐅᖁᓇᓯ ᓂᕆᓗᐊᕐᓂᕐᒧᑦ ᐃᒥᓗᐊᕐᓂᕐᒧᓪᓗ ᐃᓅᓯᕐᒧᓪᓗ ᐃᓱᒪᔮᓇᕐᑐᑕᖃᕐᓂᖓᓄᑦ, ᐅᓪᓗᒧᑦ ᑍᑦᓱᒧᖓ ᐅᐸᓗᐃᔭᐅᖁᓇᓯ ᓂᒐᕐᑎᑕᐅᔪᑎᑐᑦ. ᑕᒪᓐᓇ ᑎᑭᑦᓱᒫᕐᒪᑦ ᐃᓄᓕᒫᓄᑦ ᓄᓇᕐᔪᐊᕐᒦᑦᑐᓄᑦ. ᑍᒪᓐᖓᑦ ᖃᐅᔨᓴᑦᓮᓐᓇᕆᑦᓯ, ᑐᒃᓯᐊᖃᑦᑕᕐᓗᓯ ᐱᔪᓐᓇᕐᓂᖃᕐᑎᑕᐅᖁᓪᓗᓯ ᐊᓂᒍᐃᔪᓐᓇᖁᓪᓗᓯ ᑕᒪᒃᑯᐊ ᐱᔪᒫᕐᑐᑦ ᐊᑐᓕᕐᐸᑕ, ᓇᖏᕈᓐᓇᖁᓪᓗᓯᓗ ᐃᓅᑉ ᐃᕐᓂᖓᑕ ᓵᖓᓂ.”
ᖃᐅᑕᒫᑦ ᔩᓱᓯ ᐊᔪᕆᕐᑐᐃᖃᑦᑕᕐᐳᖅ ᑐᒃᓯᐊᕐᕕᒡᔪᐊᕐᒥ, ᐅᓐᓄᒑᖓᓪᓕ ᐊᓂᕙᒃᓗᓂ ᐅᓐᓄᐊᓕᒫᖅ ᖃᖅᑲᒦᑉᐸᒃᓗᓂ ᓇᐹᕐᑐᓕᖕᒥ ᐸᐅᕐᖓᖃᕐᐸᒃᑐᓂᒃ ᐅᕐᓱᒃᓴᐅᔪᓐᓇᕐᑐᓂᒃ. ᖃᐅᑕᒫᑦ ᐅᓪᓛᕌᕐᔪᒃᑯᑦ ᐃᓄᓕᒫᑦ ᑐᒃᓯᐊᕐᕕᒡᔪᐊᕐᒧᐊᖃᑦᑕᕐᐳᑦ ᑐᓵᔭᕐᑐᕐᓗᑎᒃ ᑖᑦᓱᒥᖓ.

ฟัง ᓘᑲᓯᐅᑉ ᐊᒡᓚᖏᑦ 21