Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᐃᖅᑲᕐᑐᐃᕕᖕᒦᑎᑎᔪᓕᒫᑦ ᓂᑯᕕᓐᓇᒥᒃ, ᔩᓱᓯ ᐰᓛᑑᓯᒧᐊᕈᑎᕚᑦ, ᔩᓱᓯᒥᒃ ᐃᖅᑲᕐᑐᒐᒃᓴᖑᕐᑎᑎᓯᒪᔪᑦ ᐅᖃᕐᐳᑦ, “ᐅᓇ ᖃᐅᔨᓚᐅᕐᐸᕗᑦ ᐃᓅᖃᑎᑦᑎᓐᓂᒃ ᑕᒻᒪᕐᓮᔪᖅ, ᐃᓂᕐᑎᓚᐅᕐᐹᑎᒍᑦ ᓰᓴᕆᒧᑦ ᑖᒃᓰᔭᖃᑦᑕᖁᓇᑕ, ᐃᒻᒥᓂᒃ ᒥᓮᐊᓯᐅᓂᕋᕐᓗᓂ ᐊᖓᔪᖅᑳᕐᔪᐊᖑᓂᕋᓗᓂᓗ.”
ᐰᓛᑑᓯᐅᑉ ᐊᐱᕆᕚ, “ᔫᑎᑦ ᐊᖓᔪᖅᑳᕐᔪᐊᕆᕚᑏᑦ?”
ᔩᓱᓯᐅᑉ ᑭᐅᕚ, “ᑕᕝᕙ ᐅᖃᕇᕐᐳᑎᑦ.”
ᐰᓛᑑᓯ ᐅᖃᕐᐳᖅ ᑐᓂᕐᕈᓯᕐᑎᑦᓯᔩᑦ ᐊᖓᔪᖅᑳᖏᓐᓄᑦ ᐃᓄᒋᐊᒃᑐᓄᓪᓗ, “ᓇᓂᓯᓐᖏᓚᖓ ᑖᑦᓱᒪ ᐸᓯᔭᐅᑦᔪᑎᒃᓴᖓᓂᒃ.”
ᑖᒃᑯᐊ ᐱᒋᐊᓪᓚᒃᑲᓐᓂᕐᐳᑦ ᐊᒃᓱᕈᓕᕐᓗᑎᒃ, ᐅᖃᕐᐳᑦ, “ᐆᒪ ᐃᓄᐃᑦ ᐊᔪᕆᕐᑐᐃᑦᔪᑎᒥᓄᑦ ᐅᐃᒪᔮᕐᑎᑉᐰᑦ, ᔫᑎᐊᓕᒫᒥ, ᒐᓕᓕᐊᒥᓪᓗ ᐱᒋᐊᕐᓗᓂ ᒪᐅᖓᓘᓐᓃᑦ ᐊᒡᓛᑦ ᑎᑭᑉᐳᖅ.”

ᐰᓛᑑᓯ ᑕᒪᑐᒥᖓ ᑐᓴᕋᒥ, ᐊᐱᕆᕚ ᔩᓱᓯ ᒐᓕᓕᐊᒥᐅᖑᖕᒪᖔᑦ. ᑐᑭᓯᑎᑕᐅᒐᒥ ᔩᓱᓯ ᐃᕉᑕᓯᐅᑉ ᐊᖓᔪᖅᑳᕐᔪᐊᖑᕕᖓᓂᑦ ᐱᓯᒪᖕᒪᑦ, ᐃᕉᑕᓯᒧᐊᕈᑦᔭᐅᑎᑉᐹ, ᑖᓐᓇ ᔨᕉᓴᓕᒻᒦᒻᒪᑦ ᐱᓇᓱᐊᕐᑎᓪᓗᒋᑦ ᑕᒪᑐᒥᖓ. ᐃᕉᑕᓯ ᖁᕕᐊᓱᒻᒪᕆᓚᐅᕐᐳᖅ ᔩᓱᓯᒥᒃ ᑕᑯᒐᒥ, ᑐᓴᐅᒪᔭᑐᖃᕆᒐᒥᐅᒃ ᑕᑯᔪᒪᔭᑐᖃᕆᓪᓗᒍ, ᑲᒪᓇᕐᑐᓕᑎᓪᓗᒍ ᑕᑯᑎᑕᐅᓂᐊᕋᓱᒋᓪᓗᓂ. ᐃᕉᑕᓯᐅᑉ ᐊᒥᓱᓂᒃ ᐊᐱᕐᓱᕐᐹ; ᔩᓱᓯᓕ ᑭᐅᓚᐅᓐᖏᓚᖅ. ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᑦ ᐱᖁᔭᓂᒡᓗ ᐃᓕᓮᔨᑦ ᓴᓂᐊᓄᐊᕐᐳᑦ ᐊᒃᓱᕈᕐᓗᑎᒃ ᐱᓇᓱᐊᓕᕐᐹᑦ ᔩᓱᓯ. ᐃᕉᑕᓯᐅᑉ ᐅᓇᑕᕐᑐᒃᓴᖁᑎᖏᑕ ᔩᓱᓯ ᒥᑕᐅᑎᒋᕚᑦ ᓇᕐᕈᒋᓪᓗᒍᓗ; ᐊᒻᒪ ᐅᓕᒡᔪᐊᒥᒃ ᐱᐅᔪᐊᓗᖕᒥᒃ ᐊᑎᑎᑉᐹᑦ, ᐅᑎᕐᑎᓪᓗᒍ ᐰᓛᑑᓯᒧᑦ. ᐅᓪᓗᒥᓪᓗ ᑕᕝᕙᓐᖓᑦ ᐱᒋᐊᕐᓗᑎᒃ ᐃᕉᑕᓯᒃᑯᒃ ᐰᓛᑑᓯᒃᑯᒃ ᐃᓚᓐᓈᕇᓕᕐᐴᒃ, ᓯᕗᓂᖓᓂ ᐊᑭᕋᕇᓚᐅᕋᓗᐊᕋᒥᒃ.


ᑕᕝᕙ ᐰᓛᑑᓯᐅᑉ ᑐᓂᕐᕈᓯᕐᑎᑦᓯᔨᑦ ᐊᖓᔪᖅᑳᖏᑦ, ᐊᐅᓚᑦᓯᔨᑦ ᐃᓄᐃᓪᓗ ᑲᑎᖁᕔᑦ, ᐅᖃᐅᑎᓪᓗᒋᑦ, “ᐅᓇ ᐅᕙᓐᓄᐊᕈᑎᔭᓯ ᐅᖃᐅᓯᕆᓪᓗᒍ ᑕᒻᒪᕐᓮᓂᕋᕐᓗᒍ ᐃᓄᖕᓂᒃ; ᖃᐅᔨᓴᕋᒃᑯ ᑕᑯᓐᓇᕐᑎᓪᓗᓯ, ᑕᑯᒋᑦ, ᓇᓂᓯᓐᖏᓚᖓ ᑖᑦᓱᒪ ᑐᖁᑕᐅᑦᔪᑎᒃᓴᖓᓂᒃ ᐸᓯᒃᓯᕈᑎᒋᔭᑦᓯᓐᓂᑦ; ᐃᕉᑕᓯᓗᑦᑕᐅᖅ ᓇᓂᓯᖏᓐᓇᒥ ᐸᓯᔭᐅᑦᔪᑎᒃᓴᒥᒃ ᑖᑦᓱᒧᖓ ᐅᑎᕐᑎᒃᑭᕚ ᐅᕙᑦᑎᓐᓄᑦ. ᑕᑯᒋᑦ, ᐊᖑᑦ ᐅᓇ ᐱᓂᐊᓚᐅᕐᓯᒪᓐᖏᓚᖅ ᑐᖁᑕᐅᑦᔪᑎᒃᓴᒥᒃ; ᑍᒤᒻᒪᑦ ᑏᒐᕐᑐᕐᑕᐅᑎᓐᓂᐊᕐᐸᕋ ᐊᓂᑎᓪᓗᒍᓗ.”
ᖄᖏᕐᑕᐅᕕᒃ ᓇᓪᓕᐅᑎᔭᕌᖓᑦ ᐰᓛᑑᓯ ᐱᐅᓯᖃᕐᐸᒃᐳᖅ ᑎᒍᔭᐅᓯᒪᔪᑦ ᐃᓚᖓᓐᓂᒃ ᐊᓂᑎᑦᓯᔭᕆᐊᖃᕐᐸᒡᓗᓂ.
ᐃᓄᒋᐊᒃᑐᕐᔪᐊᓪᓕ ᐊᑕᐅᓯᒃᑯᑦ ᓂᓪᓕᐊᓕᕐᐳᑦ, “ᐅᓇ ᑐᖁᑕᐅᓕ, ᐸᕋᐹᓯ ᐊᓂᑎᑕᐅᖔᕐᓗᓂ.” ᐸᕋᐹᓯ ᑎᒍᔭᐅᓯᒪᕕᖕᒧᐊᕐᑎᑕᐅᓯᒪᕗᖅ ᐊᑭᕋᕐᑐᓕᕐᑎᑎᓪᓗᓂ ᐅᐃᒪᔮᕐᑎᑦᓯᓚᐅᕐᒪᑦ ᑕᕝᕙᓂ ᐃᒡᓗᒐᓴᒡᔪᐊᓂ, ᐃᓄᐊᕐᓯᒪᓪᓗᓂᓗ.
ᐰᓛᑑᓯᐅᑉ ᐃᓄᒋᐊᒃᑐᑦ ᐅᖃᐅᑎᒃᑲᓐᓂᕐᐰᑦ, ᔩᓱᓯ ᐊᓂᑎᑕᐅᖁᒐᓗᐊᕋᒥᐅᒃ; ᐃᓄᒋᐊᒃᑐᓪᓕ ᕾᒐᓛᓕᕐᐳᑦ, “ᑭᑭᐊᒃᑐᕐᑕᐅᓕ, ᑭᑭᐊᒃᑐᕐᑕᐅᓕ!”
ᐰᓛᑑᓯᐅᑉ ᐱᖓᔪᐊᓐᓂᒃ ᓱᓕ ᐅᖃᐅᑎᒃᑲᓐᓂᕆᕔᑦ, “ᓱᖕᒪᑦ, ᓱᓇᒥᒃ ᐱᕋᔭᐅᑎᖃᕐᓯᒪᖕᒫᑦ? ᓇᓂᓯᖏᓐᓇᒪ ᐊᑐᕐᓯᒪᔭᖓᓂᒃ ᑐᖁᑕᐅᑦᔪᑎᒃᓴᒥᒃ ᑖᑦᓱᒪᓂ; ᑍᒤᒻᒪᑦ ᑏᒐᕐᑐᕐᑕᐅᑎᓪᓗᒍ ᓴᒃᑯᑕᐅᖁᓕᕐᐸᕋ.”
ᐃᓄᐃᓪᓕ ᐊᒃᓱᕈᒻᒪᕆᓕᕐᐳᑦ ᕾᒐᓛᕐᓗᑎᒃ ᓂᐱᓕᒫᒥᖕᓄᑦ ᔩᓱᓯ ᑭᑭᐊᒃᑐᕐᑕᐅᖁᓪᓗᒍ. ᕾᒐᓛᕐᓂᕐᒥᖕᓄᓪᓗ ᓵᓚᖃᓕᕐᐳᑦ. ᐰᓛᑑᓯ ᑕᕝᕙ ᐱᖁᔨᓕᕐᐳᖅ ᔩᓱᓯᐅᑉ ᑐᖁᑕᐅᑦᔪᑎᒃᓴᖓᓂᒃ, ᐃᓄᒐᓴᒡᔪᐊᑦ ᑍᒫᒃ ᐱᖁᔨᖕᒪᑕ. ᐰᓛᑑᓯᐅᑉ ᐊᓂᑎᑕᐅᑯᓕᕐᐹ ᐸᕋᐹᓯ ᑎᒍᔭᐅᓯᒪᕕᖕᒦᑦᑐᖅ ᐃᓄᐃᑦ ᐊᓂᑎᑕᐅᖁᔭᖓᑦ, ᐅᐃᒪᔮᕐᑎᑦᓯᓂᖓᓄᑦ ᐃᓄᐊᕐᓯᒪᓂᖓᓄᓪᓗ ᑎᒍᔭᐅᓯᒪᔪᖅ, ᔩᓱᓯ ᐱᔭᐅᑎᓕᕐᐹ ᐃᓄᐃᑦ ᐱᔪᒪᔭᖏᑦ ᒪᓕᒡᓗᒋᑦ; ᐃᓱᒪᕐᓲᑎᒋᓗᒍ ᐱᓂᐊᕐᕕᒋᓂᐊᕐᒪᑦᔪᒃ.


ᐅᓇᑕᕐᑐᒃᓮᑦ ᔩᓱᓯ ᑕᓯᐅᕐᓗᒍ ᐊᓐᓂᓯᓕᕐᐹᑦ, ᐊᓂᓕᕐᓗᑎᒃ ᑲᑎᓯᕗᑦ ᐊᖑᒻᒥᒃ ᓮᕆᓂᒥᐅᕐᒥᒃ ᓮᒨᓂᒥᒃ ᐊᑎᓕᖕᒥᒃ, ᓄᓇᐅᑉ ᐊᓯᐊᓂᑦ ᐃᒡᓗᒐᓴᖕᓄᑦ ᑎᑭᓯᒪᔪᒥᒃ, ᑖᓐᓇ ᓴᓐᓂᖓᔪᓕᖕᒥᒃ ᐃᕐᓱᒃᑎᓕᕐᐹᑦ ᔩᓱᓯᐅᑉ ᑭᖑᓂᖓᓂ.
ᐃᓄᒋᐊᒃᑐᕐᔪᐊᑦ ᒪᓕᒃᐳᑦ ᑖᑦᓱᒥᖓ, ᐊᕐᓁᓪᓗ ᐃᓚᖏᑦ ᒪᓕᖃᑕᐅᔪᑦ ᖁᕝᕕᐅᕐᐳᑦ ᐅᒡᒍᐊᕈᑎᖃᕐᓗᑎᒃ ᔩᓱᓯᒥᒃ. ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᐊᕐᓁᑦ ᔨᕉᓴᓕᒻᒥᐅᑦ, ᕿᐊᑦᔪᑎᒋᓇᓯᓐᖓ, ᐃᓕᑦᓯᓐᓂᒃ ᕿᐊᑦᔪᑎᒋᓕᕆᑦᓯ ᕿᑐᕐᖓᑦᓯᓐᓂᒡᓗ. ᑕᑯᒋᑦ, ᐅᓪᓗᐃᑦ ᑎᑭᑦᓱᒫᕐᐳᑦ ᐃᓄᐃᑦ ᐅᖃᕐᕕᒋᔪᒫᕐᑕᖏᑦ, ‘ᓮᒻᒪᕐᑎᐅᓯᒪᔪᒥᒃ ᐃᓅᓯᖃᕐᐳᑦ ᐊᕐᓁᑦ ᕿᑐᕐᖓᕐᑖᕈᓐᓇᖏᑦᑐᑦ, ᓄᑕᕋᒃᑖᓚᐅᕐᓯᒪᖏᑦᑐᓪᓗ, ᐊᒫᒪᒃᑎᑦᑎᓚᐅᕐᓯᒪᓇᑎᒡᓗ!’ ᑕᒪᓐᓇ ᓇᓪᓕᐅᑎᒃᐸᑦ ᐃᓄᐃᑦ ᐅᖃᕈᒫᕐᐳᑦ ᖃᖅᑲᓄᑦ, ‘ᑲᑕᒡᕕᒋᑎᒍᑦ’; ᐱᖑᖕᓄᓪᓗ ᐅᖃᕈᒫᕆᕗᑦ, ‘ᑕᓕᑎᑎᒍᑦ.’ ᑕᒪᒃᑯᐊ ᐊᑐᕐᑕᐅᔪᓐᓇᕐᐸᑕ ᐱᕈᕐᑐᑦ ᑐᖑᔪᕐᑎᓪᓗᒋᑦ, ᐸᓂᕐᓯᒪᓕᕐᑎᓪᓗᒋᓪᓕ ᖃᓄᐃᑦᑐᖃᕈᒫᕐᐹ?”
ᐊᖑᑏᒃᑕᐅᖅ ᒪᕐᕉᒃ ᐊᓯᖏᒃ, ᐱᐅᖏᑦᑐᓕᓯᒪᔫᒃ, ᐊᒻᒪ ᑐᖁᑕᐅᔭᕐᑐᕐᓗᑎᒃ ᑭᑭᐊᒃᑐᕐᑕᐅᕕᒃᓴᒧᐊᕐᑎᑕᐅᒋᕘᒃ ᔩᓱᓯ ᐃᓚᒋᓪᓗᒍ. ᖃᖅᑲᒧᑦ ᑎᑭᓐᓇᒥᒃ ᐊᑎᓕᖕᒧᑦ ᓂᐊᖁᕕᓂᕐᒥᒃ, ᑕᕝᕙᓂ ᔩᓱᓯ ᑭᑭᐊᒃᑐᕐᐹᑦ, ᐱᐅᖏᑦᑐᓕᓯᒪᔫᒡᓗ, ᐂᑉᐹ ᑕᓕᕐᐱᐊᓂ, ᐂᑉᐸᖓᓗ ᓴᐅᒥᐊᓂ. ᔩᓱᓯ ᐅᖃᕐᐳᖅ, “ᐊᑖᑖᒃ, ᐃᓱᒪᒋᔪᓐᓁᕐᕕᒋᒃᑭᑦ; ᖃᓄᐃᓕᐅᕐᓂᕐᒥᖕᓂᒃ ᖃᐅᔨᒪᖏᒻᒪᑕ.”
ᔩᓱᓯᐅᑉ ᐊᓐᓄᕌᖏᑦ ᓇᓚᐅᑖᕈᑎᒋᓪᓗᒋᑦ ᐊᑐᓂᑦ ᐱᑖᕋᓱᐊᕐᐳᑦ. ᐃᓄᐃᑦ ᑕᕝᕙᓂ ᓇᖏᕐᐳᑦ ᑕᑯᓐᓈᕐᓗᑎᒃ; ᔫᑎᓪᓕ ᐊᖓᔪᖅᑳᖏᑦ ᒥᑕᐅᑎᖃᕐᐳᑦ ᔩᓱᓯᒥᒃ, ᐅᖃᕐᓗᑎᒃ, “ᐊᓯᒥᓂᒃ ᐱᐅᓕᓯᓚᐅᕐᐳᖅ; ᐃᒻᒥᓂᒃ ᐱᐅᓕᓕᕐᓕ, ᒥᓮᐊᓯᐅᒍᓂ ᒎᑎᐅᑉ ᓂᕈᐊᕐᓯᒪᔭᖓ!”
ᐅᓇᑕᕐᑐᒃᓮᑦᑕᐅᖅ ᒥᑕᐅᑎᒋᕚᑦ; ᒪᔪᕋᕐᕕᒋᓪᓗᒍ ᐅᐂᓂᒥᒃ ᖃᒃᑭᓐᓇᕐᑐᒥᒃ ᐱᑎᓐᓇᓱᐊᕐᐹᑦ, ᐅᖃᕐᓗᑎᒡᓗ, “ᔫᑎᑦ ᐊᖓᔪᖅᑳᕐᔪᐊᕆᒃᐸᑎᑦ, ᐃᓕᖕᓂᒃ ᐱᐅᓕᓚᐅᕆᑦ!”
ᖁᓛᓂᓗ ᑎᑎᕋᕐᓯᒪᔪᖃᕐᐳᖅ ᐃᒤᓕᔪᓂᒃ: “ᐅᓇ ᔫᑎᑦ ᐊᖓᔪᖅᑳᕐᔪᐊᖓᑦ.”
ᓂᕕᖓᖃᑎᖓᑕᓗ ᐂᑉᐸᖓᑕ ᒥᑕᐅᑎᒋᕚ, ᐅᖃᕐᓗᓂ, “ᒥᓮᐊᓯᐅᓐᖏᓚᑏᑦ? ᐃᓕᖕᓂᒃ ᐱᐅᓕᓚᐅᕆᑦ ᐅᕙᒍᒡᓗ!”
ᐂᑉᐸᖓᑕᓕ ᐃᓂᕐᑎᕐᐹ ᐅᖃᕐᓗᓂ, “ᒎᑎᒥᒃ ᓯᕘᕋᖏᓐᓇᕖᑦ? ᑍᒫᓪᓗᐊᕐᑕᐅᖅ ᑖᑦᓱᑐᓇᖅ ᓱᒋᐊᕐᑕᐅᔪᑎᑦ ᑐᖁᑕᐅᓂᐊᕐᓗᑎᑦ. ᐅᕙᒍᒃᓕ ᑍᒫᒃ ᐱᔭᐅᑦᔪᑎᒃᓴᖃᕋᓐᓄᒃ ᐱᓂᐊᕐᕕᐅᕗᒍᒃ ᐱᓂᐊᕐᓂᕆᓚᐅᕐᑕᕗᒃ ᒪᓕᒡᓗᒋᑦ; ᐅᓇᓕ ᐊᖑᑦ ᓈᒻᒪᖏᑦᑐᒥᒃ ᐱᓚᐅᓐᖏᓚᖅ.” ᔩᓱᓯᒧᑦ ᐅᖃᕐᐳᖅ, “ᔩᓱᓰ ᐃᖅᑲᐅᒪᓛᕐᐸᕐᒪ ᐊᑕᓂᐅᕕᖕᓄᑦ ᑎᑭᒍᕕᑦ!”
ᔩᓱᓯᐅᑉ ᐅᖃᐅᑎᕚ, “ᓱᓕᔪᒥᒃ ᐅᖃᐅᑎᕙᒋᑦ, ᐅᓪᓗᒥ ᐂᑉᐸᕆᓂᐊᕐᐸᕐᒪ ᖁᕕᐊᓇᕐᑐᕕᖕᒥ.”


ᐅᓪᓗᖅ ᕿᑎᕋᓕᕐᑎᓪᓗᒍ, ᓄᓇᓕᒫᖅ ᑖᕐᓯᓚᐅᕐᐳᖅ ᐅᓐᓄᓴᖕᒧᑦ 3ᒧᑦ ᑎᑭᓪᓗᒍ, ᓯᕿᓂᖅ ᖃᐅᒪᔪᓐᓃᕐᓯᒪᑎᓪᓗᒍ; ᑐᒃᓯᐊᕐᕕᒡᔪᐊᑉ ᐃᓗᐊᓃᑦᑐᖅ ᑖᓗᑕᕐᔪᐊᖅ ᐊᓕᒃᐳᖅ ᒪᕐᕉᓕᓪᓗᓂ. ᔩᓱᓯ ᓂᐱᖅᑯᕐᑐᓪᓗᓂ ᕾᒐᓛᕐᐳᖅ, ᐅᖃᕐᓗᓂ, “ᐊᑖᑕᒃ, ᐊᓂᕐᓂᕋ ᐃᓕᖕᓄᑦ ᑐᓂᕙᕋ!” ᑍᒫᒃ ᐅᖃᕇᕋᒥ ᐊᓂᕐᓇᖏᕐᐳᖅ.
ᐅᓇᑕᕐᑐᒃᓮᑦ ᐊᖓᔪᖅᑳᖓᑦ ᑕᑯᒐᒥ ᐱᓂᐊᕐᓂᐅᔪᒥᒃ, ᒎᑎ ᓂᕐᑐᓕᕐᐹ, ᐅᖃᕐᓗᓂ, “ᐃᓛᒃ ᐊᖑᑦ ᑖᓐᓇ ᓱᓕᓪᓗᓂ ᐸᓯᔭᐅᑦᔪᑎᒃᓴᖃᓚᐅᓐᖏᓚᖅ!”
ᐃᓄᓕᒫᑦ ᑕᕝᕙᓃᑦᑐᑦ ᑕᑯᔭᕐᑐᕐᓯᒪᔪᑦ, ᑕᒪᑐᒥᖓ ᖃᐅᔨᒐᒥᒃ ᖃᓄᐃᑦᑐᖃᕐᒪᖔᑦ, ᐊᖏᕐᕋᓕᕐᐳᑦ ᓴᒡᕕᖕᒥᖕᓂᒃ ᐸᑎᒃᓯᖃᑦᑕᕐᓗᑎᒃ ᕿᒃᓵᖕᓂᕐᒧᑦ. ᔩᓱᓯᒥᒃ ᖃᐅᔨᒪᓪᓚᕆᒃᑐᓕᒫᑦ, ᐊᕐᓁᓪᓗ ᒐᓕᓕᐊᒥᑦ ᐱᓯᒪᔪᑦ ᐅᖓᓯᒋᔭᖓᓂ ᓇᖏᕐᐳᑦ ᑕᑯᓐᓈᕐᓗᑎᒃ ᑕᒪᒃᑯᓂᖓ.


ᐊᖑᑎᑕᖃᓚᐅᕐᐳᖅ ᔫᓯᐱᒥᒃ ᐊᑎᓕᖕᒥᒃ ᔫᑎᑦ ᓄᓇᖏᑕ ᐃᓚᖓᓐᓂᑦ ᐊᕆᒪᑎᐊᒥ ᓄᓇᖃᕐᑐᒥᒃ. ᑖᓐᓇ ᔫᑎᑦ ᑲᑎᒪᔨᕐᔪᐊᖏᓐᓄᑦ ᐃᓚᒋᔭᐅᔪᖅ, ᐃᓄᑦᓯᐊᕙᐅᕗᖅ ᓇᓛᒎᕐᑐᒥᒃ ᐃᓅᓯᖃᕐᓗᓂ, ᑖᓐᓇ ᑲᑎᒪᔨᐅᖃᑎᒥᓂᒃ ᐊᖏᖃᑎᖃᓚᐅᓐᖏᓚᖅ ᐱᑦᔪᑎᒋᔭᖏᓐᓂᒃ ᐱᓂᐊᕐᓂᖏᓐᓂᒡᓗ, ᒎᑎᐅᑉ ᐊᑕᓂᐅᕕᖓᑕ ᑎᑭᑦᓱᒫᕐᓂᖓᓂᒃ ᓂᕆᐅᒋᔭᖃᕐᐳᖅ. ᑖᓐᓇ ᐰᓛᑑᓯᒧᑦ ᐅᐸᒍᑎᓚᐅᕐᐳᖅ ᔩᓱᓯᐅᑉ ᑎᒥᖓᓂᒃ ᐱᔪᓐᓇᕐᑎᑕᐅᔪᒪᓪᓗᓂ. ᔩᓱᓯᐅᑉ ᑎᒥᖓ ᓴᓐᓂᖓᔪᓕᖕᒥᑦ ᐊᖅᑲᕐᑎᑉᐹ ᐃᒻᒧᓯᕐᓗᒍ ᖃᓪᓗᓈᕐᑕᒥᒃ ᓵᑦᑐᒥᒃ, ᐃᓕᓪᓗᒍ ᐃᓗᕕᕐᒧᑦ ᐃᓗᓕᐅᕐᓯᒪᔪᒧᑦ ᕾᕐᓱᒥ, ᑐᖁᖓᔪᒥᑦ ᓱᓕ ᐃᓗᕕᕐᕕᐅᓚᐅᕐᓯᒪᖏᑦᑐᒧᑦ. ᑖᓐᓇ ᐅᓪᓗᖅ ᐅᐸᓗᖕᒊᔭᕐᕕᐅᖕᒪᑦ, ᓴᐸᑎᒧᑦ ᓴᐸᑎᓐᖑᕐᐸᓪᓕᐊᓂᐊᓕᕐᓗᓂ.
ᐊᕐᓁᑦ ᔩᓱᓯᒥᒃ ᒪᓕᓚᐅᕐᑐᑦ ᒐᓕᓕᐊᒥᑦ ᔫᓯᐱ ᒪᓕᒃᐹᑦ, ᑕᑯᓪᓗᑎᒃ ᐃᓗᕕᕐᒥᒃ, ᔩᓱᓯᐅᑉ ᑎᒥᖓ ᖃᓄᖅ ᐃᓗᕕᕐᑕᐅᖕᒪᖔᑦ ᑕᑯᓐᓈᕐᓗᑎᒃ; ᐊᖏᕐᕋᕋᒥᒃ ᑎᐱᑦᓯᐊᕆᒃᓴᐅᑎᑦ ᒪᒪᕐᓴᐅᑎᓪᓗ ᑎᒥᖓᓄᑦ ᒥᖑᐊᕈᑎᒋᓂᐊᕐᑕᑎᒃ ᐅᐸᓗᖕᒊᔭᕐᐰᑦ.
ᓴᐸᑎᒥ ᕿᑲᕐᐳᑦ, ᐱᖁᔭᓂᒃ ᒪᓕᒡᓗᑎᒃ.

ฟัง ᓘᑲᓯᐅᑉ ᐊᒡᓚᖏᑦ 23