Cäk 12
12
Nhialic acɔl Abram
1 #
Luɔi 7:2,3; Ɣeb 11:8. Go Bɛ̈nydït lɛ̈k Abram an, “Jël pinydun, nyääŋë mïthëkɔckun piny, ku nyääŋë baai de wuur piny, ku lɔ paan bä lɔ nyuöth yïn. 2Yïn bä gäm mïth juëc. Ku abïk aa jur dït. Ku yïn bä thieei, ku rinku abä ke tɔ ŋic ë kɔc juëc. Ku yïn bä tɔ ya athiɛɛi.
3 #
Gal 3:8. Kɔc ee yï thieei, abä keek aa thieei.
Ku kɔc ee yï cieen, abä keek aa cieen.
Ku juöör ke piny nɔm, abä keek thieei në yïyic.” #12:3: Në yïyic...juöör; ku Juöör ëbɛ̈n abïk ɛn aa thiëëc bä keek thieei cït man cän we thieei.
4Ago Abram jäl, cït man cï Bɛ̈nydït e lɛ̈k en. Go Lɔt jäl ke yen. Ku Abram aaye run thiërdhorou ku dhïc, wään jël en ë Ɣaran. 5Ago Abram Tharai tiiŋde jɔt, kekë Lɔt wën ë mänhë, ku kaken kedhie, ku kɔc lui në yen ë Ɣaran, ku jëlkï lek piny ë Kanaan.
Na wën, aa lek ɣet piny ë Kanaan, 6acï Abram bɛ̈n baaric të nu tim de ɣok de Mameer, në piny de Cekem. Ku kɔc ke Kanaan aake ŋoot ke ke cieŋ ee pinyë. 7#Luɔi 7:5; Gal 3:16. Go Bɛ̈nydït bɛ̈n tëde Abram, ku lëk en an, “Piny bä gäm mïthku kï.” Ago Abram Bɛ̈nydïït cï tïc tëde yen yiëk yïk. 8Ku jɔ bɛ̈n kuëëth ke lɔ piny ë kuur, piny nu wun cɔl Bethel kɔ̈u të lɔ aköl amiäk. Ku piëët paanyde në kaam de Bethel kekë wun cɔl Ai, ke Bethel ë nu baŋ të lɔ aköl athɛ̈i, ku Ai ë baŋ të lɔ aköl amiäk. Go Abram Bɛ̈nydït yiëk yïk ëtɛ̈ɛ̈n, ku lɛm. 9Ku jɔ Abram bɛ baaric ke cath ke ye lɔ̈ŋ kueer, abï ɣet piny ë Kanaan thar ciëën ya, të lɔ wöuwic.
Abram anu Paan ë Rip
10Ku ëtɛ̈ɛ̈n, cɔŋ dït aa nu piny ë Kanaan, go Abram baaric ke lɔ paan ë Rip, le yök ke rɛ̈ɛ̈r ëtɛ̈ɛ̈n, në luɔi ë dïït ë cɔk aläl. 11Na wën, ale thiɔ̈k ke Rip, ke lëk Tharai tiiŋde, an, “Aŋiɛc nɔn yïn tiiŋ läk aläl. 12Të le kɔc ke Rip yï tïŋ, abïk ŋic nɔn yïn tiiŋdï, ku abïk ɛn nɔ̈k ku pälkï yïn. 13#Cäk 20:2; 26:7. Ka yïn ye lɛ̈k keek nɔn yïn nyankäi, ke ke bï ya ŋiëc looi në biäkdu, ku acïkï ya bï bɛ nɔ̈k në këdu.” 14Na wën, acï Abram ɣet paan ë Rip, ke kɔc ke Rip ë ke tïŋ Tharai ke ye tiiŋ läk aläl. 15Na wën, ale bäny nu ë melik ë Rip cök ye tïŋ, ke löckï melik ë Rip. Gokï tik lɛɛr ɣön ë melik. 16Ku melik ë Abram bɛ̈n nyuööc apiɛth në biäk de Tharai. Go Abram gäm luny ë thök, ku ɣɔ̈k, ku mul, ku thɔ̈rɔ̈l, ku lïïm röör ku diäär.
17Ago Bɛ̈nydït melik de Rip jieth piɔ̈u, kekë baaide në jɔɔk tuc thook, jɔɔk ë cï tuöc keek në këde Tharai, tiiŋ de Abram. 18Go melik Abram cɔɔl, ku lëk en an, “Eeŋö ë kërɛɛc cï luöi yɛnë? Eeŋö kën yïn e lɛ̈k ɛn nɔn yen tiiŋdu? 19Eeŋö lueel yïn en an ee nyankui, ku tɔ nääm ke ye tiiŋdï? Ku ënɔɔnë, ŋö tiiŋdu kï, nöm këdu, ku jälkï we yen.” 20Ku lëk ë melik kɔcke nɔn ruɛc kek Abram cök. Agokï ruac cök kueer kekë tiiŋde, ku kakɛn nu tëde keek.
ที่ได้เลือกล่าสุด:
Cäk 12: dip-JPB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
The Bible in Jieeng de Padang © The Bible Society in South Sudan, 2011.