Ala Kalɔ Buse 6
6
Likpidi Lɛni Bekyuli Baabla
1Uwi ɔmmɔ kemmo ni, bekyuli bése kalɔ beemomo na kalɔ lɛlɔ. Na báwɔ belekubi pii 2ɔni na kayaa batu bani náyila bana kenyekɔ na Katɔti kudɔ ni, bánu kalɛ na beleku bammɔ baadia bɔnu ɔsu ni, béti bani na baayɔ́. 3Amu na Unwoti ɔ́su ɔnini, “Mina kɔyu kɔɔɔdubo ukyuli kemmo bɔkya uwi ƒui. Anwuɔsu ukyuli ɔdubo bukpi. Na nwuna ngba emeyi adubɔbla akwa eti anyɔ ku aavlanyɔ kani.”
4Na uwi ɔmmɔ kemmo ku nwuna kama ni, bekyuli bani nákuku na bebo ɔlɔkplu bákya. Na bekyuli bamɛni badi ayu ani nébo kalɔ na Katɔti anumi na bana kasikɔ kási beleku bani na bekyuli báwɔ na kalɔ lɛlɔ. Na badi banana bani náƒɔ lɛnyi geen bábavi.
5Unwoti ɔ́nu kalɛ na ukyuli likyulikpi lɛ́ƒɔ kalɔ lɛlɔ. Na likpidi kasusu kani na ukyuli uuti uwi biala. 6Na úduo Unwoti ka údie ukyuli ɔ́kya kalɔ lɛlɔ. Na nwuna kayi kénu ɔlɛ geen. 7Anwuɔsu Unwoti ɔ́su ɔnini, “Ndubo ukyuli ɔni na lɛ́bla udu bɔyila na kalɔ lɛlɔ. Ɔ́si bekyuli lɛlɔ útédu ku bebuo ku bebweyi bani mɔɔví kalɔ lɛlɔ ƒui ku baasɛ bani muuveyi taavi kayaa lɛlɔ. Ɔsika úduo-mi geen ka lɛ́bla-ma.” 8Nsu Noa anwu ni, nwuna lɛlɔ lɛ́da Unwoti kubiti.
9Noa ngba litemi na bɔdubo bunu mɛni.
Noa ɔdi ukyuli ɔni nse siin na likpidi lɛdi lɛɛɛda-nwu na bakladi akɔ. Na ɔ́siaku Katɔti kama geen. 10Ɔ́wɔ bebi ɛtɛ. Na ama ndi Sem ku Ham ku Yaƒet.
11Uwi ɔmɛni kemmo ni, likpidi bɔbla búbile kayawi na Katɔti anumi na ɔda bubo lɛlɔ tadi ku lɛlɔ bukpoku kani nkya. 12Amu ka Katɔti ɔ́nu kalɛ na kayawi kammɔ kébie 13ɔsu ni, ɔ́su Noa ɔnini, “Ndubo bekyuli ƒui udu bɔyila. Ɔsika ɔda bubo lɛlɔ tadi kani náƒɔ kayawi na bekyuli bammɔ ɔsu. Ɔmɛni ɔsu ndubo bekyuli bammɔ ku kalɔ kammɔ ƒui udu bɔyila, na nsɔ naaavumana mina kasusu.
14“Anwuɔsu ti kugyikɛ kɔbuni na anwi ɔkɔlɔ bɔnwu aani ɔtɔ kalɛ te lɛlɔ. Bla lɛtɔ kya-nwu kemmo na akwa-ni kemmo ku kama ku kɔma. 15Na kalɛ na adubo-nwu bɔnwi na ndubo-ɔ bɔtina mɛni. Ɔkɔlɔ bonwu ɔmmɔ ɔlɛka une lɛgba eti yaalenwi (450). Na ɔbɛbɛ lɛgba liti ku aavlanyɔ-ɛlɔ. Na ɔkuku lɛgba aavlene-ɛlɔ. 16Na ebi ɔkɔlɔ ɔmmɔ katɔ na edie liƒi ete bukeye bɔkɔku aani lɛnimi kukolo leevu-maane (18) na nwuna katɔ. Kya ɔkɔlɔ ɔmmɔ kayakun na ɔƒɛnyi. Na abla ɔkɔlɔ ɔmmɔ katu taasia ɛtɛ.
17“Na ndubɔya na ɔnantu ɔna ɔƒɔ kalɔ lɛlɔ ƒui na ɔyila lɛla biala mbo ngba udu. 18Nsu ndubuti bunyimi bɔdi lɛkya ami ku awɔ ntɛ. Na eteesie etéduo ɔkɔlɔ ɔmmɔ kemmo ku ƒula bebi ku ƒ'ulekudi ku ƒula bebi bele. 19Na adubo ebuo biala udu inyɔ inyɔ bɔkpanku bɔkya ɔkɔlɔ ɔmmɔ kemmo ɔgya ku ule kalɛ na ama bakɛ ngba na ƒula kudɔ. 20Baasɛ lɛnɔ bana udu inyɔ inyɔ ku bebuo lidu lidu lɛnɔ inyɔ inyɔ ku bebweyi bani ƒui mɔɔví kalɔ lɛnɔ badubo-ɔ kudɔ na mmɔ kalɛ na bakɛ ngba. 21Na ɔlɛka asala adila biala udu na baadi ese ete lɛlɔ ku bebuo bammɔ ƒui.”
22Na Noa lɛnɔ ɔ́bla kalɛ na Katɔti ɔ́su-nwu pɛpɛɛpɛ.
ที่ได้เลือกล่าสุด:
Ala Kalɔ Buse 6: lef
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 1995, 2014 Ghana Institute of Linguistics, Literacy and Bible Translation in cooperation with Wycliffe Bible Translators, Inc.