Matius 6
6
En andumoro' i matawang sé tou lengéi
1 #
Mat. 23:5
“Ta'néieno mangé, tioo paémaan iow en atoran in agama an dior é tou wosama' sérén éra wo irayo éra kamu, ampa'paan sa kamu maéma' tanu siitu, ra'ica kéréan iow en laasa i Amang iow an sorga. 2Anaé, sa kamu méé sapa-sapake' en tumawang sé tou lengéi, tioo ipakua-kua tanu sé pengaémaan é tou punek am balé-walé paapo'an é agama Yahudi wo an lala-lalan wosama' séra irayo é tou. En ulitna icua-Ku mangé ai camu, séra makéréo in laasa éra. 3Taan sa kamu méé sapa-sapake', tioo kailekan ing kama ka'biri miow sapa e niéma' ing kama kakan iow. 4Anaé, en aiwéé miow itu iwééo mangé i maene-enep, wo in taniitu si Amang iow si makaséré mai sé icaenep, suli'an-Na oka ai camu sapa si niéma' miow itu.”
En andumoro' i masombayang
(Luk. 11:2-4)
5 #
Luk. 18:10-14
“Sa kamu sumombayang, tioo mengasombayang tanu sé tou punek. Séra mengasombayang, casalé' éra makatulung am balé-walé paapo'an wo ka'i am péngko-péngkoran in lalan wangko', wosama' séra sérén é tou. En ulitna icua-Ku mangé ai camu, séra makéréo in laasa éra. 6Taan sa kamu sumombayang, muntepo ang kamar iow, palenano em papalen wo sumombayango mangé a si Amang iow si an tampa caenep. Wo in taniitu, si Amang iow si makaséré mai sé caenep, suli'an-Na oka sapa e niéma' miow itu.
7Wo ka'i an sombayang iow itu tioo talambot tanu ing kanaramen é bangsa sé ra'ica makatuus si Amang Kasuruan. Paweroten éra sapaoka sa maké ing keli nunuwu' en sombayang éra énan oka. 8Anaé, tioo kamu kaputé éra, ampa'paan ra'ipé' pinangilek iow a si Amang Kasuruan, kinailekan-Nao sapa em paperlun iow. 9Ampa'paan in itu, sumombayango in tana'i,
‘Amang ami an sorga,
e ngaran-Mu le'nas wo iparangka-rangka',
10mayoo si Amang kumawasa tanu Kolano ami,
mamualio eng kasalé'an-Mu
ang kayo'baan meputé an sorga.
11Wéanai kami asi endo anio' kakanen si paperlun ami.
12Wo ampunganai eng kamesé-meséaan ami,
kaputé ami ka'i mawéé ing kaampungan a si tou si méma' ing kameséaan ai cami.
13Wo tioo woo iwali kami muntep am pangepé'an,
taan iwekaro mai kami ang kawasa i léwo'.
[Ampa'paan si Amango e makaanu ing kakolanoan wo ing kawasa, wo iparangka-rangka' akar ing kauré-uré. Ulit.’]
14 #
Mrk. 11:25
Sa ampungan iow eng kameséaan sé niéma' é tou ai camu, si Amang iow an sorga ka'i méé oka ing kaampungan ai camu. 15Taan sa kamu ra'ica mengaampung sé tou mengaéma' ing kaséaan ai camu, si Amang iow an sorga ka'i ra'ica kawisa méé ing kaampungan ang kaséaan iow.”
En andumoro' i mapuasa
16“Sa kamu mengapuasa, tioo en amo miow susa tanu sé tou punek. En amo éra mapa in susa kéndoon, wosama' sérén é tou sapaoka séra ang karoro'an i mapuasa. En ulitna icua-Ku mangé ai camu, siituo en laasa si kinéréano éra. 17Taan sa kamu mengapuasa, mu'aso mio' in amo an dano wo ko'koteno mangé em buuk an do'kos iow, 18wosama' ra'ica kailekan é tou sapaoka kamu ang karoro'an imapuasa, taan wayake' si Amang iow si an tampa ra'ica kaséréan e makailek. Wo si Amang iow si makaséré mai sé caenep, suliin-Na oka mai sapa e niéma' miow itu.”
En andumoro' i masuun ing kasiyaan an sorga
(Luk. 12:33-34)
19 #
Yak. 5:2-3
“Tioo kamu masuun ing kasiyaan torona in owak iow ang kayo'baan, ampa'paan eng kasiyaan ang kayo'baan anio' lolondin oka wo léwoon in taincéré' wo mai egan é rombit e rombiten éra eng kasiyaan itu. 20Taan umungeno eng kasiyaan iow an sorga, si ra'ica léwoon é lolondi wo in taincéré' wo ra'ica egan é rombit e rombiten. 21Ampa'paan am bisa eng kasiyaan iow, am bitu ka'i en até miow.
22 #
Luk. 11:34-36
Em beren itu sosoloan in owak. Sa em beren iow loor, sendoto waya en owak iow. 23Sa em beren iow makewuro, imariréimbengo waya en owak iow.
24 #
Luk. 16:13
Ra'ica wana esa tou ka'i e ro'na tumawoi a sé rua tuang. Ampa'paan sa tanu siitu, icasuutna oka si esa tuang wo icaupusna si tuang walina, kuma'pa sia le'tek oka a si tuang esa wo ra'ica mapandung si tuang walina. Taniituo ka'i kamu, tantu ra'ica toro sumelewir a si Amang Kasuruan sa memero-merotke' ing kasiyaan ing kayo'baan.”
En andumoro' ing kaindé-indé'an
25“Ampa'paan in itu, icua-Ku mangé ai camu, tioo maindé-indé' andumoro' ing katouan iow, andumoro' ing kakanen iow kuma'pa in elepen, wo tioo maindé-indé' andumoro' in owak iow, andumoro' in sapa em pakén iow. Ra'ica réén eng katouan si lébé pentingai wo ing kakanen wo en owak itu si lébé pentingai wo ing karai? 26Séréno mangé sé burung an langit, sé ra'ica mausew wo ra'ica maupu' wo ra'ica wana paumungan im buéna, taan pengawéanai kanen i Amang iow an sorga. Ra'ica réén icamu en lébé awéan wééna wo sé burung itu? 27Si séi réén an esaan ai camu ampa'paan i maindé-indé', ro'na lumambot in umurna ang katouanna?
28Kéitu réén kamu maindé-indé' andumoro' ing karai? Wéanio' rékén em bungang bakung am pangumaan, si tumou ra'ica matawoi wo mawi'bit. 29#1Raj. 10:4-7; 2Taw. 9:3-6Icua-Ku mangé ai camu, eng kasiyaan i Salomo ra'io icakua, taan sia ra'ica kawisa mekarai tanu ing kapasung im bungang itu. 30Sa en dukut am pangumaan asi endo anio' awéan taan woondona mai tiya' an api, taan piniara wo niéma' i Amang Kasuruan pasung. Ra'ica réén icamu en émaan-Na lébé pasung, éi tou sé ra'ipé' talos maéman?
31Ampa'paan in itu, tioo kamu maindé-indé' wo makua, ‘Sapa eng kanen oka ami?’ wo ‘Sapa en elepen oka ami?’ kuma'pa ‘Sapa ka'i eng karaien oka ami?’ 32Pakasa en itu pinangéré é bangsa sé ra'ica makatuus si Amang Kasuruan. Taan kailekan i Amang iow an sorga pakasa sé paperlun iow. 33Anaé, pangérén owo eng Kakolanoan i Amang Kasuruan wo eng kasalé'an-Na, wo pakasa em paperlun iow itu yawes-Na oka ai camu. 34Anaé, tioo kamu maindé-indé' andumoro' si endo woondo, ampa'paan si endo woondo awéan eng kaindé-indé'ana in esa. Eng kasusaan sangando aweske' in sangando.”
ที่ได้เลือกล่าสุด:
Matius 6: TNT
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
En Taar Weru a nunuwu' é Tontemboan @ LAI 2018