KUMA 10
10
Ũthĩn’yo wa ngie
1Na Yeova amwĩa Mose, Lika kwa Valao: nũndũ nĩnũmĩtye ngoo yake, na ngoo sya athũkũmi make, nĩ kana nonan’ye syama ii syakwa katĩ woo, #Kuma 4.21. 2na nĩ kana ũtonye kũneena mwana waku akĩw’a, o na mwĩsũkũũu, maũndũ ala nĩkĩte Misili, na syama syakwa ila nĩkĩte katĩ woo: nĩ kana mũmanye ninyie Yeova. #Kuma 7.17; Kũt 4.9; Sav 44.1; 78.4,6; Yoe 1.3. 3Na Mose na Aluni malika kwa Valao, na mamwĩa, Ũũ nĩw’o Yeova, Ngaĩ wa Aevelania, ũnũkwasya, Wĩlea kwĩnyivya mbee wakwa kũvika ĩndĩĩ? Lekya andũ makwa mathi, manthũkũme. #1 Asu 21.29; 2 Mav 7.14; 34.27. 4Kana, ethĩwa nũũlea kũlekya andũ makwa mathĩ, sĩsya, ũnĩ ngaete ngie ilike mĩvakanĩ yaku: #Nth 30.27; Ũvu 9.3. 5na ikavw’ĩka ĩũlũ wa nthĩ, o ũndũ mũndũ ũtatonya kũmyona nthĩ: na ikaya kĩla kĩtiele kya kĩla kĩthonokete, kĩla kyamũtialĩle mbuanĩ ya mavia, na ikaya kĩla mũtĩ ũla ũmeaa kwondũ wenyu kĩsesinĩ: #Kuma 9.32. 6na nyũmba syaku, na nyũmba sya athũkũmi maku onthe, na nyũmba sya Amisili onthe ĩkausũwa nĩsyo; o tondũ aaĩthe maku, o na aũmae maku mataaona, kuma mũthenya mambĩlĩlya kũsyawa kũũ nthĩ kũvika ũmũnthĩ. Na eethyũũa, na auma kwa Valao. #Yoe 2.9. 7Na athũkũmi ma Valao mamũkũlya, Mũndũ ũũ akekala e mũtei kwitũ kũvika ĩndĩĩ? Lekya andũ mathi, mathũkũme Yeova Ngai woo: ndũnamba kũmanya kana Misili nĩ mbanangĩku? 8Na Mose na Aluni matũngwa kwa Valao ĩngĩ: na amea, Endai, mũthũkũme Yeova Ngai wenyu: ĩndĩ ala methĩ naaũ? 9Na Mose amwĩa, Tũkaenda na syana sitũ na akũũ maitũ; na tũkaenda na ana maitũ na eĩtu maitũ, na ndĩthya sitũ sya mbũi na malondu na ndĩthya sitũ sya ng’ombe; nĩkwĩthĩwa no mũvaka twĩthĩwe na mboka kwondũ wa Yeova. #Kuma 5.1. 10Na amea, Yeova ethĩwe nenyu ĩndĩ, o tondũ ngũmũlekya mũthi na syana nini syenyu: sisyai; nũndũ kwĩ ũthũku mũsũanĩĩte. 11Tiw’o: endai yu, inyw’ĩ andũ aima, mũthũkũme Yeova; nũndũ ũu nĩ ũla mũkwenda. Na malũngw’a kuma kwa Valao.
12Na Yeova amwĩa Mose, Tambũũkya kw’oko kwaku ĩũlũ wa nthĩ ya Misili, nĩ kana ngie syũke syambate nthĩ ya Misili, na kũya nyũnyi syonthe sya nthĩ, o syonthe ila itialĩtw’e nĩ mbua ya mavia. #Kuma 9.22; 10.5. 13Na Mose atambũũkya ndata yake ĩũlũ wa nthĩ ya Misili, na Yeova aete kĩuutani kyumĩte wumĩlonĩ wa syũa ĩũlũ wa nthĩ mũthenya ũsu w’onthe, na ũtukũ w’onthe; na kwakya, kĩuutani kĩla kyumite wumiloni wa syũa kyaete ngie. 14Na ila ngie syambata ĩũlũ wa nthĩ yonthe ya Misili, na syekala mĩvakanĩ yonthe ya Misili; syaĩ mbai mũno; kũtyaaoneka ĩngĩ ngie itilyĩ ta isu, o na kũtikethĩwa ĩngĩ tasyo. #Sav 78.46; 105.34; Yoe 2.2. 15Nũndũ syavw’ĩkie ĩũlũ wa nthĩ yonthe, mũvaka nthĩ yaya kĩvindu; nasyo syaya nyũnyi syonthe sya nthĩ, na ũsyao w’onthe wa mĩtĩ ũla mbua ya mavia yatialĩtye: na kũtyaatialwa kĩndũ kĩũ o na kĩmwe, kya mũtĩ kana nyũnyi sya mũũndanĩ, nthĩ yonthe ya Misili. #Sav 105.35. 16Nĩvo ĩndĩ Valao wetie Mose na Aluni na mĩtũkĩ; na amea, Nĩnĩmũvĩtanĩsye Yeova Ngai wenyu, o nenyu. #Kuma 9.27. 17Na yu ĩndĩ, nĩngũmwĩsũva, ũndekee ĩvĩtyo yakwa ĩvinda o yĩĩ yĩmwe, na ũimwĩsũva Yeova Ngai wenyu, ambetee kĩkw’ũ kĩĩ kyoka. #Kuma 8.8; 1 Asu 13.6. 18Na auma kwa Valao, na amwĩsũva Yeova. #Kuma 8.30. 19Na Yeova aalyũla kĩuutani kĩ vinya mũno kyumĩte ngalĩ ya ũthũĩlonĩ wa syũa, kĩla kyookĩlilye ila ngie, na kyaitwaa na vinya Ũkanganĩ Mũtune; kũtyaatialwa ngie o na ĩmwe mĩvakanĩ yonthe ya Misili. #Yoe 2.20. 20Ĩndĩ Yeova oomya ngoo ya Valao, nake ndaalekya ana ma Isilaeli mathi. #Kuma 4.21.
Ũthĩn’yo wa kĩvindu kya ngokomi
21Na Yeova amwĩa Mose, Tambũũkya kw’oko kwaku kwelekela ĩtuni, kwĩthĩwe kĩvindu ĩũlũ wa nthĩ ya Misili, o kĩvindu kĩla kĩtonya kũkwatangwa. #Kuma 10.12. 22Na Mose atambũũkya kw’oko kwake kwelekela ĩtunĩ; na kweethĩwa kĩvindu kya ngokomi nthĩ yonthe ya Misili mĩthenya ĩtatũ; #Sav 105.28. 23matyoonanaa, o na kũtyaaũkĩla mũndũ ũmwe kwake mĩthenya ĩtatũ: ĩndĩ ana onthe ma Isilaeli maĩ na kyeni kũla matwĩe. #Kuma 8.22. 24Na Valao amwĩta Mose, na amwĩa, Endai inyw’ĩ, mũthũkũme Yeova; ĩndĩ ndĩthya syenyu sya mbũi na malondu na ndĩthya syenyu sya ng’ombe nitiwe: syana syenyu nini nasyo iende nenyu. #Kuma 10.8,10. 25Na Mose asya, Ndwĩ ndĩi ya kũlea ũtũnenga nthembo sya kũtonywa mokonĩ maitũ, na nthembo sya kũvĩvw’a, tũthembee Yeova Ngai waitũ. 26Indo sitũ nasyo tũkathi nasyo; kũti ĩvũngũ yĩmwe yĩkatiwa ĩtina; nũndũ kuma nthĩnĩ wasyo mũvaka twose tuthũkũme Yeova Ngai waitũ; na tũtyĩsĩ mũvaka no twavika vo, ila twaĩle kũthũkũma Yeova nasyo. 27Ĩndĩ Yeova oomya ngoo ya Valao, na alea ũmalekya mathi. #Kuma 10.20. 28Na Valao amwĩa, Uma vaa nĩĩ, wĩsũvĩe, ndũkone ũthyũ wakwa ĩngĩ; nũndũ mũthenya o ũla wĩona ũthyũ wakwa ũkakw’a. 29Na Mose, amwĩa, Nĩwaneena nesa; ndikona ũthyũ waku ĩngĩ nongi. #Aevl 11.27.
ที่ได้เลือกล่าสุด:
KUMA 10: Mbivlia
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956