MWAMBĨLĨLYO 41
41
Yosevu aialyũla ndoto ya Valao
1Na kweethĩwa mũminũkĩlyo wa myaka ĩlĩ mĩima, Valao aota: na, sisya, aũngama ũtee wa ũsĩ. 2Na, sisya, syambata kuma ũsĩnĩ ng’ombe nga mũonza, nzeo na nou; na syeeĩthya kĩtothyanĩ. 3Na, sisya, ng’ombe nga ingĩ mũonza syambata ĩtina wasyo kuma ũsĩnĩ, ite nzeo na mosu, na syaũngama ũtee wa ng’ombe ila ingĩ ũtee wa ũsĩ. 4Na ila ng’ombe ite nzeo na mosu syaya ila ng’ombe mũonza nzeo na nou. Na ĩndĩ Valao aamũka. 5Na akoma na aota ĩngĩ ya kelĩ: na, sisya, iia mũonza sya nganũ syamea mũtĩnĩ ũmwe, nene na nzeo. 6Na, sisya, ila mũonza ntheke, syũmanĩlĩtw’e nĩ kĩseve kyumĩte wumĩlonĩ wa syũa, syamea ĩtina wasyo. #Esek 17.10. 7Na iia ntheke syamelya ila iia mũonza nene na nima. Na Valao aamũka, na, sisya, yaĩ ndoto. 8Na kweethĩwa kwakya veva wake nĩwaũũyaa; na atũmana eki onthe ma syama ma Misili, na andũ oĩ onthe mayo: na Valao amatavya ndoto yake; ĩndĩ kũtyaĩ ũmwe ũla waĩ atonya kũmũalyũlĩla Valao syo. #Kuma 7.11,22; Nda 2.1,3.
9Na ĩndĩ ũla mũnengani mũnene wa mbinyu aneena na Valao, akĩmwĩa, Mũnthĩ ũũ nĩngũlilikana mavĩtyo makwa: 10Valao amathilĩkĩle athũkũmi make, na ambĩkĩa ũsũvĩonĩ nyũmbanĩ ya kavuteni wa nguthu ya asũvĩi, nyie na mũui mũnene: #Mwa 40.2,3. 11na twaota ndoto ũtukũ o ũmwe, nyie nake; twaota kĩla mũndũ o ta ũalyũlo wa ndoto yake. #Mwa 40.5. 12Na vo vamwe naitũ vaĩ mwanake, Mũevelania, mũthũkũmi wa kavuteni wa nguthu ya asũvĩi; na twamũtavya, nake atũalyũlĩla ila ndoto sitũ; amũalyũlĩla kĩla mũndũ kwĩanana na ndoto yake. #Mwa 40.12–19. 13Na kweethĩwa, o tondũ watũalyũlĩla, nĩw’o kweethĩiwe; nyie andũnga wĩanĩ wakwa, na ũsu amũsũsya. #Mwa 40.21,22.
14Nĩvo Valao watũmanie amwĩta Yosevu, na mamũete na mĩtũkĩ kuma kasũmbanĩ ke nthĩnĩ wa nthĩ: nake eeyenza, na eekĩa ngũa ingĩ, na avota kwa Valao. #1 Sam 2.8; Sav 105.20; 113.7,8; Nda 2.25. 15Na Valao amwĩa Yosevu, Nĩnĩotie ndoto, o na vai ũmwe ũla ũtonya kũmĩalyũla: nakwa nĩneew’a kũineenwa ũndũ waku, yĩla ũkwĩw’a ndoto nũtonya kũmĩalyũla. #Nda 5.16. 16Na Yosevu amũsũngĩa Valao, akĩmwĩa, Ti nthĩnĩ wakwa: Ngai akamũnenga Valao ũsũngĩo wa mũuo. #Nda 2.28,30. 17Na Valao amwĩa Yosevu, Ndotonĩ yakwa, sĩsya, naũngyĩ ũtee wa ũsĩ: #Mwa 41.1–8. 18na, sisya, kwambata kuma ũsĩnĩ ng’ombe nga mũonza, nou na nzeo: na syeeĩthya kĩtothyanĩ: 19na, sisya, ng’ombe nga ingĩ mũonza syambata ĩtina wasyo, mbonzu na ite nzeo nongi na mosu, o na kũthũka ndyaaona ta isu o na ĩndĩĩ, nthĩ yonthe ya Misili: 20na ng’ombe ila mosu na ite nzeo syaya ila ng’ombe nou sya mbee: 21na syamina kwiya, kũiaamanyĩka kana niĩte; ĩndĩ syeethĩwa ite nzeo, o ta mbee. Na ĩndĩ naamũka. 22Na noona ndotonĩ yakwa, na, sisya, iia mũonza, syamea mũtĩnĩ ũmwe, nima na nzeo: 23na, sisya, iia mũonza, mbovu, na ntheke, na syũmanĩlĩtw’e nĩ kĩseve kyumĩte wumĩlonĩ wa syũa, syamea ĩtina wasyo: 24na iia ntheke syamelya iia mũonza nzeo: na ĩndĩ natavya eki ma syama; ĩndĩ kũtyaĩ ũmwe ũla waĩ atonya kũmanyĩthya.
25Na Yosevu amwĩa Valao, Ndoto ya Valao nĩ ĩmwe: ũndũ Ngai ũkilĩlye kwĩka nĩwamanyĩthya Valao. #Nda 2.28,29,45. 26Ng’ombe mũonza nzeo nĩ myaka mũonza; na iia mũonza nzeo nĩ myaka mũonza: ndoto nĩ ĩmwe. 27Na ng’ombe mũonza mosu na ite nzeo ila syambatie ĩtina wasyo nĩ myaka mũonza, nasyo iia mũonza nthei syũmanĩlĩtw’e nĩ kĩseve kyumĩte wumĩlonĩ wa syũa; isu ikeethĩwa myaka mũonza ya yũa. #2 Asu 8.1. 28Ũu nĩw’o ũndũ ũla namũtavya Valao: ũla Ngai ũkilĩlye kwĩka nĩwamwon’ya Valao. 29Sisya, myaka mũonza nĩyũkĩte ya lĩu mwingĩ mũno katĩ wa nthĩ yonthe ya Misili: 30na ĩtina wayo ĩkaumĩla myaka mũonza ya yũa; na lĩu mwingĩ w’onthe ũkoola nthĩ ya Misili; na yũa yĩkamina nthĩ; #Mwa 45.6; 47.13. 31na ũla lĩu mwingĩ ndũkamanyĩka nthĩ nũndũ wa yĩla yũa yĩatĩĩe; nũndũ yĩkeethĩwa yĩ ĩnene mũno. 32Na nĩkwĩthĩwa ndoto ĩsu ĩmũkĩe Valao kelĩ, nĩ kwa kwĩthĩwa ũndũ ũsu ũlũlũmĩlwe nĩ Ngai, na Ngai akeanĩsya mĩtũkĩ. #Mot 23.19; Isa 14.24. 33Na ĩndĩ yuyu Valao namanthe mũndũ wĩ na kĩlĩko na ũĩ, na kũmwia ĩũlũ wa nthĩ ya Misili. 34Valao nĩeke ũu, na ĩndĩ aie asyaĩĩsya ĩũlũ wa nthĩ, na kĩlungu kya katano kya nthĩ ya Misili kyoswe myakanĩ mũonza ya lĩu mwingĩ. 35Na nĩmomban’ye lĩu w’onthe wa myaka ĩsu mĩseo ĩla yũkĩte, na maie nganũ kw’okonĩ kwa Valao kwondũ wa kya ũya kya i ndũa, nao mosũvĩe. 36Na lĩu ũsu ũkeethĩwa wa kwĩanĩsya nthĩ ũndũ wa myaka mũonza ya yũa, ĩla ĩkethĩwa nthĩ ya Misili; nĩ kana nthĩ ndĩkanangĩke kwondũ wa yũa.
Yosevu aituw’a mũnene wa Misili
37Na ũndũ ũsu Valao oona nĩ ũseo, na athũkũmi make onthe moona nĩ ũseo. 38Na Valao akũlya athũkũmi make, Nĩtũtonya kũmwona ũmwe ũtilyĩ ũũ, mũndũ ũla wĩ na veva wa Ngai nthĩnĩ wake? #Mot 27.18; Nda 4.8; 5.11. 39Na Valao amwĩa Yosevu, Nĩkwĩthĩwa Ngai nũkũmanyĩthĩtye ũu w’onthe, kũi ũmwe wĩ na kĩlĩko na ũĩ taku: 40ũkeethĩwa wĩ ĩũlũ wa nyũmba yakwa, na kwĩanana na ndeto yaku nĩw’o andũ makwa onthe makeaĩwa: no kĩvĩlanĩ kya ũsumbĩ nĩĩthĩwa nĩ mũnene kwĩ we. #Sav 103.21; Meko 7.10. 41Na Valao amwĩa Yosevu, Sisya, nĩkwia ĩũlũ wa nthĩ yonthe ya Misili. #Mwa 42.6; Mũta 4.13,14. 42Na Valao aumya kyaanĩ kyake ngome yake ya ũvana ũsiĩlo, na amĩkĩa kyaanĩ kya Yosevu, na amwĩkĩa ngũa ya katane nzeo, na amwĩkĩa mũnyoo wa thaavu ngingo; #Est 3.10; 8.2,15; Nda 5.29. 43na amũtũlya ĩkasyanĩ ya kelĩ ĩla waĩ nayo; na maneena na wasya mũnene mbee wake, Tulyai ndu: na amwia ĩũlũ wa nthĩ yonthe ya Misili. 44Na Valao amwĩa Yosevu, Ninyie Valao, naku ũte vo vai mũndũ nthĩ yonthe ya Misili ũla ũkokĩlya kw’oko kwake kana kũũ kwake. 45Na Valao amwĩta Yosevu syĩtwa yake, Nzevenathivanea; na amũnenga Asenathi, mwĩĩtu wa Voti‐vela mũthembi wa Oni, ethĩwe mũka wake. Na Yosevu aumaala athi nthĩ yonthe ya Misili.
46Na Yosevu aĩ wa myaka mĩongo ĩtatũ yĩla waũngamie mbee wa Valao mũsumbĩ wa Misili. Na Yosevu auma mbee wa Valao, na athi nthĩ yonthe ya Misili. #1 Sam 16.21; 1 Asu 12.6,8; Nda 1.19. 47Na ĩla myakanĩ mũonza ya lĩu mwingĩ nthĩ yasyaa mbĩ syusĩe. 48Nake oomban’ya lĩu w’onthe wa myaka ĩsu mũonza ĩla yaĩ nthĩ ya Misili, na aia lĩu ndũanĩ: lĩũ wa mĩũnda ĩla yathyũlũlũkĩte kĩla ndũa, aia nthĩnĩ wayo. 49Na Yosevu aia lĩu wa mbaa ngetha ta kĩthangathĩ kya ũkanga, mwingĩ mũno, kũvika aeka ũtala; nũndũ ndwaĩ ũtalĩka. #Yos 11.4; Asi 7.12; 1 Sam 13.5; Sav 78.27. 50Na Yosevu asyaĩwa ana elĩ mbee wa mwaka wa yũa ũtanoka, ala Asenathi, mwĩĩtu wa Voti‐vela mũthembi wa Oni, wamũsyaĩe. #Mwa 46.20; 48.5. 51Na Yosevu ayĩta ĩkithathi syĩtwa yayo Manase: asya, Nũndũ Ngai nũmbũlĩthĩtye thĩna wa wĩa wakwa w’onthe, na nyũmba yonthe ya nau. 52Na ũla wa kelĩ amwĩta syĩtwa yake Evalaimu: Nũndũ Ngai ambingĩvĩsya nthĩ ya thĩna wakwa. 53Na ĩla myaka mũonza ya lĩu mwingĩ, ĩla yaĩ nthĩ ya Misili, yathela. 54Na myaka mũonza ya yũa yambĩlĩlya kũka, o tondũ Yosevu waisye: na kwaĩ yũa nthĩ syonthe; ĩndĩ nthĩ yonthe ya Misili kwaĩ lĩu. #Sav 105.16; Meko 7.11. 55Na yila nthĩ yonthe ya Misili yaĩ na nzaa nene, andũ mamwĩkaĩla Valao nũndũ wa lĩu: na Valao amea Amisili onthe, Endai kwa Yosevu; o ũndũ wĩmũtavya, wĩkei. 56Na yũa yaĩ ĩũlũ wa nthĩ yonthe vyũ: na Yosevu avingũa makũmbĩ onthe, na amathooesya Amisili, na yũa yaĩ ĩnene nthĩ ya Misili. #Mwa 42.6; 47.14,20,24. 57Na nthĩ syonthe syooka Misili kwa Yosevu kũthooa nganũ, nũndũ yũa yaĩ ĩnene nthĩ yonthe. #Mwa 41.54,56.
ที่ได้เลือกล่าสุด:
MWAMBĨLĨLYO 41: Mbivlia
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
