Génesis 1
1
Tayta Dios llapanta kamanqan
1Imapis manarä kaptinmi ciëluta y kay patsatapis Tayta Dios kamarqan.#Juan 1.1-3. 2Kay patsaqa manam kanan kanqannötsu karqan, sinöqa tsakaq yakullam karqan. Tsay yaku jananchömi Tayta Diospa Espïritun tumaykarqan.
3Tayta Diosmi nirqan: <<¡Atsikyay katsun!>>#2Cor. 4.6.
Niptinmi atsikyay karqan. 4Atsikyayta kamaskirmi Tayta Dios rikarqan alli kanqanta. Tsaymi kamakätsirqan tsakaypis atsikyaypis kananpä. 5Atsikyaypa jutintam churarqan junaqta y tsakaypatanam paqasta. Tsaykunatam kamarqan punta kaq junaqchö.
6Tsaypitanam Tayta Dios nirqan: <<Yaku ishkayman rakikänanpä yaku chawpinchö azulyaraykaq katsun>>.#1.6 Tsay witsan runakunam yarpäyarqan ciëlu chukru kanqanta. Tsaynöllam yarpäyarqan ciëlu uchku uchku kaptin tamyamunqanta.
7Ninqannöllam azulyaraykämuqta kamarqan. Tsaynöpam wakin kaq yaku quëdarqan kay patsachö y wakin kaqnam azulyaraykämuqpa jananchö. Ninqannöllam llapanpis karqan. 8Azulyaraykämuqpa jutintam Tayta Dios churarqan ciëlu jutin kananpä. Tsaykunatam kamarqan ishkay kaq junaqchö.
9Tsaypitanam Tayta Dios nirqan: <<Tsaki patsa rikakänanpä urachö kaq yaku juk puchallaman qorikätsun>>.#2Ped. 3.5.
Ninqannöllam llapanpis karqan. 10Tsaki kaqpa jutintam Tayta Dios churarqan patsa jutin kananpä. Y qorikashqa yakutanam lamar nirqan. Tsayta kamaskirmi alli kanqanta Tayta Dios rikarqan.
11Tsaypitanam Tayta Dios nirqan: <<Allpapita wiñamutsun imaykaläya jachakuna: muruyuq qewakuna y wayuq jachakuna karpis>>.
Ninqannöllam llapanpis karqan. 12Tsaymi wiñamurqan llapan casta jachakuna, muruyuq qewakuna karpis y wayuq jachakuna karpis. Tsaykunata kamaskirmi alli kanqanta Tayta Dios rikarqan. 13Tsaykunatam kamarqan kimsa kaq junaqchö.
14Tsaypitanam Tayta Dios nirqan: <<Ciëluchö atsikyaqkuna kayätsun junaqpis paqaspis kananpä, junaqkunata watakunata yupayänanpä y muruyänanpä cosechayänanpä imay kanqanta musyayänanpä. 15Tsaynölla atsikyaqkuna ciëluchö kayätsun patsata atsikyämunanpä>>.
Ninqannöllam llapanpis karqan.
16Tsaynöllam rupayta, killata y qoyllurkunatapis kamarqan. Rupaytam kamarqan junaqpa atsikyänanpä y killatanam kamarqan paqaspa atsikyänanpä. 17Tsaykunatam Tayta Dios ciëluman churarqan kay patsata atsikyämuptin 18tsakaypis junaqpis kananpä. Tsaykunata kamaskirmi alli kanqanta Tayta Dios rikarqan. 19Tsaykunatam chusku kaq junaqchö kamarqan.
20Tsaypitanam Tayta Dios nirqan: <<Yakuchö imayka niraq pescädukuna y patsa jananpa päriqkunapis atska kayätsun>>.
21Tsaynö nirmi Tayta Dios kamarqan lamarchö jatusaq mantsaypä pescädukunata, qochakunachö y mayukunachö tukuyläya pescädukunatapis. Tsaynöllam kamarqan tukuyläya päriqkunatapis. Tsaykunata kamaskirmi alli kanqanta Tayta Dios rikarqan. 22Bendisarmi nirqan: <<Lamarchö kawaqkuna y patsa jananpa päriqkunapis, atskaman mirayay>>.
23Tsaykunatam pitsqa kaq junaqchö kamarqan.
24Tsaypitanam Tayta Dios nirqan: <<Tukuyläya ashmakuna kayätsun: wätana kaq y mana wätana kaqpis. Tsaynö kayätsun qarachaypa y lätaypa puriqkunapis>>.
Ninqannöllam llapanpis karqan. 25Tsaynöpam Tayta Dios kamarqan tukuy niraq wätana kaq y mana wätana kaq ashmakunata y qarachaypa y lätaypa puriqkunatapis. Tsaykunata kamaskirmi alli kanqanta Tayta Dios rikarqan.
26Tsaypitanam Tayta Dios nirqan: <<Kananqa runata kamashun kikintsik niraqta.#Gén. 9.6; 1Cor. 11.7. Noqantsiknö kananpämi payta kamashun.#1.26 Unay reykunam niyarqan paykunalla Dios niraq kayanqanta. Tsaynömi niyarqan Dios niraq kar paypa jutinchö runakunata mandayanqanta. Peru kay textuchömi sïqa llapan runakunapis Tayta Dios niraq kayanqanta nin. Pay niraqta runata kamanqanta nirqa Tayta Dioswan mandar kay patsachö kaqkunata shumaq rikanantsikpä kanqantam nin. Paypa poderninchömi kanqa pescädukuna, päriqkuna, wätana kaq mana wätana kaq ashmakuna y qarachaypa y lätaypa puriqkunapis>>.
27Kikin niraqtam Tayta Dios runata kamarqan.
Paynö kananpämi kamarqan.
Ollqutapis warmitapis paymi kamarqan.#Mat. 19.4; Mar. 10.6.
28Bendisarmi nirqan:
<<Kay patsa juntanqanyaq wamraykikuna atska kayätsun.
Qamkunapa podernikikunachö katsun pescädukuna, päriqkuna y llapanpis kay patsachö kawaqkuna>>.#Gén. 5.1-2; 9.1.
29Tsaypitanam nirqan: <<Mikuyänaykipämi kamarqü kay patsachö llapan mikuna kaq jachakunatawan wayuq kaq jachakunatapis. 30Ashmakuna, päriqkuna y qarachaypa y lätaypa puriqkuna mikuyänanpämi jachakunatawan qewakunata kamarqü>>.
Ninqannöllam llapanpis karqan. 31Llapan kamanqankuna pasaypa alli kanqantam Tayta Dios rikarqan. Tsaykunatam kamarqan joqta kaq junaqchö.
ที่ได้เลือกล่าสุด:
Génesis 1: qxo
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2002, 2008, Wycliffe Bible Translators, Inc. All rights reserved.