Génesis 4
4
Caínwe Abel
1Dukuwede Adán awĩ Evawe idi. Evapa ma wake dadea idi. Naskata werunawake kaĩdi. Awẽ ade Caín idi. “Ea Epa Diospa wake ina”, Eva idi. 2Chipu Abel kaĩdi.
Caínpa udiwetsa Abel oveja kexebis ipaudi. Caínri wai yudubis ipaudi. 3Peda wetsa Caínpa awẽ wai adua yudu wudi Epa Dios inaxikĩ. 4Abelpari oveja wake na kaĩ taeyabea xuakuiya wudi Dios inaxikĩ. Abel Diospa idibaxudi. 5Abel akai keskawadiba Epa Diospa Caín awẽ yuduwuki idibaxudiba. Naskake Caín sidakui wechupidi.
6Epa Diospa Caín ñukadi: “Aweskai mi sidai mi wechupime. 7Mi shara akaitu ẽ bia axusharatiru. Mi chakaitu chakapa bia winui. Askataba mi chaka winutiru”, Epa Diospa wadi.
8Wetsatiã udu nu uĩkanuwe Caínpa udiwetsa wadi. Narixu kushata udiwetsa retedi.
9Epa Diospa Caín ñukadi: “Wani mewẽ extu Abelme”, Diospa Caín wadi. Caínpa kebadi: “Ẽ tapiaba. Ẽ kexeaba”, Caínpa wadi.
10Diospa yuidi: “Aweskawakĩ mi iskawaame. Ma ẽ tapia mewẽ extu mi retea. Bai aduxu mewẽ extu awẽ imi ea ñuka awa chakawaba. Naskake ẽ axui. 11Naskake mi chakakui iki ana da bai adu mi ikiba. Mewẽ extu mi retea ẽ bia bai wetsadu putai. 12Ma mi wai wawiadu yuduwu bia kaĩxudakaba. Naskax kawa kawakakaĩkĩ mi tedepakedakaba”, Epa Diospa Caín wadi.
13Naskake Caínpa Dios kebadi: “Mia ea chakawai keskara ẽ tedetiruba. 14Datiã ma mia putai da bai aduxu. Ẽ biki udekawakakaĩdi ẽ kawasapakedaka. Watura wetsa ea wichixu ea retexiwi”, Caínpa Dios wadi.
15Epa Diospa kebadi: “Wetsã bia reteke siete veces ẽ ubiskuibatiru”, Epa Diospa Caín wadi. Naskata Epa Diospa Caín tutuwadi naatiiwiwai tapikaxu reteyabanuwu. 16Naskata Epa Dioswe tsaita Caín bai wetsari kadi nari iki kai awẽ ade Nod na wari uwaikiri Edén adu.
Caínpa awẽ rewuduwu
17Caín awĩwe idi. Ma wake dadeyabexakĩ werunawake kaĩdi. Awẽ ade Henoc idi. Naskata Caínpa atiriwiwuweta pexe ichapa wadi. Pexe ichapa adekĩ awẽ wake adekiri adedi. 18Henocpa awẽ wake Irad idi. Iradpa awẽ wake Mehujael idi. Mehujaelpa awẽ wake Metusael idi. Metusaelpa awẽ wake Lamec idi.
19Lamec awĩ raweya idi. Wetsã awẽ ade Adá idi. Awĩ wetsa Zila idi. 20Adá wake dadeyabexakĩ werunawake kaĩdi. Awẽ ade Jabal idi. Jabalpa yuina wichi tapas wakĩ taewadi. Naaturiwi yuina idawakĩ taewadi. 21Jabalpa awẽ extu Jubal idi. Jubalpa guitarra keskara awẽ ade arpa akĩ taewadi xaĩti keubakĩ taewadi. 22Silápariwi wake adi. Awẽ ade Tubal-caín idi. Bronce udiwata hierrori naa ruwe kerexwawe awara wetsa keskarawu Tubal-caínpa udiwapaudi. Aũ yudutiruwu udiwapaudi. Naatu awẽ pui Naamá idi.
23Peda wetsa Lamecpa awĩ rawe yuidi awẽ awĩ rawe atũ adewu Adáwe Zila.
“Ẽ batu yuiyaitu. Ea dikasharakawe.
Dukuwede ea tseweawake ẽ retea.
Pexkupari ea kushake.
24Epa Dios yuiya Caín watura wetsa reteke siete veces ubiskuitiru.
Watura wetsã ea reteke setenta y siete veces ubiskuitiru”, Lamecpa atu wadi.
Adánweta Evapa atũ wake Set
25Adán awiana Evawe idi. Naskayabexakĩ werunawake kaĩdi. Evapa awẽ wake adekĩ Set, wadi. Duduri yuikĩ: “Caínpa Abel retedi. Awẽ naskake Diospa ea wake ina. Naskake ẽ adei awẽ ade Set”, Eva idi.
26Naskadiadu Setpari wake adi. Werunawake idi. Awẽ ade Enós idi.
Naskaxu yurawawe Epa Dios awẽ adeuxũ kiwĩkĩ taewadiwu.
ที่ได้เลือกล่าสุด:
Génesis 4: mtsB
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้