Nau Ntơm 6:1-4

Kon bunuyh ntơm bĭk rơ̆ klơ neh jêh ri deh âk kon bu ur. Phung kon bu klâu Brah Ndu saơ kon bu ur kon bunuyh ueh jêh ri khân păng gŭ ur sai đah mbu nơm khân păng săch gay sŏk ur. Brah Yêhôva lah: “Huêng Brah Gâp mâu mra gŭ mro ôh tâm kon bunuyh yorlah khân păng knŏng jêng nglay săk, nau rêh bunuyh mra hôm e du rhiăng bar jât năm dơm.” Tâm rnôk nây jêh ri pakơi taơ geh phung dŭt toyh luh klơ neh, yorlah kon bu klâu Brah Ndu gŭ ndrel kon bu ur kon bunuyh jêh nây khân păng deh kon. Nây jêng phung bunuyh janh ktang tâm rnôk kăl e, jêng phung lư n'găr.