Joni 3
3
Nikodimu Zo Anya Yesu
1Nseminji ni Parisiyawa daa nsu seni Nikodimu, de ma a siki keshi toree ni Yawudawa. 2E zo anya Yesu ndederi nkye, <<Male mu shina nkye ki ma male na de zo dege anya Mirikisi. Sobon ba nsude yaa yi mbo mamanki yiride ki ma yi mbade Mirikisi ma nja shi naba.>>
3Se Yesu keleba yi nkye, <<Na gye ke gaskye, ba nsude yaa geni solota Mirikisi se su sakye yapu yi.>>
4Nikodimu minya nkye, <<Yaya na sua sakye yapu nsebeki a beyi de e sopa?>> Ba yaa sakye yuru a siki ni amaa e yi ni sen bi de su yapu yi ba!>>
5Yesu keleba nkye, <<Na gye ke gaskye, ba nsude yaa yuru a siki solota Mirikisi se su yapu yi ni riki nja Aworo Nsuseki. 6Mbode nsebeki yapu e ma nsebeki, sede mbode Aworo ni Mirikisi yapu e ma Aworo la. 7Kede ki yi mamanki ni mbode ni Pala ba, <Dole na su sakye yapu ke.> 8Akusuka yaa pula anya de e jima yi. Ka zi mosi yi, sede ka shina angana e butu ko angana yaa te ba. Yomu na e ma nja guru nsude su yapu yi a siki Aworo Nsuseki.>>
9Nikodimu Minya Yesu nkye, <<Yaya na mbo mu yaa paru?
10Yesu keleba yi nkye, <<Ki ma male a Izireyila,>> Na ki shina mbo mu bo? 11Na gye ke gaskye, Mua yi beta a kiya mbode mu shina, nja mua gye ku mbode mu geni, sede ari kuzukam ku yeda ni sheeda de mua pala ba. 12Mma yi ku beta a kiya mbode ma durinya sede ku yeda ba; Yaya na kwa yeda nde Ni yi ku beta a kiya mbode ma bisi? 13Ba nsude taba nunwa ta a bisi sede E ni Yaa Nsebeki de ni butu a siki bisi.
14Yiride Musa dege keripi de ma kankye mesi a bisi ntasi a siki denka, yomu na dole sua dege Yaa Nsebeki a bisi, 15sobon guru nsude yeda nja shi yaa mani leyi ni gbogbo.
16<<Sobon so de Mirikisi yi ntani durinya mu ari e beyi Yaa yi ndandaa, sobon guru nsude yeda nja shi yaa muntu ba sede yaa mani leyi ni gbogbo. 17Mirikisi saka Yaa yi a durinya ba de e yi ntani durinya shiriya naba, sede e sila ntani durinya. 18Guru nsude yeda Yaa sua yi shiriya ba, sede nsude yeda ni nshi ba su e rigye yi shiriya wo, sobon e yeda ni seni Yaa Mirikisi ba. 19Yiride shiriya ma naka: Asikye zo a siki a durinya, sede ntani su so dopuwa pi asikye sobon ANKI asu e mani mumungu la. 20Guru nsude yi mungu mbo yaa ki asikye, yaa zo anya ni asikye ba sobon mungu mboyi yaa pelesa. 21Sede nsude yaa yi gaskye yaa zo anya asikye, sobon de e geni sere a pili nkye mbode yaa yi e ma sobon Mirikisi la.>>
Sheeda Yaaya a kiya Yesu
22A beyi da mu, Yesu nja yayagizi yi ta gunduma ni Yawudiya, anya de e yi worosu su kwanki nja su nja e meyi ntani tunkwasa. 23Yaaya meyi ntani tunkwasa du, Aenon kusa ni Salemu, sobon riki yi nyowa anya ni, ntani su ma zo de e yi su tunkwasa. 24Da mu paru kapi de su sa Yaaya a siki jaru. 25Se yayagizi Yaaya sua yi musu nja nseminji Yawudawa a kiya ni alada wonkye nki. 26Su zo anya ni Yaaya su minya nkye, <<Male, ki turunwa nseminji de e ma nja ke a keteri riki ni Juda, de e ke ki beyi sheeda a kiya e yi nkyawu, yaa yi tunkwasa, konse ma te anya e yi.>>
27De e zi yomu Yaaya keleba nkye, <<Ba nsude yaa yi yaa samu mbodaa sede Mirikisi beyi. 28Oku nkiya aku kuma sheeda na <E ni na ni ma Kiristi ba sede su saka ni de ni rigye yi geba.> 29Anya buki amere, Minzi e shiya ma nsu okeshe. Oboki minji yaa pekye de zi beta ni minji okeshe, yaa yi perisiki nde e zi murinya yi. Yomuna peri siki na yaa sika. 30Dole na dereja Yesu yaa ja yowa; E ni kuma ni rigye.
Nsude Zo Dege Bisi
31<<Yesu de zo dege bisi e pi guru mbo; guru nsude butu a durinya e mani durinya la, yaa yi beta ni mbo durinya. Sede nsude butu a bisi e pi konse. 32E ma beyi sheeda ni mbode e geni nja mbode e zi, sede ba nsude e yeda ni sheeda e yi ba. 33Guru nsude keleba manki yi e taba ni atimi sheeda nkye Mirikisi ma nsu gaskye la. 34Dun nsude Mirikisi sakye yi yaa beyi kelima Mirikisi, sobon e shiya Mirikisi yaa beyi Aworo Nsuseki nyowa. 35Adaa so Yaa yi e sa guru mbo ananiyi. 36Dun nsude yeda ni Yaa e mani leyi ni gbogbo, dun nsude ki Yaa Mirikisi yaa mani leyi ba, anwashi Mirikisi ma a kiya e yi aka.>>
Kasalukuyang Napili:
Joni 3: Gaa
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
The Word for the World International and The Word for the World Nigeria