Luka 24
24
Dege ni Yesu a kumsha
Mat 28.1-10; Mk 16.1-8; Jn 20.1-10
1A nana ladi mbaki nsasape, mata woroni la keikei kemeshi de su shiriya su te a kumsha. 2Se su geni su rigye kiri dunsi bila baki kumsha, 3Su yuru a siki, sede su geni nki Obagizi Yesu ba. 4De su ma a siki tunani a kiya mbode paru, dandani menza bi sakisi ni keyi peri de mayi asikye kusa nsu. 5Mata a siki womba su ripe ndani a kisi, sede menza gye su, <<Mina sa kwa bila nsu leyi a siki nsu muntu? 6Yesu ma anya mu ba; e rigye dege! Turunwa mbode gye ku, kwanki de e ma nja ku a Galili: 7<Nkye Yaa nsebeki sua la yi beyi a nani nsu lepi, sua kisa yi, sua gidiri yi sede a nana ni wuku yaa dege jaja>> 8Se mata woroni turunwa ni kelima Yesu de gye su.
9De su kuma beyi dege kumsha, su pala guru mbo woromu nja yayagizi Yesu gom sha daa nja guru ririgye ntani. 10Mata worede gye yaya manki Yesu mbode paru osu na ma, Meremu dege Magadaliya, Yuwana, nja Meremu amaa ni Yakubu, nja worosu mata ma nja su. 11Sede nsu yayagizi Yesu yeda mbode mata woromu su pala ba, dun su la beta su ma mbodaa ba. 12Sede Biturusu, dege a bisi yi gudu ta kumsha, e bwala leka kumsha, se e geni woriki peri de su lende gan a siki kumsha, Biturusu te mayi, yi mamanki a kiya ni mbode paru.
A Turiki ni Emawus
Mk 16.12,13
13A nana ni yayagizi Yesu bi su te a geri nsu seni Emawus, de nyisa yi ma meli bokwe kyakya dege Wurishelima. 14Su yi beta nja nkiasu a kiya mbode paru guru. 15De su ma a kiya beta nja nkiasu a kiya mbode paru, se Yesu ja kusa su se e para tepiya nja su; 16sede su shina nta Yesu na mayi tepiya nja su ba.
17Yesu minya su, <<Beta mina ku mayi nja nkiyaku kuma yi tepiya?>>
Su sakisi ship, pisika asu nana bashi la yi. 18Se daa a siki asu, seni yi ma kilobas, minya yi, eke dandaa ki ma bakwe de shina mbode paru a Wurishelima a kwanamu bo?>>
19Yesu minya su nkye, <<Mina paru?>>.
Su keleba nkye<<Mbo mu paru a kiya Yesu anebi yiri Nazere,>> De mani kelima nja ANKI girima anya Mirikisi nja guru ntani. 20Sede toree pirisi nja nsu shiriya mu su la yi beyi ba nsu yiko Roma de su kisa yi, se su gidiri yi; 21mu sadishiya nkye e shi na ma nsu de yaa sila ni Izireyila yiri oboki gaba su. a beyi da mu, kwana wuku amu de guru mbo mu paru. 22Kara a kiya beta mu, worosu mata a siki keshi amu su ba mu mamanki. Su te a kumsha mbaki sasape. 23sede su sani gaga nki yi Yesu anya ni ba, Su zo gye mu nkye su geni worosu meleku a siki waayi, de su pala nkye e man leyi. 24Se worosu su a siki amu dege te a kumsha su geni yi ba, yiri de mata woromu pala geni mu.>>
25Se Yesu minya su nkye, <<Mina sa ku ma shina ba yomu, nja mina sa ku ma dishiya seberi ni beigaskye ni guru mbode anebi pala ba! 26E ma dole na de kiristi e sha Genbeki mbo worosu mu bo? Dege anya ni yaa kwa yuru a siki ni girima e yi bo?>> 27Se Yesu para gye su beta dege kiya Musa nja guru anebi, ni mbode su rubutu a takada Mirikisi kiya e yi.
28De su kusa ni dende geri de sua te, Yesu yi kankye yaa bise te a geba. 29Sede su masa e yi soseyi, <<kwana anya mu nja mu, dun nana yaa bila yaa anya yi dopuwa kuzukam;.>> Se Yesu te de e kwakwana nja su.
30De su zuzunwa de su si mbo si, Yesu la buredi, e gbede mirikisi e yi lepa e watala yi e para ba su. 31Se ndani asu bure se su shina yi, se Yesu beta te mayi bila su. 32Se su minya nkiya su, <<Dishiya amu yaa suwuta kankye wuta a siki mu ba? de yaa yi beta nja mu de mua yi tepiya a turiki de yaa gye mu beta a takada mirikisi?>>
33Su dege a bisi dandani na su kuma te a Wurishelima. Anya ni su san yaya manki gom sha daa nja worosu su, geba daa, 34Se yaya manki pala nkye, <<E ma gaskye! Obagizi dege ari e nana kiya nja Sima.>> 35Na ntani bi mu pala mbode paru su a turiki, yiri de su shina Yesu aya de keriya buredi.
Yesu Butu Ta Ayan Yayagizi e yi Nkye Selema ku
Mat 28.16-20; Mk 16.14-18; Jn 20.19-23; Ank 1.6-8
36De bi ma a siki beta a kiya mbomu, Yesu nkiya sakisi a sisika su e gye su, <<Selema e ma nja ku.>>
37Womba ka su na sua kakada, su tunani su geni potoruwa. 38Se Yesu gye su, <<Mina sa dishiya basi, mina sa ku yi shaka a dishiya ku? 39Ku kone nani na nja seni naa. E ni nkiya na la! ku kpa ni nani na de ku geni; potoruwa mani nki nja keshi ba, nta yiride ku geni niman shi.>>
40De e gama pala yomu e nana su nani e yi nja seni yi. 41Se tunde su tuku yeda nshi woba sobon perisiki nja mamanki, Yesu minya su, <<ku mani mbodaa anya mu ni si?>> 42Su beyi gunda de su dobo, 43Yesu la suku a geba asu.
44Se Yesu gye su, <<Da mu e shiya ma mbode Ni gye ku tunde ni ma nja ku e ma dole na e sika mbode su rubuta a kiya na a doka Musa, ni anebi nja zabura.>>
45Na Yesu bure dishiya su de su gane takada Mirikisi de su rubuta a kiya yi. 46Se gye su, mbode su rubuta mu: nkye kiristi yaa sha Genbeki nja yaa dege a kumsha a nana wuku, 47de sua beyi manki ni juyi nja yape ni lepi a siki seni e yi guru durinya, sua para dege Wurishelima. 48Ku ma sheeda ni guru mbo worosu mu de paru. 49Yesu gye su nkye Na saka ku mbode adaa na yi anikowori; sede ku pekye a totolo geri tuku de yiko dege bisi yaa sonka a kiya ku.>>
Su La Yesu Ta Bisi
Mk 16.19,20; Ank 1.9-11
50De Yesu kwa yi su te a beyi geri Betani, e dege nani a bisi sa su anabirika. 51De Yesu ma kiya sa su anabirika, e dege bila su se su la yi te siki bisi. 52Se su bowuta yi su kuma te Wurishelima ni perisiki nyowa. 53Se su sigeba ni ma laki Mirikisi kowon nana sua yobo Mirikisi.
Kasalukuyang Napili:
Luka 24: Gaa
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
The Word for the World International and The Word for the World Nigeria