The MYANMAR STANDARD BIBLE (MYANMAR AUDIO EDITION)℗ is professionally recorded with a solemn tone and beautiful rhythm, expressing the original flavor of the MYANMAR STANDARD BIBLE©, allowing God's word to echo in the ears and hearts of the listener, providing a brand new experience for those who are hungry for God's word to experinece its power. The MYANMAR STANDARD BIBLE (MYANMAR AUDIO EDITION)℗ is produced and distributed by the Global Bible Initiative.

MYANMAR STANDARD BIBLE (MYANMAR AUDIO EDITION)℗Copyright ℗ 2024 by Global Bible Initiative

မြန်​မာ့​စံ​မီ​သမ္မာ​ကျမ်း

စာရာ​အသက်ရှင်​ခဲ့​သော​နှစ်ကာလ​မှာ တစ်ရာ​နှစ်ဆယ့်​ခုနစ်​နှစ် ဖြစ်​၏​။ စာရာ​သည် ခါနာန်​ပြည်​ရှိ ဟေဗြုန် ခေါ် ကိရယအာဘ​မြို့​၌ သေဆုံး​၏​။ အာဗြဟံ​သည် စာရာ​အတွက် ငိုကြွေး​မြည်တမ်း​ရန် လာ​လေ​၏​။
ထို့နောက် အာဗြဟံ​သည် မိမိ​မယား​၏​အလောင်း​နား​မှ​ထ​၍ ဟေသ​အမျိုးသား​တို့​အား “​အကျွန်ုပ်​သည် သင်​တို့​တွင် တိုင်းတစ်ပါးသား​ဧည့်သည်​ဖြစ်​ပါ​၏​။ အကျွန်ုပ်​မယား​၏​အလောင်း​ကို ထုတ်သွား​၍​သင်္ဂြိုဟ်​ရန် သင်​တို့​ပိုင်​သော​သင်္ချိုင်းမြေ​ကို အကျွန်ုပ်​အား ရောင်း​ပေး​ပါ​”​ဟု ဆို​၏​။
ဟေသ​အမျိုးသား​တို့​က​လည်း အာဗြဟံ​အား “အကျွန်ုပ်​တို့​သခင်​၊ အကျွန်ုပ်​တို့​စကား​ကို​နားထောင်​ပါ​။ သခင်​သည် အကျွန်ုပ်​တို့​တွင် ဘုရားသခင်​နှင့်ဆိုင်သော​မင်း​ဖြစ်​ပါ​၏​။ အကျွန်ုပ်​တို့​၏​အကောင်းဆုံး​သင်္ချိုင်းမြေ​တွင် သခင့်​မယား​၏​အလောင်း​ကို​သင်္ဂြိုဟ်​ပါ​။ အကျွန်ုပ်​တို့​၏​သင်္ချိုင်းမြေ​တွင် သခင့်​မယား​၏​အလောင်း​သင်္ဂြိုဟ်​မည်​ကို တားမြစ်​မည့်​သူ​တစ်ယောက်မျှ​မ​ရှိ​ပါ​”​ဟု ပြန်ပြော​ကြ​၏​။
ထိုအခါ အာဗြဟံ​သည်​ထ​၍ ထို​ပြည်သား​များ​ဖြစ်​ကြ​သည့် ဟေသ​အမျိုးသား​တို့​ရှေ့​တွင် ပျပ်ဝပ်​ကာ “​အကျွန်ုပ်​မယား​၏​အလောင်း​ကို အကျွန်ုပ်​ထံ​မှ​ထုတ်သွား​၍ သင်္ဂြိုဟ်​မည်​ကို သင်​တို့​စိတ်စေတနာ​ရှိ​လျှင် အကျွန်ုပ်​စကား​ကို​နားထောင်​ကြ​ပါ​။ ဇောဟာ​၏​သား ဧဖရုန်​နှင့်​တွေ့ဆုံ​၍ သူ​၏​လယ်​အစွန်​ရှိ သူ​ပိုင်ဆိုင်​သည့်​မပ္ပေလ​လိုဏ်ဂူ​ကို အကျွန်ုပ်​အား​ရောင်း​ပေး​ရန် အကျွန်ုပ်​အတွက် ပြောပေး​ကြ​ပါ​။ ၎င်း​ကို ကိုယ်ပိုင်​သင်္ချိုင်းမြေ​အဖြစ် သင်​တို့​ရှေ့​တွင် တန်ရာတန်ကြေး​အပြည့်​ဖြင့် အကျွန်ုပ်​အား​ရောင်း​ပေး​စေ​ပါ​”​ဟု သူ​တို့​အား ပြော​လေ​၏​။
ဧဖရုန်​သည် ဟေသ​အမျိုးသား​တို့​အလယ်​တွင် ထိုင်​လျက်​ရှိ​၏​။ သို့ဖြစ်၍ ဟိတ္တိ​လူမျိုး​ဧဖရုန်​သည် မြို့​တံခါး​သို့ ရောက်လာ​သော ဟေသ​အမျိုးသား​အပေါင်း​တို့​ရှေ့​၌ အာဗြဟံ​အား “​ထိုသို့​မ​ဟုတ်​ပါ​။ သခင်​၊ အကျွန်ုပ်​စကား​ကို​နားထောင်​ပါ​။ ထို​လယ်​နှင့် ထို​လယ်​ထဲ​ရှိ​လိုဏ်ဂူ​ကို သခင့်​အား​အကျွန်ုပ်​ပေး​ပါ​၏​။ အကျွန်ုပ်​အမျိုးသားချင်း​တို့​ရှေ့​၌ပင် သခင့်​အား အကျွန်ုပ်​ပေး​ပါ​၏​။ သခင့်​မယား​၏​အလောင်း​ကို သင်္ဂြိုဟ်​ပါ​”​ဟု ပြန်ပြော​လေ​၏​။
အာဗြဟံ​သည်​လည်း ထို​ပြည်သား​တို့​ရှေ့​တွင် ပျပ်ဝပ်​ပြီးလျှင် ထို​ပြည်သား​တို့​ရှေ့မှောက်​၌ ဧဖရုန်​အား “​ထိုသို့ဆိုလျှင် အကျွန်ုပ်​စကား​ကို​နားထောင်​ပါ​။ လယ်​၏​တန်ဖိုးငွေ​ကို အကျွန်ုပ်​ပေး​ပါ​မည်​။ အကျွန်ုပ်​ထံမှ​လက်ခံ​ပါ​။ သို့မှသာ ထို​အရပ်​၌ အကျွန်ုပ်​မယား​၏​အလောင်း​ကို သင်္ဂြိုဟ်​ပါ​မည်​”​ဟု ဆို​၏​။
ဧဖရုန်​က​လည်း အာဗြဟံ​အား
“​အကျွန်ုပ်​သခင်​၊ အကျွန်ုပ်​စကား​ကို​နားထောင်​ပါ​။ ငွေ​လေး​ရာ​ရှယ်ကယ်​တန်ဖိုးရှိ​သော​မြေ​သည် သခင်​နှင့်​အကျွန်ုပ်​ကြား​၌ အဘယ်ဆိုဖွယ်​ရှိ​သနည်း​။ သခင့်​မယား​၏​အလောင်း​ကို သင်္ဂြိုဟ်​ပါ​လော့​”​ဟု ပြန်ပြော​လျှင် အာဗြဟံ​သည် ဧဖရုန်​၏​စကား​ကို​နားထောင်​လေ​၏​။ ထိုသို့ ဟေသ​အမျိုးသား​တို့​ရှေ့မှောက်​၌ ဧဖရုန်​တန်ဖိုးဖြတ်​သည့် ငွေ​အချိန်​လေး​ရာ​ရှယ်ကယ်​ကို အာဗြဟံ​သည် ကုန်သည်​တို့​၏​စံနှုန်း​အတိုင်း​ချိန်တွယ်​၍ သူ့​အား​ပေး​လေ​၏​။ ဤသို့ဖြင့် မံရေ​မြို့​အရှေ့​၊ မပ္ပေလ​အရပ်​၌​ရှိ​သော ဧဖရုန်​၏​လယ်​၊ ထို​လယ်​နှင့်တကွ လယ်​ထဲရှိ​လိုဏ်ဂူ​နှင့် လယ်​၏​လယ်စပ်​ပတ်လည်​ရှိ သစ်ပင်​အားလုံး​တို့​ကို မြို့​တံခါး​သို့ ရောက်လာ​သော ဟေသ​အမျိုးသား​အပေါင်း​တို့​ရှေ့​တွင် အာဗြဟံ​ပိုင်​သော​ဥစ္စာ​အဖြစ် အတည်ပြု​ကြ​၏​။ ထို့နောက်တွင် အာဗြဟံ​သည် ခါနာန်​ပြည်​၊ ဟေဗြုန် ခေါ် မံရေ​မြို့​အရှေ့​၊ မပ္ပေလ​လယ်​၌​ရှိ​သော​လိုဏ်ဂူ​ထဲ၌ မိမိ​မယား​စာရာ​ကို သင်္ဂြိုဟ်​လေ​၏​။ ဤသို့ဖြင့် ဟေသ​အမျိုးသား​တို့​သည် ထို​လယ်​နှင့်တကွ လယ်​ထဲရှိ​လိုဏ်ဂူ​ကို အာဗြဟံ​၏​ကိုယ်ပိုင်​သင်္ချိုင်းမြေ​အဖြစ် အတည်ပြု​ကြ​လေ​၏​။

Dinleyin ကမ္ဘာဦးကျမ်း 23