Mbụlembu 3
3
Adada nemadzụ
1Agwọ bụ anụ, shi kakọta ẹregede l'anụ-ẹgbudu, Chipfu, bụ Chileke meshiru l'ophu. Noo ya; ọ sụ nwanyị ono: “Chileke ?ọ sụkpooru g'ọ tọ dụshi akpụru oshi, nọ lẹ mgbabu-a, unu e-rije tọo?”
2Nwanyị ono sụ agwọ ono: “Anyi e-rijekwa-a akpụru, shi l'oshi, nọgbaa lẹ mgbabu-a. 3Ọ kwa akpụru oshi ọphu nọ l'echi mgbabu bẹ Chileke sụru g'anyi te erishi; mbụ g'anyi te emekwa iya ẹka ememe ophu; l'anyi -denyi iya ẹka bẹ anyi a-nwụhukwa.”
4Agwọ ọbu sụ nwanyị ono: “Ọ tọ dụkwa anwụhu, unu anwụhu. 5Ọ chịa lẹ Chileke maru lẹ unu -ria ya; ẹnya asahụ unu; unu adụ gẹ Chileke; maru iphe, dụ ree waa ẹjo-iphe.”
6Nwanyị ono bya elee ẹnya l'akpụru oshi ono; bya ahụma l'ọ dụ ree k'eriri; bya amakwaphọ mma ele ẹnya; tẹme ọ nọdu agụkwa iya phọ ẹgu g'o ria akpụru oshi ono maru iphe. Ọ wọta iya ria bya anụkwapho ji iya, ẹphe l'iya tụko nọdu l'ẹka ono; o rikwaphọ. 7Ẹnya tụko sahụchaa ẹphenebo; ẹphe maru l'ẹphe gba ọto. Ẹphe dzụkobe ẹkwo oshi fịgu nmarụ.
8Ẹphe nụma ụkporo Chipfu, bụ Chileke lẹ g'oojephe lẹ mgbabu ono lẹ gẹ phẹrephere ụzenyashi ezi; ẹphe je eworu onwophẹ woharụ Chipfu, bụ Chileke l'azụ oshi, nọgbaa lẹ mgbabu ono. 9Chipfu, bụ Chileke bya ekua Ádamu; sụ iya: “?Bụ awe bẹ ị nọ?”
10Ádamu sụ iya: “Mu nụmakwaru ụkporo ngu lẹ mgbabu ono; mu je eworu onwomu domia l'ẹka ndzụ agụ mu; kẹle mu gba ọto.” 11Ọ sụ iya: “?Bụ onye sụru ngu l'ị gba ọto? ?Ti riakwaru nụ akpụru oshi-a, mu sụru g'i ti rishi-a?”
12Ádamu sụ iya: “Ọ kwa nwanyị-a, i doberu mu l'iya l'ẹka-a bẹ woru akpụru, shi l'oshi ono nụ mu; mu ria.”
13Chipfu, bụ Chileke bya ajịa nwanyị ono sụ iya: “?Dẹnu g'ọ nwụru i meru iphe, dụ nno?”
Nwanyị ono sụ: “Ọ kwa agwọ gbabẹru mu ẹregede; mu je erinaa ya.”
14Chipfu, bụ Chileke sụ agwọ: “Eshinu i meru iphe-a bẹ
“Iphe, bụkota iphe-edobe;
mẹ anụ-ẹgbudu l'ophu
bụepho gụbedua bẹ a tụru ọnu.
Ịi-wata awụ l'ẹpho.
Ọ bụru ẹja, shi l'alị bẹ ii-rije
gbiriri jasụ g'ịi-nọ-beru.
15Mu e-me g'unu lẹ nwanyị-a
bụru ọhogu; awa nkengu
yẹe kẹ nwanyị-a
a-bụkwarupho ọhogu.
Ọo-zọpya ngu ishi;
gụbedua emeka iya iphe
l'ichirupfu ọkpa.”
16Nwanyị ono bẹ ọ sụru:
“Mu e-me g'iphe-ẹhuka,
dụru ngu l'apa ẹpho-ime ka shii.
Ii-jeje iphe-ẹhuka tẹme l'ị nwụa nwa.
Ji ngu a-nọduje agụ ngu ẹgu;
ọ bụru iya bẹ ịi-nọdu l'ẹka.”
17Ọ sụ nwoke ono:
“Eshi ọphu i kwetarụ ngabẹru nyee ngu
nchị je eria akpụru oshi ono,
mu sụru g'i ti rikwa ono bẹ
I meakwaru; alị bụwaru iphe,
mu tụru ọnu.
Ii-jeje ozi mkpọnwu ẹhu tẹme
l'i seta nri, ii-ri.
Ọ bụru g'ii-je iya bụ ono gbiriri
jasụ g'ịi-nọ-beru.
18Alị a-wata efushiru ngu ẹjo ẹswa;
waa obvu;
tẹme ọ bụru akpụru-iphe,
mịtaru l'ẹgu a-bụjeru ngu nri.
19Ịi-kụta ẹphuru phee tẹme l'i ria nri;
gbiriri jasụ ị laphu azụ l'alị;
eshi ọphu ọ bụ ẹja shi l'alị bẹ i shi.
Ọo ẹja shi l'alị bẹ ị bụ;
ọ bụkwarupho l'ẹja shi l'alị ono bẹ
ịi-laphu azụ.”
20Tọbudu iya bụ; nwoke ono gụa nyee ya ono Ivu; noo kẹle ọo-bụru ne ọha l'ophu.
21Chipfu bụ Chileke bya eworu akpọ-anụ mee ẹkwa nmabẹ Ádamu yẹe nyee ya. 22Noo ya; Chipfu, bụ Chileke bya epfua sụ: “Nta-a bẹ nemadzụ dụwaa g'anyịbedua; mbụ ọ mawaru iphe, dụ ree; bya amaru iphe, bụ ẹjo-iphe. G'ọ tọ wọtafuanu akpụru oshi, emeje g'a nọdu ndzụ ria nọdu ndzụ ojejoje.” 23Ọo ya bụ; Chipfu bụ Chileke chịfu iya lẹ mgbabu Édẹnu; g'o je ejeahaa ozi l'alị, bụ ẹka e shi wota ẹja kpụa ya. 24Ọ chịfuchaepho nemadzụ lẹ mgbabu ono; ọ bya eje l'ụzo ẹnyanwu-awawa kẹ mgbabu Édẹnu ono; bya eworu ojozi-imigwe, bụ Chierobu dobe iya; bya edobe iya ogu-echi, charụ gbarara; tẹme ọ nọdu egbu swịiswiiswii iphu l'azụ g'o chee ụzo, e shi eje l'oshi ndzụ phọ nche.
Seçili Olanlar:
Mbụlembu 3: Izii
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2014 Wycliffe Bible Translators, Inc. in cooperation with Abakaliki Literacy and Translation Trust