Mataayo 7
7
Imanyiiso tsa kulongwi tsa kʉhɨga avange
(Maliko 4:24; Luuka 6:37-38, 41-42)
1“Kwʉ baako ʉkʉvahɨga avange, pwʉ najyʉnyie namulaahɨgwe, 2manya ʉmwʉ muhɨgɨla avaanu avange, muumwa mwʉ ʉNgʉlʉve alavahɨgɨla najyʉnyie, nɨ kɨgelelo ɨkyʉ mukʉvagelela avange, kɨɨkyo kyʉ ʉNgʉlʉve alavagelela najyʉnyie.
3“Kɨki vutsingahɨtsa akabandʉkɨlo ka libɨkɨ akalɨ mu liiho lya nnino, wileka ʉkʉlola ʉlʉvale lwa libɨkɨ ʉlʉlɨ mu liiho lyako? 4Ikange, vuweesa ndeeti ʉkʉmbʉʉla ʉnnino ʉkʉta, ‘Itsaga ndɨkʉhetse akabandʉkɨlo ka libɨkɨ akalɨ mu liiho lyako,’ wʉ mu liiho lyako mulɨ lʉvale lwa libɨkɨ? 5Vɨ nnuasi ʉve! Hetsa taasi ʉlʉvale lwa libɨkɨ ʉlʉlɨ mu liiho lyako, pwʉ jʉvukʉkavona vʉnonu nʉ kʉhetsa akabandʉkɨlo akalɨ mu liiho lya nnino!
6“Muleke ʉkʉtsipa imbwa isiinu sya Ngʉlʉve. Ikange, muleke ʉkʉtsilahɨla ingʉbe isiinu sya lʉtogo,#7:6 Ʉkʉkongana ni nyiiho tsa Vayahudi, imbwa ni ngʉbe sikanu isyʉ sinyala, nasivalatse. ɄYɨɨsʉ ilɨngʼaania isikanu isi na vaanu avavejangi, avatava vavalatse mu numbula tsa veene ʉlwakʉva vikʉjɨbeela ɨkulongwi jya Ngʉlʉve nʉ kʉleka ʉkʉjyɨdɨka. Pwʉ avɨɨdɨki va Ngʉlʉve navanogiili ʉkʉta vavavʉʉlage avaanu avo ʉwajɨlweli wooni wa Ngʉlʉve, manya vagela vikʉvakilivukila mu lʉviipo nʉ kʉvananga avɨɨdɨki avo. manya ɨngave mukʉtsilahɨla isiinu sya lʉtogo isyo, ingʉbe jʉtsikada nʉ kʉvakilivukila ʉnyie pakʉta tsivalendʉle.
Ʉkʉdoova, ʉkʉlonda nʉ kʉdɨndʉtsa
(Luuka 11:9-13)
7“Doovagi kwa Ngʉlʉve, pwʉ ʉmwene jiikʉvapa. Londagi, pwʉ jʉmukʉsivona. Dɨndʉtsaagi, pwʉ ʉNgʉlʉve jiikʉvadɨndʉlɨla ʉndyango, 8manya ʉmuunu ʉvaveetsaga ʉvidoova, ʉNgʉlʉve ikʉmpa, ʉvilonda, ʉNgʉlʉve ikʉmbonia nʉ vɨ idɨndʉtsa, ʉNgʉlʉve ikʉnʼdɨndʉlɨla ʉndyango.
9“Oogo, veeni pagati paanyie ʉvɨ ɨngave ʉmwana va mwene idoova ʉnkate, ikʉmpa ɨliganga? 10Evo idoova ɨsomba, ikʉmpa ɨnzoka? 11Ɨngave ʉnyie nyɨ vagalo, mulʉmanyile ʉkʉvapa avaana viinyo isiinu isinonu, ndeeti, ʉDadajiinyo va kʉkyanya nakalʉtɨɨlɨle ʉkʉvapa isiinu isinonu vooni avikʉnʼdoova?
12“Pwʉ muvavombelage avaanu avange ndʉwʉ najyʉnyie munogwa ʉkʉvombelwa, manya ago gwʉ geene vʉganulu wa ndagɨlo tsa Moose ni manyiiso tsa vanyamalago.
Ʉndyango ʉnsinye nʉ mbaha
(Luuka 13:24)
13“Ingilagi ʉndyango ʉnsinye ʉlwakʉva ʉndyango ʉmbaha gulotsa kʉ lwongometso, najɨ nzɨla ɨjilotsa ʉkʉ mbaha siitso. Ikange, avaanu wʉ vongosu avikwingilila ʉndyango ʉgwa. 14Apeene ʉndyango insinye, najɨ nzɨla sinye ɨjilotsa kʉ wʉʉmi wa sikutsooni, nava vaanu vadebe avikʉjɨvona.
Ʉmʼbɨkɨ gumanyikika kʉ seke itsʉ guhʉʉpa
(Luuka 6:43-44)
15“Ikange, muveetsage miiho na vanyamalago va vʉnuasi, manya ʉnsɨkɨ vikʉviitsila, vikɨvɨɨka ndi ngʼolo. Hʉmbe mu nʼgati ngʼekeeva. 16Avo mukʉvamanyaga mu seke tsa veene, manya avaanu navitʉngʼula iseke tsa mizabibu mu mitwinyo. Ikange, navitʉngʼula iseke itsa nkʉjʉ mu mitigalɨtsi. 17Kwʉ kʉta ʉmʼbɨkɨ ʉgʉveetsaga ʉnnonu guhʉʉpa iseke inonu, nagwene ʉmʼbɨkɨ ʉgʉveetsaga ʉmbiivi guhʉʉpa iseke imbiivi. 18Nagʉkʉli ʉmʼbɨkɨ ʉnnonu ʉguhʉʉpa iseke imbiivi, pange ʉmʼbɨkɨ ʉmbiivi ʉguhʉʉpa iseke inonu. 19Kwʉ kʉta ʉmʼbɨkɨ ʉgʉveetsaga ʉgʉnaguhʉʉpa iseke inonu, gudumulwa nʉ kʉtaagwa mu mwoto. 20Pwʉ lɨno avanyamalago va vʉnuasi avo mukʉvamanyaga kʉ nzɨla jya seke tsa veene.
ɄYɨɨsʉ alavabeela avanavivomba itsa vʉnogwe wa Ngʉlʉve
(Luuka 13:25-27)
21“Nakwʉ kʉta avaanu vooni aviita, ‘Ntwa, Ntwa,’ valiingila mu Lʉdeeva lwa Kʉkyanya. Mwene ʉmuunu ʉvɨ ivomba ʉvʉnogwe wa Daada vango ʉvɨ alɨ kʉkyanya, ʉjwa vɨ aliingila. 22Pa kɨgono kya vʉhɨgi ʉvʉliitsa, avaanu vongosu valateetsaga, ‘Gwe Ntwa! Gwe Ntwa! Mu litaawa lyako namwʉ twapʉlɨsaage ɨlimenyu lya Ngʉlʉve nʉ kʉswɨma imepo imbiivi nʉ kʉvomba isidego syongosu?’ 23Apo ndɨlavavʉʉla pavʉvalasu ndɨlaata, ‘Nandɨvamanyili ʉnyie, lʉsiku! Hegi apa, nyɨ vatulanongwa!’
Ʉkʉtsenga pa vʉkangasu evo pa ndivila
(Luuka 6:47-49)
24“Pwʉ lɨno ʉmuunu ʉvaveetsaga ʉvɨ ipʉlɨka amamenyu gango nʉ kʉgavombela, alaava ndʉ muunu ʉnya lʉhala ʉvɨ aatsengile ɨnyumba jya mwene pa lʉnalaawe. 25Ʉnsɨkɨ ɨsula jitima, ɨmikoka gɨkadɨga amagasi, ʉnkuluguuto ʉmbaha gʉkakula nʉ kʉjɨkuluga ɨnyumba ɨjyo. Napeene, ɨnyumba ɨjyo najyagwe ʉlwakʉva ʉwaalo wa jyene waatsengilwe pa lʉnalaawe. 26Ʉmuunu ʉvaveetsaga ʉvɨ ipʉlɨka amamenyu gango aga, lɨno nikʉgavombela, ʉjwa alɨ ndʉ muunu ʉmpelwa ʉvɨ aatsengile ɨnyumba jya mwene pa ndivila. 27Ɨsula jɨkatima, ɨmikoka gɨkadɨga amagasi, ʉnkuluguuto ʉmbaha gʉkakula nʉ kʉjɨkuluga ɨnyumba ɨjyo, baaho ɨnyumba ɨjyo ɨkagwa kʉ nkindo ʉmbaha siitso!”
Ʉvʉtavʉlɨlwa wa Yɨɨsʉ
28Wʉ ʉYɨɨsʉ amalile ʉkʉtsova amamenyu ago, ɨlipʉga ɨlyo lya vaanu lyadegile siitso kʉ manyiiso tsa mwene, 29manya aamanyiisaaga ndʉ muunu ʉnya vʉtavʉlɨlwa, natsyale ndi tsa vamanyisi va ndagɨlo va veene.
Seçili Olanlar:
Mataayo 7: zga
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2019, Wycliffe Bible Translators, Inc. All rights reserved.