Lûqa 5
5
Îsa Veyndano Sîmonî
(Matta 4:18-22; Marqos 1:16-20)
1Rojê Îsay kinardê gol di bi, nameyê na gol Gennesaret bi. Milet çorşmeyê ey girot ki qisanê Ellay biaşnawê. 2Îsay di teney qayixî gol ver di dî, wihêrê ci ameybî war ew torrê xo yê masan kerdê pakî. 3Îsa nişt qayixa ki ê Sîmonî ya ew ey ra reca kerd ki, wa qayixa xo tayn kinardê gol ra bero dûrî. Bahdo qayix mîyan di ronişt ew uja ra miletî rê wahzî day. 4Îsay qiseyê xo qedînay se, Sîmonî rê va: “Qayixanê xo biramê cayandê xorîya ew torranê xo çekerê aw mîyan ki şima masey tepêşê!”
5Sîmonî Îsay rê va: “Begê mi, ma bîşewka hetanî şewra ma hend torrî çekerdî ew fina zî ma nêşa teba tepêşim. Hima vatişdê to sera ez do fina zî çekera.”
6Nay sera, înan torrê xo çekerdî. Hendik bol masey kewtî mîyan ki hima hima torrê ci do bidirryayê. 7Înan pey desta veynda wertaxandê xo yê bînan ki, wa bêrê ci rê qeyret bikerê. Qayixa bîn zî amê, ew wirna#5:7 Yazî: wirdina qayixî hendik kerdê pirr ki tayn mendbi, do aw bin kewtê.
8Senî ki Sîmon Petrûsî no wuna dî, xo eşt lingandê Îsay ver û ci ra reca kerd: “Rebbî, mi ra dûrî vindi, ez merdimêndo gunakar a!”
9Sîmon ew êyê ki eya pîya qayix di bî, bol tersaybî ew ecêb mendîbî, çiki înan hendayê bol masey tepiştîbî. 10Lajê Zebedî, Yaqûb û Yûhanna, ê yê Sîmonîya pîya kar kerdê, ê zî bol tersaybî. Hima Îsay Sîmonî rê va: “Meters! Neya tepya, ti do masey nê, merdiman tepêşê!” 11Bahdo, înan qayixê xo gol ra antî herr ser, heme çî uja di verada ew Îsay dima şî.
Îsa Jew Nêweşê Cizamî Keno Weş
(Matta 8:1-4; Marqos 1:40-45)
12Rojê jû sûk di Îsa raştê jew merdimî ame, ganê ci pêro geyrabi nêweşînda cizamî ya. Senî ki ey Îsa dî, xo çekerd lingandê ci ver, rîyê xo na erda ew reca kerd: “Begê mi, eki ti buwazê, ti şenê mi weş kerê!”
13Îsay destê xo kerd derg û na ey ser#5:13 Çimdê Yawudîyan di, nêweşê winayinî nam-heramî bî, qandê coy kesî destê xo înana nênayê. ew va: “Ez qayil a ti weş bê!” Mêrdek a çeq di nêweşînda cizamî ra reya.
14Îsay o tembey kerd ki, wa kesî rê teba nêvajo, hima ey rê va: “Şo kahînî hetek, wa bivîno ki ti nêweşînda xo ra reyayê ew wa o zî ney testîq kero. Bahdo zî zeki Qanûndê Mûsay di yazi bîyo#5:14 Bewnîrê kitabdê Levililer'î di 14:4-10., qurbananê pakey bik, wa pêro pey bihesyê ki ti nêweşînda xo ra reyayê.”
15Nay sera xebera Îsay verî ra vêşî bî vila. Merdimî qelfe qelfe ameyê Ey hetek ki goştareya ey bikerê, ew O nêweşîna înan weş kero. 16Hima wext bi wext Îsay xo antê cayo bêveng û bêhes ki duay bikero.
Jew Nêweşê Fercî Benê Îsay Hetek
(Matta 9:1-8; Marqos 2:1-12)
17Rojê Îsay fina wahzî dayê merdiman. Vernî di, Ferîsîyan#5:17 Ferîsî jew meshebê dîndê Yawudîyan bi. (Bewnîrê listeda qisan peynîda nê kitabî.) û Alîmê Kitabana#5:17 Alîmê Kitaban: Merdimê ki Kitabanê Ellay bol rind zanayê. (Bewnîrê listeda qisan.) roniştîbî, nê pêro heme sûkandê Celîle ra, Yawudîye ra ew heta Yeruşalîm ra zî ameybî. Ew hukumdê Ellaya, Îsay şîfa dayê nêweşan. 18A çeq di, çend camêrdan jew nêweşo fercin cinaza kerd û ard uja. Ê qayilî bî ey berê zerre ew Îsay ver di ronê. 19Hima hend milet bol bi, înan nêşayê ki ravêrê ew ey Îsay hetek resnê. Qandê coy ê şî banî ser, banî sera çend kiremîtî hewaday ew nêweş uja ra verada cêr, wertedê milet ra Îsay ver di rona. 20Îsay îmanê înano ki wuna gird o dî ew nay sera nêweşî rê va: “Ey merdim, gunayê to ef bî!”
21Ferîsîyan û Alîmê Kitaban xo mîyan di va: “No kamo ki O yo wuna Ellay rê kufir keno? Bê Ellay kam şeno gunayan ef kero?”
22Hima Îsay zanayê fikrê înan çiçî yo ew înan ra pers kerd: “Şima yê zerrîda xo di çi winî dişmiş benê? 23Şima se vanê kamcî vatiş deha rehat o, kes vajo ‘Gunayê to ef bî’, yazî ‘Werz pay ew şo!’ 24Hima şima do bivînê, hukmê Lajdê Însanî tîya erdî sero zî esto ki gunayan ef kero!” Ew O ageyra nêweşî ser ew va: “Ezo to rê vana, werz pay, mitêlanê xo#5:24 Yazî: doşegê xo bigî ew şo keye!”
25Mêrdek çimandê heminan ver di jû find' werişt pay, mitêlê ki sero kewte bi, ê arêday, şi keye ew Ellay rê şukur kerdê. 26Êyê ki uja di arêbîyaybî pêser, pêro bol şaş mendîbî, înan Ellay rê hemd û şukur kerdê ew vatê: “Ewro ma girweyê ecêbî dî!”
Îsa Veyndano Tahsîldar Lewî
(Matta 9:9-13; Marqos 2:13-17)
27Bahdo, wexto ki Îsa sûk ra vijyayê, jew tahsîldar dî ew nameyê nê tahsîldarî Lewî bi. Nê tahsîldarî kêberdê sûk di vêrgî girotê. Îsay ey rê va: “Mi dima bê!” 28Lewî zî werişt pay, heme çî herun di verada ew Îsay dima şi.
29Bahdo Lewî qandê Îsay keyedê xo di jû dahwetênda gird da. Bol tahsîldarî ew tayn merdimê bînî zî ameybî na dahwet. 30Ferîsî û alîmê xoya, ê xo mîyan di vajîyayê, înan telebandê Îsay rê va: “Şima yê çi wenê û şimenê tahsîldarana ew merdimê ki zeydê înana gunakarî yê?”
31-32Îsay zî înan rê wuna va: “Ez qandê merdimandê rindan nîyameya, ez qandê gunakaran ameya ki ê tewbe bikerê. Merdimê ki nêweşî nîyê, ê mehtajê tixtorî zî nîyê, êyê ki nêweşî yê, xora ê mehtajî yê.”
Mesela Roje-Tepişten
(Matta 9:14-17; Marqos 2:18-22)
33Ferîsîyan û Alîmandê Kitabana fina Ey ra pers kerd: “Telebeyê Yehyay bol finî roje tepêşenê ew duay kenê, telebeyê ma zî winî kenê. Hima telebeyê to yê wenê ew şimenê!”
34Îsay înan rê wuna va: “Hendik zama yo meymanandê veyvîya pîya yo, şima şenê meymanan rê vajê, roje tepêşê? 35Xora wext nezdî yo, zamay do înan mîyan ra vejê. Wexta ê do ê rojan di roje tepêşê.”
36Îsay înan rê na mesel zî va: “Qe kes çinado newe ra lete nêcikeno ew eya çinayê kihanî pîne nêkeno, eki winî bikero se, çinayo newe zî hermîyeno ew pîneyo newe zî qe umişê kihanî nêbeno. 37Ew qe kes zî şeraba tezî meşkandê kihanan nêkeno, eki winî bikero se, şeraba tezî meşkan teqnena, wexta şerab rijyena ew meşkî zî dirryenê. 38Nê, kes do şeraba tezî dekero meşkandê newan! 39Ew qe jew merdim eki şeraba verên şimito se, ey dima newîda ci ra nêwazeno, o do vajo ‘Na verên weş a.’ ”
Seçili Olanlar:
Lûqa 5: diq
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© (Active), Wycliffe Bible Translators, Inc. All rights reserved.