Yohana 19
19
UYeesu iihigwa kibudwa pa musalaaba
(Mataayo 27:15-31; Maluko 15:6-20; Luuka 23:13-25)
1Lino uPilaato wámutoola uYeesu mukhati ya nanda, wávalajisa avasulukhali vaakwe kiija, vamutove uYeesu na majalidi. 2Avasulukhali vaatava injoola ya mimfwa, vamufwasa ku mutwe. Khanji vamufwasa inkhansu ya mwalaala, iya shitwa. 3Vaaluta kunyaakwe, vamuhunjila kwa kimubeda vaaja, “Aaje senga, wee Mutwa wa Vayahuudi!” Vamubamula amakhoofi.
4UPilaato wáahuma panja khanji, wáshijovela ishipuga sha vaanu vala wáaja, “Puliisi, nisimuhumye kunja kunyeenyu umuunu uyu, baheene mumanye kiija, nisalwaga lujowo loloona kunyaakwe luna ananjile.” 5Lino vamuhumya uYeesu panja, afwalile injoola ya mimfwa ni nkhansu ya mwalaala. Lino uPilaato wálogola bahawuvalafu wáaja, “Loleeli, umuunu uyo.” 6AVatambule avakhome na vasulukhali va nanda imbaagule pina vamwajile uYeesu, valyova vaajova, “Mukhomeeleli pa musalaaba, mukhomeeleli pa musalaaba!” Lino uPilaato wávajovela wáaja, “Mutooli omwe yuumwe mumukhomeelele pashaanya pa musalaaba, kwa kiiva one nisalwaga lujowo loloona kunyaakwe luna ananjile.” 7AVayahuudi vamugomosesa vaajova, “Ose tina ndaji, na kwa ndaji iyo, isakulwa kibudwa, kwa kiiva ikiyikhoona kiija, umwene Lusawo lwa Nguluvi.”#19:7 Yimba mu litaafili lya Njowo sa Valaawi 24:16.
8UPilaato wáganaga kipulikha amaswi ago, wáshilaga kitiila mandu. 9Lino wáhuluta khanji mu mbalino yaakwe, wámuposa uYeesu wáaja, “Wee muunu owe, uhumile kwi?” Leelo uYeesu asikhavagomoseese hata liswi limo. 10Ino uPilaato wáaja, “Kwashi usikinigomosesa? Wuli, usiimanya kiija nina wutawulilwa wa kikudindulila, khanji na uwa kikukhomeelela pa musalaaba?” 11UYeesu wámugomosesa uPilaato wáaja, “Owe ndi usaava nu wutawulilwa wowoona kunyangu, nda usipeliilwe nu Nguluvi. Leelo umuunu yula yuna aniviishile mu mawokho gaakho, ana wunansi wukhome mandu kishila uwunansi waakho.” 12Ino uPilaato pina wápulikha ago, wáajesa kisakula insila ya kimudindulila uYeesu, leelo aVayahuudi valyova khanji vaajova, “Nda umudindulile umuunu uyo, ino owe usili mumanyi wa Kayisaali, umutwa wa Valuumi. Umuunu yoyoona yuna ikiyigaha kiija mutwa, ikimukhaana umutwa wa Valuumi.” 13UPilaato pina wápulikha amaswi ago, wámuleeta uYeesu panja, wáaluta kikhala pa shitengo sha kihijila, uluvala luna valutambulaga Luutu lwa Mangʼanga (ilitaawa ili kwa Shihebulaniya viijova Gabata).
14Lukhandi luhaavi lwa masala ga mutanda ndeeni paminsi, mu lisiku lya kiyipinyangania kwa kiiva ya shiwungo sha Pasaakha. UPilaato wáshijovela ishipuga sha vaanu wáaja, “Loleeli, umutwa weenyu uyu!” 15Aveene valyova vaajova, “Mubuda, mubuda! Mukhomeeleli pa musalaaba!” UPilaato wávaposa wáaja, “Wuli, mwisakula nimukhomeelele pa musalaaba umutwa weenyu?” AVatambule avakhome vamugomosesa vaajova, “Ose tisiina umutwa uyunji, leelo tinawo mwene duguli Kayisaali, umutwa wa Valuumi!” 16Lino kuwudugo uPilaato wámutawula uYeesu mu mawokho gaanave, baheene vamukhomeelele pa musalaaba.
UYeesu ikhomeelelwa pa musalaaba
(Mataayo 27:32-44; Maluko 15:21-32; Luuka 23:26-43)
Lino avasulukhali vamutoola uYeesu na kiluta nawo. 17Wásumula umusalaaba gwakwe, wáwuukha mu lijumbi, wáaluta uluvala luna lutambulwa kwa Shihebulaniya Goligota, uluganulo lwakwe, Lipangalasa lya Mutwe. 18Vaganaga kifikha pala, vamukhomeelela uYeesu pa musalaaba. Uluvala lulula, vavakhomelelaga avaanu avanji vavili, shila muunu pa musalaaba gwakwe. Yumo ulubali lwa kundiilo, uyunji ulubali lwa kunshiji.
19UPilaato wálajisa kiija, gayandikhwe amaswi na kiviikhwa pa musalaaba gwa Yeesu, gina giijova,
“UYeesu uwa ku Nasaleti, Mutwa wa Vayahuudi.”
20Amayandikhwa ago gakhayandiikhwe mu shilogolo sha Shihebulaniya, Valuumi na Vayunaani. AVayahuudi vinshi vakhandi viyimba amayandikhwa ago, kwa kiiva uluvala ulo luna vamukhomelelaga pa musalaaba, pakhandi nkholeela ni Yelusalemu. 21Lino avatambule avakhome vamujovela uPilaato kiija, “Usikhayandikhaga kiija, ‘Uyu yu Mutwa wa Vayahuudi,’ leelo uyandishe kiija, ‘Umuunu uyu akhayikhoonile kiija, umwene yu Mutwa wa Vayahuudi.’ ” 22UPilaato wávagomosesa wáaja, “Ndaali, amayandikhwa gasigale shiisho ngaja shina nayandikha.”
23Avasulukhali vaganile kimukhomeelela uYeesu pa musalaaba, vatoola amenda gaakwe, vaagava fihupi fina. Shila musulukhali wátoola shihupi shaakwe. Khanji, vatoola inkhansu yaakwe. Inkhansu iyi yikhandi yisushiilwe, vagahilaga shisepe shimo hela sha mwenda, yisikhandi yihoniilwe hata pamo. 24Lino vapulinkhanaga vaajova, “Tisikhademulaga inkhansu iyi, leelo tipulinkhane kiija, yive ya naani.” Ago gasenjekhaga kiija, gakwilane gina gayandiikhwe mu Mayandikhwa aManofu kiija, “Vagavanaga amenda gangu, na kipulinkhana ulwa kitoola inkhansu yangu.”#19:24 Yimba mu litaafili lya Sabuli 22:18. Gageene gina vagahaga avasulukhali.
25Lino vakhandi vakwali avashimaayi avanji vana, vina vakhandi vayiimile nkholeela nu musalaaba gwa Yeesu. Mu vashimaayi awo akhandi akwali umaayi wa Yeesu, umaame wa maayi wa Yeesu, uMaliya umudala wa Kileopa, nu Maliya uwa ku Magidala. 26UYeesu pina wámwaga umaayi waakwe, khanji nu mumanyisiwa yuna akhandi amugeene mandu ayiimile nkholeela nu maayi waakwe, wáaja, “Wee maayi wangu, loleela uyo yumwene mwanaakho.” 27Khanji wámujovela umumanyisiwa yula wáaja, “Loleela, uyo yu maayi waakho.” Lino kihuma uluhaavi lulula umumanyisiwa yula, wáwuukha nu maayi wa Yeesu, wáaluta kikhala nawo mu nanda yaakwe.
UYeesu iifwa pa musalaaba
(Mataayo 27:45-56; Maluko 15:33-41; Luuka 23:44-49)
28Ino, uYeesu wáamanya kiija wáamala kisenga insengo yaakwe yoona. Ino wálogola wáaja, “Niiwona nkhawu ya malenga.” Ndeeno, gakwilana gina gayandiikhwe mu Mayandikhwa aManofu.#19:28 Yimba mu litaafili lya Sabuli 69:21. 29Pa luvala pala, pakhandi ni shombo shina vamemyaga idivaayi inkhali yina yikhaliipe. Lino vatoola isifongo vajabikha mu divaayi iyo, vaviikha mu lilansi, vamutwalila uYeesu ku mulomo. 30UYeesu pina wáajesa idivaayi iyo, wálogola wáaja, “Insengo yangu yaasila!” Baheene wásungamya umutwe, wáafwa.
Avasulukhali vikimuhoma uYeesu ni malala
31Likhandi lisiku lya Ijumaa ilisiku lya kiyandaala iSabaato,#19:31 Lisiku lya Ijumaa ilisiku lya kiyandaala iSabaato: Kwa Vayahuudi yikhandi yiyansa pa Ijumaa pashaamihe. khanji iSabaato yila yikhandi lisiku likhome kishila insiku isinji.#19:31 ISabaato yila yikhandi lisiku likhome kishila insiku isinji: Kwa kiiva yikhandi mu lisiku lya shiwungo sha Pasaakha. Avakhome va Vayahuudi vasikhandi visakula umufimba gusigale pa musalaaba mu lijuva lya Sabaato. Ndeeno vaaluta kwa Pilaato, vamulomba kiija, avasulukhali valute vavadeenye amagulu#19:31 Vavadeenye amagulu: Vagahaga ngaja ndeeno baheene vafwe gwalimo. avaanu vina vavakhomelelaga, na kiwuusa amafimba gaanave pa musalaaba. 32Lino vaaluta, vamudeenya amagulu uwa wutasi nu wa wuvili vina vavakhomelelaga lumo nu Yeesu. 33Leelo pina viiluta kwa Yeesu, vaawona afwile, ndeeno vasikhamudeenyile amagulu. 34Leelo umusulukhali yumonga wámuhoma uYeesu ni malala mu luvafu. Baheene yaahuma idanda na malenga. 35Imola isi siyandiikhwe nu muunu yuna akhandi ikigaaga gina gakhandi gisenjekha. Aga gina ikigalogola ga shiyooli, khanji woope iimanya kiija, gina ilogola ga shiyooli. Ino ndeeno na yuumwe, muhuviilile. 36Amaswi ago gasenjekhaga, baheene gakwilane gina gayandiikhwe mu Mayandikhwa aManofu kiija, “Kusiina ilifupa lyakwe lina likhadeenywa.”#19:36 Yimba mu litaafili lya Sabuli 34:20. 37Khanji aMayandikhwa aManofu giija, “Vakhayinsa kimuloleela yuna vamuhomaga ni milala.”#19:37 Yimba mu litaafili lya Sekhaliya 12:10.
UYeesu iviikhwa mu lijooja
(Mataayo 27:57-61; Maluko 15:42-47; Luuka 23:50-56)
38Ago pina gashilile, wáyinsa umuunu yumonga ilitaawa lyakwe yu Yusufu, yuna wáhumile mu lijumbi lya Alimataaya. Umuunu uyu akhandi mumanyisiwa wa Yeesu, leelo kwa wufiho hela, kwa kiiva akhandi ikivatiila avakhome va Vayahuudi. Lino umuunu yula wáaluta kwa Pilaato, wámulomba kiija, atoole umufimba gwa Yeesu agusiile. UPilaato wámutawulila. Baheene uYusufu wáaluta, wáguwuusa umufimba gula.
39UNikodeemu, yuna uluhaavi lumonga wálutile kwa Yeesu pa shilo,#19:39 Yimba mu litaafili lya Yohana 3:1-2. wáyinsa na mafuta ga mununsi umunofu, gina gahansiiwe nu wubani nu mugoda ugwa kisivila umufimba gusikhananjikhaga, gakhandi ngaja kilo mashumi gatatu ndeeni. 40Avaanu vavili vala vatoola umufimba gwa Yeesu, vaguvilinjisa amenda aga kisiilila, vagupakha amafuta gina ginunshilila wunofu mandu kilingana ni ngʼoma ya Vayahuudi iya kisiila avaanu. 41Uluvala luna vamukhomelelaga pa musalaaba uYeesu, gukhandi gukwali umugunda. Mu mugunda mula likhandi likwali ilijooja#19:41 Ilijooja: Ingʼoma ya Vayahuudi ya kisiila avaanu, vakhandi vikivaviikha vina vafwile mu lijooja lina likhandi lihimbe mu shidunda na kiviikha ilingʼanga pa mulyango. lina vasinajelaje kimusiila umuunu yoyoona. 42Ilisiku ilyo, likhandi lisiku lya Vayahuudi kiyipinyanga mu Sabaato. Kwa kiiva ya ilyo, vamusiila uYeesu mu lijooja lila, kwa kiiva likhandi nkholeela.
Seçili Olanlar:
Yohana 19: Shisangu
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2020, Wycliffe Bible Translators, Inc. All rights reserved.