Mateo 3
3
Juan inajiejnawo iyo jlamtikie' yi'i pa ajnat laj i'nioye'e
(Mc 1.1-8; Lc 3.1-9,15-17; Jn 1.19-28)
1Puwak siupuwa jlomas ti 'yakaja t'ipi pet pa Juan inajiejnawo, yi'i pa ajnat laj i'nioye'e yiji japa Judea, iyoyet'ipi 'ate ti iyo jika'niyeja':
2—¡Woye asosik ink'ieye, siunie Sinia' jika anechijiayas je pa tojwa ilia'm!#Mt 4.17
3Juan paka pa siupa ti Sinia' jijwejlanik jiwo Isaías ijwilt'ipi ti iyo'ate:
“Jla'lap pa i'nio' ti pesieje ti to'm ape'e pa ajnat ti laj i'nioye'e ti iyo'ate,
Wakajlanitie ni Saka'niona ni ja ji'niayija',
jlajlats'i siunie ja ji'niayija' ti jajnajyi.”#Is 40.3
4Siupuwa ji'wuye pa Juan puwak siujlie'e jikiayi kosoki po 'wole ti titietaja pijia'm ti tajakik'i; siupa iyo jika'wakie a'naj t'ipi,#2 R 1.8 jlampet siupa itiujw inkayik pet siu'neje puwa kio'ol. 5Siupapo i'nio' tajla'm japa Jerusalén, siu'neje papo tajla'm pet japa ajnat Judea wikie'eyi, siu'neje papo tajlits'i pet puwa isi'il jilis jikiusk'i pa tewuk Jordán, papok ijioyi pa Juan 6ti ininekiajlisi'n jla'yi ti tiniejienaja'n seka'a yi'i pa tewuk.
7Je 'es jlam ti Juan i'wina ti 'loj papo Fariséojos, siu'neje papo Saducéojos ti kia'iyo iyo ka tiniejienaja'n. Sekyi'i iyonat'iyijpe 'ate:
—¡Jiwoye'ate niwa injlajas! ¿Tempa i'neyasajnajyi'n ti ijwi'lase'm ti ja'yiltana k'iye ni Sinia' jiwak ni jana'm? 8'Esiji ka anilesanayiji, kajanitie siunie jiwoyeyi ti jininekiajla'. 9Ataj ká awomayi siuti jiwoye 'ate, “Sa'am Abraham jilists'e'm atomaja pijia'm.”#Jn 8.33 'Yejne'n siuniwa sisajas je jwelta ka Sinia' je 'najane pa ka wone ka kiak iwone ka wone Abraham jilisa'. 10Pajk'i ti wakal ni siunie ala' ti ja tikienaja niwa a'la' ti ja tijwajak'i isia'm, ti ja tenajak'i niwa jijwetis. A'la'pe jana ja ke 'esie, ti ja ke iwo jlaye, janak tijwajakiejepi, ka titietajayajampe ni jwat.#Mt 7.19 11Ya'am ti anajiena anajienajyi ni i'niat, in'yenajiap jiwek ti jiwo ajosik ink'iejyisa'. 'Yina po 'neje siunie 'wanjli isia'm ti jana'ajme, nak ja inajienajyi pet ki iyo jana Sinia' jikimet ti 'es siu'neje ni jwat. Jla'm ijiate jla'am ti jijweye poyi ti 'yaka'm itipe'e, ijiate ti je akajli ka yikiji niwa jisieti. 12Itiu'un siojopa jika a'la', ti jankiene ni ipiatatiok t'ejes 'wanjle'e ti 'wena jajnoti ni jop t'ejes ti ijlijni'ni. Janena'ana'a siupa jane'ne siupa ipiatatiok t'ejes 'wanjle'e ti 'es. Ja jlampet siuniwa jop ijlijni'ni ka intatajayijamna'a siunie jwat ti je paj ka 'no'me.
Juan iniejie'n pa Jesús
(Mc 1.9-11; Lc 3.21-22)
13Jesús tal Galiléaja ti ijioyet'ipi 'niji yi'i pa tewuk Jordán. Yiyi pa Juan ti iyonat'iyijpe 'ate:
—Juan, awojonk'iye pet ka siniejie'n.
14'Yina Juan ti ipi'yaye, iyoyet'ipi 'ate:
—¿Yot'iyi'ni ti si'yase'n ka iniejie'n? Ya'm ijiattaja ka siniejie'n.
15Jesús isiujlie ti iyo'ate:
—Sejni wek'iate. Awo'ate, 'esiji ka iyoki wikie'eyi siunie Sinia' iyo ka iyoki.
Sekyi'i Juan ijiate iyoyi, 16iniejien'ne ja Jesús. 'Yina Jesús tajla'm jiwek pa i'niat, sekyi'i siupa poli 'ajlaja'm. I'winat'ipi ilia'm japak Sinia' jikimet, 'yiniye ni ojwo', ti na'm isia'm ti ijioyi ti yi' ape'e. 17Sekyi'i ti pesiejat'iyipi pak ina'lap ti tom poliyi ti iyo'ate:
—'Nak siu'nie yas ti yiminik, wuj ti ts'ajka'a.#Sal 2.7; Is 42.1; Mt 12.18; 17.5
Seçili Olanlar:
Mateo 3: CRT97
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
Nuevo Testamento en Chorote © Sociedades Biblicas Unidas, 1997.