Yùxanà 10

Yesù ci wò rii sàà gbaà dɔ̀nmàdziɛ

1Àyìwà, Yesù yè dzin ci: «Sààben na, mun nì ci e ra, mòò riì sàà gbaà dɔ̀nmàdziɛ toò, è bè tèyn gàne kpɛrɛ ɲan è dɔ̀n sàà gbaà doùn, tɔ̀ tsìfa shɔn nì, è bà gookoronfabaa. 2Ŋà, mòò riì dɔ̀ɔn dɔ̀nmàdziɛ takia rà, tɔ̀ rii sàà rèè kplatsuubaà yɛ̀r'la. 3Sàà gbaà kplatsuubaà fùa, tɔ̀ yeè dziɛ̀ san sàà rèè kplatsuubaà rè, sàà rèè y'à vuà myɛ̀n. È raa sàà rèè sapɛ kir'là e tsoò rà tɔ̀un, è bo è ka da rɔ̀n. 4À ye e raa sàà rèè sapɛ bo dò waatsi riì bwèy, è bè e ji è jɔun, sàà rèè yè e gban à kpɛyn, kàtsu y'à vuà tɔ̀. 5Ŋà, mòò riì yè è mà tɔnɔn, è na e gbaàn tɔ̀ kpɛyn byɛ. È vwɛ̀ɛ rìì, yè e dan gbànbe à ra, kàtsu, è na mòò kpɛrɛ ì vu tɔ̀ waa.»

6Yesù yè tɔ̀ gooma bɔɔ̀ ka tàlen ban e lamyɛ̀nbaa rèè rè tɔ̀ tsuru. Ŋà, à kàjaa riì kaà gooma ree doùn è re, è akiri na tɔ̀ jà waa.

Yesù ci wò rii dzwɛka kplatsuubaa wùɔ

7Tà shɔ̀ùn, Yesù yè dzin kɔn ci: «Sààben na, mun nì ci e ra, mun nì sàà gbaà dɔ̀nmàdziɛ. 8Nìì reè sapɛ nàu mun jɔun, twɛy shɔn ì ko gookoronfabaa ì rìì. Ŋà, sàà rèè na e toro wɔ è re waa. 9Mun nì dɔ̀nmàdziɛ, mòò riì ye dɔn mun ne, tɔ nà tsi. À tsìfa nà dɔ̀n, è bo e saoma, è dziira gaa ɲwɛyn jà. 10Shɔɔ̀n nà kuàn na pɛn waa, è shɔnbeè rìì fa, è vui fa, è baragoò fa. Mun nà kuàn nì yɛ mòdzian yè jaamabee dziù tàrà, y'à tàrà, fɔ è jaa yè bè cɛn.»

11Yesù yè dzin kɔn ci: «Mun nì dzwɛka kplatsuubaa wùɔ. Dzwɛka kplatsuubaa wùɔ yè e xɔɔn sìan e re sàà rèè kamà. 12Ŋà, mòò riì sàà rèè kplatsuɔ sàr'là ma, tɔ̀ na è kplatsuubaa taki takià waa, sàà rèè to na à raa waa. Àwà, tɔ̀ ye kparan nakɔɔn ja nìi tsuru, tɔ̀ y'a vwɛ̀ynkɔɔn, è sàà rèè bàto. Kpar'na kuin faa tɔ̀un è sàà rèè jee. 13À vwɛ̀ɛ tà tsuru, kàtsu à faagoo rèe faa sàr'lì kpɛyn, sàà rèè, twɛy na à vyɛ̀ɛ goo waa.

14Mun nì dzwɛka kplatsuubaa wùɔ. Min ne sàà rèè tɔ̀, mun ne sàà rèè yè bà mun tɔ̀. 15#Mat 11.27; Luk 10.22.Tɔ ni a ci Fà Ŋaablà mun tɔ̀ nìi tsuru, mun sa yeè bà à tɔ̀. Mun yè n xɔɔn sìan n ne sàà rèè kamà. 16Sàà kpɛrɛ ì ni mun ne, nìì reè na ni nèe sàà gba rèe doùn waa. Fɔ min bè twɛy sa xɔ na. È nà mun vuà myɛ̀n. Tà doùn, è sapɛ nà bà sàà kuru soo, kplatsuubaa soo yeè bà ni è ka.

17A y'a jà mun goò dzi Fà Ŋaablà ra, à nèe goo rèe rìì kamà: min tsiɛ, min xɔɔn sìn, min kòmànà à sèè tsi. 18Mòò pɛn na dzia mun xɔɔn bo mun na waa, à kuà mun nì ɲàn, m'a sìn. À dzi ni mun na m'a sìn, à dzi yeè bà ni mun na m'a sèè tsi. Tɔ dzugooma xɔù, mun nìi tàrà bou n Fa Ŋaablà re.»

19Twɛy gooma reè kamà, Dzyèèsìbee mòdzin neè yè tara kɔn. 20Giri na dziàn è ɲan ci: «À kweykɔɔn, è bà fàkɔɔn ! Feera ye yè bà e toro wɔɔ̀ à re ?»

21Swey yè bà dziàn ci: «Nèe na kweykɔɔn gooma ì dɛ ! Kweykɔɔn dzia jaana ì jaa dzii san ɔn ?»

Yesù gooma niì dèu, à y'à to Ŋaablà re gbà blàa sɛr'là koùn

22Àyìwà, Dzyèèsìbee mòdzin neè na dɛ̀rɔɔ̀n, yè Ŋaablà re gbà blàa goo rèè sɛrɛ sɔn faa Yerusalɛmùn mùnkɛɛ̀ waatsi rɔn. 23Tɔ̀ sɛr'là waatsi wɔumaà, è ni à goo rèè rà, gàne nìi kir'là Ŋaablà re gbà blàa fɔɔn doùn, ci màsa Sɔ̀ɔ̀mɛyn naa fààkɔ̀r'laà, Yesù na e ɲantsyeere tsyeeree mɔn. 24Àwà, à ni tɔ̀ ra, Dzyèèsìbee mòdzin neè yè nà à laguru, yè dzin à ra ci: «Wo ni ɲe akiri tsùù fɔ waatsi kɛn nèe goo rèe ka ? Wo rìì ye ba Ŋaablà Jaara Modzìàn, à dè fyɛ mùn na.»

25Yesù yè dzin è ra ci: «Mun y'à dèu ye ra nòn, ŋà, ye na ɲɛɔ̀n à ra waa. Mun goo nìì reè faa n Faà tsoo ra, twɛy rìì mun shɛɛrɛbe faa. 26Ŋà, ye na ɲɛɔ̀n à ra waa, kàtsu ye na mun ne sàà rèè kuru waa. 27Mun ne sàà rèè mun vuà myɛ̀ɛn. Mun yè è tɔ̀, yè bà e gbaàn mun kpɛyn. 28Mun jaamabe dziù dòbɛɛ sìan è ra, bara na ni è mà waa, mòò pɛn to fa dzi è kun bo mun suun waa. 29Mun Fà Ŋaablà niì yè è sìun mun na, tɔ blà gè sapɛ ma, mòò pɛn to na dzia è kun bo mun Fà Ŋaablà suun waa. 30Mun ko n Fa Ŋaablà, ɲe sa wò soo rìì.»

31Dzyèèsìbee mòdzin neè yè kpàa ì sen kɔn, ci ye nà Yesù dzyɛn vu. 32Yesù yè dzin è ra tɔ̀un ci: «Mun goowùù wuu giri fau ye jaa ra n Fa Ŋaablà re fa ɲan. Ye to mun dzyɛn vua twɛy goo rèè kɛ̀nma ni soo kamà ?»

33 # Sak 24.16. Dzyèèsìbee mòdzin neè yè dzin à ra ci: «Ɲe na wo dzyɛn vua goowùù fauma kamà dɛ, ŋà, ɲe wo dzyɛn vua, kàtsu, wo Ŋaablà tsoo bar'la, wo mòdzìn màànàkɔɔn yè bà a yɛrɛ baɔ̀ Ŋaablà.»

34 # Zab 82.6. Yesù yè dzin è ra ci: «N ci à sɛbɛɔ̀n ye re sàrìyaa kìtaabuà min sɔn ci:

"Mun Ŋaablà ci ye ŋaabla ì" ?

35Mùn y'a tɔ̀ ci nìi deò Ŋaablà re goomaa doùn, tɔ̀ na dzia mɛɛy waa. Ŋaablà re gooma ree to sìun nìì reè rà, gooma ree doùn, Ŋaabla twɛy kiriɔ ŋaabla ì. 36Tà doùn, Fà Ŋaabla mun nìi boo e Jaara, è mun ka na dziɲaan doùn, ye dzia dzin dzùrù, ci mun Ŋaablà tsoo bar'la, kàtsu mun dziun ci mun Ŋaablà Dzin Kpir'la ? 37Mun ma ba n Fa Ŋaablà raa goo rèè faa, e maà ɲɛn n na waa. 38Ŋà, min ba twɛy goo rèè rìì faa, e kɛnsɛɛn ma ɲɛn mun na, ye ɲɛn twɛy goo rèè rà kɛ̀, sànko y'a tɔ̀, ye ɲɛn à ra, ci mun Fà Ŋaabla ni mun ɲan, min bà ni à ɲan.»

39Àwà, tɔ dèu min niì, yè fù kɔn, ci ye nà Yesù kun, ŋà, è bo è si tsɔ̀ rè, è geren.

40 # Yux 1.28. È dɔ̀n be, è bè to Yuridɛn baa kɛ̀yn, Mòdzìn Jààràfoobaa Yùxanà na mòdzian jaara foo min niì dan, Ŋaablà re shia goo rèè rà. 41Mòdzian giri yè bè à re mɔn kɔn, yè bà dziàn ci: «Mòdzìn jààràfoobaa Yùxanà na kabagoo goo pɛn fa waa, ŋà, à goo o goo dèu nèe kpir'lee tsɛ, à sapɛ bàu sààben.»

42Tɔ̀ gàne rɔ̀n mɔn, mòò giri yè ɲɛn Yesù rà.

Seçili Olanlar:

Yùxanà 10: BDZU

Vurgu

Paylaş

Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Bible Dzùùngoo Unicode Hakkında Daha Fazlasını Öğrenin