Yùxanà 14

Yesù ci a y'a myɛ̀n shia ko sààbeen ko jaamabee tɔ wò rii

1Àyìwà, tà shɔ̀ùn, Yesù yè dzin e re kàràndzin neè rà ci: «E maà à to e akir'là yè gbiiman waa. Ye ɲɛn Ŋaablà ra, ye ɲɛn mun sa ra. 2Gbà giri ni mun Fàà rè gàne rɔ̀n. À mà bà tɔ̀ tsuru, mun ni dzin ye ra, ci mun nà bè tsùùma lamɔnɔ̀n tsùù ye re o ? 3Min tsùùmaà lamɔnɔ̀n dò ye re waatsi riì bwèy, mun nà sèè na, min nà ye sen be n ka, sànko mun ni min niì, ye sa yeè bà ni mɔn. 4Mun bèe min niì, shi niì bèe mɔn, ye tɔ̀ tɔ̀.»

5Yesù rè kàràndzin neè ɲàn, nìi tsoo Tomà, tɔ̀ yeè dzin à ra ci: «Tsìfaà, wo bèe min niì, ɲe na tɔ̀ tɔ̀ waa, shi niì to bèe mɔn, ɲe nà tɔ̀ tɔ̀ dzùrù ?»

6Yesù yè dzin à ra ci: «A y'a myɛ̀n shia ko sààbeen ko jaamabee, tɔ mun nì. Mòò pɛn na dzia nà Fà Ŋaablà ma nàu'n kuru pɛn na, è bà mun shɛn too waa. 7Ye ye ba mun tɔ̀, ye nà mun Fàà sa tɔ. È sen dòònuùn nà, y'a tɔ̀ nòn, ye yè bà à jaɔ̀ sa.»

8Fìlipù, tɔ̀ yeè dzin à ra ci: «Tsìfaà, Fà Ŋaablà kpadè mùn na, tɔ ɲe boò.»

9Yesù yè dzin à ra ci: «Fìlipù, she na mun bà ye ka, arì she wo na mun tɔ̀ ŋe o ? Mòò riì mun jàu, tɔ Fà Ŋaablà rii jàu. Wo dzia dzin dzùrù kɔn ci: "Fà Ŋaablà kpadè mùn na ?" 10Wo na ɲɛn à ra, ci mun ni Fà Ŋaablà ɲan, è bà ni mun ɲan ɔn ? Mun gooma niì reè dèe ye ra, twɛy na boò mun yɛ̀r'la ɲàn waa. Fà Ŋaablà riì ni mun ɲan, tɔ̀ rii yè e re goo rèè shi jiɛ tɔ̀ tsuru. 11Ye ɲɛn n na, mun ni Fà Ŋaablà ɲan, è bà ni mun ɲan. E kɛnsɛɛn ma ɲɛn tɔ̀ ra, mun goo nìì reè faa ye jaa ra, ye ɲɛn n na twɛy bàsɔùn kamà kɛ̀.

12Sààben fyan, mun nì ci e ra, mòò riì ye ɲɛn mun na, mun goo nìì reè faa, à tsìfa sa nà twɛy fa. À yɛ̀rɛ̀ to nà bla ì fa è geren twɛy sa tsɛ, kàtsu mun bèe Fà Ŋaablà re. 13Ye to ye gè o ge gaa mun tsoo ka, mun nà tɔ̀ fa, sànko Fà Ŋaablà blabee yè kpàdè, è bo Dzin Kpirimaa ɲàn. 14Ɔ̀ɔn, ye ye gè o ge gaa mun tsoo ka, mun nà tɔ̀ fa.

Yesù dzwɛ̀mabaa kpɛrɛ sìn goo deu min niì

15Ye ye ba mun kɛ̀niɔ̀n taki, ye nà mun dzugooma xɔù rèè shi jiì. 16Tà doùn, mun nà à gaa Fà Ŋaablà re, è Dzwɛ̀mabaa kpɛrɛ sìn ye ra, sànko, tɔ̀ yeè bà ni tsuù ye ka kudɛyn. 17À Ŋaablà re Dzia rìì, sààbeen ni nìi ɲàn. Dziɲan na dzia tɔ̀ tàrà waa, kàtsu, dziɲan na à jàa waa, à to na à tɔ̀ tsu waa. Ŋà, nìi ye, ye y'à tɔ̀, kàtsu, à ni ye ka, à to nà bà ni ye ɲan.

18Mun fa ye to e soone, a ci dzinsèè waa, mun nà sèè na ye re. 19Sani dɛyn, dziɲan jaa fa ɲɛn mun mà dɛ, ŋà ye, ye nà mun jà, kàtsu, mun jaama ni, ye sa to nà bà jaama. 20Tɔ̀ sii sèè ye wɔ, ye nà à tɔ̀, ci mun ni n Faà ɲàn, mun ni ye ɲan, ye yè bà ni mun ɲan.

21Mòò riì mun kɛ̀niɔ̀n, tɔ̀ rii mun dzugooma xɔù rèè toò e duùn, à yè è shi jiì. Mòò riì to mun kɛ̀niɔ̀n, mun Fà Ŋaablà sa nà tɔ̀ tsìfa kɛ̀n, mun nà à tsìfa kɛ̀n, mun yè n yɛrɛ kpadè à ra.»

22Yesù rè kàràndzin neè ɲàn, nìi tsoo Yudè, è bà e si Sikariyɔtsì rà, tɔ̀ yeè dzin Yesù rà ci: «Tsìfaà, fee y'à to, wo nà a yɛrɛ kpadè ɲe bàsɔùn nì nà, wo fa a yɛrɛ kpadè dziɲan na waa ?»

23Yesù yè dzin à ra ci: «Mòò riì mun kɛ̀niɔ̀n, tɔ nà mun dzugoomaa to e duùn, à y'à shi jiì. Mun Fà Ŋaablà sa to nà à tsìfa kɛ̀n. Mun ko n Faà, ɲe fiɛ̀ sa nà nà à tsìfa mà, ɲe yè e tsuùma bo à re. 24Ŋà, mòò riì na mun kɛ̀niɔ̀n waa, tɔ̀ na mun dzugooma reè toò e duùn, à yè è shi jiì waa. Àwà, ye yɛ gooma niì myɛ̀ɛn è bo mun dzu, tɔ̀ na boò mun yɛ̀r'la ɲàn waa. Ŋà, Fà Ŋaablà riì mun ka naɔ, à tɔ̀ raa gooma ni.

25Mun tɔ̀ sapɛ deè ye ra, è mun to ye ka ŋe. 26Ŋà, Fà Ŋaablà nà Dzwɛ̀mabaa nìi ka na mun tsoo ka, Ŋaablà re Dzi Fɛnɛɛ, tɔ nà ye kàràn goò sapɛ ra. Mun to nìi dèu ye ra, à nà ye taa to tɔ̀ re. 27Mun kpɛ̀yn bèe, ŋà, jaanciàn n tɔ̀ toò e re, à mun naa jaanciàn nì sìnkɔɔn ye ra. Mun na à sìan, a ci dziɲan y'a sìan nìi tsuru waa. Tɔ̀ kamà, e akiri mà gbiiman waa, shiɲaanbe tsu to mà bà ni e vunun tsɛ waa.

28Ye y'à dèkɔɔn myɛun mun ne, ci mun nà bè, tà ko min kpɛyn sèè na ye re kɔn. Ye yè bà na mun kɛ̀niɔ̀n, à tɔ̀umaà ye re ci mun bèe Fà Ŋaablà re, ye na nà e taama dzibe, kàtsu, Fà Ŋaabla blà mun mà. 29Mun tɔ̀ dè tsùɔ ye ra dòònuùn, sani à fa jisee yeè wɔ. Tà tsuru, è na fa, ye nà ɲɛn à ra. 30Mun fa dzi gooma giri dè ye ka dɛ, kàtsu, Sùtana, dziɲan ree kùntsiɛ̀ nàa, dzi pɛn to na ni à re mun tsɛ waa. 31Ŋà, fɔ dziɲan y'a tɔ̀, ci mun Fà Ŋaablà kɛniɔ̀n, à to ye nìi ji mun jɔun, mun tɔ̀ rii faa. Ye fù, m'a wa, mìn bo mìin.»

Seçili Olanlar:

Yùxanà 14: BDZU

Vurgu

Paylaş

Kopyala

Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın

Bible Dzùùngoo Unicode Hakkında Daha Fazlasını Öğrenin