Lukas 8
8
Raɗa lawai katuluni Yesus
1Walna moʄahoge, Yesus nakako ta ɗiha kota ɗiha kota mono ta ɗiha harona ɗiha harona, tannam katalarage Lii Dahha tutnai Alla ɓana halegeɓewe pareha ɗaꞌ Raja. Kabul ɗuɗa ana hakodo halole-Na ɗaɗoku-Ni. 2Tauɗa ʄalage ɗaad lawai pahataggahana walta wad japata mono kalawara. Raɗa yiɗɗaꞌnaː Maria, hangara ʄalai Magdalena (pitu wad japata ɓehalai wal tabarana); 3lohhoi Yohana, ole-ummanai Kuza, kapala hagawe umma rajanai Herodes; Susana mono buta hola lawai waɗeka. Yiɗɗa ɗatulluni Yesus mono ana hakodo halole-Na waidi amahaɗa mono agayi kaɗaana tabaraɗa.
Lii-hatuʄa kahaɓarana wini
(Mat. 13:1-9; Mrk. 4:1-9)
4Ata ɗahakitana mai tabarai Yesus walta tangnga ngara kota. Kole ɓana buta hingna ata kamakahhaɓe neɗo, Yesus nahalarawe tabaraɗa lii-hatuʄa kalinaɗana: 5“Wu ata nakako haɓarana win ta omana. Ɓatangrana haɓarana, ɗaad win kamoun ta lara nyiwe mana dekege ata mono ɗaa ɗummoge hatutkana kawurna. 6Ɗaa ɗummoge kamoun ta tana kahawatna. Kole ɓana tumwe na win, namalelewe oroge tana ɓana marakotawe. 7Ɗaa ɗummoge kamoun ta jonga rabta kaman tarana. Rabta kaman tarana natum hamarangage nna win, mana kapiꞌhawe tomage ɓana matewe. 8Ɗaa ɗummolige kamoun ta tana kadauka, natumuwe mono nareih lijakowe ɓana wuuwe kahha ai angtage yapge.”
Ɓanaɓeha halarayi naɗa lii-hatuʄa, Yesus nahanewe, “Kapang katilna, rangewe!”
Ahhai Yesus mana waina lii-hatuʄa
(Mat. 13:10-17; Mrk. 4:10-12)
9Kaɗokuni Yesus ɗakanukawe tabara-Na ngihna naɗa lii-hatuʄa. 10Yesus nabaleha, “Miyo yiiɓegimi maniwola pahangaɗa kapik tadamige agawe ai hatadahona ata tutge aganaɗawei Alla ɓana hareha ɗaꞌ Raja. Tanyiɗuwe ata heka hanuwa waid lii-hatuʄa, tannam yiɗɗa kaɗa hamatarage tabolo wale ɗatadaꞌmawe agawe kaɗaꞌ, mono ɗarangewe tabolo wale ɗayappaꞌmawe.”
Yesus nahalarawe ngihna lii-hatuʄa win pahaɓara
(Mat. 13:18-23; Mrk. 4:13-20)
11Nyi naɗe ngihna naɗa lii-hatuʄa, naɗa win halinawe, nyiꞌwe Liinai Alla. 12Nna win kamoun ta lara, natuʄai ata karangewe Liinai Alla. Tanyiɗuwe ammini kabalka karamage wal ta atena, tannam ka ila ɗahatena mono ila ɗamanemara. 13Win kamoun ta hadau kahawatna, natuʄai ata karangewe Liinai Alla, ɗahiba waige lagahara ate. Tanyiɗuwe Liinai Alla walna kalartaꞌmawe ta ateɗa. Hoꞌhege mahiggo ɓaɗa hatenawe, ɓa kole ha amge kamakaɓa yiɗɗa wale ɗahil hatenaꞌmai Alla. 14Win kamoun ta jonga rabta kaman tarana, natuʄai ata karangewe Liinai Alla, tanyiɗuwe ɗagelagaga mono ɗakamaꞌge mourha kamajaɓola lohho dahhage pan-tana. Tangngad raɗa mawalena kulha ɗangaꞌmage hatenaɗa, tuʄai win aika wuu dahha. 15Tabolo win kamoun ta tana kadauka, natuʄai ata karangewe Liinai Alla, ka ijalawe ta ateɗa kadahha mono kalurha. Nyiɓatauɗage, yiɗɗa ɗahatena hakitana mono rayi butage kadahha tuʄai win kahakitana wuu habutana kadahha.”
Lii-hatuʄage latwe
(Mrk. 4:21-25)
16“Walaꞌma ata kaharewo latwe mono kur waige hajaal, waleka ijalawe ta kab hadau dura. Tabolo natauwe nna latwe ta hadau kamadehta, tannam ata katama kaɗa etawe kamagakahana. 17Enga walaꞌma kaɓunyi aiha eta; mono enga walaꞌma hakamiꞌha aika huuna mono aiha tada.
18Oro ɓatauɗage, hamatara hadahhage hanuwa-Gu, ilam jala yappaka. Oroge ata kanarogage hatakki-Gu, Alla engage ɓana yiin kabuta; tabolo ata aika narogage hatakki-Gu, langka hoꞌkakige hayappana engagei Alla ɓana ngalanadi.”
Inyana mono angwunai Yesus
(Mat. 12:46-50; Mrk. 3:31-35)
19Inyana mono angwunai Yesus ɗamai tabara-Na, walɗa tomaꞌmage ɗikkin oro alnadi butaɗa ata. 20Ma ɗaan kalinani Yesus, “Ama, inyam mono angwum ɗaad ta balhaꞌ, ɗakab atege taɓokaw, Ama.”
21Tanyiɗuwei Yesus linage tabaraɗa, “Inyag mono angwug halugna, yiɗɗaꞌna raɗa ata karangewe hataknai Alla mono karayige.”
Yesus nahaɗannan warata
(Mat. 8:23-27; Mrk. 4:35-41)
22Ɗaage ɗiha laɗo, Yesus mono ana hakodo halole-Na ɗapane ta tena. Malinagei Yesus tabaraɗa, “Maikada kako nna ta bal hoba.”#8.22 Nne hoba Galilea, pahangara ʄala ‘Hoba Genesaret.’ (Torro ʄalay Lukas 5:1). Nne hoba ɗaage ta tana Galilea, malauge ɓatutkawe 21 kilometerage mono gallarage ɓatutkawe 13 kilometerage. Maɗa kako. 23Tangrage ɓana maɓohe tena, Yesus duranage. Nahayaɗawe warata neꞌ ta hoba. Nyiwe naɗa tena manataman wee, maɗa kamhamayilla. 24Ana hakodo halolenai Yesus ɗakako tabara-Na maɗa haraɗui. Maliɗage, “Ama Guru, Ama Guru, yitta mate tabulodage!”
Yesus nakaɗe mana harehai naɗa rereha mono ngalung kalla. Rereha mono ngalung nakaɗannawe. 25Nyiwei Yesus manahanewe tabaraɗa, “Ahha mi mawalem hatena tabara-Gu?”
Maɗa ɓangara mono ɗamadauta. Maliɗage ɓaɗa pahaggawikɗa hanewe, “Iyatakkaɗai naɗe ata kaharehayi naɗa rereha mono ngalung, maɗa liɓawa tabara-Na?”
Yesus nawugai wad japata walta ata Gerasa
(Mat. 8:28-34; Mrk. 5:1-20)
26Yesus mono ana hakodo halole-Na, ɗahakitana waina tena kahha ta tana Gerasa ta bal hoba Galilea. 27Neɗana Yesus nabur ta tana yara, ɗaan wu kaɓaani hatamana wad japata, amini tabara-Na. Naɗa ata walna neꞌ ta kota. Madiiwe aina waina kalabbe mono aina baige kaɗanna ta umma tabolo engana ta hadau rate ata mate. 28Kole ɓana etai Yesus, nakawula mono nakawoʄo ta aronai Yesus, mono nakawula-wula, “Yesus, Anai Alla Kahadda Madehta! Ahha mam tag orhaɗawa? Nauwag rainog ilam hamayillawa!” 29Naɗa ata manahanewe tauɗana orogei Yesus ɓana harehai wad japata huuna wal tabarana. Naɗa wad japata walena pahalaꞌmai naɗa ata, nyiɗawe maɗa katnadi limmana mono leꞌna waina kalarr ɓahi lohho ɓa ʄawayi, tabolo engaɗauge ɓana pohtai kalarr ɓah, mono naɗa wad japata nangidiyi ta hadau kahika.
30Yesus nakanukai tabarana naɗa ata, “Iyau ngaramu?”
Balehanage, “Ngaragu Legionwa.”#8.30 Legion kawalwe ta hanewe Yunani, legion halinawe yiɗɗaꞌna hordadu Roma 4000 waleka 6000 ata lar ta wu kalibbo. Nyiwe tadage naɗa ata ɓana tamaɓen wad japata kabuta. Malinage ɓana baleha oroge ɓatau kallad butadi wad japata katama ta tauna. 31Wad japata ɗamaraino tabarai Yesus tannam ka ilana wugai ta Lirra Kaka.
32Tabarage neꞌ hadau buta takkai wayi katangrana mayegana hayaaɗa ta karapeha letena. Raɗa wad japata ɗakaraihingwe tabarai Yesus tannam kana pahaidi ɓaɗa tama raɗa ta wayi. Mana ngogei Yesus. 33Ma raɗa wad japata ɗahuuna walta naɗa ata, mono ɗatama ta wayi buta. Nyiwe raɗa wayi maɗa hawingna malai lej, walta nir lirra kahha lar ta hoba, maɗa mate tabulo.
34Kaʄawai raɗa wayi ɓaɗa etawe nna kaɗaꞌ, ma atud malai talarage neɗo ta kota mono ta harona habaraɗa. 35Nyiwe maɗa huuna raɗa ata torrowe agawe kaɗaꞌ. Maɗamai tabarai Yesus, mono ɗaɗikkin neɗo naɗa ata papahalaɓena walta wad japata katangrana ngoɗo tabara leꞌnai Yesus. Naɗa ata nawaiɓena kalabbe mono nahiraɓewe pahangaɗana. Raɗa ata ɗamadauta, ɓaɗa etawe nna kaɗaꞌ. 36Raɗa ata ka eta ɗauwe nna kaɗaꞌ, ɗatakwe tabara ata waɗeka aganaɗawe naɗa ata ɓa hataggahayi. 37Tangngaɗa ata neɗo ta tana Gerasa ɗakaraiwe tannamui Yesus kana ijakage neꞌ hadau, oroge tangngaɗa ɗamadauta. Nyiwei Yesus mono ana hakodo halole-Na ɗapane ta tena, maɗa kako. 38Naɗa ata papahalaɓena walta wad japata maraino tabarai Yesus tannam kana pahaiʄalani haɗouk.
Tanyiɗuwei Yesus nahalewai hagga, malinani, 39“Haggawu mono halarawe agawe harayiɓenai Alla tabaramu.”
Ma naɗa atage nahagga mono nahalarawe tabaraɗa ata ta tangngage kota, agawe harayiɓenai Yesus tabarana.
Yesus nahamourha haggai anai Yairus mono nahataggahai wu lawai
(Mat. 9:18-26; Mrk. 5:21-43)
40Kole ɓana haggai Yesus ta bal hoba ta kota Kapernaum, ata buta ɗahiba wain lagahara, oroge ata buta rema-rema memaɗani Yesus. 41Ɗaan wu ata kangaranai Yairus, nyiyo kapala umma hadau kangote ata Yahudi ta hadau neɗo.#8.41 Umma hadau kangote ata Yahudi, yoɗa hadau bahhaɗage Jurata Lii-Kira Kamema, hadau kangote, hadau lii-hanuwa lii-ha akka mono hadau pohta palakara. Nyi namai kawoʄo ta aronai Yesus, mono nakarai waige ha oha, tannamui Yesus kanamai ta ummana, 42oroge ɓanyi waikina ana lawaina kakabul ɗuɗa dauna matuna, kalawara kamhamate.
Ɓatangranai Yesus kako ta ummanai Yairus, buta ata kaharuꞌha-ruꞌha wikna walta liranai Yesus, mono ta kalii ta kawana. 43Ta jongaɗa ɗaan wu lawai kabul ɗuɗa dau kalawarana, huu hakitage raayo. Nyi naɓeyii tangngad ɗauna ɓana bayarad dotera. Walahingmana wu ak kamaɗan hataggahayi. 44Naɗa lawai naɗahekai Yesus walta lira, manaʄoʄanage lai kalabbe madakka-Na. Neɗa mema raana naɗa lawai nangahwe. 45Yesus nakanukawe, “Iyai kaʄoʄawa Nauwa?”
Oroge ai ɗaa wu ak kamangaak, manahanewei Petrus, “Pa Ama guru, buta takka ata kaharuꞌha-ruꞌhana kilora-Guǃ”
46Malinagei Yesus, “Tabolo ɗaa ɗahingna ata kaʄoʄawa. Nauwag tadawe, oro ɗaage kulha kahuuna wal tabara-Gu.” 47Naɗa lawai walena ingtaꞌma kaɓunyge ɓa nyi kaʄoʄai Yesus. Nyiwe mana kadaddaka ɓana mai kawoʄo ta aronai Yesus. Manahalarawe ta aro tangngaɗa ata ahha mana ʄoʄai Yesus, neɗa mema taggahawe kalawarana oroge ɓana ɓe haʄoʄai Yesus. 48Malinagei Yesus tabarana, “Ana-Gu, oroge yau ɓam hatena tabara-Gu, yaum taggahawu. Ɓatauge haggawu, kamkako waina mouli.”
49Ɓatangrahona hanewei Yesus, amin ata pahalewa walta ummanai Yairus. Malinage tabaranai Yairus, “Marabba, ana lawaimu namateɓe. Ilam hamayillai naɗa ha Ama Gurr.”
50Kolei Yesus ɓana rangewe nna hatakki, malinage tabaranai Yairus, “Ilam madautaka. Hatenaɗaꞌwe, mono anamu enga taggahana.”
51Kole ɓaɗa ɗik ta ummanai Yairus, Yesus walena pahaiꞌmana wu ak ata tama maranga-Ni, dukai Petrus, Yohanis, Yakobus mono inyana amana naɗa lakawa yiɗɗa ɗahe. 52Tangngaɗa ata kaɗaana neɗa hooɗage mono kaɗeha oro matena naɗa lakawa. Tanyiɗuwe Yesus linage, “Ilam hooka. Naɗa lakawa walna mateꞌma, tabolo duraɗaꞌnage!”
53Maɗa malhani Yesus, oroge ɓa baɗa tada waiɗage naɗa lakawa lawai ɓa baɗa mateɓena. 54Maɓeggei Yesus nanaronan limmana naɗa lakawa malinage, “Ana, kaɗewu!” 55Manahaɗu haggawe ngahna naɗa lakawa, mono neɗa mema ɓana kaɗe. Ɓewe neɗo Yesus nahalewai atatuna naɗa lakawa tannam kaɗa yiin hayaana. 56Atatuna naɗa lakawa ɗaɓangara hingna. Tanyiɗuwe Yesus naheridi, ila ɗatakwe nna kaɗaꞌ langɓa tabara iya ɗahingkana.
Seçili Olanlar:
Lukas 8: lmy
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 (Active), Wycliffe Bible Translators, Inc. All rights reserved.