التكوين 15
15
بركة أبرام
مولانا يعطي لأبرام علامة اعلى اخلاڮة اللي لاهي يورثو
1وعاڮب يلين خلڮت هاذي لمور، ڮال الله تعالى لأبرام فحلم: لا تخاف من شي. آنا نحميك وأجرك اكبير عندي. 2وڮال أبرام: يا مولانا يا ربي شنهي اصا فايدة الخير اللي تعطيني. آنا ما نجبر لولاد، واللي لاهي يورثني هو أليعازر اللي من دمشق. 3وڮال املي أبرام: انتا ما اعطيتني لولاد وذا هو لعبد اللي اخلاڮة عندي لاهي يورثني. 4وڮالّو الله تعالى: ذا لعبد ماهو لاهي يورثك. اللي لاهي يورثك لاهي يوخظ من صلبك. 5ووخظ الله تعالى أبرام شور ڮدام خيمتو وڮالّو: خرص السما واعد النجوم إلى ڮديت. وڮالّو الله تعالى: ڮد عدد النجوم لاهي يعود ڮد نسلك. 6وصدق أبرام الله تعالى واعتبر الله تعالى أبرام إنسان صالح.
7وڮالّو: آنا هو الله تعالى اللي جابك من أور الكلدانيين اياك انورثك هاذي لارض . 8وڮال أبرام لله تعالى: ابسيمحالة لاهي نعرف اعلني لاهي نورثها؟ 9وڮالّو الله تعالى: اڮبظلي عجلة وعنز وكبش اعمر كل منهم 3 سنوات. وڮبظلي املي احمامتين. 10وڮبظهم أبرام وشڮهم من الوسط اعلى نصين واجعل كل نص امڮابل النص لوخر، والطيور ما ڮسمهم. 11وإلين ڮامت الطيور لخلة تنزل وتوكل من الجيفة، صاعهم أبرام.
12وإلين الحڮ لمغرب، ارڮد أبرام ارڮاد امتين، وفذا جات اعليه ظلمة امتينة ونخلع. 13وڮالّو الله تعالى: عود متيقن اعلن نسلك لاهي يتغرب فارض ماهي لهم ، ولاهي يستعبدوهم أهلها ويحڮروهم مدة 400 سنة. 14يغير لاهي انخلص لهم من ذاك الشعب اللي أستعبدهم، وعاڮب ذاك لاهي يوخظو بياسر من لأملاك. 15وانتا لاهي اتموت فالعافية وتندفن بشيبة صالحة. 16وهوما لاهي يرجعو هون عاڮب أربع اجيال . بيهلي اثام الأموريين اللي ساكنين هون ما فات عادت ياسرة اياك يعاقبهم الله تعالى اعليها . 17وإلين غربت الشمس وجات الظلمة، اظهر اعمود من الدخان واشهاب من النار واخظين امبين طشات اللحم. 18وفذاك اليوم عدل الله تعالى عهد امع أبرام وڮالّو: لاهي نعطي هاذي لارض لنسلك من نهر مصر إلى نهر لكبير، نهر الفرات، 19ابلاد القينيين والقنزيين والقدمونيين 20والحيثيين والفرزيين والرفائيين 21ولأموريين والكنعانيين والجرجاشيين واليبوسيين.
Seçili Olanlar:
التكوين 15: الحسانية
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/