CAWA'TA TUNITA 11
11
Simdir ma yum Babel
1Hay na'ta sumun hay nagat noŋ kaf vunna visi ma nisi dumna ay kepe, yoboy ma nisi di hiɗi namna ay kepe kaw. 2Nisi yaway hay gal ma kuɗuwn pa, nisi fi liyn ma beɗna hay Sineyar, nisi lak hayam ziya.
3Nisi ka di jar-tuwsiya: Tuɗaygiya, caygi brikŋa, gaygit hiɗi kuta. Brikŋa muɗi mi hiɗiyna visiya, naga ma dirginna muɗi mi zomona ma sliraɓam jaramna may. 4Nisi ka di jar-tuwsi ala: Tuɗaygiya, inaygi hoyok-ziyn ma ŋolla hiɗi simdira, nay ma inim fiyoko ta-ta sinem co kulo dukalawn goŋ'. Nay ma tiyay say goy tiy, kay nay ma mer goy kay yam nagat siɗak-ɗakɗi.
5Bugol kayni Ma-Vatɗina jikay gaa'a kay ɗuw hoyok-ziyna hiɗi gulmunna ma gurona vi sumun ka inimna. 6Ma-Vatɗin di'e: Yo! sum nisin tani jafsi kepe, vunna visi kep lay, van kayni mi tun-cawta visi ɦawa, hini wulin ɗawni, va ma nisi daawa ala nisi min lumu ni, sa ma as telsi kalam may loɗi. 7Nay tuɗaygiya, jikaygi gaa jarsiya, ɓurawsi vunsi goyo, kay a nisi ma hum vun tuwsi loɗi. 8Hay liy namna pa Ma-Vatɗina hinsi mer goy kay nagat pete, nisi hin inda vi simdir namna. 9Nisi yi sem liy namna ala Babel,#11:9 Babel min di ala rigas vunna. kay hay buur namna kayni sum sa ka kay nagat pete Ma-Vatɗina ɓurawsi vunsi goyo, hay liy namna pa kaw nam mer jaf-sumun kaf goy kay nagata.
LABARA VI SEM HIƊI JAFNA VALAMU
10Kayni mi jafna vi Sem: Hay li ma busata vi Sem co kis, nam vuɗ Arpaksad, kayn di ala busat ma' bugol niy ŋol ma de gaa kay nagatna. 11Bugol vu'da vi Arpaksad, Sem li busat kis-vasl lo, nam vuɗ guro-jufayna hiɗi guro-boyna.
12Hay li ma busata vi Arpaksad co dok-ɦidi yam vasl cona, nam vuɗ Selah. 13Bugol vu'da vi Selah, Arpaksad li busat kis-fiɗi hiɗi diram ɦidi, nam vuɗ guro-jufayna hiɗi guro-boyna.
14Hay li ma busata vi Selah co dok-ɦidi, nam vuɗ Heber. 15Bugol vu'da vi Heber, Selah li busat kis-fiɗi hiɗi diram ɦidi, nam vuɗ guro-jufayna hiɗi guro-boyna kaw.
16Hay li ma busata vi Heber co dok-ɦidi yam fiɗi; nam vuɗ Peleg. 17Bugol vu'da vi Peleg, Heber li busat kis-fiɗi hiɗi diram dok-ɦidi lo; nam vuɗ guro-jufayna hiɗi guro-boyna kaw.
18Hay li ma busata vi Peleg co dok-ɦidi, nam vuɗ Rehu. 19Bugol vu'da vi Rehu, Peleg li busat kis-ma' hiɗi diram zleeŋe lo, nam vuɗ guro-jufayna hiɗi guro-boyna kaw.
20Hay li ma busata vi Rehu co dok-ɦidi yam ma cona, nam vuɗ Serug. 21Bugol vu'da vi Serug, Rehu li busat kis-ma' hiɗi diram siɗiya lo; nam vuɗ guro-jufayna hiɗi guro-boyna kaw.
22Hay li ma busata vi Serug co dok-ɦidi cona, nam vuɗ Nakor. 23Bugol vu'da vi Nakor, Serug li busat kis-ma' lo, nam vuɗ guro-jufayna hiɗi guro-boyna kaw.
24Hay li ma busata vi Nakor co dok-ma' yam zleeŋe, nam vuɗ Terak. 25Bugol vu'da vi Terak, Nakor li busat kis hiɗi diram doogo yam zleeŋe lo; nam vuɗ guro-jufayna hiɗi guro-boyna kaw.
26Hay li ma busata vi Terak co dok-siɗiya cona, nam vuɗ Abram, Nakor hiɗi Haran.
LABARA VI TERAK HIƊI ABRAHAM
27Tan kayni mi jafna vi Terak: Terak vuɗ Abram, Nakor hiɗi Haran. Haran vuɗ Lot may. 28May Haran mit jew bulum Terak, nam mit hay nagat ta nam vuɗ haya'ta, kayn di ala Ur hay Kaldee. 29Abram hiɗi Nakor yaw boyo: Cata vi Abram semda va' ala Saray, cata vi Nakor semda va' ala Milka, na' ti goota vi Haran bum Milka hiɗi Yiska. 30Saray na' gediya, tay vuɗ goorɗi. 31Terak vi goora valam Abram hiɗi goor-ŋolona valam Lot goora vi Haran kuɗumu, hiɗi Saray cata vi goora valam Abram kaw, Nagat Ur hay Kaldee nisi hina'a, kay tuɗ hay Nagat Kanaan. Nisi co hay nagat Karan, nisi lak haya' ziya.
32Terak li busat kis-ma' hiɗi diram vasl, nam mit hay nagat Karan.
Seçili Olanlar:
CAWA'TA TUNITA 11: Massana
Vurgu
Paylaş
Kopyala
Önemli anlarınızın tüm cihazlarınıza kaydedilmesini mi istiyorsunuz? Kayıt olun ya da giriş yapın
BIBALDA TA PELDETTA © L'Alliance Biblique du Cameroun, 2001