Southern Zazaki, Cermik - WBT (Luke) Drama

Southern Zazaki, Cermik - WBT (Luke) Non Drama

Rojênda Şabatî, Îsa û telebandê xoya erdan mîyan ra ravêrdê. Telebanê ci qota xelî cikerdê, destandê xo mîyan di piroşnayê ew xeleyê ci werdê. Uja di tayn Ferîsîyan înan rê va: “Çîyo ki Qanûndê Ellay di Roja Şabatî di xirab o, şima yê çi ey kenê?”
Îsay înan rê va: “Winî yo se, şima nêwendo ki Dawidî se kerdo, wexto ki embazandê xoya pîya bi veyşan? Dawid şi Keyedê Ellay zerre ew nano mibarek girot, nano ki bê kahînan kes nêşeno bûro. Hem bixo ê nanî ra werd, hem zî da embazandê xo.” Bahdo Îsay zî înan rê va: “Lajê Însanî wihêrê Rojda Şabatî yo zî, ew O îzin dano na roj di kes şeno çiçî bikero.”


Rojnada Şabatî di, Îsa şi sînagog ew merdiman rê qisey kerdê. Uja di jew mêrdek bi, destê ci teba nêtepiştê. Alîmê Kitaban û Ferîsîyana zî mahney geyrayê ki Îsay neheq kerê. Qandê coy çimê înan tim Îsay sero bî; înan vatê, hele O do Roja Şabatî kesî weş kero, nêkero. Hima Îsay zanay fikrê înan. Ey no mêrdeko ki destê ci nêtepiştê, ey rê va: “Werz pay ew bê vernî!” No mêrdek zî werişt pay ew ame werte di vinderd.
Nafin, Îsay Alîmandê Kitaban û Ferîsîyan rê va: “Ezo şima ra pers kena, Qanûndê Ellay di, Roja Şabatî kes girweyo rind bikero raşt o, yazî xirab bikero raşt o? Ganê jew merdimî bireyno, yazî ê merdimî verado bimiro?” Ey çimê xo heminan sera çarnay ew bahdo nê mêrdekî rê va: “Destê xo derg ki!” Ey zî winî kerd ew destê ci fina bi weş. Nê Alîmê Kitaban û Ferîsîyana hêrsan ra kewtî xo gan ew xo mîyabeyn di qisey kerdê ki hele Îsay rê senî xirabey bikerê.


Ê rojan di, Îsa şîyê jew kerrî ser ki duay bikero. Şewê hetanî destê şefaqî Ellay rê duay kerdê. Roj akewt se, Ey veynda telebeyandê xo, wa bêrê Ey hetek, nînan mîyan ra xo rê diwês merdimî weçînay ew înan rê va: “Şima wekîlê min ê.” Nameyê nînan wuna bî: Sîmono ki Îsay name na pa, va Petrûs, ew birayê ey Andreas, Yaqûb, Yûhanna, Filîpos, Bartolomeyos, Metta, Toma, lajê Alfayosî Yaqûb, Sîmono ki leqabê ci Welat-Heskerdox o, lajê Yaqûbî Yawuda ew Yawuda Îsqaryot, oyo ki bahdo Îsay rê bêbextey keno.


Îsa wekîlandê xoya pîya kerre ra ame war. Cayêndo duz di, xeylê telebeyê ci arêbîyaybî pêser, ew bê nînan heme cadê Yawudîye ra, Yeruşalîm ra ew çorşmedê dengizî ra zî sûkandê Sûr û Sayda ra, bol merdimî ameybî uja. Ê qayilî bî goştareya Îsay bikerê ew O nêweşîna înan weş kero. Merdimê ki cinî kewtîbî, Îsay ê zî cinan ra reynay. Şêligî pêroy qeyret kerdê ki destê xo Îsaya nê, çiki Ey ra quwet vijyayê ew Ey nê pêro kerdê weş.


Îsay çimê xo teleban sera çarnay û wuna va:

“Werrekê şima, ey feqîrî,
Çiki Hukumdareya Ellay, ê şima ya.
Werrekê şima, êyê ki nika veyşanî yê,
Ella do şima mird kero.
Werrekê şima zî, êyê ki nika bermenê,
Şima do nezdi ra bihuwê.
Werrekê şima, çimhal ki merdiman qandê Lajdê Însanî şima ra hes nêkerdê
Ew şima xo mîyabeyn ra qewirnayê,
Şima xo ra cêr dîyê ew nameyê şima xirab vatê,
Wexta werrekê şima!
Roja ki nê girwey wuna bî, kêf ra xo tilo kerê,
Çiki Ellay hetek di xelata şima gird a.
Xora kalikanê înan zî pêxemberan rê winî xirabîn kerdê.

“Hima, wax şima, zengînan rê,
Çiki şima xora kêfê xo kerdê.
Wax şima rê, êyê ki nika mirdî yê,
Şima do veyşan bimanê.
Wax şima rê, êyê ki nika huwenê,
Çiki şima do bibermê ew binalê.
Wax zî şima rê, wexto ki merdiman hemin wesbê şima day.
Çiki kalikanê înan zî pêxemberandê zûrayan rê wuna kerdê.”


“Êyê ki goştareya mi kenê, ezo şima rê vana: Dişmenandê xo ra hes bikerê, êyê ki şima ra hes nêkenê, înan rê hewlîn bikerê. Êyê ki şima rê nehlet kenê, şima înan rê duayê bereketî bikerê ew kam ki şima rê xirabey keno, înan hemin rê duay bikerê. Wexta ki jewerî sîla dê to ro, guma xoya bîn zî hetê cîya ki. Çimhal ki jewerî çakêtê to girot, wexta qolika xo zî bidi ci. Kam to ra çîyê wazeno, ey bidi ci, ew kam to ra çîyê gêno, ey peyser mewaz. Şima qandê xo merdiman ra çiçî pawenê se, şima zî merdiman rê ey bikerê.
“Eki êyê ki şima ra hes kenê, şima zî înan tenya ra hes bikerê se, şima yê çi hewlîn Ellay ra pawenê? Xora gunakarî zî embazandê xo tenya ra hes kenê. Eki şima ê merdimîyê ki şima rê rindey kenê, înan rê rindey bikerê se, şima do çiçî qezenc kerê? Xora gunakarî zî winî kenê. Eki şima yê tebayê danê kesî se, şima zanê ki şima do hetanî quruşdê ci ey peyser bigîrê, şima yê Ellay ra çi hewlîn pawenê? Xora gunakarî zî pêjewbînandê xo rê winî kenê. Hima şima dişmenandê xo ra hes bikerê, înan rê hewlîn bikerê, ew şima tebayê danê kesî, ey peyser mepawê! Wexta xelata şima do gird bo, şima do qeçê Ellay bê, O ki heme çî sera yo. Çiki zerrîya ci merdimandê nankoran û xiraban rê zî veşena. Zeki Pîyê şima rehmanî yo, şima zî rehmanî bê!”


“Jewnay mahkûm mekerê ki Ella zî şima mahkûm nêkero. Şima kesî rê lome mekerê ki şima rê zî lome nêbo. Ef kerê ki şima zî ef bê. Bidê ki şima rê bideyo; ew pey olçîdo pirra, rind piloxnaye, ser di şîyaye do bideyo şima. Şima kamcî olçîya bidê se, do şima rê zî eynî olçîya bideyo.”


Îsay înan rê na mesel zî va: “Jew merdimo kor nêşeno jewna korî rê ray bimisno, eki winî bikero se, wirna pîya gunenê çal ro. Jew telebe zî mehlîmdê xo sera nîyo, ew çend bimiso zî, çimhal ki heme çî misa zî, o do zeydê mehlîmdê xoya bo.
“Senî beno ki, tî yê qirşo ki birardê to çim di, tî yê ey vînenê, hima çuweyo ki to çim di, tî yê ey nêvînenê? Ti senî birardê xo rê vanê: ‘Bê tîya, ez ê qirşî to çim ra veja!’ Hima no çuweyo ki to çim di, tî yê qe ey nêvînenê? Ti dirî yê! Çuweyo ki to çim di, ti ey verî vej, wexta ti şenê rind bivînê ew birardê xo çim ra ê qirşî vejê.”


“Dara rind mexelo xirab nêdana ew dara xirab zî mexelo rind nêdana. Dara rind kes mexeldê ci ra silasneno. Kes nêşeno ki telîyan ra encîlî cikero ew percînan ra zî engûr arêdo. Merdimo rind girweyê rindî keno, çiki zerrîda ey di rindey esta. Hima merdimo xirab girweyê xirabî keno, çiki zerrîda ey di xirabey esta. Zerrîda kesî di çiçî esto, fekdê kesî ra o vijyeno.”


“Şima yê çiçî rê mi rê vanê ‘Rebbî, ya Rebbî’, hima senî ezo şima rê vana, şima yê winî nêkenê. Kam ki ame mi hetek, qiseyê mi aşnawitî ew goştareya qisandê mi kerd se, ez şima rê vaja, o merdim kamî maneno? O jewo ki keno ban virazo, o hîmê banî rind xori keneno ew banî ey sero virazeno. Winî ki sêl yeno zî, nêşeno ki nê banî ca ra biluno, çiki hîmê ci cado pêt di viraştbi. Naqor merdimo ki qiseyê mi aşnawitê, hima goştareya qisandê mi nêkerdo, o merdim zî ey maneno: Jewo ki ban virazeno, hima bano bêhîm beno ew winî ey erdî sero virazeno, ey maneno. Wexto ki sêl yeno, o banê ci damiş nêbeno, jû find' herunda xo di rijyeno ew beno xirabe.”

Слухайте Lûqa 6