Bible text: Luvale © Bible Society of Zambia, 2017 www.biblesociety-zambia.org/ Recording of the New Testament ℗ Hosanna, 2022

Luvale - 2017 BSZ (NT) Drama

Kufuma haze, Yesu ayile musali yachijiva chaNgalileya, chikiko chijiva cha Chivelya .
Kaha lizavu lyavatu lyalinene lyapwile nakumukavangiza, mwomwo vamwene vinjikizo vize apwile nakulinga hali vaka-kuviza.
Yesu akandukile hapili, kaha atwamine nakunoka haze natumbaji twenyi.
Jino likumbi lyachiwanyino chaKuzomboka chavaYuleya, lyapwile nakupandama hakamwihi.
Kaha Yesu hakwandula meso enyi, amwene lizavu lyavatu lyalinene lili nakwiza kuli Ikiye. Ahulishile Fwilipu ngwenyi, Kulihi natulanjila jimbolo mangana valyenga?
Amuhulishile ngocho nakumweseka, mwomwo Ivene atachikijile omu ambile kulinga.
Fwilipu amukumbulwile ngwenyi, Chipwe tumbolo twakulanda na jindenali makulukaji avali (200) katweshi kutamoko numba mutu himutu atambuleko kamwe.
Kambaji kenyi umwe, Andelei, ndumbwaShimona Petulu, amwambile ngwenyi,
Kuli kanyike walunga kuno ali natumbolo twa mbali tutanu natuishi tuvali, oloze evi navavizuka ava vavavulu ngana?
Yesu ambile ngwenyi, Lwezenu vatu vatwame. Jino kuze kwapwile mwila wauvulu. Ngocho vatwamine. Kuvula chamalunga kaha chapwile kafwe makombakaji atanu (5,000).
Kaha Yesu atambwile tuze tumbolo, kaha hakukumisa kusakwilila, avapangililile vaze vatwamine — natuze tuishi nawa mwomumwe kutesa nomu vasakilile.
Kaha omu vekuchile, alwezele tumbaji twenyi ngwenyi, Mbatenu vihanda vinasaleho nakuvilama, kuchina navilyenyeka.
Shikaho kutuze tumbolo twa mbali tutanu válile, vambachile vihanda vyasalileho nakuvilamina mujimbángo likumi najivali játò-o.
Omu vaze vatu vamwene chize chinjikizo álingile, vambile ngwavo, Mwamuchano vene, Ou Ikiye uze Kapolofweto vamba ngwavo mweza hano hakaye.
Jino Yesu hakutachikiza ngwenyi vanambe kwiza nakumukwata nangolo vamulingise kupwa Mwangana, afumineko nakuya cheka kupili kwauka wenyi.


Hakulauka chalikumbi, tumbaji twenyi vashikumukile kuchijiva
nakwingila muwato, vazauke chijiva nakuya ku Kapelenau . Jino kwapwile milima, kaha Yesu apwile kanda ahete kuli vakiko.
Chijiva chapwile namakimba chikuma mwomwo peho yayinene yapwile nakuhuhwa.
Jino, omu vavuwile kafwe jikilomita jitanu chipwe jitanu nayimwe, vamwene Yesu ali nakutambuka hameya hachijiva nakupandama kuwato, kaha vevwile woma.
Oloze avambile ngwenyi, YAMI NGWAPWA, kanda namwivwa womako.
Kaha, vamutambwile muwato nakuwahilila, kaha hahaze vene kukasumuka wato uli kutunda kuze vapwile nakuya.
Omu kwachele, lize lizavu lyasalile musali yachijiva vamwene ngwavo kuze kwapwanga wato umwe kaha, kaha nawa Yesu kengilanga muwato kana natumbaji twenyi hamweko, tumbaji vayanga uka wavo kaha.
(Oloze kuChivelya hinakufuma mato eka amandende nakuheta hakamwihi nahaze válililile jize mbolo ásakwililile Mwata.)
Shikaho, lize lizavu hakumona ngwavo Yesu natumbaji twenyi kaveshi kuzeko, vengilile mumato aze nakuya ku Kapelenau nakutonda Yesu.

Hakumuwana musali yachijiva, hinavamuhulisa ngwavo, Ove Lapi , lwola muka wezanga kuno?
Yesu avakumbulwile ngwenyi, Mwamuchano vene nangumilweza ngwami, Kamweshi nakungutonda hakumona vinjikizoko, oloze hakwikuta jize mbolo mwalyanga.
Kanda namukilikichila kulya echi cheji kulyenyekangako, shina kulya kana chakutwalililaho nakuhana mwono wázeneka kukuma, echi mwamihana Mwanamutu, mwomwo Ikiye vanahake katachikijilo kuli Ise Kalunga.
Kaha vamuhulishile ngwavo, Tulinge muka numba tuzatenga milimo yaKalunga?
Yesu avakumbulwile ngwenyi, Mulimo waKalunga ukiko kufwelela Ou átuma.
Jino vamuhulishile ngwavo, Kaha chinjikizo muka naulinga mangana tuchimone tukufwelele? Nauzata mulimo muka?
Vakakuluka jetu valile mana mupambo, nge muze vasoneka ngwavo,
Avahanyine mbolo yakufuma mwilu valyenga.
Yesu avambile ngwenyi, Mwamuchano vene nangumilweza ngwami, Kapwile Mose ámihanyine mbolo yakufuma mwiluko, oloze Tata amihana Mbolo yamuchano yakufuma mwilu.
Mwomwo Mbolo yaKalunga Ikiye Ou afuma mwilu ahana vaka-kaye mwono.
Hinavamwamba ngwavo, Ove Mwata, tuhanenga lika Mbolo kana.
Yesu avambile ngwenyi, Ami yami Mbolo yamwono. Ou mweza kuli Ami keshi kukevwa zalako, kaha ou mwangufwelela Ami keshi kukevwa cheka lipwilako.
Oloze ngwamyambile ngwami, Munangumono, chipwe ngocho kamwafwelelako.
Veshovo mwanguhana Tata naveza kuli Ami, kaha ou mweza kuli Ami kangweshi kukamuhangako.
Mwomwo ngunafumu mwilu, keshi mangana ngulinge mwaya muchima wamiko, shina mwaya muchima waUze angutuma.
Kaha mwaya muchima waUze angutuma mukiko omu ngwenyi, nguzeneke kujimbalisa chipwe umwe kuli vosena vaze anguhana, oloze ngukavasangule halikumbi lyakukuminyina.
Mwomwo mwaya muchima waTata mukiko omu ngwenyi, weshowo mwamona Mwanenyi nakumufwelela mwapwa namwono wázeneka kukuma, kaha Ami nangukamusangula halikumbi lyakukuminyina.
Shikaho vaYuleya vamutatwokesele mwomwo ambile ngwenyi, Ami yami Mbolo yafumine mwilu.
Vambile ngwavo, Kumana Ou keshi Yesu mwanaYosefweko? Ise nanaye twavejiva. Nyi oholili mwatulweza ngachilihi ngwenyi, Ngunafumu mwilu?
Yesu avakumbulwile ngwenyi, Kanda namulitatwokesa enu vaveneko.
Naumwe mwahasa kulijila kuli Ami wauchi, kuvanga Tata Uze ángutuma amukoke, kaha Ami nangukamusangula halikumbi lyakukuminyina.
Vasoneka kuli vapolofweto ngwavo,
Kaha vosena navakapwanga vavanangula lyehi kuli Kalunga.
Wose nevu Tata nakunanguka, mweza kuli Ami.
Keshi nge kuli umwe amona lyehi Tatako, kuvanga Ou kaha afuma kuli Kalunga, Ikiye amona Tata.
Mwamuchano vene nangumilweza ngwami, Ou mwafwelela ali namwono wázeneka kukuma.
Ami yami Mbolo yamwono.
Vakakuluka jenu valile mana mupambo, kaha vafwile.
Eyi yikiko Mbolo yakufuma mwilu, mangana wose mwalyako, azeneke kufwa.
Ami yami Mbolo yakuyoya yafuma mwilu. Wose mwalya kuMbolo yino mwayoyanga kujingonde jázeneka kukuma. Kaha Mbolo nanguhana Ami mangana vaka-kaye vapwenga namwono, yikiko nyama yami.
Ngocho vaYuleya valikokojwesele ngwavo, Ou Mutu mwahasa ngachilihi kutuhana nyama yenyi tuyilye?
Shikaho Yesu avambile ngwenyi, Mwamuchano vene nangumilweza ngwami, Kuvanga mulyenga nyama yaMwanamutu nakunwa manyinga enyi, nge chiku kamweshi kupwa namwonoko.
Ou mwalya nyama yami nakunwa manyinga ami ali namwono wázeneka kukuma, kaha Ami nangukamusangula halikumbi lyakukuminyina.
Mwomwo nyama yami yikiko kulya chivene, kaha manyinga ami akiko kunwa chivene.
Ou eji kulyanga nyama yami nakunwanga manyinga ami, atwama muli Ami, Ami nawa muli ikiye.
Ngana omu nangutumu Tata Ou ayoya, kaha Ami ngwayoyela muli Tata, ngocho ou mwangulya Ami, naikiye nawa mwayoyelanga muli Ami.
Eyi yikiko Mbolo yafuma mwilu, keshi nge yize valile vakakuluka numba kutwala muze hikufwako. Ou mwalya Mbolo yino mwayoyanga nakujingonde jázeneka kukuma.
Ahanjikile mazu awa mu sunangonga , omu apwile nakunangula ku Kapelenau .

Jino tumbaji twenyi vavavulu hakuchivwa hinavamba ngwavo, Mazu awa nahanjika amakalu, iyaze mwahasa kuwevwilila?
Oloze Yesu hakutachikiza mumuchima wenyi ngwenyi tumbaji twenyi vali nakutatwoka hachuma kana, avahulishile ngwenyi, Echi chinamifutwisa tahi?
Nyi nge namumona Mwanamutu mwakanduka nakuhiluka mwilu muze apwilenga?
Shipilitu Ikiye Muka-kuyoyesa, chisemwa chamujimba kachawahisako. Awa mazu ngunahanjika Ami kuli enu, akiko shipilitu, akiko mwono.
Oloze mukachi kenu muli vamwe vazeneka kufwelela. (Mwomwo kufuma kukuputuka Yesu atachikijile vaze vazenekele kufwelela, nauze mwakamuhana kumavoko avaka-kole.)
Kaha avambile ngwenyi, Hoho vene ngwamilwezelanga ngwami, Naumwe wauchi mwahasa kulijila kuli Ami, kuvanga vanamuhanecho kuli Tata.
Hoho vene tumbaji twenyi vavavulu vahilukile, kaha kavatambukilenga nenyi chekako.
Shikaho Yesu avahulishile vaze likumi navavali (12) ngwenyi, Nayenu nawa namusaka kuya tahi?
Shimona Petulu amukumbulwile ngwenyi, Ove Mwata, natuya kuli iya? Ove uli namazu amwono wázeneka kukuma,
kaha etu tunafwelela nakutachikiza chikupu ngwetu, Yove Wajila waKalunga.
Yesu avakumbulwile ngwenyi, Kumana Ami kangwamisakwile enu likumi navavaliko (12)? Oloze minenu umwe napu liyavolo.
Avulukile Yuta mwanaShimona Isakalyote, umwe wavaze likumi navavali (12), uze mwasaka kumuhana kumavoko avaka-kole.

Слухайте Yowano 6