Muria, Far Western: Muria Far Western (NT)

Muria Far Western

अव दियांग बपतिस्मा हेवाल युहन्नाल वास यहुदियाता वारु पल्लातिगा वेहिला लागतुर, “स्वरग राज्य हेरे अवता इन्जोर पस्तेमाम्ट” इदाम वेहतुर।
“वारु पल्लातिगा वरोर पकाय जोरदे इदाम वेहान्तोर,
‘प्रबुना हरि तयार किम्ट, ओना सळाकिंग सिदो किम्ट’ ”
इदाम परमेस्वरतोर पोल्लो वेहवाल यशायाह वेहतोर येर ओरे आन्दुर। युहन्नान हुटकना कल्कने बनेहकितांग सन्दरांग अनि ओना नळितिगा तोलाता पट्टा दोहच मतोर; ओना जेवन तिन्दाना योग्य मता पतेंग अनि केळाता काळाल निय मता। असके येरुसलेम सहेरतोरक अनि सबोय यहुदिया प्रदेशतोरक अनि यरदन नदिता हेरे-गुरेटा सबोय नाटेनोर लोकुरक पसियस ओना हेरे वातुरक। ओरक आप-आपुना पापतुन मानेमास यरदन नदितिगा ओनाकेडाल बपतिस्मा येतितुरक।
पकाय परीसि लोकुरक अनि सदुकिया लोकुरक बपतिस्मा साटि आपुना हेरे वायानपा हुळतुर असके युहन्नाल ओरकुन इतुर, “हे नांग तरासतोरक पिलांग, परमेस्वरना वायवाल मन्ता पकाय होंगताल विताट इन्जोर मिकुन बोर चेतेह कितुर? निमाट खरोय पस्तेमास अदेना योग्य जिवन जिवेमाम्ट। अनि ‘मावोर बाबो अब्रहाम आन्दुर’ इदाम आप-आपुना मन्दिगा विचार किस घमन्ड केमाट बाक्याकि इव कल्कनिगाडाल वने परमेस्वरिन अब्रहाम साटि बालक उपजेह किया परान्तोर इन्जोर नना मिकुन इन्तोना। इदेकेय मरस मराकनांग बुडुमदिगा इरता मन्ता, सोबाय कायांग हादोंग ओव सबोय मराकुन कदियस किसतिगा हरचानुर। नना मिकुन एरते पस्तेमायाना बपतिस्मा हिन्तोना, मति नावा पजा वायवाल मन्तोर ओर नावाताल लाववाले मन्तोर, ओना हरपुह ताहानाता नना योग्य हिलेन। ओर मिकुन पवित्र आत्माते अनि किसते बपतिस्मा हियानुर। गोहक साप कियाना हेति ओना कयदे मन्ता, अनि ओर आपुना कळातुन सोबाय रितिते साप कियानुर, अनि आपुना गोहकुन टोलितिगा निहानुर मति भुसातुन बसकेय पियो आयार ओद किसतिगा पोतहानुर।”


ओदबेरा येसु गलील प्रदेशताल यरदन नदिता टकातिगा युहन्नाना हेरे बपतिस्मा येतिला वातुर। मति युहन्नाल ते ओन रोमिहला लागतुर: “निया कयदे बपतिस्मा येताना नाकुन जरुरि मन्ता मति निमा नावा हेरे वातोन बहे?” इन्जोर इतुर। येसु ओन “इदेक इदामे आयिला हिम, बाक्याकि माकुन इदे रितिते परमेस्वरना मुने येताना योग्य मन्ता सबोय पोल्लोंग पुरा कियाना सोबाय मन्ता” इन्जोर उत्तर हितुर, असके युहन्नाल ओना पोल्लो मानेमातुर। अनि येसु बपतिस्मा येतस सान्डेय एरतिगाडाल पोरो वातुर असके आबार तरियतु अनि परमेस्वरना आत्मा परेवा लेहका रयस आपुना पोरो वायानपा येसु हुळतुर। “येर नावोर मयातोर मरि आन्दुर, ओनाताल नना पकाय गिरदा मन्तोना” इन्जोर स्वरगताल उन्दि लेंग आत।

Слухайте मत्ति 3