Korwa - WBT (NT) Non Drama

Korwa - WBT (NT) Drama

हरदोस, राजाय दोहोन मेला, एहूदिया छतरराः बेतलहेम सहररे ईसू जनमावनेना। दो तोनोंग दिन तयोमरे एहूदिया छतरराः पुरुब होराः देस अते एरुसलेम सहररे तोनोंग तोनोंग कनहूनदारकू सेनेडा। हँकू हंडा सोदोरनेनखनकू होंबोरतेड, “एहूदाकूरीग राजा करेय जनमावकिया? अले हाँयरीग इपील सेरमोरेले ञेलतिरिया अरू हाँय सलामगेय लगाले वेगकिया।”
नाःआ कता हरदोस राजा अरू एरुसलेमरिकुःआ होड़कू अयूमतेड दो हँकूराः जीव मुरुक बोरोयान। हनते हाँयग हरदोस राजा, जमा मरंग पुजउरीकू अरू भगवानराः नियम चेडदार होड़कूय एचे जुमावतेडकुःआ अरू हँकू एचेरेय होंबोरतेरा, “मसीराः जनम करे होयाःता?” दो हँकू हाँय एचेरेकू कतातेड, “एहूदिया छतरराः बेतलहेम सहररे होयाःता। भगवानराः बड़रा कतायीग होड़ नाःआ इयाय ओजाःतेरा;
एहूदिया छतरराः बेतलहेम सहररिकुःआ होड़कू,
अपे अते मी होड़ मनारंग राजाय बड़ाँःता,
अरू हाँय ईंगरिकुःआ इसराएल होड़कूय अगुवाइवाकूता।
हनालगा अपेराः सहर एहूदिया छतरराः एटाः सहरकून अते मरंगकू ओंगलेता।”
हनते हरदोस राजा हँकुःआ कनहूनदारकू कलेकाले राःतेडकुःआ अरू हँकू एचेरेय होंबोरतेरा, “इपील तुमीसपे ञेलतिरिया?” हनते हाँय हँकू, बेतलहेम सहर अगी नाःआ इया कतावातेडकूखने वारगोतेडकू, “अपे नपायते डेंबापे ञाम अरू हाँयराः सरवन ईंग एचेरेपे उदुःगे, जेमहा ईंग हों सेनेकियानखन हाँयिंग सलाम अवे।”
हँकू हरदोस राजाराः कता अयूमतेडखनकू सेनेडा। अरू सेनेन सेन मेला हँकू मड़ंगकू ञेलतिरिया हाँयग इपील सेरमोरे हँकू मड़ंग मड़ंगे सेना। हाँयग डेंबा दोहोना हना ततेररेकू सोदोरयान दो हाँयग इपील रोंकावयान। इपील रोंकावयान दो कनहूनदारकू मुरुक बडेतेकू बहालयान।
हनते हँकू ओड़ाःरेकू बोलोयान अरू हाँयग लँइग, एंगात मरियम सुदाकू ञेलतिरिया अरू हँकू ईसू मड़ंगरे उकुड़ोमनेनखनकू सलामतिरिया। हनते हँकू बकसाकून गीगतेडखन सोना, लसा अरू गंदरस हाँय लगाकू दहिनतेरा।
दो सेरमो देसरीग बराहील हँकू एचेरे सपनारे सेतावतेडकूखने कताया, अपे हरदोस राजा एचेरे अलोपे कुदा सेन, माःआन। हनालगा हँकू एटाः दूरते अँकूराः देसकू कुदा सेनेडा।

हँकुःआ कनहूनदारकू कुदायान, हना तयोमरे परबू भगवानरीग बराहील सपनारे उसूप एचेरे सेनेडखने कताया, “रिमुःमे, लँइग अरू एंगात गोःकेडखन मिसिरी देस अगीम ञीर। हरदोस राजा लँइग ञेड गोजेय लगाय ओंगलेतना। हनालगा ईंग आम एचेरेयिंग कतायता हना बेला वरी हंडाम दोहोन।” दो हाँय रेमनेनखन रनइत रइतरे लँइग अरू एंगात सुदा मिसिरी देसकू ञीरयान। अरू हँकू हरदोस अरीने गुजुः वरी हंडाकू दोहोना। नाःआ कता भगवानराः बड़रा कता होड़राः कता इया होयानेना,
“मिसिरी देस अते ईंगरीग बेटायिंग राःकेरा।”
तयोमरे हरदोस राजा सुदीगोतेडे, “हँकुःआ कनहूनदार होड़कू ईंगकू अडिगकेरा।” दो हरदोस राजा मुरुके रीसनेन अरू हाँय आँयगरिकुःआ होड़कू बेतलेहेमरेय वारगोतेडकू। हाँय कनहूनदारकू अतेय सुदीतेरा हना बेला इया बेतलहेम सहररिकुःआ बार बरिस अते हुडिंग हुडिंग जमा हेरेल होनकूय एचे ञेड एंडा गोतेडकू। दो नाःआ कता भगवानराः बड़रा कतायीग होड़ इरमिया कतातेरा हनन इया होयानेना,
“रामाह सहर अते अरोकू अयूमतेरा,
इयाम अरू मुरुक फिकीरराः अरो,
राहेल आँयगरिकुःआ लइंकू लगाय इयामाः।
हँकुःआ लइंकू गोएगयान।
हनालगा तोनोंगीग हाँय मेरकू कता बहाल अवेगडीग।”
तोनोंग बरिस तयोमरे हरदोस राजा गोएगनेना। हनते परबू भगवानरीग बराहील मिसिरी देसरे उसूप एचेरे मीटोंग सपनारेय कतातेरा, “ने उसूप, डेंबा एचे ञेड एंडागेय लगाकू ओंगलेःआ, हँकू दो गोएगयनाकू। हनालगा आम रिमुःमे अरू लँइग अरू एंगात सुदा इसराएल देसरेम कुदा सेन।”
दो उसूप रेमनेन अरू डेंबा अरू एंगात सुदा इसराएल देस तोराकू। अरकिलाउस आँयगरीग अपात हरदोस राजाराः बदलारे एहूदिया छतररे राइजगेतना, माःआन उसूप अयूमतेरा। दो हाँय एहूदिया छतर सेन लगाय बोरा। एटाः सपनारे भगवान हाँये सेतावतेरा दो, हाँय गलील छतर अगीय सेनेडा। हनते हाँय नसरत सहररेय सेनेडखन हंडाय बसावनेना। मड़ंगरे भगवानराः बड़रा कता होड़कू कतातेरा,
“हाँय नसरतरीग होड़ माःआनकू कतावायता,”
हनन इया नाःआ होयाकिया।

Слухайте मती 2