If you would like a copy of this version please contact info@davaraudiobibles.org

Lhomi New Testament

हुनी येशु च्‍येल्‍ल यरुशलेम्‍नी फरीसी धङ् छ्‌यो़डीम्‍गी चयेलम यरी युङ्‌न हुबे खोङ्‌ल नीज्‍यरङ्‌गी ॱलोप्‍टुक् हुबे लक्‍पल ठी़ मत् ज्‍यबल सम सगुक् न। घन्‍डल पुबु ॱमुमी़ टोल ॱमीत् ॱसम्‍गेन् बेक्‍क? सीन्‍न झ्‍यीब बेत्।
हीगी लेल्‍ल येशुगी खीत्‍रङ्‌सो़ पुबु ॱमुमी़ टो दी ॱसम्‍बे ढीक्‍ल को़न्‍ज्‍योक्‍की छ्‌यो़डीम्‍गी कल ङीन अक्, खीत्‍रङ्‌गी हुगी टो दीरङ् ज्‍यीक्‍पा ॱसम्‍गेन् बेत्। ॱनी को़न्‍ज्‍योक्‍की कगो़त्‍ल थो़ङ्‌गेन् बेत्।
फमल खुच्‍च्‍य झ्‍यीज्‍यीत्। ॱनी ॱसी़ फमल तम् ङेम्‍ब लप्‍कुक्‍क हुगो ॱसो़त् गोगेन् बेत् सीर यो़क्‍केन् बेत्।
ॱनी हीन्‍न अक्, खीत्‍रङ्‌गी टोल हीन्‍दुक् झ्‍यीक्‍केन् बेत्। मी ॱसी़ रोरङ् च्‍याल रोरङ्‌गी फम घन्‍डे गो़बे खोज्‍येत् लीन्‍दु युङ्‌गुक्‍क हुल भु दीगी हीगो टो़त् ॱमीत् छुबेत्। हीगो ङे को़न्‍ज्‍योक्‍ल पुज्‍येल ॱमीन स्‍यक्‍पे च्‍यम्‍बे हीन् सीन्‍न सीक्‍केन् बेत्। हुन्‍दुक् झ्‍यीन फमल झ्‍यीत् गोगेङ्‌गी खुच्‍च्‍य दी खीत्‍रङ्‌गी झ्‍यीत् मीत् गो़बल सोगेन् बेत्। हुन्‍दुक् झ्‍यीन खीत्‍रङ्‌गी टो घयेक्‍की को़न्‍ज्‍योक्‍की ॱसुङ्‌रप्‍की क हुगो मीप्‍पल सोगेन् बेत्। खीत्‍रङ् छ्‌यीलेल नङ् मत् लेबे मी घयेत्‍ल डीक्‍पे केच्‍च्‍य यशैयागी ॱङो़स्‍स्‍यील थो़ङ्‌गेन् बेत्।
हीगी मी घयेत् हीबे ख दीगीरङ् ङल तो़प्‍प झ्‍यीक्‍केन् बेत्। ॱसीम् दी ङ ङो़ल मीप्‍प बेत्। हीबे ङल छ्‌यक् छ्‌यो़प्‍प पुब हुगो घो ॱमीत् छ्‌यो़त् बेत्। हीबे मी स्‍यङे क घयेक्‍की ढीक्‍ल मेन्‍द, ॱमीत् ॱस्‍यो़क्‍केन् बेत् सीन्‍न को़न्‍ज्‍योक्‍की ॱसुङ्‌न यो़क्‍केन् बेत्।

हीनी येशुगी मी ॱयोङ्‌म घयेत् दी इक् रोरङ्‌गी लोल भो़न खोङ्‌गी हुब घयेत्‍ल खीत्‍रङ् घयेत् हीगो नेन्‍न ॱह घोव झ्‍यीज्‍यीत्। मी खनी मल्‍ल घन्‍ड स्‍युन अक्, हुगी मील ढीप्‍लङ् मीत् युङ्‌गेन् बेत्। मी खनी घन्‍ड थो़ङ्‌गो़दङ् हुगी रोरङ् ढीप्‍च्‍येल्‍ल सोगेन् बेत् सीन्‍न ॱसुङ बेत्।
हुनी ॱलोप्‍टुक् दीबे खोङ्‌ल नीज्‍यरङ्‌गी ॱस्‍येप्‍पे तम् घयेत् फरीसी घयेक्‍की ॱह घोन खोङ्‌डोक् झ्‍यीगुक्। हीगो नीज्‍यरङ्‌ल ॱस्‍यो़च्‍च्‍ये मीप्‍प ॱनी? झ्‍यीब बेत्। हीगी लेल्‍ल खोङ्‌गी तेङ् यी़न स्‍युगेन् ङे यप्‍की ॱमत् चुबल कीन युङे ढङ् घयेत् चवनी पीक्‍न पुर्केन् बेत्। हुब घयेत्‍तङ् भीन दो़च्‍च्‍यीत्। हुब घयेत् लम्‍बा स्‍यर्च्‍योक् बेत्। ॱनी स्‍यर्च्‍योक् च्‍यीक्‍की स्‍यर्च्‍योक् च्‍यीक्‍रङ् लक्‍टी़त् तप्‍न ठीक्‍न ॱनी, हुब ॱङीक्‍कर् जरोक्‍ल जक्‍केन् हीन्‍डो न ॱनी झ्‍यीब बेत्।
ॱनी पत्रुस्‍की खोङ्‌ल ङीत्‍ल ॱलीङ्‌दम् हुगी धो़न् दी ॱस्‍यो़प्‍प ॱनङ् झ्‍यीब बेत्। हीगी लेल्‍ल खोङ्‌गी खीक्‍की इक् हुन्‍दो हीगो ॱह घोमोङ ॱनी? खनी मल्‍ल घन्‍ड स्‍युक्‍को़दङ् हुगो ढोप्‍पल डोगेन् बेत्। हुनी आक्‍पल थो़न् डोगेन् बेत्। हीगो ॱस्‍यो़च्‍च्‍ये मीप्‍प ॱनी? खनी घन्‍ड थो़ङ्‌गो़दङ् हुगो ॱसीम्‍बे नङ्‌नी युङ्‌गेन् बेत्। ॱनी मील ढीप्‍लङ् दी हस्‍सो़त् हुगी युङ्‌गेन् बेत्। ॱसीम्‍बे नङ्‌नी ॱसम्‍ल ङेम्‍ब तोङ्‌गेन्, मी ॱसो़क्‍केन्, ॱयोङ्‌दङ् ङीब झ्‍यीक्‍केन्, दयम् झ्‍यीक्‍केन्, की़न्‍नक् कुगेन्, पङ्‌बु झ्‍यीप्‍पे यङ्‌ल ॱएलम ज्‍यक्‍केन् धङ् ॱमो़म्‍बी़त् तोङ्‌गेन् हीन्‍दुक् झ्‍यीबे ढङ् थो़ङ्‌गेन् बेत्। ॱनी मील ढीप्‍लङ् दी हस्‍सो़त् हुन्‍दुक् झ्‍यीब घयेक्‍की युङ्‌गेन् बेत्। लक्‍पल ठी़ मत् ज्‍यबल सम सेबल ढीप्‍लङ् मीत् युङ्‌गेन् बेत्।

येशुसो हुनी थो़न्‍नी टायर् धङ् सीदोन् सार्की लुङ्‌बल फीम्‍ब बेत्। ॱनी हुदु येशु च्‍येल्‍ल हुगी लुङ्‌बदु दो़क्‍केन्, कनानीगी भुमु ढोङ्‌गी आम च्‍यीक् युङ्‌न हुगी खोङ्‌ल ॱवे दाऊद्‌गी ज्‍यी़त्, चोव ज्‍यीन्‍दक् ङल ॱङीङ्‌ज्‍यी जेत्‍रो ॱनङ्। ङे भुमुल ॱनो़प्‍प अयेक्‍प स्‍यीन्‍न यो़त्। ॱनी हुगो आक्‍सी ॱनो़क्‍कुक् सीन्‍न केत् ज्‍यब बेत्। येशुगी हुल घन्‍डे लेम्‍बु उक् ॱमत् ॱलोक्‍पल ॱलोप्‍टुक् दीबे खोङ्‌ल हुगी ढोङ्‌गी आम हुगो हज्‍यरङ्‌गी तीङ्‌ल केत् ज्‍यप्‍न युङ्‌गुक्। हुगो ॱलोक्‍न तोङ्‌रो झ्‍यी सीन्‍न झ्‍यीब बेत्। हीगी लेल्‍ल खोङ्‌गी ङ इस्राएल्‍की लुक् भत्‍त छ्‌यर्नर घयेत् च्‍यालरङ् तङ्‌ज्‍युङ् झ्‍यीब बेत्।
हुनी हुगी ढोङ्‌गी आम दी येशुगी लोल युङ्‌न खोङ्‌ल छ्‌यक् छेन चोव ज्‍यीन्‍दक् ङल दगु जेत्‍रो ॱनङ् सीन्‍न स्‍युव पुब बेत्। ॱनी खोङ्‌गी लेल्‍ल भीजल तीच्‍च्‍येमे सम ढोप्‍ची कील पुर्न तीच्‍च्‍ये मीत् युङ्‌गेन् बेत् झ्‍यीब बेत्। ॱनी हीगी लेल्‍ल हुगी ढोङ्‌गी आम दीगी चोव ज्‍यीन्‍दक् नीज्‍यरङ्‌गी ॱसुङ्‌गेन् हुगो खुङ्‌देन् बेत्। ॱनी हीन्‍न अक्, दक्‍पी़ सेबे फीरुक् च्‍योक्‍चीनी मल्‍ल छर्नर घयेत् दी क की इक् डुन सगेन् बेत्। ॱनी येशुगी लेल्‍ल ॱवे भुमु रङ्‌गी छ्‌य गन्‍दीक्‍म स्‍योक्‍कुक्। रङ्‌गी ॱनो़ब दी डस्‍सीरङ् झ्‍युङ्‌ल ज्‍युक् झ्‍यीब बेत्। ॱनी हीगो सीरे छो़त् दीलरङ् हुगी ढोङ्‌गी आमे भुमु दी ढक्‍नर बेत्।

हुनी येशु हुगी लुङ्‌ब दीनी थो़न्‍नी गालीलागी छो ङो़ल फीन्‍न हुगी लदोक् च्‍यीक्‍ल जेन देप्‍प बेत्। ॱनी हुदु खोङ् च्‍येल्‍ल मी छेत्‍मीत् घोङ्‌रीय, स्‍यर्च्‍योक्, सी़गी यल्‍लक् ॱस्‍योर्नर, घुव धङ् नेप्‍प ॱयोङ्‌म गज्‍येन् ठीक्‍न युङ्‌न खोङ्‌गी दोङ्‌दु स्‍यक्‍प बेत्। ॱनी खोङ्‌गी हुब कुरीक् ढक्‍तु ची़प्‍प बेत्। ॱनी तम् लप् ॱमीत् छुगेन् घुव घयेत् लप् छुगेल्‍ल, सी़गी यल्‍लक् ॱस्‍योर्नर घयेत् ढक् डोव, घोङ्‌रीय छ्‌यम्‍न डोव धङ् स्‍यर्च्‍योक्‍की थोङ्‌गेल्‍ल डोव हुगी मी ॱयोङ्‌म घयेत् दीगी थोङ्‌नी, हुल ॱह लेन हुबे इस्राएल्‍की को़न्‍ज्‍योक्‍ल तो़प्‍प पुब बेत्।

हीनी येशुगी रोरङ्‌गी ॱलोप्‍टुक् दीब लोल भो़न हुबल हीन्‍दुक् सीन्‍न ॱस्‍येप्‍प बेत्। मी घयेत् हीबल ङ ॱङीङ् छगुक्। हीब ङदङ् दल स्‍यक्‍पु ॱसुम् थम्‍ब देत्‍नी, हीबल सम हुन्‍दो घन्‍ड अक् मीप्‍प बेत्। हीब नुक्‍रङ् ॱलोक्‍न तङ्‌न ॱनी, लम्‍ल डोये यङ्‌ल तोबे ङेस्‍यीक्‍प च्‍यक्‍को़ट्‌टो। हीब नुक्‍रङ् ॱलोक्‍न तोङ् ॱमीत् छुबेत् झ्‍यीब बेत्। ॱनी ॱलोप्‍टुक् दीबे खोङ्‌ल नुक्‍मे मी मङल डङे ढोप्‍ची हीन मी मीस्‍से लुङ्‌बनी ङीत्‍ल घन्‍दुक् झ्‍यीन ज्‍योर्केन्? झ्‍यीब बेत्। हील येशुगी खीत्‍ल ढोप्‍ची घजो़त् च्‍यीक् यो़प्‍प? सीन्‍न ढीनी, ॱलोप्‍टुक् दीबे लेल्‍ल ढोप्‍ची दी़न् धङ् न च्‍युङेत्‍मु च्‍यीक्‍प यो़त् झ्‍यीब बेत्।
हुनी येशुगी मी घयेत् दील हीब ॱसल दो़त् झ्‍यी सीक्‍केङ्‌गी खक्‍को़ ॱनङ बेत्। हुनी ढोप्‍ची दी़म्‍बु दी धङ् न दी खोङ्‌गी छ्‌यक्‍ल ॱनम्‍न को़न्‍ज्‍योक्‍ल थु छ्‌यी पुब बेत्। हुनी ढोप्‍ची दी खोङ्‌गी च्‍यक्‍न ॱलोप्‍टुक् दीबे लक्‍ल टेप्‍प बेत्। हुनी ॱलोप्‍टुक् दीबे मी घयेत् दील टेप्‍प बेत्। ॱनी मी घयेत् दी कुरीक्‍की ढोप्‍प डङ् डङ् सेब बेत्। ॱनी स ॱमत् छुबे ॱल्‍हक्‍टो़ फरक् फीरुक् घयेत् दी ॱलोप्‍टुक् दीबे डुनी डालो दी़न् घेङ बेत्। ॱनी उन तोम्‍दु सम सगेन् घयेत् दी भुमु धङ् भीजल ॱमत् चीये, छ्‌योगो घयेत् दीरङ् तोङ्‌डक् स्‍यीजो़त् च्‍यीक्‍की ची यो़प्‍प बेत्। हुनी खोङ्‌गी हुगी मी घयेत् दी पीद तङ्‌नी, खोङ् रोरङ्‌सो ढुल स्‍युन मगादान् लुङ्‌बल फीम्‍ब बेत्।

Слухайте मत्‍ती 15