Aepa Gemae 16
16
Emalemiʼa Isameliʼmo alino ateʼniya gemae
1 #
Aep 11:30; Ga 4:24 Emalemi aʼamo Selaiʼa mafaʼnemo alino oʼateʼniye. Selai aliʼyaʼamo neʼaliya a mafaʼnemo Isipi kotega a mafaʼnemo agiʼamo Hegaʼae. 2Selaiʼa Emalemifeʼmo, Afiyo, huno, Ala kava neʼmoʼa mafaʼnemo aliʼna oʼatesuvafeʼmo naipamo ago alino akani maleʼniyanageʼna mafaʼnemo aliʼna oʼategauve. Oʼategauvaʼmofeʼmo kahaoke hovanagi uka aliʼyaʼnimo neʼaliya a mafaʼneʼeʼmo magokepiʼmo lokaeka havao. Agaepatiʼmo nagae mafaʼnemo mago maisafi, huno ha paiʼniye. Inagi Emalemiʼa huʼniya gemo afiʼniye. 3Emalemi aʼamo Selaiʼa Hegaʼmo Isipi a mafaʼnemoʼmo aliʼyaʼamo neʼaliya a mafaʼnemo aʼamo maisiyafeʼmo avaleno amiʼniye. Emalemiʼa Kenani koteʼmo teniʼa kafugamo mainoʼaeʼmo ani a mafaʼnemo aliʼniye. 4#Mai 30:21,23Inagi Emalemiʼa Hegaʼeʼmo lokaeno havaeʼnigeno Hegaʼa aipaguʼeʼmo maiʼniye. Hegaʼa ago naipaguʼeʼmo mauve, huno hutenoʼaeʼmo Selaiʼmo alino afepi ateʼniye. 5Selaiʼa Emalemifeʼmo ha painoʼaeʼmo, Nagaemo huʼnova hosu kavaʼmo kagaeteʼmo haneno. Aliʼyaʼnimo neʼaliya aʼmo avaleʼna kamiʼnogenoʼaeʼmo hemenimo naipaguʼeʼmo maiʼnove, huno ageʼniyaʼmofeʼmo nagaemo alino afepi neʼnate. Ala kava neʼmoʼa kagaeʼe nagaeʼeʼmo alino fako huno laʼategaiye, huno ha paiʼniye. 6Emalemiʼa hunoʼaeʼmo, Aliʼyakamo neʼaliya a mafaʼnemo kayapiʼmo maiʼnigekaeʼmo kagaemo yagaika neʼatanaʼmofeʼmo haiya kavaʼmoʼa kanale hugiye, huka ageʼnisapigi ani kavaʼmo afaʼa huvo, huno ha paiʼniye. Inagi Selaiʼa Hegategamo lokiya kavaʼmo huʼnigeno Hegaʼa Selai aulagaleʼmo oʼmaino ataleno aune heno uʼniye.
7Hegaʼa mago kaʼmo Su haopalega uʼniya kateʼmo uno vayaʼmo oʼmaiʼnaya haopalega maiʼnigeno Ala kava neʼmoʼa enisole vekaʼamoʼmo mago meti aniʼmo aeno latino haine neʼeya yateʼmo agaetegamo afole aiʼniye. 8Enisole vekamoʼmo hunoʼaeʼmo, Hegao, huno, Selai aliʼyaʼamo neʼalina aʼmogae, huno, haiyaʼalegati ekaeʼmo haiyategamo visanafe nehane, huno ge huno afi geʼnigenoʼaeʼmo, Nagaemo Selaiʼmo aliʼyaʼmo neʼaluva a kanomo aulagaletiʼmo ataleʼna naune heʼna neʼove, huno ha paiʼnigeno, 9#Ta 2:9halate atagineka yagaino nekateya a kanomo Selaitegamo uka aiyafiʼmo maiʼneka muki geʼamo akame huvo, huno ha paiteno 10#Aep 17:20magoʼe gemo ha painoʼaeʼmo, Kaginago vayakamo asole vayaʼmo aliʼna hamaleʼna apatesugeʼa vayaʼmogi afaʼa lekana opaigae. 11Afiyo, huno, kaipaguʼeʼmo maiʼnananageka ve mafaʼnemo alika ategananagi agiʼamo Isameliʼae huka ato. Ala kava neʼmoʼa kana aliʼnana kavaʼmo ageʼniyaʼmofeʼmo Isameliʼae huka ato. Isameliʼae agimo aepaʼamo haneʼniyana Gotiʼa neʼage. 12Mafaʼnekamo afela vekamo maiteno muki vayaʼaitegamo kame huno apatesigeʼapaeʼmo muki vayaʼmogimo kame huʼa ategae. Agaemo vayaʼaʼeʼmo lokaeno oʼmaigifa aote maigiye, huno ha paiʼniye. 13Ha paiʼnigeno Hegaʼa Ala kava neʼmo ha paiʼniya geeʼmo agesa afiteno Ala kava nefeʼmo ina ge huno agimo amiʼniye. Gotiʼa neʼnageya vekae. Neʼnageya Gotiʼmo ago ageʼnovaʼmofeʼmae, huno huʼniye. 14Ani kavaʼmo huʼniyaʼmofeʼmo ani meti aniʼmo agiʼamo Miya Lahai Loi anine, huʼa agi aeʼnae. Ani agimo aepaʼamo afaʼa maiʼneno neʼnageya vekamo anine. Hemenimo ani aniʼmo Katesi taonimo hanete Meleti taonimo hanete hutegeno folagapiʼmo haneʼniye.
15 #
Ga 4:22
Henagaʼamo Hegaʼa Emalemi ve mafaʼnemo alino ateʼniye. Emalemiʼa agiʼamo Isameliʼae huno ateʼniye. 16Emalemiʼa ani afinaʼmo eiti sigisiʼa kafugamo maiʼniye.
Поточний вибір:
Aepa Gemae 16: kyg2013
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2013, Wycliffe Bible Translators, Inc. All rights reserved.