Matayo 4
4
Ukugelwa kwa Yesu
(Maliko 1:12-13; Luka 4:1-13)
1Ndawe Umuhe Umwelu amusindikige Yesu ku balali sambi agelwe na Setani. 2Ndawe iyimige ukulya ifilo machumi gatayi swe pambele ifwa musale. 3Ndawe Setani asige kwa Yesu swe itigila, “Manyi veve wi mwana va Nguluvi, lonze amaganga iga gave wugali.” 4Swe Yesu ipitula, “Lwandike ‘Ulwa umunu sisaanana kwa kilyo hela nda pesi ulukani ulwihuma kwa Nguluvi hela.’”
5Ndawe Setani amusindikige ku Yelusalemu iboma inzelu, ndawe amuvikige kuluneng'esi ulwa itembeli, 6Ndawe Setani amutigilige Yesu, “Veve manyi wimwana va Nguluvi, witose pasi; pakuva lwandike:
‘Nguluvi akuletela Vanyivaha va Nguluvi vakwe
vakugabe mumawoko gawo vakutegule,
sambi ulemwe ukwikuvala mumaganga.’”
7Ndawe Yesu amutigilige Setani, “Kangi lwandike: ‘Ulamugela Nguluvi Umutwa vako.’”
8Kangi, Setani swe akumusindika Yesu kukidunda ikitali, swe akumulagila uwutwa mbewuli uwa ing'i na indolo sakwe. 9Ndawe amulongelige, “Ifi mbefili fiva fyako manyi ufugamile nu kusunyalila.” 10Ndawe Yesu atigilige kwa Setani, “Hege ipa Setani! Pakuva lwandike: ‘Saumufugamila nu kumusunyalila Nguluvi vako yeiyena swe.’”
11Ndawe Setani amulekige, neke baho baho vaase vanyivaha nu kumupigila Yesu.
Umuvango gwa ifipigo fya Yesu mu Galilaya
(Maliko 1:14-15; Luka 4:14-15)
12Yesu ave ipulika ulwa Yohane mudindile ahele ku Galilaya. 13Neke ahege na ku Nasaleti, abite akikale ku Kapelenaumu, imbali sa mu Sabuloni na mu Nafutali, 14Sambi lukwile ulwalonzilwe na umuvisi Yesaya:
15“Ulutanana ulwa Sabuloni na
Ulutanana lwa Nafutali,
kulubali lwa kumwani ukulowoka ku Yolodani, ing'i iya
ku Galilaya ya avamyanza!
16Avanu vevevikalite mulwisa
vawuwene uwelu uwukomi.
Na avikalige mung'i
inyalwisa na umwigigi ugwa ifwa,
vawuwona uwelu pe wivala.”
17Ukuhuma baho Yesu avanzile ukudalika, itigila, “Mupelage, pakuva Uwutwa uwakuchanya wuhegelye!”
Yesu ikemela avalofi va isomba vatayi
(Maliko 1:16-20; Luka 5:1-11)
18Yesu peagendige mulubali mumwani ya ku Galilaya, avawene Simoni Petulo na Andeleya mwanakwave vitoosa ifilovelo mululenga; pakuva vevalofi vaisomba. 19Ndawe Yesu avatigilige, “Muninile nene ndivigisa ukuva muvalofi va avanu.” 20Lulusika lulo vafilesile ifilovelo fyawo, nu kumuninila.
21Neke peahesile pala, avawene vangi vavili munu na mwanakwawo Yakobo na Yohane avana va Sebedayo, vevali mukipugu pamwi nayu dadawo, viwuyapa ifilovelo fyawo. Neke Yesu avakemele, 22Swe lulusika lulo vakukileka ikipugu nayu dadawo, nu kumuninila.
Yesu akwigisa avanu na kuponia avatamwa
(Luka 6:17-19)
23Ndawe Yesu avangige ukupilima mung'i mbeyili iya mu Galilaya akwigisa mumasinagogi gawo na ukudalika Ulukani Ulunofu lwa Uwutwa wa Nguluvi. Na kuponia avanu avahomefu na avanyafitamwa. 24Ndawe ing'ani sakwe sapulisige mung'i mbeyili ya mu Siliya. Neke avanu pevalete avatamwa, avanyakuguda na ifitamwa mbefili; avanu avanya masoka, nalilibisi, litela na avalema mbevali iwo avaponise. 25Swe amalugu molofu ga avanu gakumufwata uluhuma ku Galilaya na ku Dekapoli (boma isinyichumi) na ku Yelusalemu na ku Yudaya na uluhuma kumwambu gwa Yolodani.
Поточний вибір:
Matayo 4: HeNT2004
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Kihehe New Testament © Bible Society of Tanzania, 2004.