Jénésis 1
1
Eringe nyí Osówo o/chi Ejíí
1[Ké kiimkpet kyikû, Osówo o/chi bubóng ne esí.] 2Esí e/mû byiryibyiryi, nang chwǒm kyi/mû kyi*fí ké nyǐ*. Ne baya ḿbé ba/mû ba/cít ké nyǐ ba/mû kyifip kyífip. [Busun ḿbú Osówo] bu/mû bu-byí i kyíbóng zírízírí bu-wáp ng baya ámbe. 3Ne Osówo o-kye busa o/fu, kiinwángé kyibyí, ne kiinwángé kyi-byí. 4Ne Osówo o-ri o/fu, kiinwángé ánkyi nkyi kanong, ne o-kyii kiinwángé ne kyifip. 5Osówo o/kó kiinwángé, dyicí, o-kó kyifip, buchú. Ne dyikurúku dyi-fyi, dyicófóróng dyi-cé, dyicí dyibónge dyi-shwôm.
6-7Ne Osówo o-kye busa o/fu, chwǒm wǎ mbwôm kyikyú ké otyém-baya ámbe, ne o-chi kánkyí kâng kyi-kyii kámbé ba-firi byikit byifee, omu mú kyíbóng ne baya ḿbé kyísí. Ne kyi-chi éné. 8Osówo o/kó chwǒm ánkyi wǎ mbwôm, bubóng. Ne dyikurúku dyi-fyi, dyicófóróng dyi-cé, ací afee a-shwôm.
9Ne Osówo o-kye busa o/fu, baya ḿbé kyísí bacibi ba-jâ kyicê kyibónge, eringe nyí esí edabyí. Ne kyi-chi éné. 10Osówo o/kó esí, esí, o-kó baya ḿbé ba/cibi ba-jâ kyicê kyibónge, baya ḿbé baryên. Ne Osówo o-ri o/fu, nkyi kanong. 11Ne Osówo o-kye busa o/fu, byichí ḿbyí byidazím esang ne ḿbyí byidazím byirim byibyí ké esí ké azong ké azong. Ne kyi-chi éné. 12Ne byichí byi-byí kâng ké esí, ḿbyí byidazím esang ne byirim ké azong ké azong. Ne Osówo o-ri o/fu, nkyi kanong. 13Ne dyikurúku dyi-fyi, dyicófóróng dyi-cé, ací achât a-shwôm.
14Ne Osówo o-kye busa o/fu, byěm ḿbyí byidakûkye kiinwángé byibyí kyíbóng, byi-kyii buchú ne esû, byi-tông ekap nyí ací ne aje ne ajî-byifen, 15byi-kûsan kyíbóng eringe nyí byidakûkye kiinwángé ké ejíí. Ne kyi-chi éné. 16Ne Osówo o-chi kâng byěm ḿbyí byi/rêe ḿbyí byidakye kiinwángé byifee. O/fu, óbyísû okyú otu mú esû, ne otukáku mú kaǎníng okyú otu mú buchú. Osówo o-chi to ékpére. 17Ne o-tî byěm ámbyi ḿbyí byidakye kiinwángé ké bubóng byi-kûkye kiinwángé ké ejíí, 18byi-kûkyú batu ḿbé buchú ne esû, byi-kyii kiinwángé ne kyifip. Ne Osówo o-ri o/fu, nkyi kanong. 19Ne dyikurúku dyi-fyi, dyicófóróng dyi-cé, ací anyii a-shwôm.
20Ne Osówo o-kye busa o/fu, azong-enyam chwóó ne ekworê byisú ké baya, ne bunurung ḿbú budabyí kyíbóng bubyí. 21Ne Osówo o-chi kâng biǐnyám-baya ne enyam nyí edawá kace ké azong ké azong, ne kángkáng bunurung to ké azong ké azong. Ne Osówo o-ri o/fu, nkyi kanong. 22Ne Osówo o-jware kámbyí byimúmú. Ne o-raa ne byěm ḿbyí ké baya o/fu, kû n̂g efwon ba-jê ng ba-câ ba-sú ké buce ne baya, o-raa ne bunurung o/fu, bufwon bu-sú ké ejíí. 23Ne dyikurúku dyi-fyi, dyicófóróng dyi-cé, ací atánge a-shwôm.
24Ne Osówo o-kye busa o/fu, enyam ebyí ké ejíí ké azong ké azong, byitú ne enyam-dyikán nyí eryên ne nyí boǒníng. Ne kyi-chi éné. 25Ne Osówo o-chi kâng enyam nyí ké ejíí ké azong ké azong ne byitú ké azong ké azong ne kángkáng enyam nyí boǒníng ké azong ké azong. Ne Osówo o-ri o/fu, nkyi kanong.
26Ne Osówo o-raa o/fu, byichi banet ba-kyú wǎ be, ba-bí bě, ḿbé ekworê nyí ké kace ne bunurung ḿbú kyíbóng ne byitú ne ejíí kángkáng ne [kángkáng enyam nyí nyi ké ejíí] byidakyú ké bubwô ebe. 27Ne Osówo kâng o-chi banet wǎ nyǐ oyén. O/chi kámbé onyinchéng ne onyinyi. 28Ne Osówo o-jware kámbé, o-sét kámbé o/fu, kû n̂g efwon ba-jê, ba-sú ké ejíí emúmú, e-kyú ké bubwô enen. Kyú n̂g ne busa kyi-kim ne ekworê nyí ké kace ne bunurung ḿbú kyíbóng ne kángkáng enyam nyí nyi ké ejíí. 29Ne Osówo o-raa ne banet o/fu, me nn/kye běn kángkáng byichí ḿbyí mbyi byi-zím m byirim ne ḿbyí mbyi byi-zím m esang ké ejíí. Kû n̂g eryí kámbyí. 30Ne kángkáng enyam nyí ké ejíí ne bunurung ḿbú kyíbóng ne kángkáng enyam nyí boǒníng ne kángkáng byěm ḿbyí mbyi ne dyikpen, me nn/kye kányí byichí ḿbyí edaryí. Ne kyi-chi éné. 31Ne Osówo o-ri kángkáng byěm ḿbyí o/chi, ne byi/mû byi-nwa ng kanong kanong. Ne dyikurúku dyi-fyi, dyicófóróng dyi-cé, ací nyâchât a-shwôm.
Поточний вибір:
Jénésis 1: BKY
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
Published by the Bible Society of Nigeria @ 1985