Matie 2

Lowubhlɩ 'kʋʋ nyɩkpa ‑yi 'yu ‑dɔdɔɔ bʋbɔ ‑kää

1Zozii nä, Zudee‑bhlɩɛɛ' 'duu wa laa lä Bɛtlɛmʋduu#2.1 Bɛtlɛmʋduu: Ʋ ‑glö 'loyo Davidö ɔ 'bhlɩ. nä ‑mɔɔ wa ‑gänönöɔ. ‑Lɔɔ' 'tänyɩɛ 'mnö 'loyo Elodö 'kämä bhlä 'bhlɩɛ. ‑Mä ‑laagɔzälöö' yëkuu' wälɩ‑yibhënyʋä ‑bha 'Ylʋʋ ghlää‑gbäsɩ 'nɩ wa ‑yi Zolizalɛmʋduu'. 2Wa ‑yi lä nä, wlä ‑mä 'Zufʋnyʋaa' 'loyoo wa ‑gään lä nä, ‑a sɔɔ bhä ‑mä, ‑a 'nii‑ ɔɔ' ‑laagɔzälöyee ‑mɔɔ 'Ylʋʋ ghlää ‑gbäsɩ 'yi nä, ɔmɔ ‑a ‑yi lä bʋbɔ ‑kää. 3‑Mä 'loyo Elodö nuu‑ lä wälɩɩ nä, kä plɛ ‑bhɔɔ 'mnö. 'Nɩ Zolizalɛmʋduu' nyɩkpaa ‑mä 'sɩɩ plɛ ‑bhʋwa 'mnö ɔmɔ 'bhisäkʋ. 4'Nɩ ɔ yi 'Cibhisänyʋaa' 'cifinyʋa ‑yä ‑Jlämöcɩanyʋa 'sɔ 'wlu 'wlää, 'nɩ ɔ yiwa 'ylä nynä ‑mä mä ‑sä Klisöɔ 'kä bhɛ ‑zi gänönöɔ 'naa‑? 5Wlä Zudee‑bhlɩɛɛ' 'duu‑ plöö‑ lä Bɛtlɛmʋ nä, ‑mɔɔ Klisöɔ 'kä lä gänöɔ. ‑N ni 'klüü 'plɔfɛtɩɔ ‑jɩjlä lä nä. Ɔ lä

6 ‑Mɔɔ Bɛtlɛmʋdu‑!

‑N ‑glö Zuda‑bhlɩnɛ 'mnö 'du!

‑Mä ɛɛ' 'di 'kädɩɩ wa kɩ zɛɛ nä,

‑Mɔɔ ‑mä 'sɩɩ, wa yi‑i zɛɛmʋ.

‑Ɔnöza bhää?

'Kämänyɔ yi‑i 'kʋ ghlää.

Ɔmɔɔ‑ 'gä lä 'Yizlɛ‑bhlɩɛ 'mnö nyɩkpaa 'fɩɩn kpanyɔ 'plö. # 2.6 Ɩ bha Misee 5.1.

7Ɩ ‑kä 'ŋnö nä, ‑laagɔzälöö yëkuu' wälɩ‑yibhënyʋä, kä 'loyo Elodö lanʋwa‑ ziziodä 'nɩ ɔ yiwa 'ylä, 'nɩ 'tänyɩɛ 'titiclö 'mnö ‑laagɔzälöyee ‑ghlä lä 'kʋ nä, wa yio 'nyɛ paa. 8'Nɩ ɔ yiwa Bɛtlɛmʋduu' lobho, ɔ lä a mʋ ‑yä a 'ylä 'nägäsä ‑yä wa sonö'anyɩ 'yuoo' yëkuu' wälɩ ‑yä a 'kä yi a kä'ä 'dö ‑sää. Ɩyä ‑amʋ 'titi, n 'kɔ 'sɩɩ bʋbɔ ‑kää 'muu. 9'Loyo Elodö cii‑ ylä sɔɔ nä, 'nɩ nyɩkpaa yi 'kʋ ‑bha 'nɩ wa yi mʋ. ‑Mä wa ‑kʋ lä mʋdä nä, ‑laagɔzälöyee wa 'nii‑ bhlä ‑mɔɔ 'ylʋʋ ‑ghlää ‑gbäsɩɩ 'yi nä, ɛ ‑kʋwa bhɛ 'yikʋ. Wa güe‑ 'kʋ ‑aaa, 'nɩ dä wa ‑gänö lä 'yuo nä ɛ yi ‑lɔɔ ŋëë, 'nɩ ɛ yi 'nynigo. 10‑Mä wa nie‑ lä 'yi 'nɩ ɛ 'nynigo‑ lä ‑lɔɔ nä, kä ‑pʋpɛ 'kädɛ ‑plʋwa. 11'Nɩ wa yi ‑lɔɔ' ‑bhutuu 'mnö plä. Wa lä wa wloo nä, ‑n ni 'yu ‑dɔdɔɔ ‑yä ɔ 'nɔ Malii. 'Nɩ wa yi 'yuo ‑kokoowli dëlü glu 'pä, 'nɩ wa yio bʋbɔ. 'Nɩ wa yi waa' kääkäälɩɩ 'mnö wloo, 'nɩ wa yi ‑mɔɔ bɔɔpälɩɩ ‑sä 'nɩ wa yio ‑bɔɔ 'pä. Wa nyɩɔ‑ ‑sikaa, ‑yä ‑kätawlɛ ɩyä ‑daŋwɩɛ wa laa lä 'milö nä. 12‑Mä wa ŋɔɔ‑ 'nɩ wa ‑ghlä. 'Nɩ ‑mɔɔ 'ylaa 'mnö Laagɔ ‑sonʋwa nynä wa 'nä 'ylɩbhɔ ‑lä 'loyo Elodö yëku. Ɩ ‑kä 'ŋnö 'nɩ wa ‑bhlü 'wlu ‑bi ‑blɔ, 'nɩ wa yi wa 'bhlɩ 'ylɩbhɔ.

Zozɛfʋ ‑yä Malii 'sɔ guu‑ 'nɩ wa ‑mʋ Ejipiti

13‑Laagɔzälöö' yëkuu' wälɩ‑yibhënyʋä ‑mʋ ylä nä, Zozɛfʋ ‑ghlä 'ylaa 'nɩ ‑Laagɔzuzu ‑sonöɔ, ʋ lä ‑N ‑bha 'kʋ, ‑n 'bhlü 'yuo ‑yä ɔ ‑nɔɔ 'sɔ 'kʋ, ɩyä ‑n ‑yʋwa 'sɔ ‑guu a mʋ Ejipiti. ‑N kʋ ‑mɔɔ ‑aaa, ‑mä ylʋʋ yi ‑lɔɔ 'kʋ 'nɩ ‑n yi‑i soo nynä ‑n 'ylɩbhɔ. ‑Ɔnöza bhää? Kä 'loyo Elodö tään lä 'yuo ‑yä ɔ 'kɔ 'bhlä. 14Ɩ ‑kä 'ŋnö 'nɩ Zozɛfʋ ‑bha 'kʋ 'nɩ, 'saboo, ɔ bhlüü‑ Malii ‑yä 'yuo 'sɔ 'kʋ 'nɩ ɔ ‑yʋwa 'sɔ yi Ejipiti mʋ. 15Ɔ ‑kʋ ‑mɔɔ ‑aaa 'nɩ 'loyo Elodö yi 'ku ‑yä sä Kwlienyɔ Laagɔɔ' 'plɔfɛtɩɔ cii‑ bhlä nä, sɔɔ 'kä glää. Kɔ cii‑ bhlä, ɔ lä kä n laa‑ n ‑yowli nynä ɔ ‑bha yɩ Ejipiti‑bhlɩɛ 'mnö ‑yä ɔ yi.#2.15 Ɩ bha Ozee 11.1.

Elodö bhlää‑ 'yuë ‑dɔdʋä

16‑Mä 'loyo Elodö ‑wloo lä wälɩɩ 'nɩ, ɔ nii‑ lä 'yi nynä ‑mä, ‑laagɔzälöö' yëkuu' wälɩ‑yibhënyʋa, kä wa 'nyigënöɔ‑ nä, kä ɔɔ' 'mnö ‑nyimo. Plɛkʋ ‑sio sää 'titi. Ɩ ‑kä 'ŋnö 'nɩ ɔ ‑lobho nyɩkpa Bɛtlɛmʋ‑duu' ‑yä ʋʋ' kpëkpë 'kʋʋ 'dii 'mnö. Ɔ lä ‑mɔɔ 'yua 'fɩɩn wa 'bhlʋwa. Ɔ lä wa 'bhää ‑lɛɛ ‑dɔdʋa 'kʋ ‑aaa ‑yä ‑wa ‑kä ylä yiosä 'ylʋbɔ 'sɔ nä, wa ŋënʋwa 'kʋ. 'Tänyɩɩ ɔ ylää‑ lä ‑laagɔzälöö' yëkuu' walɩ‑yibhënyʋa nä, 'tänyɩɛ wa ‑nyäka lä nä, ɛmɛ ɔ paa‑ plɛkʋ 'nɩ ɔ bhlää‑ lä 'yuë ‑dädʋa. 17'Plɔfɛtɩ Zelemii' ciciwälɩɩ, sää ɩ ‑glää lä.

Kä Zelemii cii‑ bhlä nynä

18 Lamaa‑duu',

Bhʋtʋ‑wälɩ ghlää ‑kä ‑mɔɔ!

Nyɩkpɔ tu 'nɩ ɔ zözlä!

Zakɔpʋ 'ŋnɔ Lasɛlɩɩ,

Ɔɔ' 'yua wa bhlää‑ lä nä,

Wamä ɔ tu lä!

Ɔ tu 'nɩ ɔɔ' nyɔkɔ ‑wʋ!

‑Ɔnöza bhää?

Ɔɔ' 'yua yä bhɩä! # 2.18 Ɩ bha Zele 31.15.

Zozɛfʋ yä Malii 'sɔ yä Ejipiti ‑bha wa yä yi

19'Tänyɩɛ 'mnö Elodö kuu‑ ylä 'fɩa nä, Zozɛfʋ ‑kʋ bhä ‑mɔɔ Ejipiti, 'nɩ ɔ ‑ghlä 'ylaa. 'Ylaa 'mnö nä, ‑Laagɔzuzu ‑sonöɔ, 20ʋ lä Zozɛfʋ‑, ‑n ‑bha 'kʋ ‑yä ‑n 'bhlü 'yuo ‑yä ɔ 'nɔ 'sɔ 'kʋ ‑yä ‑n 'ylɩbhɔ yɩ 'Yizlɛbhlɩ 'kʋ ‑mä nyɩkpaa‑ tään bhlä 'yuo ‑yä wa 'kɔ 'bhlä nä, wa yä 'ku. 21‑Laagɔzuzuu cii‑ ylä sɔɔ nä, kä Zozɛfʋ ‑bha yɩ 'kʋ. Ɔ bhlüü‑ 'yuo ‑yä ɔ 'nɔ 'sɔ 'kʋ 'nɩ ɔ yi 'Yizlɛbhlɩ 'kʋ 'ylɩbhɔ. 22‑Maa, ɔ nuu‑ lä nynä Akelayusö 'mɔɔ‑ bhlüü‑ ɔ 'bä Elodöö' 'leyi‑këkpëa 'kʋ nä, ɔmɔɔ‑ plöö‑ bhɛ Zudee‑bhlɩɛɛ' 'loyo nä, kä Zozɛfʋ ‑guu ‑mɔɔ' mʋlɩ. 'Nɩ ɔ ‑ghlä 'sɩɩ 'ylaa 'nɩ Laagɔ ‑gblɩmänöɔ. Ɩ ‑kä 'ŋnö nä, Galilee‑bhlɩɛ 'mnö, ‑mɔɔ ɔ ‑mʋ kʋ ‑kää. 23‑Mɔɔ' 'du ‑bhlo wa laa lä Nazalɛtö nä, ʋmʋ 'mnö ɔ ‑mʋ kʋ ‑kää. Kɩ plöö‑ lä sɔɔ 'kʋ ‑yä, sä 'plɔfɛtɩnyʋa cii‑ bhlä ‑mɔɔ ‑gɔgɔbhlää' nä, sɔɔ 'kä glää. Kwa cii‑ bhlä nynä ‑mä Klisöɔ nä Nazalɛtöö' nyɩkpɔ‑ wa 'kɔ laa.#2.23 Zɛɛ 'sɩɩ Nʋnʋ 24.5.

Поточний вибір:

Matie 2: god

Позначайте

Поділитись

Копіювати

Хочете, щоб ваші позначення зберігалися на всіх ваших пристроях? Зареєструйтеся або увійдіть

Дізнатися більше про GOD - u2

Matie 2

Lowubhlɩ 'kʋʋ nyɩkpa ‑yi 'yu ‑dɔdɔɔ bʋbɔ ‑kää

6 ‑Mɔɔ Bɛtlɛmʋdu‑!

‑N ‑glö Zuda‑bhlɩnɛ 'mnö 'du!

‑Mä ɛɛ' 'di 'kädɩɩ wa kɩ zɛɛ nä,

‑Mɔɔ ‑mä 'sɩɩ, wa yi‑i zɛɛmʋ.

‑Ɔnöza bhää?

'Kämänyɔ yi‑i 'kʋ ghlää.

Ɔmɔɔ‑ 'gä lä 'Yizlɛ‑bhlɩɛ 'mnö nyɩkpaa 'fɩɩn kpanyɔ 'plö. # 2.6 Ɩ bha Misee 5.1.

Zozɛfʋ ‑yä Malii 'sɔ guu‑ 'nɩ wa ‑mʋ Ejipiti

Elodö bhlää‑ 'yuë ‑dɔdʋä

Kä Zelemii cii‑ bhlä nynä

18 Lamaa‑duu',

Bhʋtʋ‑wälɩ ghlää ‑kä ‑mɔɔ!

Nyɩkpɔ tu 'nɩ ɔ zözlä!

Zakɔpʋ 'ŋnɔ Lasɛlɩɩ,

Ɔɔ' 'yua wa bhlää‑ lä nä,

Wamä ɔ tu lä!

Ɔ tu 'nɩ ɔɔ' nyɔkɔ ‑wʋ!

‑Ɔnöza bhää?

Ɔɔ' 'yua yä bhɩä! # 2.18 Ɩ bha Zele 31.15.

Zozɛfʋ yä Malii 'sɔ yä Ejipiti ‑bha wa yä yi

Поточний вибір:

Позначайте

Поділитись

Копіювати

Хочете, щоб ваші позначення зберігалися на всіх ваших пристроях? Зареєструйтеся або увійдіть

Дізнатися більше про GOD - u2