मत्तयाल 18
18
स्वर्ग राज्येमते पेहरोर बोर?
(मरकुस 9:33-37,42-48; लूकाल 9:46-48; 17:1-2)
1आ वेलाते सिस्युल्क येसुनगा वासि, “स्वर्ग राज्येमते अंटोर्कन्ना पेद्दा बोर?” इंचि पूसकीतुर.
2-3अस्के येसु वरोर सिन्ना पेडन केय्सि, ओरा नड्डुम निलाहचि इल्हा वेहालय दल्गुतोर. “नना निजम वेहांतन, मीवा गुनाल्कुन मार्सकुंचि मिमेट पेडनलेसीं आयवा,#18:2-3 पेडनलेसीं आयवा ओनद-ओर सिन्नागासि तिरियमड, सिन्ना पेडांक कदर मन्नो. स्वर्ग राज्येमते बस्केने होना परिर. 4दानहाटीं बोर अय्ते ओनाद ओरे ई सिन्ना पेडन लेह्का सादा-सिंपल मनांतोर, ओरे स्वर्ग राज्येमते पेहरोर आंदुर. 5बोर अय्ते नापोर्रो विस्वासम कियना ई सिन्ना पेडनसंटोन बेस हूळांतोर, ओर नाकुन बेस हूळतापे. 6गानि नापोर्रो विस्वासम कियना ई सिन्ना पेडानसंटोन बोरन्ना पापमते अरहते, ओना बोंळगेक जोत्ता बंडा दोहाचि ओन समुद्रमते लोतु एते ओसि मुळुहमळे बेस मनंता. 7पापमते अरहना पोल्लें ई दुनियाते वेल्लेन मंतां. अवुनहेंदाल दुनिया लोकुल्कुन पापमते अरहंता. अदुनहाटीं ई दुनियाक बच्चोन गोसा वायार! पापमते अरहना पोल्लें अय्ते वायमळे गावाले, गानि अव बोनाहेंदाल अय्ते वांतांगो ओन्क बच्चोन गोसा वायार!”
8ओक्कला नीवा कय आयि काल आयि नीकुन पापम किया वेह्ते दान नर्किसि पोहा. बारित्ते रोंडु कय्क, रोंडु काल्क मंचि बस्केळ्क पोत्सेके मनना तडमिता नरकमते होननदानकन्ना, अपंग हिलाकोंटे कूटाल आसि पिस्वरते होनमळे नीहाटीं बेस. 9अल्हेने, ओक्कला नीवा कळु नीकुन पापम किया वेहते दान तेंडसि पोहा. बारित्ते रोंडु कळ्क मंचि नरकमता तडमिते होननदानकन्ना गुड्डि आसि पिस्वरते होनमळे नीहाटीं बेस मनंता.
10हुळाट, नावापोर्रो विस्वासम कीता ई सिन्नोरकुन बोने तेंडसि पोहमटु. नना वेहनद बतल इत्ते, ओरा पेनदा दूतां स्वर्गमते मनना नावा पेनबाबांक बस्केळक कलियसेके मनंतां. 11अचोने आयका मनकना रूपमते पुटतोन नना तप्सोत्तोर्कुन पिसागोटलय वातन.#18:11 इद वचनम कोन्नि पांडु लिपिने हिल्ले.
12“ओक्कला वरोर मनकानगा नूर गोर्रें मंतां इनकुंटु. अवुनाल उंदि गोर्रे तप्पिस होनानय्ते, कळमता टोंबै तोम्मिद गोर्रेन ओर अग्गेन होळसिसि, तप्सोत्ता आ उंदि गोर्रेतुन पहकालय होन्नोरा? दांतोर. 13नना निजम वेहांतन, ओक्कला ओन्क होत्ता गोर्रे दोर्कानय्ते, आ टोंबै तोम्मिद तप्पिस होनवा गोर्रेंकन्ना, तप्सोत्ता आ उंदि गोर्रेपोर्रो एक्को आनंदम आयानुर. 14अल्हेने ई सिन्नोरकुनाल वरोर इंका नासडेम आयामन्नि इंचि स्वर्गमते मनना मीवा बाना मनसु मंता.”
तपसोत्तोर्कुंक बतल वेहना?
15ओक्कला तम्मुर आयि दादाल आयि नीवा विरोदमते पापम कियानय्ते, निमे वरोने ओनगा होंचि ओर कीता पापम ओन्क तेळियागोट्सि वेहा. ओर ओक्कला नीवा पोल्ले केंजानय्ते निमे ओना मनसुन गेल्सताप.#18:15 इद वचनमते मनना पोल्ले सिराप विस्वासम कीतोराहाटीं रासतद आंद. 16उंदि वेला ओरगिंटा नीवा पोल्ले केंजुवस्के, वरोर-इव्वुरकुन नीवा पज्जो पीसि होन. बारित्ते, अगा बतल जर्गुतनो अदुन वेहालय ओर गवाइ मनांतुर. 17ओक्कला ओर ओरा पोल्लेगुडा केंजाकुंटे कलिसियातोर्क वेहा. कलिसियातोर वेहतदगुडा केंजाकुंटे, ओर पेनदा मनकल आयोर इंचि इनकुन. हिलाकोंटे कर वसुल कियानसंटोर इनकुन.
18“नना मीकु निजम वेहांतन, मिमेट बूमिपोर्रो बदुन अय्ते दोहंतिरो, अदुन स्वर्गमतेगुडा दोहमळ जर्गंता, मिमेट बूमिपोर्रो बदुन अय्ते लेहांतिरो, अदुन स्वर्गमतेगुडा लेहामळ जर्गंता.#18:18 इद वचनता अर्तम बतल इत्ते, मिमेट बोर्कुनना माप कीते पेन ओर्कुन माप कींता, मिमेट बोर्कुनना माप कियाकोंटे पेनगुडा ओर्कुन माप किय्यो. 19अचोने आयका नना वेहनद निजम बतल इत्ते, ई बूमिपोर्रो मीवा लोप्पोटाल बोरन्ना इव्वुर उंदि आसि मीकु बतल अय्ते गावालेनो अद तल्कानय्ते स्वर्गमते मनना नावा पेनबाबाल तप्पाकोंटा हींतोर. 20बारित्ते बगा अय्ते नावा पोरोलते इव्वुर-मुव्वुर उंदगा जमा आंतुरो, अगा ओरा नड्डुम नना मनांतन,” इंचि येसु इत्तोर.
वरोनद वरोर माप कियना
21अस्के पत्रु येसुनगा वासि, “सामि, वरोर तम्मुर आयि दादाल आयि नावा विरोदमते पापम कियानय्ते, नना ओन बच्चुं मल्कां मापि कीकन? एडुं मल्कंगां?” इंचि पूसकीतोर.
22अस्के येसु ओन्क, “एडुंगें मल्कां आयो, ओर बच्चुं मल्कां तप्पु किय्यिनागानि ओन निमे माप कीसेक मन्नु,” इंचि वेहतोर.
23पजा येसु इल्हा वेहालय दल्गुतोर, स्वर्ग राज्येम वरोर राजन लेह्का मंता. आ राजाल ओन्क बाकि मत्ता जीतागाह्कुना हेंदाल बाकीं वसुल कियना इंचि विचारम कीतोर. 24बस्के अय्ते ओर वसुल कियालय सुरुव कीतोर, अस्के वरोर लक्सेना बाकि मत्ता जीतागान राजानहेके तत्तुर. 25आ जीतागानगा ओना मालकुना बाकि दोहालय बतले मनाहिल्ले. अस्के ओर ओन्क आदेस हीतोर गदा, “ओर ओना मुत्तो-पिलाल्क, लोन-दारा अचोने आय्का ओनगा बतल अय्ते मंतनो अव अन्नि अम्मिसि, वाता कोत्तानाल बाकि दोहिरकांटी,” इंचि वेहतोर.
26अस्के आ जीतागाल राजाना काल्कुनपोर्रो अर्सि बात्मिलाडतोर, “राजा नाकु कोन्नि रोजकुना मुदत हीम, मेल्लगा-मेल्लगा नावा बाकि पुरागा दोहंतन,” इंचि इत्तोर. 27अस्के आ मालकुंक ओना जीतागानपोर्रो दया वासि ओना बाकि अंता पुरागा माप कीसि होळसीतोर.
28पजा आ जीतागाल अगटाल पेय्सि होननेंके ओन्क नूर रूपें बाकि मत्ता ओना दंटाता जीतागाल हरदे कलियतोर. अस्के ई मुन्नेटा जीतागाल आ जीतागाना बोंळ्गे पीसि, “नाकु हियना कोत्तां बस्के हींतिन? नाकु इंदकेटद इंदकेन हीम,” इंचि ओन इत्तोर.
29पजा आ जीतागाल मुन्नेटा ओना दंटाता जीतागाना काल्कुना पोर्रो अर्सि विनंति कीसि, “निमे कोन्नि रोजकु ओप्के पीम, नना नीवा बाकीं नीकु हींतन,” इंचि इत्तोर.
30अयना ओर बतले केंजाकोंटा, ओर बाकि दोहनाल ओन जेलने वाटसीतोर. 31अस्के अगा जर्गतद ओना दंटाता जीतागाह्क हूळतुर ओर्कु वेल्ले दुक्कम आता. ओरा मालकुनगा होंचि जर्गतव अंता वेहतुर.
32अस्के मालक ओन केय्सि इत्तोर, “अरे तेल्वि तक्को जीतागा, नीकु इच्चोरगुडा दया वाया हिल्लेना? निमे नावा काल्क पीसि विनंति कीतिन अय्ते नना नीवा पूरा बाकितुन माप कीतन. 33नना बल्हा नीवा पोर्रो दया कीतनो अल्हेने निमे नीवा दंटाता जीतागाना पोर्रो दया किया मत्तिन.” 34इंचि मालक ओनपोर्रो होंग आसि ओन जेलने वाटसीतोर. ओना बाकि नेम्मनजेप ओन जेलनाल होळसा हिल्लोर.
35इल्हेने मिमेटगुडा मीवा तम्मुन आयि दादान आयि मनसुनाल मापि कियाकोंटे ई राजाल बल्हा कीतोरो अल्हेने नावा स्वर्गमते मनना बाबालगुडा मीकुन मापि किय्योर.
Поточний вибір:
मत्तयाल 18: esg-Deva
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2022, Wycliffe Bible Translators, Inc. All rights reserved.