Yowana 1
1
Omwana wa Nyamuwanga ꞉aariga ariwo bhusimukwa
1Bhusimukwa ꞉ryariga ririwo Riingʼana, Riingʼana uyo, ꞉aariga ari ku-Nyamuwanga. Na Riingʼana ꞉aariga ari Nyamuwanga. 2Bhusimukwa, Riingʼana uyo ꞉aariga ari ku-Nyamuwanga. 3Ebhiinu bhyone kutyo ꞉bhyabhumbirwe okuturira Riingʼana uyo. Kitariwo kiinu na kimwi kinu ꞉kyabhumbirwe, kitabhumbirwe nawe. 4Mw-ingʼana muyo nimwo ꞉bhwariga bhuri obhurame bhwone kutyo, na obhurame bhuyo nibhwo obhureeta obhweru mu-bhaanu. 5Obhweru bhuyo obhumirika mu-kisuute, na ekisuute kitakutura okubhuyiga.
6꞉Eejire omuunu wumwi unu ꞉aariga atumirwe na Nyamuwanga. Omuunu uyo ꞉aariga ˆnaatogwa Yowana.#1:6 Yowana. Yowana unu ni Yowana Omubhatiisha. 7Yowana ꞉aariga eejire okubhwira abhaanu iiguru ya obhweru bhuyo, insonga abhaanu bhoone kutyo bhabhwikirishe okuturira ku-mangʼana gaaye. 8Yowana omwene ꞉aariga atari obhweru bhuyo, tari ꞉eejire okubhwira abhaanu amangʼana iiguru ya obhweru bhuyo. 9꞉Bhwariga bhuriwo obhweru obhwenebhwene, unu kaamirikira abhaanu bhoone kutyo, ꞉aariga ˆnaaja ku-kyaro.
10꞉Aariga ariwo mu-kyaro, okuturira omwene uyo, ekyaro ꞉kyabhumbirwe. Nawe, abhaanu bha mu-kyaro ꞉bhataamumenyere. 11꞉Eejire ku-bhaanu bhaaye, nawe abhaanu bhaaye ꞉bhataamuramiiye. 12Tari, abhaanu bhoone kutyo bhanu ꞉bhaamuramiiye, ꞉aabhayaaye obhuturo bhwa okubha bhaana bha Nyamuwanga. Bhayo ni bhanu bheekirisiishe riisiina ryaye. 13Bhayo bhatari abhaana bha Nyamuwanga kwa okubha ati ꞉bheebhuuywe na amaanyinga, amwi ati kutyo omubhiri ogwenda, amwi ati obhukene bhwa muunu, tari okwibhurwa kwebhwe kusookere ku-Nyamuwanga.
14Mmbe, Riingʼana uyo ˆnaabha muunu, ˆneekara kw-iswe. Na eswe kyone nkirora obhugungyo bhwaye, obhugungyo bhwa Omwana omumwemwe, unu kaasooka ku-Raata Nyamuwanga. Eejuuye giinema na ekimari.
15Yowana ꞉aabhwiriiye abhaanu, aamuuye obhuraka ˆnaaikaga ati, “Unu niwe unu ꞉naariga nimbabhwira ati, ‘Omuunu unu kaaja iinyuma waani, abheeye imbere ku-anye, kwa okubha ꞉aariga ariwo anye nikyari okwibhurwa.’ ”
16Ni kuriingʼaana na obhuswereene bhwaye, Nyamuwanga akiyaaye eswe kyone kutyo iinema yaaye, na kaagenderera okukyongesisha giinema ku-nema yaaye. 17Kara, Nyamuwanga ꞉aasoosiishe ebhiraagiro bhyaye okuturira ku-Musa.#1:17a Musa. Ringira riingʼana rinu mu-Mangʼana Amakomeeye. Woori, areetere iinema yaaye na ekimari okuturira ku-Yeesu Kiriisitu.#1:17b Kiriisitu. Ringira riingʼana rinu mu-Mangʼana Amakomeeye. 18Atariwo muunu woonewoone unu ararorere Nyamuwanga. Tari Nyamuwanga Omwana, omwene era niwe ari ayeeyi na Raata Nyamuwanga, na niwe atuuye abhweru Nyamuwanga.
Amangʼana ganu Yowana ꞉aabhwiriiye abhaanu
(Mataayo 3:1-12; Maariko 1:1-8; Ruuka 3:1-18)
19Rusuku rumwi, abhatangasha bha Bhayawudi ꞉bhaatumire abhashengesi#1:19a Abhashengesi. Ringira riingʼana rinu mu-Mangʼana Amakomeeye. na Abharaawi#1:19b Abharaawi. Abharaawi ꞉bhaariga mbakorera Nyamuwanga emirimu mw-iyekaru ryaye, mbasakiraga abhashengesi. Ringira Obhubhasi 3:1-13. okusooka Yerusareemu,#1:19c Yerusareemu. Ringira riingʼana rinu mu-Mangʼana Amakomeeye. bhagende ku-Yowana. Bhunu ꞉bhaamuyikire-ko mbamubhuusha ati, “Awe ni niga?” 20꞉Ataabhabhisire, ˆnaabhabhwira ekimari ati, “Anye nitari Kiriisitu.” 21Mbamubhuusha kweki ati, “Woori awe ni niga? Angu, awe ni omuragi Eriya?” Yowana ˆnaabhasubhya ati, “Wuri, anye nitari Eriya.” Abheene mbamubhuusha kweki ati, “Angu, ni awe omuragi unu ekirindirira okusooka ku-Nyamuwanga?”#1:21 Ringira Ekiyiityo kya Ebhiraagiro 18:15-22. Yowana ˆnaabhasubhya ati, “Wuri, nitari anye.” 22Mbamubhuusha kweki ati, “Ambe woori awe ni niga? Nuukibhwire insonga kigende kibhwire bhanu bhaakituma. Awe omwene owiiyaaikira kutiki?” 23Yowana ˆnaabhasubhya okuriingʼaana na amangʼana ganu omuragi Isaaya ꞉aaikire ati, “Ni anye
‘Obhuraka bhwa omuunu unu kaamura mw-ibhara ati,
Mwimye anu Raatabhugenyi kaaja okutura!’ #1:23 Ringira Isaaya 40:3.”
24Abhaanu bhanu ꞉bhaariga bhatumirwe ku-Yowana, ꞉bhaariga bhasookere na ku-Bhafarisaayo. 25Abhaanu bhayo mbamubhuusha ati, “Raabhe awe utari Kiriisitu, na utari muragi Eriya, na omuragi unu ekirindirira okusooka kwa Nyamuwanga, ndora owubhatiisha abhaanu?” 26Yowana ˆnaabhasubhya ati, “Anye enibhatiisha abhaanu mu-manji, nawe agati weemwe ariwo muunu unu emwe mutakumenya. 27Uyo niwe unu kaaja iinyuma waani. Anye niteesire na kwinama okumusurumurira gingoye gya ebhikwirya bhyaye.”#1:27 Okumusurumurira gingoye gya ebhikwirya bhyaye. Mu-nsiku giyo, emirimu gya okusurumura gingoye gya ebhikwirya bhya abhagenyi insonga bheeyoshe amaguru geebhwe, ꞉gyariga ngikorwa na abhagaya bha emwaro muno.
28Amangʼana gayo goone kutyo ꞉gaakorekere mw-igunguri rya Bhetaaniya, ebhuwuruka esuubha obhwa oruuji rwa Yorodaani, anu Yowana ꞉aariga ˆnaabhatiisisha abhaanu.
Yeesu ni Ngʼondi ya Nyamuwanga
29Mwejo, Yowana ˆnaarora Yeesu ˆnaamuuja-ko. ˆNaabhwira abhaanu bhanu ꞉bhaariga bhari ayo ati, “Murore, uyo niwe Iingʼondi ya Nyamuwanga,#1:29a Iingʼondi ya Nyamuwanga. Ringira riingʼana Iingʼondi mu-Mangʼana Amakomeeye. unu kaagega ebhikayo bhya abhaanu bhoone kutyo abha ekyaro kinu!#1:29b Ringira Obhungʼaanyi 12:21-28. 30Unu niwe unu ꞉naariga nimbabhwira ati, ‘Omuunu unu kaaja iinyuma waani, abheeye imbere ku-anye, kwa okubha ꞉aariga ariwo anye nikyari okwibhurwa.’ 31Anye noone ꞉naariga nitakumumenya, nawe ꞉neejire okubhatiisha abhaanu na amanji insonga atuurwe abhweru ku-bhaanu bha Ijirayeeri.” 32Niwe Yowana ˆnaabhabhwira ganu ꞉aariga arorere, ˆnaaikaga ati, “Naarora Mwoyo Omutaakatiifu#1:32 Mwoyo Omutaakatiifu. Ringira riingʼana rinu mu-Mangʼana Amakomeeye. ˆnaamwikira okusooka mu-rwire ˆnaasusaga rwa inguuti ˆnaamwikara-ko. 33Anye naanitakumumenya, nawe Nyamuwanga unu ꞉aantumire okubhatiisha ꞉aariga ambwiriiye ati, ‘Omuunu unu uraarore Mwoyo waani ˆnaamwikira, kimwi ˆnaamwikara-ko, uyo niwe aribhatiisha abhaanu na Mwoyo Omutaakatiifu.’ ” 34Yowana ˆnaagenderera okwaika ati, “Anye omwene naarora iingʼana iyo, na enibhabhwira ati, unu ni Mwana wa Nyamuwanga.”
Abheeyigira abha okwamba abha Yeesu
35Katondo yeende-ko, Yowana ꞉aariga ayambaaye amwi na bheeyigira bhabhiri, mu-bheeyigira bhaaye. 36Niwe ˆnaarora Yeesu ˆnaaribhataga, ˆnaabhwira abheeyigira bhaaye ati, “Muringire, uyo niwe Iingʼondi wa Nyamuwanga!” 37Bhunu abheeyigira bhayo ꞉bhoonguuywe amangʼana gayo, mbaseeta Yeesu. 38Yeesu ˆneekebhuukira, ˆnaarora abheeyigira bhayo mbamuseeta. ˆNaabhabhuusha ati, “Angu, omwagaraki?” Abheene mbamusubhya ati, “Ee Raabhi, wiikaaye aaki?” Insonga ya riingʼana “Raabhi” ni “Mwiyigisha.” 39Yeesu ˆnaaika ati, “Ambe muuje, omuuja okurora-wo.” Niwe mbamuseeta, mbagenda anu ꞉aariga eekaaye, mbarora-wo. Anu ꞉bhaayikire ayo, ꞉yaariga iri keegoro mu-nsa ekumi, orusuku ruyo mbamaama ayo.
40Owumwi wa abheeyigira abhabhiri bhanu ꞉bhoonguuywe amangʼana ga Yowana mbaseeta Yeesu, ꞉aariga ˆnaatogwa Ndereya, omumura waabho Simooni Peetero. 41Ndereya ˆnaagenda okwagara Simooni, omumura waabho. Bhunu ꞉aamunyoorere, ˆnaamubhwira ati, “Kyarora Masiya!”#1:41 Masiya. Ringira riingʼana rinu mu-Mangʼana Amakomeeye. Masiya, insonga yeende-ko ni “Kiriisitu.” 42Niwe Ndereya ˆnaasira Simooni ku-Yeesu. Yeesu ˆnaaringira Simooni, ˆnaamubhwira ati, “Awe ni Simooni, omwana wa Yowana. Nawe okwambira woori, riisiina ryawo eriija okubha Keefa.” Riisiina riyo mu-Kiyunaani ni Peetero, insonga yeende-ko, ni “Etare.”
Yeesu kaasora abheeyigira abhandi bhabhiri
43Katondo yeende-ko, Yeesu ˆnaaramura ati agende Gariraaya. Gariraaya eyo ˆnaarora-yo Firipo, ˆnaamubhwira ati, “Nuuje, unseete.” 44Firipo ꞉aariga ari muunu wa mu-musi gwa Bheetisayida, mu-musi guyo, nimwo Ndereya, na Peetero bhoone ꞉bhaariga bheekaaye.
45Mmbe, Firipo ˆnaarora Naataniyeri, ˆnaamubhwira ati, “Kyarora omuunu unu Musa ꞉aakaamire amangʼana gaaye mu-kitabho kya Ebhiraagiro, unu abharagi bhoone ꞉bhaakaamire amangʼana gaaye. Riisiina ryaye ni Yeesu omumura wa Yuusufu, asookereeye Naajareeti.” 46Nawe Naataniyeri ˆnaabhuusha Firipo ati, “Ekiinu ekijomu ekitura okusooka Naajareeti?” Firipo ˆnaamusubhya ati, “Nuuje, urore.”
47Bhunu Yeesu ꞉aarorere Naataniyeri ˆnaamuuja-ko, ˆnaaika ati, “Rora omuunu uyo, ni Muijirayeeri omwenemwene, atakubhisa kiinu mu-mutima gwaye.” 48Naataniyeri ˆnaabhuusha Yeesu ati, “Waammenya kutiki?” Yeesu ˆnaamusubhya ati, “Firipo akyari okukubhirikira, anye naanamarire okukurora wiikaayega ansi mw-itiini.” 49Naataniyeri ˆnaamusubhya ati, “Mwiyigisha, awe uri Mwana wa Nyamuwanga! Ni awe Omukama wa Ijirayeeri!” 50Yeesu ˆnaamubhuusha ati, “Angu, owiikirisha kwa okubha naakubhwira ati naakurora wiikaaye ansi mw-itiini? Owuuja okurora amangʼana agandi amanene okukira ganu!” 51Yeesu ˆnaagenderera okwaika ati, “Kimari enibhabhwira ati, omuuja okurora orwire rwigukire, bhaamaraayika#1:51a Bhaamaraayika. Ringira riingʼana Maraayika mu-Mangʼana Amakomeeye. bha Nyamuwanga mbariinya na okwika ku-Mwana wa Adaamu.”#1:51b Ku-Mwana wa Adaamu. Ringira riingʼana Omwana wa Adaamu mu-Mangʼana Amakomeeye.
Поточний вибір:
Yowana 1: kya
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 2023, Wycliffe Bible Translators, Inc. All rights reserved