San Mateo 20
20
Cho⁴ˀnta³ xi³ qui³si³xa¹cao⁴ tso³jmi²ntje².
1Nca⁴ je² cjoa⁴te¹xo³ma³-le⁴ ncˀa³jmi³ ma³nco¹son² jo³-ni³ tsa² jnco³ xi³ nˀai³-le⁴ ntˀia³, xi³ ji³tjo³ nca³ ta⁴njion²ya³ nca³ qui³ ca³jnqui³ cho⁴ˀnta³ xi³ si⁴²xa¹cao⁴ tso³jmi²ntje²-le⁴.
2Cˀia⁴ nca³ je³qui³sˀe³nta³cao⁴ cho⁴ˀnta³ nca³ jnco³ vi²xo⁴ nca³ jnco³ ni⁴čhjin³, qui³sca³ni¹jin³ tso³jmi²ntje²-le⁴. 3Ja⁴me³-la⁴ las nueve nca³ ta⁴njion² ji³tjo³-nca¹ni³, tsa³ve³ cˀa³ xi³ tjio¹ ya⁴ nti⁴tsin⁴, xi³ tsi²jme³ xa¹ tjin¹-le⁴. 4Qui³tso²-le⁴: Cˀoa⁴-ti⁴ ta⁴nquion¹³ nca³ jon² ja⁴jin³ tso³jmi²ntje²-na⁴, an³ tsjoa³-no³ jo³ tjin¹ xi³ va³quin²-no³. Cˀoa⁴ qui³ cho⁴ˀnta³-ve⁴. 5Ja⁴me³nchi³sen³-le⁴ ji³tjo³ nqui²jnco³ cˀa², cˀoa⁴ nqui²jnco³ cˀa² las tres nca³ coan³xon², cˀoa⁴ ti⁴qui³sˀin³-nca¹ni³. 6Ja⁴me³-la⁴ las cinco nca³ coan³xon² ji³tjo³-nca¹ni³, coan³sjai³cˀa³-le⁴ xi³ to⁴xquia⁴ ya⁴ tjio¹, cˀoa⁴qui³tso²-le⁴: A¹-ni³ nca³ ti⁴ˀi⁴ ti³yo³-si¹nio³ cˀoa³ni⁴čhjin³ nca³ tsi² ni²xao¹³. 7Cho⁴ˀnta³ qui³tso²-le⁴: Nca⁴ tsi² tsa² ˀya³ xi³ tsa³cˀe¹nta³cao⁴-na³jin⁴. Je² qui³tso²-le⁴: Cˀoa⁴-ti⁴ ta⁴nquion¹³ nca³ jon² ja⁴jin³ tso³jmi²ntje²-na⁴, cˀoai⁴-no³ jo³ tjin¹ xi³ va³quin²-no³. 8Cˀia⁴ nca³ je³coan³xon² je² nai³-le⁴ tso³jmi²ntje²-ve⁴ qui²tso²-le⁴ je² cho⁴ˀnta³ xi³ si¹coi²nta⁴ xi³cˀa³: Ti⁴no²cjoa⁴-lai⁴ cho⁴ˀnta³, tˀai²-lai⁴ chji¹-le⁴, tˀe²tsˀia⁴coai⁴ sa³ˀnta³ xi³ fe³tˀa³-ni³ sa³ˀnta³ xi³ ti¹tjon². 9Cˀia⁴ nca³ ja³ˀai³ je² xi³ me³ las cinco nca³ coan³xon² qui³ si¹xa¹, qui³tsˀai²-le⁴ jnco³ vi²xo⁴ nca³ jnco¹jnco¹. 10Cˀia⁴ nca³ ja³ˀai³ je² xi³ ti¹tjon², qui³si³cja³ˀai³tsjen³ nca³ nqui²sa⁴ tse³ cˀoai⁴-le⁴. To⁴nca³ cˀoa⁴-ti⁴ nca³ je² qui³tsˀai²-le⁴ jnco³ vi²xo⁴ nca³ jnco¹jnco¹. 11Cˀia⁴ nca³ qui³scoe¹, tsa³cja³yo³je¹tˀa³-le⁴ nˀai³-le⁴ ntˀia³. 12Qui³tso²: Je² xi³ scan³ ca²fa³ˀai³, to⁴jnco³ hora qui³si³xa¹ cˀoa⁴ to⁴nco¹son² ca²si¹cao⁴-na³jin⁴ cao⁴ xi³ scan³ ca²si¹xa¹ cao⁴ nca³ jin⁴-jin⁴ xi³ qui³jcho¹cjoa⁴-na³jin⁴ chˀa¹-le⁴ ntoa¹-le⁴ ni⁴čhjin³. 13Cˀia⁴ je² nˀai³-le⁴ ntˀia³ qui³tso²-le⁴ jnco³ xi³ tsˀe⁴ cho⁴ˀnta³-ve⁴: Mi²yo⁴, a³li²jme³ xi³ chˀao³ ti²si³cao⁴-le²³. A³ tsi² tsa³cˀe²nta³cao⁴-nai¹³ nca³ jnco³ vi²xo⁴. 14Chjoai¹³ je² xi³ tsi⁴, cˀoa⁴ tˀin³, an³ me³-na³ tsjoa³-le⁴ je² xi³ fe³tˀa³-ni³ jo³-ni³ ji³. 15A³ tsi² tjin¹-na³ ˀnte³ nca³ cˀoa⁴-sˀin² sˀian³ jo³-sˀin² me³-na³ cao⁴ je² xi³ tsˀan⁴. A³ chˀao³ ntai³ cjoain³, nca⁴ an³ ña³qui³ nta³ ni⁴ma⁴-na⁴. 16Cˀoa⁴-sˀin² je² xi³ ma³ ti¹tjon² cjoe⁴tˀa³-ni³ coan⁴, cˀoa⁴ je² xi³ fe³tˀa³-ni³ ti¹tjon² coan⁴, Ncjin² xi³ qui³no²cjoa⁴-le⁴, to⁴nca³ choa³ xi³ ji³tjo³jin³.
Jesús va¹ya³con³-nca¹ni³ cjoa⁴vi³ya³-le⁴.
(Mr. 10:32-34; Lc. 18:31-34)
17Cˀia⁴ nca³ qui³mi³ Jesús ya⁴ Jerusalén, qui³cao⁴ tˀa³xin² xi³ te³jao² cho⁴ta⁴-le⁴, cˀoa⁴qui³tso²-le⁴ ya⁴ ntia⁴²: 18Coe⁴-ni³ ma³nquin¹mia³² ya⁴ Jerusalén. Cˀoa⁴ je² ˀnti¹-le⁴ cho⁴ta⁴ cˀoai⁴tˀa³-le⁴ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴ scribano, cˀoa⁴ cˀaon⁴ne²-le⁴ cjoa⁴vi³ya³. 19Cˀoa⁴ sca⁴ni²tˀa³-le⁴ cho⁴ta⁴ xi³ li² judío-jin², jme¹-ni³ nca³ cˀoa⁴-sˀin² coi⁴jno²que³-si¹ni³, cˀoa⁴ nca³ coa⁴²-le⁴, cˀoa⁴ nca³ coa⁴²tˀa³ cro², cˀoa⁴ xi³ ma³jan²-ni³ ni⁴čhjin³ si⁴cja³ˀa¹ya³-ni³le⁴.
Cjoa⁴ xi³ qui³si³je¹-le⁴ Jesús je² xti³-le⁴ Zebedeo.
(Mr. 10:35-45)
20Cˀia⁴ na⁴-le⁴ xti³-le⁴ Zebedeo ji³cho²con³-le⁴ Jesús, cao³ xti³-le⁴, tsa³ca³sen²xco¹nchˀin³tˀa³-le⁴ nca³ tjin¹ xi³ qui³si³je¹-le⁴. 21Cˀoa⁴ Jesús qui³tso²-le⁴: Jme¹ xi³ me³-li². Qui³tso²: Cˀoa⁴-si¹ nca³ ca²ta³tio² je² jao² xti³-na⁴, jnco³ xi³ nca³qui²xi⁴-li⁴, cˀoa⁴ nqui²jnco³ xi³ nca³scon¹-li⁴ ya⁴ cjoa⁴te¹xo³ma³-li⁴. 22Cˀia⁴ Jesús qui³nchja⁴-nca¹ni³: Li²coi³ ˀyao³ jme³ xi³ ni²jai¹³. A³ coan⁴²-no³ sˀio⁴yao³ je² cho⁴tsin¹ cjoa⁴ñˀain³-na⁴ xi³ an³ scˀoi⁴ya²³, cˀoa⁴ nca³ sa⁴te¹ntao¹³ tˀa³tsˀe⁴ cjoa⁴ñˀain³ jo³-sˀin² nca³ an³ sa³te¹nta¹. Je² xi³ jao²-ve⁴ qui³tso²-le⁴: Coan⁴-na³jin⁴. 23Jesús qui³tso²-le⁴: Xi³ cjoa⁴qui²xi⁴ sˀio⁴yao³ je² cho⁴-tsin¹ cjoa⁴ñˀain³-na⁴, cˀoa⁴ jo³-sˀin² nca³ an³ sa³te¹nta¹-nia³, cˀoa⁴-sˀin² sa⁴te¹ntao¹³ ja⁴tˀa³tsˀe⁴ cjoa⁴ñˀain³, to⁴nca³ xi³ coi⁴yo³tˀa³-nao¹³ nca³qui²xi⁴-na⁴ cˀoa⁴ nca³scon¹-na⁴, a³li² an³-jian²³ xi³ tsjoa³-le⁴, to⁴nca³ je² ˀnte³-ve⁴ cˀoai⁴-le⁴ je² xi³ Nˀai³-na⁴ tsa³cˀe¹nta³-le⁴. 24Cˀia⁴ nca³ je² xi³ te³-ve⁴ qui³nčhˀoe¹ je²-vi⁴, coan³jti³-le⁴ xi³ tˀa³tsˀe⁴ xi³ jao² ntsˀe⁴-ve⁴. 25Cˀia⁴ Jesús qui³nchja⁴-le⁴, cˀoa⁴qui³tso²: ˀya³-nio¹³ nca³ je² cho⁴ta⁴ti¹tjon²-le⁴ cho⁴ta⁴ xi³ li² judío-jin² si¹cˀe¹yo³nqui³ cho⁴ta⁴-le⁴ tˀa³tsˀe⁴ cjoa⁴te¹xo³ma³-le⁴, cˀoa⁴ je² xi³ nca³jco⁴-le⁴ nˀion¹ vˀe¹ne²-le⁴. 26To⁴nca³ jin³-le⁴ nca³ jon², li²coi³ cˀoa⁴coan⁴, to⁴sa³ to⁴ˀya³-ni³ve⁴ xi³ me³-le⁴ nca³ je³ya³ cˀoe¹yo³jin³-no³ nca³ jon², ca²ta³si¹xa¹-le⁴ xi³cˀa³. 27Cˀoa⁴ je² xi³ jin³-le⁴ nca³ jon², xi³ me³-le⁴ nca³ ti¹tjon² coan⁴, cho⁴ˀnta³-no³ nca³tsˀio³ ca²ta³ma³ nca³ je². 28Ti⁴cˀoa⁴-sˀin²ni³ je² ˀnti¹-le⁴ cho⁴ta⁴ li²coi³ ja³ˀai³ nca³ si⁴xa¹-le⁴, to⁴nca³ je² xi³ si⁴²xa¹, cˀoa⁴ tsjoa¹ ni⁴ma⁴-le⁴ nca³ cˀoe⁴²chji¹ntjai² ncjin² cho⁴ta⁴.
Jao² cho⁴ta⁴ xi³ xca⁴ cjio³ coan³tsen³-le⁴.
(Mr. 10:46-52; Lc. 18:35-43)
29Cˀia⁴ ji³tjo³-ni³ Jesús ya⁴ ˀnte³ Jericó, cho⁴ta⁴ncjin² qui³tjen⁴nqui³-le⁴. 30Coe⁴-ni³ jao² cho⁴ta⁴ xi³ xca⁴ cjio³ tjio¹ntai³ ntia⁴². Cˀia⁴ nca³ qui³nčhˀoe¹ nca³ Jesús ja³ˀa³to³-ve⁴ qui³squi³ˀntia¹tˀa³, qui³tso²: Señor, ji³ xi³ ˀnti¹-le⁴ David, jcha⁴ma⁴ta³con²-na³jin⁴. 31Je² cho⁴ta⁴ncjin²-ve⁴ qui³nchja⁴ti³cao⁴, jme¹-ni³ nca³ jyo¹ ca²ta³va³tio²-si¹ni³, to⁴nca³ je² nqui²sa⁴ nˀion¹ qui³nchja⁴: Señor, ji³ xi³ ˀnti¹-le⁴ David, jcha⁴ma⁴cha³-na³jin⁴. 32Cˀia⁴ Jesús tsa³ca³sen²jna³, qui³nchja⁴-le⁴, qui³tso²: Jme¹ xi³ me³-no³ nca³ si³cao⁴-no³. 33Je² xi³ xca⁴ cjio³ qui³tso²-le⁴: Señor, ca²ta³tjo³ˀai²nqui³ xcoin³⁴-jin⁴. 34Cˀia⁴ Jesús coan³ma⁴que³ qui³si³cao⁴ xcon⁴. Coan³tsen³ nti⁴ton⁴-le⁴, cˀoa⁴ qui³tjen⁴nqui³-le⁴.
Поточний вибір:
San Mateo 20: mauDBL
Позначайте
Поділитись
Копіювати
Хочете, щоб ваші позначення зберігалися на всіх ваших пристроях? Зареєструйтеся або увійдіть
© 1960, Wycliffe Bible Translators, Inc. All rights reserved.